عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
بەرێ خۆ بدەنە عیسای و د خۆڕاگر بن 
1
لەوما، مادەم ئەم ب جەماوەرەكێ هۆسا مەزن[a] یێ شاهدان د دەور داینە، دا هەر بارەكی و گونەهێن ب ساناهی د مە دئالیێن، بهاڤێژین و د وێ غاردانێ دا یا ل بەر مە هاتیە دانان، ب خۆڕاگری بكەینە غار.
2
بەرێ مە ل عیسای بیت، داهێنەر و تەمامكەرێ باوەریا مە، ئەوێ ژ پێخەمەت دلشادیا ل بەر وی هاتیە دانان، خۆ ل بەر خاچێ گرتی و شەرمزاریا وێ ب پشت گوهـ ڤە هاڤێتی، ئەڤجا ل رەخێ راستێ یێ تەختێ خودێ روینشتی.
3
هزرێ د وی دا بكەن یێ خۆ ل بەر ڤێ هەمی دژایەتیا گونەهكاران گرتی، داكو هوین نەوەستیێن و دلسار نەبن.
4
د خەباتا دژی گونەهێ دا، هێشتا هەوە تا خوینێ بەرخۆدان نەكریە.
5
هەوە ئەو هاندان ژ بیر كریە یا هەوە رادسپێریت، كو هەوە ب ‹كوڕ› ب ناڤ دكەت:
«كوڕێ من، سڤكاتیێ ب تەمبیكرنا خودانی نەكە،
6
چنكو ئەوێ خودان حەز ژێ دكەت، تەمبی دكەت،
هەر ئێكێ خودان وی وەكو كوڕێ خۆ قەبیل دكەت، قامچی ددەت.»[b]
7
ئەڤجا خۆ ل بەر تەمبیكرنێ بگرن، خودێ وەكو كوڕێن خۆ سەرەدەریێ ل گەل هەوە دكەت. ما كیژان كوڕە بابێ وی، وی تەمبی ناكەت؟
8
لێ ئەگەر هوین ژ وێ تەمبیكرنێ د بێبەهر بن، ئەوا هەمی كوڕ تێدا پشكدار دبن، هنگی هوین بیژینە، نە كوڕێن وینە.
9
زێدەباری ڤێ چەندێ، مە بابێن لەشكانی هەنە، ئەم تەمبی دكرین و مە رێز ل وان دگرت. ما ئەم هێشتا گەلەك پتر ملكەچی بابێ خۆ یێ روحانی نابین، داكو بژین؟
10
ئەوان بۆ دەمەكێ كورت، ل دویڤ یا وان دیتی كو باشە، ئەم تەمبی كرین، لێ خودێ بۆ مفایێ مە ب تەمبیكرنا مە رادبیت، دا ئەم پیرۆز ببین، هەروەكو ئەو یێ پیرۆزە.
11
هەر تەمبیكرنەك دەمێ دهێتە كرن یا خۆش نینە، لێ یا ب ژانە. سەرەڕای وێ چەندێ ل دویماهیێ بەرهەمێ ئاشتیانە كو راستداریە، ددەتە وان كەسان یێن پێ هاتینە مەشقدان.
12
ئەڤجا دەستێن خۆ یێن سستبووی و چۆكێن خۆ یێن خاڤبووی پەیت بكەن،
13
بۆ پێیێن خۆ رێكێن راست چێكەن، داكو پارچەیا لەنگ ژ جهـ نەچیت، لێ ساخ ببیت.
ئاگەهداركرن ژ رەتكرنا كەرەما خودێ 
14
بۆ ئاشتیێ ل گەل هەمی كەسان بزاڤێ بكەن، هەروەسا بۆ پیرۆزیێ، ئەوا بێی وێ كەس خودانی نابینیت.
15
هەوە های ژێ هەبیت نەكو كەسەك ب كەرەما خودێ را نەگەهیت و رەهەكا تەحل د ناخێ هەوە دا وەرارێ نەكەت، كو ببیتە ئەگەرێ ئارێشەیێ و ب رێكا وێ رەهێ گەلەك كەس بهەڕمن،
16
نەكو ئێك ببیتە كەسەكێ دەهمەنپیس یان رێزێ ل پیرۆزیێ ناگریت وەكو عیسۆی، ئەوێ ژ پێخەمەت خوارنەكا ب تنێ نەخریبوونا خۆ فرۆتی.
17
هوین دزانن پشتی هنگی، دەمێ وی ڤیای ببیتە میراتگرێ بەرەكەتێ، ئەو هاتە رەتكرن، چنكو دەلیڤە بۆ لخۆزڤڕینێ نەدیت، هەر چەندە وی ب رۆندكان داخواز كر.
18
هوین نەهاتنە نك چیایەكی[c] كو هوین دشێن دەست بكەنێ، ئاگرەكێ ب گوڕی، تاریاتیێ، مژ و موورانێ، باڕۆڤەیێ،
19
دەنگێ بۆڕیزانێ[d] و دەنگێ ئێكێ دئاخڤیت كو یێن ئەو بهیستی، هیڤی كرین ئێدی ئاخفتنەكا دی بۆ وان نەهێتە گۆتن.
20
چنكو ئەو نەشیان خۆ ل بەر وی تشتی بگرن یێ فەرمان پێ هاتی: «خۆ ئەگەر گیانەوەرەك ژی دەستێ خۆ بكەتە چیای، دڤێت بهێتە بەربارانكرن.»[e]
21
ئەو دیمەن هند یێ ب ترس بوو، تاكو مووسای گۆت: «ئەز یێ بەهتیمە و دلەرزم.»[f]
22
لێ هوین هاتنە نك چیایێ سییۆنێ، باژێڕێ خودایێ زیندی، ئورشەلیما ئەسمانی، نك ئاهەنگەكێ كو فریشتەیێن بێ هژمار خڕڤەكرین،
23
نك جڤاكا نەخریێن تۆماركری د ئەسمانان دا، نك خودێ، دادوەرێ هەمیان، نك گیانێ راستدارێن هاتینە كاملكرن،
24
نك عیسای، ناڤبەینكارێ پەیمانا نوی و نك خوینا رەشاندی[g] كو تشتەكێ باشتر ژ گۆتنا خوینا هابیلی[h] دبێژیت.
25
هشیار بن ئەوێ دئاخڤیت رەت نەكەن. چنكو مادەم ئەو قورتال نەبوون یێن ئەو رەتكری[i] یێ كو ئاگەهداری ل سەر ئەردی داینە وان، ئەڤجا چەند مسۆگەرترە كو ئەم رزگار نابین، ئەگەر ئەم پشتا خۆ بدەینە وی یێ ژ ئەسمانی مە ئاگەهدار دكەت؟
26
هنگی دەنگێ وی ئەرد هەژاند، لێ نوكە سۆز یا دای و دبێژیت: «جارا بهێت ئەز دێ ب ئێكجاری، نە ب تنێ ئەردی، لێ ئەسمانی ژی هەژینم.»[j]
27
گۆتنا «جارا بهێت ب ئێكجاری» دیار دكەت كو تشتێن دهێنە هەژاندن، ئانكو تشتێن چێكری، ژ ناڤ دچن، دا ب تنێ ئەو بمینن یێن ناهێنە هەژاندن.
28
لەوما، ژ بەر كو ئەم پاشایەتیەكا ناهێتە هەژاندن وەردگرین، بلا ئەم سوپاسیا خودێ بكەین و وەسا وی بپەرێسین، ب شێوازەكی كو جهێ رەزامەندیا وی بیت، ئەو شێواز یێ ب خودێترسی و سەهمگرتن بیت.
29
چنكو «خودایێ مە ئاگرەكێ خۆرەكە.»[k]
  1. a. 12‏:1 دەق و دەق: ‹عەورەكێ هۆسا مەزن›.
  2. b. 12‏:6 پەند 3‏:11‏-12
  3. c. 12‏:18 مەبەست پێ چیایێ سینایە. بنێڕە دەركەفتن 19‏:16‏-19
  4. d. 12‏:19 q بۆڕیزان: ب عەرەبی دبێژنێ ‹بوق›.
  5. e. 12‏:20 دەركەفتن 19‏:12‏-13
  6. f. 12‏:21 گۆتارا مووسای 9‏:19
  7. g. 12‏:24 q خوینا رەشاندی: خوینا مەسیحیە ئەوا هاتیە رشتن و ب وێ رشتنێ پەیمانا نوی كەفتە كاری. رشتنا خوینا وی وەكو رەشاندنا وێ خوینێیە ئەوا مووسای ئەنجامدای، كو ب وێ رەشاندنێ پەیمانا كەڤن كەفتە كاری. بنێڕە دەركەفتن 24‏:3‏-8؛ مەتتا 26‏:26‏-29
  8. h. 12‏:24 بنێڕە دەستپێكرن 4‏:10؛ عیبرانی 11‏:4
  9. i. 12‏:25 q یێن ئەو رەتكری: ئانكو یێن مووسا رەتكری.
  10. j. 12‏:26 حەگەی 2‏:6
  11. k. 12‏:29 گۆتارا مووسای 4‏:24