عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- پێشكێشیا بیژنێ
- 1
- بەرێ خۆ دایێ و دیتن، دەولەمەند یێ پێشكێشی یێن خۆ دهاڤێژنە د پارەدانكا پەرستگەهێ دا
- 2
- و چاڤێ وی ب بیژنەكا هەژار كەفت یا دوو فلسان دهاڤێژیتە د پارەدانكێ دا.
- 3
- ئینا گۆت: «ئەز راستیێ دبێژمە هەوە ڤێ بیژنا هەژار ژ هەمیان پتر هاڤێتن،
- 4
- چنكو ڤان هەمیان ژ زێدەهیا خۆ هاڤێتن، لێ وێ ژ بەلەنگازیا خۆ هەمی مالێ هەیی كو پێ بژیت، هاڤێتن.»
- پێشبینیكرن ل دور وێرانبوونا پەرستگەهێ
- 5
- دەمێ هندەكان بەحسێ پەرستگەهێ دكر كو ب بەرێن جوان و پێشكێشیان هاتییە خەملاندن، عیسای گۆت:
- 6
- «ئەڤ تشتێن هوین دبینن، رۆژ دێ هێن كو بەر ل سەر بەری نامینیت؛ هەمی دێ هێنە هەرفاندن.»
- نیشانێن دوماهیا سەردەمی
- 7
- ئینا پرسیار ژێ كرن و گۆتن: «مامۆستا، كەنگی دێ ئەڤە چێبیت؟ و دێ چ نیشان هەبیت، دەمێ كو دێ ئەڤە رویدەت؟»
- 8
- عیسای گۆت: «هشیار بن نەهێنە خاپاندن، چنكو دێ گەلەك ب ناڤێ من هێن و دێ بێژن ”ئەز ئەوم“ و ”ئەو دەم نێزیك بوو.“ هوین ل دویڤ وان نەچن.
- 9
- دەمێ هەوە گوهـ ل جەنگ و نەخۆشیان دبیت، نەترسن، چنكو دڤێت ل پێشیێ ئەڤ تشتێن هەنێ پەیدا ببن. لێ دوماهی ئێكسەر ناهێت.»
- 10
- و پاشی گۆتە وان: «دێ مللەتەك دژی مللەتەكی و پاشاتیەك دژی یا دی رابیت
- 11
- و دێ د گەلەك جهان دا بیڤەلەرزێن مەزن و برس و نەخۆشی پەیدا بن، و دێ رویدانێن ب ترس و نیشانێن مەزن ژ ئەسمانی دیاربن.
- 12
- لێ بەری ڤێ هەمیێ، مرۆڤ دێ پێخەمەت ناڤێ من هەوە گرن و تەپەسەر كەن، و دێ هەوە دەنە دەستێ كنیشتان و هاڤێنە د زیندانان دا، و هوین دێ بۆ پاشا و حوكمرانان هێنە راكێشان.
- 13
- ئەڤ رویدانە دێ چێبن داكو هوین بۆ من شاهدەیێ بكەن.
- 14
- ئەڤجا خەما هندێ نەخون و هزر نەكەن كا چەوا دێ بەرەڤانیێ ژ خۆ كەن،
- 15
- چنكو ئەز دێ دەڤەكی و داناییەكێ دەمە هەوە، هەمی بەرهنگارێن هەوە نەشێن خۆ ل بەر بگرن یان بەرسڤا وێ بدەن.
- 16
- خۆ دایك و باب و برا و مرۆڤ و هەڤالێن هەوە ژی دێ بێ بەختیێ ل هەوە كەن و دێ هندەكا ژ هەوە كوژن.
- 17
- و پێخەمەت ناڤێ من، هەمی كەس دێ كەربێ ژ هەوە راكەن
- 18
- لێ مویەك ژی ژ سەرێ هەوە ژناڤ ناچیت،
- 19
- هوین ب خۆراگرتنا خۆ دێ ژیانا خۆ ب دەست ڤە ئینن.
- 20
- دەمێ هوین ئورشەلیمێ دبینن ب لەشكەری یا دورپێچ كرییە، هوین هنگی بزانن وێرانكرنا وێ نێزیك بوو.
- 21
- هنگی ئەوێن ل دەڤەرا یەهودیایێ بلا برەڤن و بچنە چیای، و هەركەسێ ل باژێری بلا ژێ دەربكەڤیت، و ئەوێن ل گوندان بلا نەچنە باژێری،
- 22
- چنكو ئەڤ رۆژێن هەنێ یێن تولڤەكرنێنە، دا هەمی تشتێن هاتینە نڤیسین ب جهـ بهێن،
- 23
- لێ ل وان رۆژان نەخوزیكێن ژنێن ب دووگیان و شیردەر. چنكو تەنگاڤیەكا گران دێ كەڤیتە سەر ئەردی، و توڕەبوونەكا مەزن دێ ب سەر ڤی مللەتی دا هێت.
- 24
- و دێ كەڤنە بەر دەڤێ شیری، و بۆ هەمی مللەتان ب ئێخسیری دێ هێنە برن، و ئورشەلیم دێ ژ لایێ مللەتان ڤە هێتە پێشێل كرن، تاكو دەمێن مللەتان ب دوماهیك دهێت.
- 25
- دێ نیشان ل هەیڤ و رۆژ و ستێران پەیدا بن، و ل ئەردی ژ بەر دەنگێ هورمە هورما پێلێن دەریایێ، مللەت دێ بزدن و شاش بن
- 26
- و دێ مرۆڤ دلگرتی بن، ژ بەر ترس و چاڤەرێكرنا كا دێ چ ب سەر جیهانێ دا هێت، چنكو هێزێن ئەسمانان دهێنە هەژاندن.
- 27
- هنگی دێ كوڕێ مرۆڤ بینن یێ ل سەر عەورەكێ ب هێز و ب مەزناهی دهێت
- 28
- و دەمێ ئەڤە دەست پێ دكەن، راست راوەستن و سەرێن خۆ راكەن، چنكو رزگاركرنا هەوە نێزیك دبیت.»
- 29
- و نموونەیەك بۆ وان ئینا: «بەرێ خۆ بدەنە هژیرێ و دارێن دی.
- 30
- دەمێ هوین دبینن دبشكڤیت، هوین ب خۆ دێ زانن كو هاڤین نێزیك بوو.
- 31
- ئەها هوسا هوین ژی، دەمێ دبینن ئەڤ تشتە چێدبن، بزانن كو پاشاتیا خودێ یا نێزیكە.
- 32
- راستیێ دبێژمە هەوە، ئەڤ نفشە نابوریت تا ئەڤ تشتە هەمی چێنەبن.
- 33
- ئەرد و ئەسمان دێ ژ ناڤ چن، لێ پەیڤێن من ژ ناڤ ناچن .
- هشیار بمینن و نڤێژان بكەن
- 34
- هشیار بن، نەكو دلێن هەوە ب مەی ڤەخوارنێ و سەرخۆشیێ و خەمێن ڤێ ژیانێ گران ببن، و ئەو رۆژە ژ نشكەكێ ڤە ب سەر هەوە دا بهێت
- 35
- چنكو دێ وەكو تەلهەكێ هەمی ئاكنجیێن سەر رویێ ئەردی گریت.
- 36
- ئەڤجا هشیار بمینن و ل هەمی دەمان نڤێژان بكەن، داكو هوین بشێن خۆ ژ ڤان هەمی تشتێن كو نێزیكە دێ رویدەن قورتال بكەن و ل بەر كوڕێ مرۆڤ راوەستن.»
- 37
- ئەوی ب رۆژ د پەرستگەهێ دا فێركرن دكر، و ب شەڤێ دەردكەفت و ل چیایێ دبێژنێ چیایێ زەیتونان شەڤێن خۆ دبوراندن.
- 38
- خەلك هەمی سپێدێ زوی رادبوون و دهاتنە پەرستگەهێ دا گوهێ خۆ بدەنێ.
