عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- «یوحەننایێ تافیركەر»
- 1
- ل سالا پازدێ ژ حوكمرانیا تیبەریوسێ قەیسەر، دەمێ پیلاتوسێ بونتی حوكمرانێ دەڤەرا یەهودیایێ، و هێرودێس دەستهەلاتدارێ جەلیل و برایێ وی فیلیپوس دەستهەلاتدارێ ئیتوریایێ و هەرێما تراخونیتسێ و لیسانیوس دەستهەلاتدارێ ئەبیلینێ،
- 2
- و ل دەمێ حەنان و قیافای سەرۆكاتیا كاهنان دكر، هنگی پەیڤا خودێ بۆ یوحەننایێ كوڕێ زەكەریای ل چۆلی هات.
- 3
- یوحەننا چوو ل سەرانسەری رویبارێ ئوردن رادگەهاند، كو خەلك بهێنە تافیركرن و ل خۆ بزڤڕن، داكو ل گونەهێن وان بهێتە بورین.
- 4
- هەروەكو د پەرتوكا ئەشعیا پێغەمبەری دا هاتییە نڤیسین «دەنگێ گازیكەرەكی ل چۆلی دهێت: ”رێیا خودانی ئامادە بكەن و رێكێن وی راست بكەن،
- 5
- هەر نهالەك دێ هێتە داگرتن، و هەر چیایەك و گرەك دێ هێتە نزمكرن و ئەو ریێن خواروڤیچ دێ هێنە راستكرن و یێن سەخت و دژوار دێ هێنە دروستكرن.
- 6
- هەر كەسەك دێ قورتالبوونا خودێ بینیت.“»
- 7
- یوحەننای دگۆتە ئەوان كەسان ئەوێن لێ خڕڤەبووین دا ل سەر دەستێ وی بهێنە تافیركرن: «هەی زارۆكێن ماران، كێ هوین ئاگەهدار كرینە ژ توڕەبوونا بهێت برەڤن؟
- 8
- بەرهەمەكێ وەسا بدەن، كو هەژی ل خۆ زڤرینێ بیت، و د دلێ خۆ دا نەبێژن ”مە بابەکێ هەی، ئیبراهیمە.“ چنكو ئەز دبێژمە هەوە: خودێ دشێت زارۆكان بۆ ئیبراهیمی ژ ڤان بەران دەربئێخیت.
- 9
- ئەها ئەڤە دەڤێ بڤری ل سەر قورمێ داران یێ هاتییە دانان، و هەر دارەكا بەرهەمێ وێ یێ باش نەبیت دێ هێتە بڕین و بۆ ناڤ ئاگری هێتە هاڤێتن.»
- 10
- كومبوویان پرسیار ژێ كر: «پا ئەم چ بكەین؟»
- 11
- یوحەننای بەرسڤا وان دا: «یێ دوو كراس هەبن، بلا ئێكی بدەتە یێ بێ كراس، و یێ خوارن هەبیت بلا هەر وی تشتی بكەت.»
- 12
- هندەك باجگر ژی هاتن داكو بهێنە تافیركرن و پرسیار ژێ كر: «مامۆستا، ئەم چ بكەین؟»
- 13
- یوحەننای گۆتە وان: «پتر ژ وێ یا بۆ هەوە هاتییە دەست نیشانكرن وەرنەگرن.»
- 14
- هندەك سەربازان ژی پرسیار ژێ كر «پا ئەم چ بكەین؟» یوحەننای بەرسڤا وان دا: «زۆرداریێ ل كەسێ نەكەن، بێبەختیێ ل كەسێ نەكەن و ب مووچێ خۆ رازی بن.»
- 15
- هندی مللەت بوو چاڤێ وان ل مەسیحی بوو و هەمیان دەربارەی یوحەننای پرسیار ژ خۆ دكر: «ئەرێ ئەو ب خۆ مەسیحە؟»
- 16
- یوحەننای بەرسڤا وان هەمیان دا: «ئەز ب ئاڤێ هەوە تافیردكەم، لێ پشتی من دێ ئێكێ ژ من ب هێزتر هێت، ئەوێ ئەز هەژی هندێ نینم بچەمیێم و بەنكێ پێلاڤا وی ڤەكەم. ئەو دێ هەوە ب گیانێ پیرۆز و ئاگری تافیركەت.
- 17
- ئەوێ ملهێبا وی د دەستێ دا، داكو بێدەرا خۆ ب ئێكجاری پاقژ بكەت. گەنمی دێ ل كوارا خۆ خڕڤە كەت، لێ كایێ دێ ب ئاگرەكێ چ جاران نەڤەمریت، سوژیت.»
- 18
- یوحەننای بۆ گەلەك تشتێن دی ئاگەهداریا خەلكی دكر، و مزگینی ددا وان.
- 19
- لێ هێرودێسێ دەستهەلاتدار، ئەوێ یوحەننای پاشڤە بری، ژ بەر ژنبرا وی هیرودیایێ و ژ بەر هەمی خرابیێن وی كرین،
- 20
- زێدەباری ئەوان هەمیان ئەو رابوو یوحەننا كرە د زیندانێ دا.
- تافیركرنا عیسای
- 21
- دەمێ هەمی خەلك هاتینە تافیركرن، عیسا ژی هاتە تافیركرن و دەمێ عیسای نڤێژ دكر، ئەسمان ڤەبوو.
- 22
- و گیانێ پیرۆز وەكو كوترەكێ دادا سەر سەرێ وی، و دەنگ ژ ئەسمانان هات و گۆت: «تویی كوڕێ من یێ خۆشتڤی، ئەز ب تە گەلەك شادم.»
- بنیاتێ عیسای
- 23
- دەمێ عیسای دەست پێ كری، ژیێ وی نێزیكی سیهـ سالان بوو و ل نك خەلكی ئەو بوو، كو عیسا كوڕێ یوسڤێ كوڕێ هالیێ
- 24
- كوڕێ متساتێ كوڕێ لاویێ كوڕێ مەلكیێ كوڕێ یەننایێ كوڕێ یوسڤی،
- 25
- كوڕێ مەتسیایێ كوڕێ عاموسێ كوڕێ ناحومێ كوڕێ حەسلیێ كوڕێ نەجای،
- 26
- كوڕێ مەئاسێ كوڕێ مەتسیایێ كوڕێ شیمعیێ كوڕێ یوسێخێ كوڕێ یۆدای،
- 27
- كوڕێ یوحەننایێ كوڕێ ریسایێ كوڕێ زەروبابەلێ كوڕێ شەئەلتئیلێ كوڕێ نەری،
- 28
- كوڕێ مەلكیێ كوڕێ ئەددەیێ كوڕێ قوسەمێ كوڕێ ئەلمودامێ كوڕێ عیری،
- 29
- كوڕێ یەشوعێ كوڕێ ئەلیعازەرێ كوڕێ یوریمێ كوڕێ مەتساتێ كوڕێ لاوی،
- 30
- كوڕێ شەمعونێ كوڕێ یەهودایێ كوڕێ یوسڤێ كوڕێ یونامێ كوڕێ ئەلیاقیمی،
- 31
- كوڕێ مەلەیایێ كوڕێ مەینانێ كوڕێ مەتتاسایێ كوڕێ ناسانێ كوڕێ داوودی،
- 32
- كوڕێ یەسسایێ كوڕێ عوبیدێ كوڕێ بوعەزێ كوڕێ سەلمونێ كوڕێ نەحشونی،
- 33
- كوڕێ عەمینادابێ كوڕێ ئادمینێ كوڕێ ئارامێ كوڕێ حەسرونێ كوڕێ فارسێ كوڕێ یەهودای،
- 34
- كوڕێ یەعقوبێ كوڕێ ئیسحاقێ كوڕێ ئیبراهیمێ كوڕێ تارەحێ كوڕێ ناحوری،
- 35
- كوڕێ سەروجێ كوڕێ رەعویێ كوڕێ فالەجێ كوڕێ عەبەرێ كوڕێ شالەحی،
- 36
- كوڕێ قینانێ كوڕێ ئەرفەكشادێ كوڕێ سامێ كوڕێ نوحێ كوڕێ لامەكی،
- 37
- كوڕێ مەتوشالەحێ كوڕێ ئەخنوخێ كوڕێ یارەدێ كوڕێ مەهلەلئیلێ كوڕێ قینانی،
- 38
- كوڕێ ئەنوشێ كوڕێ شیتێ كوڕێ ئادەمێ كوڕێ خودێ یە.
