عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- دان وستاندن دەربارەی شەمبیێ
- 1
- رۆژەكا شەمبی، عیسا و شاگردێن خۆ د ناڤ زەڤیان را بورین و شاگردێن وی گولیێن گەنمی ب دەستان دپەرخاندن و دخوارن.
- 2
- لێ هندەك فەریسیان گۆتە وان: «بۆچی هوین وی كاری دكەن، یێ نابیت د رۆژا شەمبی دا بهێتە كرن؟»
- 3
- ئینا عیسای بەرسڤا وان دا: «ئەرێ ما هەوە نە خواندییە، داوودی چ كر دەمێ ئەو و هەڤالێن وی برسی بووین؟
- 4
- چەوا چوو د مالا خودێ ڤە و نانێن پێشكێشیێ راكرن و خوارن و دانە هەڤالێن خۆ ژی، هەر چەندە ژبلی كاهنان نابیت كەس ژێ بخوت؟»
- 5
- و پاشی گۆتە وان: «كوڕێ مرۆڤ خودانێ شەمبیێیە.»
- عیسا مرۆڤەكێ دەست چرمسی ساخ دكەت
- 6
- رۆژەكا دی ژ رۆژێن شەمبیێ عیسا چوو كنیشتێ و دەست ب فێركرنێ كر، زەلامەك ل وێرێ بوو دەستێ وی یێ راستێ یێ چرمسی بوو.
- 7
- هنگی چاڤێ مامۆستایێن دەستوری و فەریسیان ل عیسای بوو، كا دێ ل شەمبیێ نەساخان ساخ كەت، داكو تشتەكی ببینن عیسای پێ تاوانبار بكەن.
- 8
- لێ وی زانی چ د دلێ وان دایە، ئينا گۆتە زەلامێ دەستێ وی چرمسی «رابە و ل ناڤەندێ راوەستە.» ئەو رابوو و راوەستیا.
- 9
- عیسای گۆتە وان: «ئەز دێ پرسیارەكێ ژ هەوە كەم: چ دروستە مرۆڤ رۆژا شەمبیێ بكەت، كارێ باش یان یێ خراب؟ رزگاركرنا ژیانێ یان ژناڤبرنا وێ؟»
- 10
- پشتی باش بەرێ خۆ دایە هەمیان، گۆتە نەساخی: «دەستێ خۆ درێژ كە.» نەساخی دەستێ خۆ راست كر، و دەستێ وی ساخ بوو ڤە.
- 11
- لێ ئەو ژ توڕەیێ پڕ بوون و پرسیار ژ ئێكودوو كرن، كا چ ل عیسای بكەن.
- هەر دوازدە هنارتی
- 12
- د وان رۆژان دا عیسا چوو چیای داكو نڤێژان بكەت، و ئەو شەڤ هەمی ب نڤێژان ڤە بۆ خودێ بوراند
- 13
- و دەمێ رۆژ هەلاتی گازی شاگردێن خۆ كر و دوازدە كەس ژ وان هەلبژارتن و ناڤێ «هنارتی» دانا سەر وان و ئەو دوازدە كەس ژی ئەڤە بوون:
- 14
- شەمعون ئەوێ عیسای ناڤێ وی كرییە پەتروس، ئەندراوسێ برایێ وی، یەعقوب، یوحەننا، فیلیپوس، بەرتولەماوس،
- 15
- مەتتا، توما، یەعقوبێ كوڕێ حەلفی، شەمعونێ دگۆتنێ وەلاتپەروەر،
- 16
- یەهودایێ كوڕێ یەعقوبی و یەهودایێ ئەسخەریوتی، ئەوێ پشتی هنگی بێبەختی ل عیسای كری.
- 17
- پشتی عیسا دگەل وان هاتییە خوارێ، ل ئەردەكێ دەشت راوەستیا. ل وێرێ جەماوەرەكێ مەزن ژ شاگردان و خەلكەكێ گەلەك زۆر ژ هەمی دەڤەرا یەهودیایێ، ئورشەلیمێ و كنارێ سور و سایدا، لێ كوم بوون.
- 18
- ئەو هاتبوون دا گوهێ خۆ بدەنە عیسای و ژ ئێشێن خۆ ساخ ببن. و ئەوێن ژ لایێ گیانێن پیس ژی ڤە دهاتنە ئێشاندن، ساخ دبوون.
- 19
- و خەلكێ هەمیان بزاڤ دكر دەستێ خۆ لێ بدەن، چنكو هێزەك ژ وی دەردكەفت و هەمی ساخ دكرن.
- 20
- بەرێ خۆ دا شاگردێن خۆ و گۆت: «خوزیكێن هەوە گەلی بەلەنگازان، چنكو پاشاتیا خودێ بۆ هەوەیە،
- 21
- خوزیكێن هەوە ئەی برسیێن نوكە، چنكو هوین دێ تێر بن، خوزیكێن هەوە ئەوێن هوین نوكە دگرین، چنكو هوین دێ كەنن.
- 22
- خوزیكێن هەوە دەمێ خەلك پێخەمەت كوڕێ مرۆڤ كەربێ ژ هەوە رادكەن و هەوە ژ ناڤ خۆ دەردێخن و جڤینان ل هەوە دكەن و ناڤێ هەوە ب خرابی دئینن.
- 23
- ل وێ رۆژێ دلشاد بن و تلیلیان ڤەدەن، چنكو خەلاتێ هەوە ل ئەسمانی یێ مەزنە. بابكالێن وان هۆسا رەفتار دگەل پێغەمبەران دكر.
- 24
- لێ نەخوزیكێن هەوە گەلی دەولەمەندان، چنكو هەوە خۆشیا خۆ وەرگرت.
- 25
- نەخۆزیكێن هەوە گەلی تێربوویێن ئەڤرۆ، چنكو هوین دێ برسی بن، نەخۆزیكێن هەوە ئەوێن هوین ئەڤرۆ دكەنن، چنكو هوین دێ كەڤنە شینی و گرینێ.
- 26
- نەخۆزیكێن هەوە دەمێ هەمی مرۆڤ بەحسێ هەوە ب باشی دكەن، چنكو بابكالێن وان هوسا رەفتار دگەل پێغەمبەرێن درەوین دكر.
- حەژ دوژمنێن خۆ بكەن
- 27
- لێ دبێژمە هەوە گەلی گوهداران: حەژ دوژمنێ خۆ بكەن و چاكیێ بكەن دگەل ئەوێن كەربێ ژ هەوە رادكەن.
- 28
- ئەوێن نەفرەتا ل هەوە دكەن پیرۆز بكەن، و ئەوێن نەباشی دگەل هەوە كری نڤێژان بۆ بكەن.
- 29
- ئەگەر ئێكی زللەهەك دانا رویێ تە، رویێ خۆ یێ دی ژی بدە بەر و ئەگەر ئێكی قوتكێ تە ژ تە ستاند، كراسێ خۆ ژی ژێ نەڤەگێڕە.
- 30
- هەر كەسێ ژ تە بخوازیت بدێ، و هەركەسێ تشتێن تە ژ تە بستینیت، داخوازیا وان ژێ نەكە.
- 31
- كا چەوا هەوە دڤێت مرۆڤ رەفتارێ دگەل هەوە بكەن، هوین ژی وەسا رەفتارێ دگەل بكەن.
- 32
- ئەگەر هەوە ب تنێ حەژ وان كر یێن حەژ هەوە دكەن، ئەرێ پا باشیا هەوە چییە؟ خۆ مرۆڤێن گونەهكار ژی حەژ وان كەسان دكەن، ئەوێن حەژ وان دكەن.
- 33
- ئەگەر هوین دگەل وان باش بن ئەوێن دگەل هەوە باش، ئەرێ پا باشیا هەوە چییە؟ خۆ مرۆڤێن گونەهكار ژی ڤێ چەندێ دكەن.
- 34
- ئەگەر هەوە قەر دگەل وان كەسان كر یێن هوین بزانن دێ قەرێ هەوە ل هەوە زڤرینن، ئەرێ پا باشیا هەوە چییە؟ خۆ مرۆڤێن گونەهكار ژی دگەل گونەهكاران ڤێ چەندێ دكەن.
- 35
- لێ حەژ دوژمنێن خۆ بكەن و چاكیێ بكەن و قەری بدەن بێی كو چاڤەرێی ڤەگەڕیانێ بن، ب ڤی رەنگی خەلاتێ هەوە دێ یێ مەزن بیت، و دێ بنە كوڕێن خودێ یێ بلند. چنكو ئەو چاكیا خۆ ب سەر مرۆڤێن نەسوپاسدار و خراب دا دادرێژیت.
- 36
- دلوڤان بن هەر وەكو بابێ هەوە یێ دلوڤانە.
- مرۆڤێن دی دادنەكەن
- 37
- دادكرنێ نەكەن، هوین ناهێنە دادكرن، سزاكاریێ نەكەن، هوین ناهێنە سزاكرن، و لێبورینێ بكەن، دێ ل هەوە ژی هێتە بورین.
- 38
- بدەن، دێ بۆ هەوە هێتە دان، پیڤانەكێ باش و قوتای و حەشاندی و د سەردا چووی دێ هێتە د كوشا هەوە دا. چنكو دێ بۆ هەوە ب وی ئامانی و بەری هێتە پیڤان یێ كو هەوە پێ پیڤای.»
- 39
- بۆ وان نموونەیەك ژی گۆت: «ما كۆرە دشێت كۆرەی ب رێ ببەت؟ ئەرێ ما هەردوو ناكەڤنە د چالەكێ دا؟
- 40
- شاگردە نە د سەر مامۆستایێ خۆ را یە. لێ ئەوێ باش پێ بگەهیت ، دێ وەكو مامۆستایێ خۆ لێ هێت.
- 41
- و ئەها تۆ زلكی د چاڤێ برایێ خۆ دا دبینی، لێ تۆ گاریتەی د چاڤێ خۆ دا نابینی؟
- 42
- یان تۆ چەوا دشێی بێژیە برایێ خۆ: ”برا، بهێلە ئەز وی زلی ژ چاڤێ تە بینمە دەرێ“ و تۆ وی داری د چاڤێ خۆ دا نابینی؟ ئەی دووڕوی، دێ تۆ داری ژ چاڤێ خۆ بینە دەرێ، هنگی تۆ دێ باش بینی داكو تۆ زلی ژ چاڤێ برایێ خۆ بینییە دەرێ.
- هەر دارەك ژ بەرهەمێ وێ دهێتە نیاسین
- 43
- چ دارا باش نینە بەرهەمەكێ نەباش بدەت، و چ دارا نەباش نینە بەرهەمەكێ باش بدەت.
- 44
- چنكو هەر دارەك ژ بەرهەمێ وێ دهێتە نیاسین، و هژیر ژ ستریان ناهێنە چنین و تری ژ دڕیا ناهێتە چنین.
- 45
- مرۆڤێ باش ژ گەنجینا دلێ خۆ یا باش، باشیێ دەردئێخیت، لێ مرۆڤێ خراب ژ گەنجینا دلێ خۆ یا خراب، خرابیێ دەردئێخیت، چنكو دەڤ وێ دبێژیت ئەوا ب سەر دلی دا درژیت.»
- هۆستایێ دانا و هۆستایێ دەبەنگ
- 46
- ئەها هوین دبێژنە من: ”خودان، خودان!“ و هوین ب گۆتنێن من ناكەن؟
- 47
- هەركەسێ بهێتە نك من و گوهێ خۆ بدەتە گۆتنێن من و پێ بكەت، ئەز دێ دیاركەم كا وەكو چییە:
- 48
- وەكو وی مرۆڤییە ئەوێ خانیەكێ ئاڤا بكەت. بناغێ خۆ باش و كویر بكولیت و دیوارێ خۆ دانیتە سەر كەڤری، و پاشی بارانەكا زۆر هات و لەهیێن وێ ل وی خانی دان و نەشیا بلڤینیت، چنكو ل سەر كەڤری ئاڤا كربوو
- 49
- لێ هەركەسێ گوهـ لێ بووی و پێ نەكەت، وەكو وی مرۆڤێ، خانیەكی بێ بناغە ل سەر ئەردی ئاڤاكری و دەمێ لەهیێ لێ دای، د جهـ دا هەرفی و هەرفینا وی خانی گەلەكا مەزن بوو.
