عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- 1
- پشتی هنگی ل هەمی باژێر و گوندان دەست ب گەڕیانێ كر، پەیام دگەهاندە خەلكی و مزگینیا پاشاتیا خودێ دكر. دوازدە شاگردێن وی دگەل دا بوون،
- 2
- و هندەك ژنك ژی دگەل بوون، ئەوێن ل سەر دەستێ وی ژ نەساخی و گیانێن پیس ساخ بووین، و ئەو ژی ئەڤە بوون: مەریەم ئەوا دبێژنێ مەجدەلی، ئەوا كو حەفت ئەجنە ژ وێ دەرئێخستین،
- 3
- یووەننا هەڤژینا خوزای جێگرێ هێرودێسی، و سۆساننا و گەلەكێن دی ئەوێن هاریكاریا وی ب پارێن خۆ دكرن.
- نموونەیا تۆڤچینی
- 4
- دەمێ گەلەك خەلك ژ هەمی باژێران لێ خڕڤەبووین، نموونەیەك بۆ وان ئینا:
- 5
- «تۆڤچینەك دەركەفت دا تۆڤێ خۆ بچینیت. دەمێ وی تۆڤێ خۆ دهاڤێت، هندەك ژ تۆڤێ وی كەفتە سەر رێكێ، ئینا پێ لێ هاتە دانان و چویچكێن ئەسمانان خوار
- 6
- و هندەك كەفتە سەر كەڤری، پشتی شین بووی، هشك بوو چنكو یێ بێ شهـ بوو.
- 7
- و هندەك كەفتە ناڤ ستریان و دگەل ئێك شین بوون، ئینا ستریان ئەو فەتساند.
- 8
- و هندەك تۆڤ كەفتە ئەردێ باش و دەمێ شین بووی بەرهەمەكێ سەد جاركی دا.» ئەڤ چەندە گۆت و گازی كر: «هەر كەسێ گوهـ بۆ گوهداریێ هەبن، بلا ببهیسیت.»
- ئارمانجا نموونەیان
- 9
- شاگردێن وی پرسیار ژێ كرن: «مەبەستا ڤێ نموونەیێ چییە؟»
- 10
- ئینا گۆت: «تێگەهشتنا نهێنیێن پاشاتیا خودێ یا بۆ هەوە هاتییە دان، لێ مرۆڤێن دی ئەز ب نموونەیان بۆ وان دئاخڤم داكو بەرێ خۆ بدەن لێ نەبینن، و گوهـ لێ بن لێ تێنەگەهن.
- شرۆڤەكرنا نموونەیا توڤچینی
- 11
- ئەڤەیە مەبەستا نموونەیێ: تۆڤ پەیڤا خودێ یە
- 12
- و ئەو تۆڤێ كەفتییە سەر رێكێ ئەو كەسن، ئەوێن پەیڤێ گوهـ لێ دبن، و پاشی ئبلیس دهێت و پەیڤێ ژ دلێ وان درەڤینیت نەكو باوەریێ بینن و قورتال ببن.
- 13
- ئەو تۆڤێ كەفتییە سەر كەڤری، ئەو كەسن ئەوێن چەوا پەیڤێ گوهـ لێ دبن ب دل خۆشی وەردگرن و ئەڤ كەسێن هەنێ دبێ بناغەنە، دەمەكێ كۆرت باوەریێ دئینن و دەمێ تاقیكرنێ، ژ وێ باوەریێ ڤارێ دبن.
- 14
- و ئەو تۆڤێ كەفتییە د ناڤ ستریان دا ئەو كەسن، ئەوێن گوهێ خۆ ددەنە پەیڤێ، لێ ئەو ب دەرد و دەولەمەندی و خۆشیێن ژیانێ مژویل دبن و پێ دهێنە فەتساندن، ئەڤجا چ بەرهەمێ گەهشتی نادەن.
- 15
- و ئەو تۆڤێ كەفتییە سەر ئەردێ باش، ئەو كەسن ئەوێن گوهـ ل پەیڤێ دبن و د دلەكێ باش و راست دا دڤەشێرن و ب بێهن فرەهیێ بەرهەمی ددەن.
- نموونەیا چرای
- 16
- كەسەك چرای هەلناكەت و ب ئامانەكی بنخێڤیت یان ژی دانیتە دبن تەختی ڤە، لێ ددانیتە ئەردەكێ بلند داكو ئەوێن بهێنە ژۆرێ روناهیێ ببینن.
- 17
- چ ڤەشارتی نینن، دیار نەبن و چ نەپەنی نینن نەهێنە ئاشكرا كرن.
- 18
- ئەڤجا هشیار بن و بزانن كا چەوا گوهداریێ دكەن، بۆ ئەوێ هەیی دێ پتر هێتە دان، و ئەوێ نەیی، خۆ یێ هزرا هەبوونێ ژی بكەت دێ ژێ هێتە ستاندن.»
- دایك و برایێن عیسای
- 19
- د وی دەمی دا دایك و برایێن وی هاتن و دڤیان بچنە ل نك، لێ ژ بەر گێلەشوكا مرۆڤان نەشیان بگەهنێ.
- 20
- ئینا گۆتنێ: «دایك و برایێن تە ژ دەرڤە دراوەستاینە، دڤێن تە ببینن.»
- 21
- لێ وی بەرسڤا وان دا و گۆت: «دایك و برایێن من ئەون یێن گوهـ ل پەیڤا خودێ دگرن و پێ دكەن.»
- عیسا بارۆڤەی تەنا دكەت
- 22
- رۆژەك ژ رۆژان ئەو و شاگردێن خۆ ل قاییكەكێ سوار بوون و گۆتە وان: «دا دەرباز بینە رەخێ دی یێ گۆلێ» و هاژوتن.
- 23
- ئەو یێ د گۆلێ دا قاییكێ دهاژون و عیسا نڤست. ژ نشكەكێ ڤە بارۆڤەیەك هات و قاییك تژی ئاڤ دكر و كەفتنە د دەراڤەكێ گەلەك تەنگ دا
- 24
- ئینا چوونە نك عیسای و هشیار كرن و گۆتنێ: «مامۆستا، مامۆستا ئەم دێ ژناڤ چین.» عیسا ژ خەو رابوو و ل بارۆڤەی و پێلێن ئاڤێ حەیتاند، ئینا د جهـ دا راوەستیان و تەناهی پەیدا بوو
- 25
- پاشی گۆتە وان: «كا باوەریا هەوە؟» ئینا ترسیان و گوهشین و گۆتنە ئێكودوو: «ئەڤە كییە فەرمانێ ل بای و ئاڤێ دكەت و گوهێ خۆ ددەنێ؟»
- ساخكرنا زەلامەكێ گەلەك ئەجنە تێدا
- 26
- پاشی گەهشتنە دەڤەرا جەراسینیان، كو دكەڤیتە بەرامبەری دەڤەرا جەلیل.
- 27
- دەمێ عیسا پەیا بووی و گەهشتییە هشكاتیێ زەلامەكێ خەلكێ وی باژێری دیت، كو دەمەكێ درێژ بوو ئەجنە تێدا ئاكنجی ببوون، ئەوی زەلامی ژمێژە جلك نەكرینە بەر خۆ، و د خانیان دا نەدژیا و هەر ل ناڤ گۆڕستانان بوو.
- 28
- دەمێ چاڤێ وی ب عیسای كەفتی كرە هەوار و كەفتە بەر پێن وی و ب دەنگەكێ بلند گۆت: «عیسایێ كوڕێ خودێ یێ بلند تە چ ژ من دڤێت؟ من هیڤییە تۆ من نەئێشینی.
- 29
- هندی عیسا بوو، فەرمان دابوو گیانێ پیس كو ژ وی دەركەڤیت. گەلەك جاران ل سەر زال دبوو، هندی ب بەند و زنجیران گرێدابا و زێرەڤانی لێ هاتبا كرن، ئەو دا بەندێن خۆ شكێنیت و ئەجنەی بەرێ وی ددا چولی.
- 30
- ئینا عیسای گۆتێ: ناڤێ تە چییە؟» گۆت «لەشكەر»ە، چنكو گەلەك ئەجنە چووبوونە دناڤ وی دا.
- 31
- ئەجنان هیڤی ژ عیسای كرن، كو بەرێ وان نەدەتە ئەبیسۆسێ. [a]
- 32
- وی دەمی رەڤدەكا مەزن یا بەڕازان ل چیای دچەرین، ئینا ئەجنان هیڤی ژ عیسای كرن، كو دەستویریێ بدەتێ داكو بچنە د بەڕازان دا، ئینا رێك دایێ.
- 33
- ئەڤجا ئەجنە ژ وی مرۆڤی دەركەفتن و چوونە د بەڕازان دا، ئینا رەڤدە ب لەز رەڤی و خۆ ژ رەخێ چیای ژور دا هاڤێتە د دەریاكێ دا و خەندقین.
- 34
- دەمێ گاڤانان ئەڤ تشتە ب چاڤێن خۆ دیتی، رەڤین و چوونە گوند و باژێری داكو دەنگوباسان بگەهینن.
- 35
- خەلك دەركەفتن داكو وێ رویدانێ ببینن و هاتنە نك عیسای و ئەو مرۆڤێ ئەجنە ژێ دەركەفتین دیتن یێ ل بەر پێن عیسای روینشتییە و جلێن وی یێ ل بەر و یێ ل سەر هشێن خۆ، ئینا ترسیان.
- 36
- و ئەوێن ئەڤ رویدانە ژی دیتی و كا چەوا ئەو مرۆڤێ ئەجنە تێدا ئاكنجی ساخ بوو، بۆ خەلكێ ڤەگێرا.
- 37
- ئینا هەمی خەلكێ دەڤەرا جەراسینیان داخواز ژ عیسای كر كو ژ نك وان بچیت، چنكو ترسەكا مەزن ب سەر وان دا هات، ئینا عیسا ل قاییكێ سوار بوو و ڤەگەڕیا ڤە.
- 38
- ئەوێ ئەجنە ژێ دەركەفتین، هیڤی ژ عیسای كرن، كو بهێلیت دگەل وی بچیت، لێ عیسای ڤەگەڕاندەڤە و گۆتێ:
- 39
- «هەرە مالا خۆ و ئەوا خودێ بۆ تە كری، بۆ خەلكی رابگەهینە.» ئینا رابوو چوو ل هەمی باژێری گەڕیا و گازی دكر كا عیسای چ بۆ كرییە.
- ساخ كرنا ژنكا خوین لێ ڤەرەسیای و زیندی كرنا كچا یایروسی
- 40
- و دەمێ عیسا ڤەگەڕیایە ڤە، جەماوەرەكی پێشوازیا وی كر، چنكو چاڤێ وان هەمیان ل هاتنا وی بوو.
- 41
- ئێكی دگۆتنێ یائیروس، سەرۆكێ كنیشتێ بوو، هات و خۆ هاڤێتە بەر پێن عیسای و هیڤی ژێ كرن، دگەل بچیتە مالا وی.
- 42
- چنكو كچەكا ئێكانە هەبوو، ژیێ وێ نێزیكی دوازدە سالان بوو، ل بەر مرنێ بوو. دەمێ ئەو ب رێ دچوو، جەماوەری د ناڤ خۆ دا ئاسێ دكر.
- 43
- ژنەك هەبوو ئەو دوازدە سال بوو خوین ژ بەر دچوو و چ مالێ هەی دابوو نوژداران، لێ ل سەر دەستێ چ ژ وان ساخ نەبوو.
- 44
- ئەو ژن كەفتە دویڤ عیسای و دەست هاڤێتە لێڤا كراسێ وی و د جهـ دا خوینا وێ راوەستیا
- 45
- عیسای گۆت: «كێ دەستێ خۆ كرە من؟» دەمێ هەمیان ماندەل كری، پەتروسی گۆت: «مامۆستا، خەلكێ تە پالددەن و تۆ یێ پرسیار دكەی كێ دەستێ خۆ كرە من؟»
- 46
- عیسای گۆت: «كەسەكی دەستێ خۆ كرە من، چنكو من هەست پێ كر شیانەك ژ من دەركەفت.»
- 47
- دەمێ ژنكێ بەرێ خۆ دایێ دێ كارێ وێ ئاشكرا بیت، هات و د لەرزی و خۆ هاڤێتە بەر پێن عیسای و ل پێش چاڤێن هەمیان گۆت كا ژ بەر چ دەست هاڤێتە عیسای و كا چەوا د جهـ دا ساخ بوو.
- 48
- عیسای گۆتێ: «كچا من، باوەریا تە تۆ ساخ كری، ب ئاشتی هەرە.»
- 49
- ئەو د وان ئاخفتنا دا بوو، هنارتیەك ژ مالا سەرۆكێ كنیشتێ هات و گۆتێ: «زەحمەتێ بوو مامۆستای چێنەكە، چنكو كچا تە مر.»
- 50
- دەمێ عیسای ئەڤ چەندە گوهـ لێ بووی، گۆتێ: «نەترسە ب تنێ باوەریێ بینە، دێ كچا تە ژ مرنێ قورتال بیت.»
- 51
- دەمێ گەهشتییە مال، نەهێلا كەس ژبلی پەتروسی و یوحەننای و یەعقوبی و دایك و بابێن كچكێ دگەل بچیتە ژۆر.
- 52
- و هەمیان بۆ دكرە گری و دلوراندن، ئینا گۆت: نە كەنە گری ئەو نە مرییە، بەلكو یا نڤستییە.
- 53
- ئینا پێ كەنین، چنكو وان دزانی یا مری.
- 54
- لێ دەمێ هەمی دەرئێخستین، دەستێ وێ گرت و گازی كرێ و گۆت: «كچكێ رابە.»
- 55
- د جهـ دا گیانێ وێ ڤەگەڕیا ڤە و رابوو و گۆتە وان خوارنێ بدەنێ.
- 56
- دایك و بابێن وێ گوهشین، لێ گۆتە وان ڤێ رویدانێ نە بێژنە كەسێ.
- a. ئەبیسۆس، ناڤێ وێ نهالا گەلەك كویرە ل ژێر ئەردی، گیانێن پیس و مری تێدا دهێنە بەندكرن.
