عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- عیسا هەر دوازدە هنارتیان دهنێریت
- 1
- عیسای هەر دوازدە شاگردە خڕڤەكرن و شیان و دەستهەلات ل سەر ئەجنان و ساخكرنا نەخۆشیان دایێ
- 2
- و هنارتن داكو پاشاتیا خودێ بۆ خەلكێ رابگەهینن و ژ نەساخیان ساخكەن
- 3
- و گۆتە وان: «د رێكێ دا چ تشتان هەلنەگرن، نە داری و نە تویركی و نە نانی و نە پاران، و بلا كەسێ دوو كراس دگەل دا نەبن.
- 4
- چ مالا هوین بچنێ، ل وێرێ بمینن، تا هوین ژ وێرێ دەربكەڤن.
- 5
- و ئەگەر ئێكی هوین نەحەواندن ژ باژێری دەركەڤن و توزێ ژ پێن خۆ داقوتن، داكو ل سەر وان ببیتە شاهدە.»
- 6
- ئەڤجا ئەو دەركەفتن و چوونە گوندان و ل هەمی جهان مزگینی دگەهاند و خەلك ساخ دكرن.
- دلگرانیا هێرودێسی
- 7
- هێرودێسێ دەستهەلاتدار، ئەو هەمی رویدانێن چێدبوون گوهـ لێ بوو. ئینا هێرودێس پێ دلگران بوو، چنكو هندەكان دگۆت یوحەننا یێ ژ ناڤ مریان رابووی.
- 8
- و هندەكان دگۆت ئیلیا دەركەفت و هندەكێن دی دگۆت: ئێك ژ پێغەمبەرێن كەڤن یێ ژ مرنێ رابووی،
- 9
- هێرودێسی گۆت: «من سەرێ یوحەننا یێ دایە بڕین، لێ ئەو كییە ئەوێ ئەز ڤان تشتان دەربارەی وی گوهـ لێ دبم؟» و وی بزاڤ دكر ببینیت.
- عیسا خوارنێ ددەتە پێنچ هزاران
- 10
- پشتی هنارتی ڤەگەڕیاین، چ تشتێ كرین بۆ عیسای گۆتن. ئینا ئەوی ئەو ب تنێ دگەل خۆ برنە باژێرەكێ دبێژنێ بەیت سایدا.
- 11
- لێ خەلكی پێ زانی و خۆ گەهاندنە وی. عیسای پێشوازیا وان كر و بۆ وان بەحسێ پاشاتیا خودێ كر و هەركەسێ نەساخ و پێدڤی ب ساخبوونێ هەی، ساخكر.
- 12
- دەمێ رۆژ بەرەڤ ب دوماهیێ ڤە چووی، شاگردێن وی چوونە نك و گۆتنێ: «جەماوەری ڤەرەڤینە دا بچنە گوندێن دەوروبەر و ناڤ رەزان، و ل وێرێ ڤەحەویێن و خوارنەكێ پەیدا بكەن، چنكو ئەم یێ ل جهەكێ چۆل و ڤەدەر.»
- 13
- ئینا گۆتە وان: «هوین تشتەكی بدەنێ دا بخون.» ئەوان بەرسڤ دا و گۆتن: «مە ژ پێنچ نان و دوو ماسیان پێڤەتر نینە، ب تنێ ئەگەر ئەم بچین خوارنێ بۆ ڤی هەمی جەماوەری بكڕین.»
- 14
- چنكو ژمارا زەلامان نێزیكی پێنچ هەزاران بوو. پاشی گۆتە شاگردێن خۆ: «وان بكەنە كوم كوم و بلا روینن و هەر كومەك پێنجی كەس بن.»
- 15
- ئەوان گۆتنا وی ب جهـ ئینا و هەمی دانە روینشتن.
- 16
- عیسای هەر پێنج نان و دوو ماسی هەلگرتن و بەرێ خۆ دا ئەسمانان و سوپاسیا خودێ كر و نان كەركر و دا شاگردێن خۆ، داكو بدەنە جەماوەری.
- 17
- ئەوان هەمیان خوار و تێر بوون و تژی دوازدە بۆقچكێن بەرماییكان راكرن.
- پەتروس دانپێدانێ ب عیسای ددەت
- 18
- دەمێ عیسای ب تنێ نڤێژ دكر و شاگردێن وی دگەل بوون، پرسیار ژ وان كر. «خەلك دبێژن ئەز كیمە؟»
- 19
- ئەوان بەرسڤا وی دا: «هندەك دبێژن تۆ یوحەننایێ تافیركەری و هندەك دبێژن تۆ ئیلیای؛ و هندەك دبێژن تۆ ئێك ژ پێغەمبەرێن كەڤنی ژ مرنێ رابووی.»
- 20
- عیسای گۆتە وان: «و هوین چ دبێژن، ئەز كیمە؟» پەتروسی گۆتێ: «تۆ مەسیحێ خودێ ی.»
- 21
- لێ عیسای ئاگەهداریا وان كر، كو ڤێ چەندێ نە بێژنە كەسێ.
- عیسا پێشبینیا مرن و رابوونا خۆ دكەت
- 22
- و گۆت: «دڤێت كوڕێ مرۆڤ گەلەك ئازارێ بكێشیت و ریهسپی و سەرۆكێن كاهنان و مامۆستایێن دەستوری وی رەت بكەن و بهێتە كوشتن، و ل رۆژا سیێ بهێتە راكرن.»
- 23
- و پاشی گۆتە هەمیان «هەر كەسێ بڤێت ب دویڤ من بهێت بلا خۆ ماندەل بكەت و هەر رۆژ خاچا خۆ هەلگریت و ل دویڤ من بكەڤیت.
- 24
- هەر كەسێ بڤێت ژیانا خۆ قورتال بكەت دێ ژ دەست دەت، لێ ئەوێ ژیانا خۆ پێخەمەتی من ژ دەست بدەت، دێ قورتال كەت.
- 25
- چنكو ما دێ چ مفایێ مرۆڤی بیت، ئەگەر جیهان هەمی ب دەست خۆ ڤە ئینا، لێ خۆ ژ دەست دا، یانژی خۆ دۆراند؟
- 26
- چنكو هەر كەسێ شەرمێ ب من و ئاخفتنێن من بكەت، كوڕێ مرۆڤ ژی دێ شەرمێ پێ كەت، دەمێ كو ب مەزناهیا خۆ و یا بابێ خۆ دگەل فریشتێن پیرۆز ڤەدگەڕیتەڤە.
- 27
- لێ ئەز راستیێ دبێژمە هەوە، دناڤبەرا مرۆڤێن ل ڤێرێ راوەستیای دا، هندەكێن هەین، كو مرنێ ب چاڤێن خۆ نابینن، تا پاشاتیا خودێ نەبینن.»
- دیاربوونا مەزناهیا عیسای
- 28
- نێزیكی هەشت رۆژان پشتی وان ئاخفتنا، عیسای پەتروس و یوحەننا و یەعقوب دگەل خۆ برنە سەرێ چیایەكی، داكو نڤێژێ بكەت.
- 29
- و دەمێ عیسای نڤێژ دكر، دیاربوونا دێمێ وی هاتە گوهورین و جلێن وی سپی بوون و تەیسین.
- 30
- دوو زەلام دگەل ئاخفتن، ئێك ژ وان ئیلیا بوو و یێ دی موسا بوو.
- 31
- ئەو هەردوو ب مەزناهی دیاربوون و بەحسێ دەركەفتنا عیسای دكرن یا كو نێزیك ببوو ل ئورشەلیمێ روی بدەت و ب جهـ بهێت.
- 32
- خەوێ چاڤێن پەتروسی و یێن دگەل دا گران كربوون، لێ د سەر هندێ را دەمێ چاڤێن خۆ ڤەكرین، مەزناهیا وی و هەردوو مرۆڤێن دگەل وی راوەستیای دیتن،
- 33
- دەمێ هەردوو مرۆڤ ژ عیسای دویر كەفتین، پەتروسی گۆتە عیسای: «مامۆستا، باشە ئەم ل ڤێرێ. ئەم سێ كەپران دانین، ئێك بۆ تە و ئێك بۆ موسای و ئێك ژی بۆ ئیلیای.» وی نەدزانی وی چ دگۆت.
- 34
- لێ دەمێ ئەوی ئەو ئاخفتن دكرن، عەورەك هات و سیبەر ل وان كر، دەمێ كەتینە ناڤ عەوری، ئەو ترسیان.
- 35
- دەنگەك ژ عەوری هات: «ئەڤە كوڕێ منە ئەوێ من هەلبژارتی، گوهێ خۆ بدەنێ»
- 36
- دەمێ دەنگ ژ عەوری دەركەفتی، وان عیسا ب تنێ دیت، ئێدی ئەڤ رویدانە ڤەشارت و ل وان رۆژان ئەو تشتێ دیتی نەگۆتە كەسێ.
- عیسا زارۆكەكێ گیانێ پیس تێدا ساخ دكەت
- 37
- ل رۆژا پاشتر دەمێ ژ چیای هاتینە خوارێ، جەماوەرەكێ زۆر كەفتنە پێشیا وی،
- 38
- و زەلامەكی ژ ناڤ وان گازی كر: «مامۆستا، ئەز هیڤیێ ژ تە دكەم تۆ بەرێ خۆ بدەیە كوڕێ من چنكو ئێكانێ منە،
- 39
- یێ بوویە كولەیێ گیانەكێ پیس، و هەما ژ نشكەكێ ڤە دكەتە قێری و تەپ دگریت و كەف ب سەر دەڤی دكەڤیت، و تاكو نەئێشینیت و نەهەرشینیت ئەو ژێڤە نابیت.
- 40
- و من ژ شاگردێن تە خواست وی گیانێ پیس دەربئێخن، لێ نەشیان.»
- 41
- عیسای بەرسڤ دا و گۆت: «هەی نفشێ بێباوەر و خوار، تا كەنگی ئەز دێ د ناڤ هەوە دا مینم و دگەل هەوە یێ بێهن فرەهـ بم؟» گۆتە زەلامی: «كوڕێ خۆ بینە ڤێرێ.»
- 42
- دەمێ زارۆك دهات ئەجنەی ئەو ل ئەردی دا و تەپێ دگرت. عیسای ل گیانێ پیس حەیتاند و زارۆك ساخ كر و داڤ بابێ وی.
- 43
- ئینا هەمی ژ مەزناهیا خودێ بەهتین.
هێشتا هەمی د گوهشینا كریارێن عیسای دا مابوون، عیسای گۆتە شاگردێن خۆ: - 44
- «هوین ڤێ ئاخفتنێ بكەنە د گوهێن خۆ دا: چ نەمایە دێ كوڕێ مرۆڤ دەنە دەستێ مرۆڤان.»
- 45
- لێ ئەو د ڤێ ئاخفتنێ نەدگەهشتن، و بۆ وان تشتەك ڤەشارتی بوو و ترسیان پرسیارێ دەربارەی وێ ئاخفتنێ ژێ بكەن.
- كی مەزنترە؟
- 46
- د سەر ڤێ چەندێ را د ناڤ وان دا كێشمەكێشەك چێبوو، كا مەزنترین كەس د ناڤ وان دا كییە؟
- 47
- دەمێ عیسای ئەوا د دلێ وان دا زانی، زارۆكەك ئینا و ب رەخ خۆ ڤە راوەستاند
- 48
- و گۆتە وان: «هەر كەسێ ژ هەوە ڤی زارۆكی ب ناڤێ من وەرگریت، ئەوی ئەز وەرگرتم و ئەوێ من وەرگریت وی وەردگریت یێ ئەز هنارتیم، و هەركەسێ د ناڤبەرا هەوە دا بچویكترین كەس بیت ئەو مەزنترین كەسە.»
- یێ دژی هەوە نەبیت، دگەل هەوەیە
- 49
- یوحەننا ئاخفت و گۆت: «مامۆستا، مە ئێك دیت ب ناڤێ تە ئەجنە دەردئێخستن. ئەڤجا مە نەهێلا وی كاری بكەت، چنكو ئەو دگەل مە ب دویڤ تە ناكەڤیت.»
- 50
- ئینا عیسای گۆت: «رێكێ لێ نەگرن، چنكو ئەوێ دژی هەوە نەبیت دگەل هەوەیە.»
- گوندەكێ سامەریان عیسای رەت دكەت
- 51
- دەمێ رۆژێن بلندبوونا وی نێزیك بووین، بریار دا بچیتە ئورشەلیمێ.
- 52
- وی هندەك هنارتی ل پێشیا خۆ هنارتن، چوونە گوندەكی ژ گوندێن سامەریا داكو خانیەكی بۆ وی ل وی گوندی ئامادە بكەن.
- 53
- لێ رازی نەبوون پێشوازیا وی بكەن، چنكو ئەو بەرەڤ ئورشەلیمێ ڤە دچوو.
- 54
- و دەمێ هەردوو شاگردێن وی یەعقوب و یوحەننای ئەڤ تشتە دیتین، گۆتن: «خودان، تە دڤێت ژ خودێ بخوازین ئاگر ژ ئەسمانان بهێتە خوارێ و وان ب ئێك جاری بسوژیت؟»
- 55
- ئینا عیسا ل وان زڤری و ئەو پاشڤە برن،
- 56
- و پاشی چوونە گوندەكێ دی.
- بهایێ دویڤ كەفتنا عیسای
- 57
- دەمێ د رێكێ دا دچوون، ئێكی دگۆتێ: «تۆ كیڤە بچی، ئەز دێ ل دویڤ تە هێم.»
- 58
- ئینا عیسای گۆتێ: «رویڤیان كونێن هەین و بالندێن ئەسمانان هێلینێن هەین، لێ كوڕێ مرۆڤ چ جهـ نینن سەرێ خۆ دانیتێ.»
- 59
- گۆتە ئێكێ دی: «ل دویڤ من وەرە.» لێ وی مرۆڤی گۆت: «خودان، دەستویریا من بدە، دا ئەز ل پێشیێ بچم بابێ خۆ ڤەشێرم.»
- 60
- عیسای گۆتێ: «بهێلە مری مریێن خۆ ڤەشێرن. لێ تۆ هەرە مزگینیا پاشاتیا خودێ بدە.»
- 61
- ئێكێ دی گۆتێ: «خودان، ئەز دێ ب دویڤ تە كەڤم، لێ تۆ دەستویریا من بدە، ئەز ل پێشیێ خاترا خۆ ژ مالا خۆ بخوازم.»
- 62
- عیسای گۆتێ: «كەس نینە دەستێ خۆ دانیتە سەر هنجاری و بەرێ خۆ بدەتە پشت خۆ، ب كێر پاشاتیا خودێ بهێت.»
