عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- عیسا ل نك پیلاتوسی
- 1
- دەمێ بووییە سپێدە سەرۆكێن كاهنان و ریهسپی و مامۆستایێن دەستوری و جڤاتا بلند هەمی كەتنە دانوستاندنێ، پاشی عیسا گرێدا و بر و كرە د دەستێ پیلاتوسی دا.
- 2
- ئینا پیلاتوسی پرسیار ژێ كر: «ئەرێ توی پاشایێ جوهیان؟» بەرسڤا وی دا: «تە ب دەڤێ خۆ گۆت.»
- 3
- سەرۆكێن كاهنان ئەو ب گەلەك تاوانان تاوانبار كر.
- 4
- پیلاتوسی جارەكا دی پرسیار ژێ كر و گۆت: «ما تۆ چ بەرسڤان نادەی؟ گوهێ خۆ بدێ یێ چەند تاوانان ئاراستەی تە دكەن!»
- 5
- لێ عیسای چ بەرسڤێن دی نەدان، هەتا كو پیلاتوس ژێ گوهشی.
- دادكرنا عیسای ب مرنێ
- 6
- ژ رەوشتێن پیلاتوسی ئەو بوو كو هەر جەژنەكێ زیندانیەكی ل دویڤ داخوازا مللەتی ئازاد بكەت،
- 7
- و زەلامەكێ زیندانكری ب ناڤێ باراباس هەبوو دگەل كومەكا تێكدەران ئەوێن د دەمێ گرفتاریان دا كوشتن كرین.
- 8
- جەماوەر هات و داخواز ژ پیلاتوسی كر، كو وێ بكەت ئەوا هەردەم بۆ وان دكر،
- 9
- ئینا گۆتە وان: «ئەرێ هەوە دڤێت ئەز پاشایێ جوهیان بۆ هەوە ئازاد بكەم؟»
- 10
- چنكو وی زانی، كو سەرۆكێن كاهنان ژ بەر چاڤچنوكیا خۆ عیسا یێ دایە دەست.
- 11
- لێ سەرۆكێن كاهنان جەماوەر ئازراندن بۆ داخوازا ئازادكرنا باراباسی ل شوینا عیسای.
- 12
- ئەڤجا پیلاتوسی ل وان ڤەگەڕاند: «پا ئەز چ ل وی بكەم یێ هوین دبێژنێ پاشایێ جوهیان؟»
- 13
- ئینا ل قێریان دان و گۆتن: «ل خاچێ بدە!»
- 14
- پیلاتوسی گۆتە وان: «بۆچی؟ ئەوی چ تاوان كرییە؟» ئینا قێریێن وان بلندتر لێ هاتن: «ل خاچێ بدە!»
- 15
- و چنكو پیلاتوسی دڤیا جەماوەری رازی بكەت، ئینا باراباس بۆ وان ئازاد كر و پشتی عیسا قامچی دای دا دەست وان داكو بهێتە خاچ دان.
- سەرباز ترانا ب عیسای دكەن
- 16
- پاشی سەربازان عیسا كێشا د ناڤ حەوشا كۆچكا والی دا و گازی هەمی سەربازێن قۆلێ كرن دا كوم ببن.
- 17
- كراسەكێ مۆر[a] كرنە بەر و تانجەك ژ ستریان ڤەهاندن و دانانە سەر سەرێ وی،
- 18
- و دەست ب پێشوازیا وی كرن و گۆتن: «سلاڤ پاشایێ جوهیان!»
- 19
- ب لەڤەنەكی ددانا سەرێ وی و تف دكرنێ و چوكڤەدان بۆ دبرن.
- 20
- پشتی گەلەك ترانە پێ كرین، كراسێ مۆر ژ بەر كرن، جلكێن وی كرنە بەر و كێشانە ژ دەرڤە دا ل خاچێ بدەن.
- عیسا ل سەر خاچێ
- 21
- و زەلامەكێ رێڤینگ ژ زەڤیێ دهات ئەو ژی شەمعونێ قەیرەوانی بوو، بابێ ئەسكەندەری و روفوسی بوو. سەربازان نەچار كر كو خاچا وی هەلبگریت.
- 22
- و عیسا ئینانە وی جهێ ئەڤێ دگۆتنێ گولگوتە، ئانكو جهێ كلوخی،
- 23
- و بۆ وی مەیەكا تێكەل دگەل موڕێ ئینان، لێ وی ڤەنەخوار.[b]
- 24
- و ل خاچێ دان. كراسێ وی ل خۆ لێكڤەكرن و هاڤێتنە پشكێ، دا هەر ئێك بەهرا خۆ بزانیت.
- 25
- و دەمژمێر سێ یێ رۆژێ بوو [c] ، دەمێ ل خاچێ داین.
- 26
- و ل سەر ناڤنیشانێ تاوانێ وی نڤیسابوو: «پاشایێ جوهیان»
- 27
- و دوو رێگر ژی دگەل دا ل خاچێ دان، ئێك ل دەستێ وی یێ راستێ و ئێك ل یێ چەپێ.
- 28
- و ئەو نڤیسار ب جهـ هات: «دگەل تاوانباران هاتە هژمارتن.»
- 29
- و هاتوچوویان كرێت دكرن و سەرێ خۆ دهەژاندن و دگۆتن: «ها! ئەی وێرانكەرێ پەرستگەهێ و ئاڤاكەرێ وێ ب سێ رۆژان!
- 30
- ژ خاچێ وەرە خوار و خۆ قورتال بكە!»
- 31
- هەروەسا سەرۆكێن كاهنان ژی ترانە پێ دكرن دگەل مامۆستایێن دەستوری و دگۆتنە ئێكودوو: «هندەكێن دی یێن قورتال كرین لێ نەشێت خۆ قورتال بكەت!
- 32
- بلا مەسیح پاشایێ ئیسرائیلێ ژ خاچێ بهێتە خوارێ، دا ببینین و باوەریێ پێ بینین!» هەروەسا ئەوێن دگەل وی ل خاچ دایین ئەوان ژی سڤكاتی پێ دكرن.
- مرنا عیسای
- 33
- دەمێ بوویە دەمژمێر شەش، تاریەك ب سەر هەمی ئەردی دا هات، تا دەمژمێر نەه. [d]
- 34
- و دەمژمێر نەه، عیسای ب دەنگەكێ بلند كرە هەوار: «ئێلۆیی ئێلۆیی لاما ساباختانی؟» ئانكو: «خودایێ من خودایێ من تە بۆچی ئەز هێلام؟»
- 35
- هندەك ژ ئامادەبوویان گوهـ لێ بوو و گۆتن: «گوهێ خو بدەنێ، یێ گازی ئێلیاسی دكەت!»
- 36
- ئێكی كرە غار و ئیسفەنجەك د سركێ هەلاند و ب سەرێ لەڤەنەكی ڤە هەلاویست و پێشكێشی وی كر داكو ڤەخوت و گۆت: «بهێلن دا ببینین كا دێ ئێلیاس هێت وی ئینیتە خوار.»
- 37
- عیسای ب دەنگەكێ بلند كرە قێری و گیانێ خۆ دا دەست.
- 38
- پەردا پەرستگەهێ ژ سەری تا بنی شەق بوو و بوو دوو پارچە.
- 39
- سەرلەشكەر بەرامبەر خاچێ یێ راوەستیای بوو و دەمێ دیتی كا چەوا عیسای گیان دا دەست، گۆت: «ب راستی ئەڤە كوڕێ خودێ بوو.»
- 40
- هەروەسا هندەك ژنكان ژ دویرڤە بەرێ خۆ ددایێ د ناڤ وان دا مەریەما مەجدەلی و مەریەما دایكا یەعقوبێ بچویك و یوسی و سالومە بوون،
- 41
- ئەوێن ل جەلیل ب دویف كەفتین و خزمەتا وی كری، و ژبلی وان، گەلەك ژنكێن دی بوون ئەوێن دگەل وی سەركەفتینە ئورشەلیمێ.
- ڤەشارتنا عیسای
- 42
- و دەمێ بووییە ئێڤار و ژ بەر كو رۆژا ئامادەكرنێ بوو ئانكو رۆژا بەری شەمبیێ،
- 43
- یوسڤێ ئاریمەتیایی [e] هات، ئەو ژی ئەندامەكێ رێزدار بوو د ناڤ جڤاتا بلند دا و ل هیڤیا پاشاتیا خودێ بوو، وی مێرانی كر و چوو نك پیلاتوسی و داخوازا تەرمێ عیسای ژێ كر.
- 44
- پیلاتوس گوهشی بوو كو ئەو هوسا زوی مر، و گازی سەرلەشكەری كر و ژێ پرسی: «ئەرێ راستە ئەو هوسا زوی مرییە؟»
- 45
- و دەمێ ژ سەرلەشكەری زانی، رێ دا یوسڤی تەرمێ عیسای ببەت،
- 46
- و كفنەكی كتانی كڕی و تەرم ژ خاچێ ئینا خوار و دكفنی پێچا و كرە د گۆڕەكی دا یێ د كەڤری كولای و بەر گرێل كرە بەر دەرێ گۆڕی.
- 47
- مەریەما مەجدەلی و مەریەما دایكا یوسی دیت، كا ل كیڤە هاتە دانان.
- a. ل وی سەردەمی جلكێن مۆر گەلەك بهاگران بوون و ژ لایێ كەسوكارێن پادشایڤە دهاتنە ل بەر كرن.
- b. موڕ روهنەكێ بێهنخۆشە وەك دەرمان یانژی وەك گولاڤ دهاتە بكارئینان، موڕ تشتەكێ پڕبها بوو و تاما وی یا تەحلە.
- c. دەمژمێر نەهێ سپێدە ب دەمێ نهوو
- d. ژ نیڤرۆ تا دەمژمێر سیێ ئێڤاری ب دەمێ نهوو
- e. ئاریمەتیا ناڤێ كەڤنێ باژێرێ (رامە) یە
