عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- دەرئێخستنا گیانێن پیس و خەندقاندنا بەڕازان
- 1
- پاشی گەهشتنە رەخێ دی یێ گۆلا جەلیل ل دەڤەرا جەراسیان.
- 2
- دەمێ ژ قاییكێ هاتییە خوار، ئێكسەر ژ گۆڕستانێ زەلامەك هاتە بەراهیا وی، گیانەكێ پیس تێدا بوو
- 3
- ئەو د ناڤ گۆڕستانێ دا دژیا و كەس نەدشیا خۆ وی ب زنجیران ژی گرێدەت،
- 4
- چنكو ئەو گەلەك جاران ب قەید و زنجیران هاتبوو گرێدان، زنجیر دقەتاندن و قەید دشكاندن و كەسەك نەدشیا وی ئاسێ كەت.
- 5
- هەردەم ب شەڤ و رۆژ ل ناڤ گۆڕان و ل چیایان دكرە گازی و لەشێ خۆ ب بەران بریندار دكر.
- 6
- دەمێ وی عیسا ژ دویرڤە دیتی، كرە غار و چوو نك و بۆ وی چوكڤەدان،
- 7
- و هندی ژێ هاتی كرە هەوار: «تە چ ژ منە، عیسایێ كوڕێ خودایێ بلند؟ تۆ ب ناڤێ خودێ كەیە، من ئەشكەنجە نەدە!»
- 8
- چنكو عیسای گۆتبوو وی: «ئەی گیانێ پیس ژ ڤی مرۆڤی دەركەڤە!»
- 9
- و عیسای پرسیار ژێ كر: «ناڤێ تە چییە؟» ئینا بەرسڤ دا: «ناڤێ من "لەشكەر"ە، چنكو ئەم گەلەكین!»
- 10
- و گەلەك هیڤی ژ عیسای كرن دا وان نە هنێرتە ژ دەرڤەی دەڤەرێ.
- 11
- رەڤدەكا مەزن ژ بەڕازان ل وێرێ هەبوو ل نێزیكی چیای دچەرین.
- 12
- گیانێن پیس هیڤی ژ عیسای كرن و گۆتن: «مە فرێكە د ناڤ بەڕازان دا، داكو بچینە تێدا!»
- 13
- ئەڤجا دەستویریا وان دا و گیانێن پیس دەركەفتن و چوونە د بەڕازان دا. ئینا رەڤدا بەڕازان ژ كێلەكا چیای بەرەڤ گۆلێ ڤە بەزین و تێدا خەندقین، و ژمارا وان نێزیكی دوو هزاران بوو.
- 14
- گاڤانێن بەرازان ژی رەڤین و ئەو رویدان ل باژێری و ل گوندان راگەهاند، ئینا خەلك دەركەفتن دا ببینن كا چ رویدایە.
- 15
- دەمێ هاتینە نك عیسای، دیتن ئەو زەلامێ لەشكەرەكێ گیانێن پیس تێدا یێ ل وێرێ روینشتییە و جلكێن د بەر دا، و یێ ل سەر خۆیە. ئینا ترسیان.
- 16
- و دیدەڤانان ئەوا ب سەرێ وی زەلامێ گیانێن پیس تێدا و ب سەرێ بەڕازان هاتی، بۆ وان بەحسكرن.
- 17
- ئەڤجا هیڤی ژ عیسای كرن، كو ژ دەڤەرا وان بچیت.
- 18
- دەمێ عیسا ل قاییكێ سیار دبوو، ئەو زەلامێ بەرێ گیانێن پیس تێدا داخواز ژێ كر كو دگەل بچیت.
- 19
- ئینا عیسای دەستویری نەدایێ، لێ گۆتێ: «هەڕە مالا خۆ و ل ناڤ مرۆڤێن خۆ و بێژە وان كا خودانی چەند بۆ تە كر و چەوا دلوڤانی ب تە بر.»
- 20
- ئینا ئەو زەلام چوو و ئەو چەندا عیسای بۆ كری ل دەڤەرا دەهباژێران راگەهاند، ئەڤجا هەمی حێبەتی مان.
- ڤەژاندنا كچا یایروسی و ساخبوونا ژنەكێ
- 21
- دەمێ عیسا ب قاییكێ دەرباز بووی و ڤەگەڕیایەڤە لایێ دییێ گۆلێ، گەلەك مرۆڤ ب رەخ گۆلێ ڤە لێ خڕڤە بوون.
- 22
- ئێك ژ سەرۆكێن كنیشتێ، ناڤێ وی یایروس بوو، هات و چەوا ئەوی عیسا دیت خۆ هاڤێتە بەر پێن وی
- 23
- و گەلەك هیڤی ژێ كرن و گۆت: «كچا من یا بچویك یا ل بەر مرنێ، خوزی تۆ هاتبای و تە دەستێ خۆ دانابا سەر دا ساخ بیت و بژیت.»
- 24
- ئینا دگەل چوو و كومەكا مەزن ژی كەفتە دویڤ و ئاسێ كر.
- 25
- ژنكەك ل وێرێ هەبوو، ئەو دوازدە سال بوون خوین ژێ دچوو.
- 26
- ئەوێ گەلەك ئێش و نەخۆشی ل سەر دەستێ گەلەك نوژداران كێشابوون، و چ مالێ هەی مەزاختبوو، لێ چ مفا نەدیتبوو، بەلكو رەوشا وێ ئالوزتر لێ هاتبوو.
- 27
- ئەوێ گوهـ ل دەنگوباسێن عیسای ببوو، ئەڤجا د ناڤ كومێ را هات و ژ پشت ڤە دەستێ خۆ كرە كراسێ وی.
- 28
- چنكو وێ د دلێ خۆ دا دگۆت: «خۆ ئەگەر ئەز دەستێ خۆ بگەهینمە جلكێن وی ژی دێ ساخ بم.»
- 29
- و د گاڤێ دا خوین ژێ چوونا وێ راوەستیا، د لەشێ خۆ دا هەست پێ كر كو یا ژ دەردێ خۆ ساخ بووی.
- 30
- و ئێكسەر عیسا پێ حەسیا كو هێزەك ژێ دەركەفت، ل كومێ زڤڕی و گۆت: «كێ دەست كرە جلكێن من؟»
- 31
- ئینا شاگردێن وی گۆتنێ: «تۆ یێ دبینی خەلكێ تە پالڤەددەت و تۆ یێ پرسیار دكەی: ”كێ دەست كرە من؟“»
- 32
- لێ عیسا ل دەوروبەرێن خۆ دزڤری داكو یا وە كری ببینیت.
- 33
- لێ ژنك هات ب ترس و لەرز ژ بەر كو دزانی چ كارێ ب سەری هاتی ئینا خۆ هاڤێتە بەر پێن وی و راستی هەمی بۆ گۆت.
- 34
- ئینا گۆتە وێ: «كچا من، باوەریا تە تۆ ساخ كری. ئەڤجا ب سلامەتی هەڕە و ژ دەردێ خۆ ساخ بە.»
- 35
- و هێشتا عیسا دئاخفت، هندەك ژ مالا سەرۆكێ كنیشتێ هاتن و گۆتن: «كچا تە یا مری، ئێدی پێدڤی ناكەت تۆ مامۆستای ب وەستینی.»
- 36
- لێ دەمێ عیسا گوهـ ل وێ ئاخفتنێ بووی، گۆتە سەرۆكێ كنیشتێ: «نەترسە، ب تنێ باوەریێ بینە.»
- 37
- ئەوی نەهێلا كەسەك ژبلی پەتروسی و یەعقوبی و یوحەننای برایێ یەعقوبی دگەل دا بچیت.
- 38
- دەمێ گەهشتییە مالا سەرۆكێ كنیشتێ، گێلەشوكەك دیت، گەلەك یێن دگرین و دلۆرینن.
- 39
- چوو د ژۆرڤە و گۆتە وان: «بۆچی هوین دكەنە قێری و دگرین؟ كچك نەمرییە، بەلكو یا نڤستییە!»
- 40
- ئەو پێ كەنین. لێ ئەوی هەمی دەرئێخستن و دایك و بابێن كچكێ و ئەوێن دگەل وی دا، برنە جهێ كچك تێڤە.
- 41
- دەستێ وێ گرت و گۆتێ: «تالیتا قومی!» كو وەرگێرانا وێ: «كچكێ، دبێژمە تە رابە!»
- 42
- و د گاڤێ دا كچك رابوو و ب رێڤە چوو. كچك یا دوازدە سالی بوو. ئەڤجا گەلەك گوهشین.
- 43
- و ئەو گەلەك راسپاردن، كو كەس بلا ب ڤێ چەندێ نەزانیت و گۆتێ: «خوارنێ بدەنێ دا بخوت.»
