عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- 1
- گۆتە وان: «راستیێ دبێژمە هەوە: هندەك ژ ئەوێن ل ڤێرێ ئامادە بووین تام ناكەنە مرنێ، تاكو نەبینن پاشاتیا خودێ ب هێز یا هاتی.»
- مەزناهیا عیسای بۆ شاگردان دیار دبیت
- 2
- پشتی شەش رۆژان، عیسای پەتروس، یەعقوب و یوحەننا ب تنێ دگەل خۆ برنە سەر چیایەكێ بلند و دیمەنێ وی ل بەر وان هاتە گوهارتن.
- 3
- و جلكێن وی سپی و بریسیكدار بوون، كو چ سپیكار ل سەر ئەردی نەشێن وەسا سپی بكەن.
- 4
- و بۆ وان ئیلیا و موسا دیار بوون كو یێ دگەل عیسای دئاخڤن.
- 5
- پەتروسی گۆتە عیسای: «مامۆستا، باشە ئەم یێ ل ڤێرێ؛ ئەڤجا بلا ئەم سێ كەپران چێكەین، ئێك بۆ تە، ئێك بۆ موسای و ئێك بۆ ئیلیای.»
- 6
- وی نەزانی كا چ بێژیت، چنكو ئەو بەهتی بوون.
- 7
- پاشی عەورەك هات و سیبەر ل وان كر، و دەنگەك ژ عەوری هات و گۆت: «ئەڤەیە كوڕێ من یێ خۆشتڤی، گوهێ خۆ بدەنێ!»
- 8
- ژ نیشكەكێ ڤە ل دۆر خۆ زڤرین و ژبلی عیسای ب تنێ كەس دگەل خۆ نەدیتن.
- 9
- دەمێ ئەو ژ چیای دهاتنە خوار، عیسای فەرمان ل وان كر، كو ئەو تشتێ وان دیتی نەبێژنە كەسێ تا كوڕێ مرۆڤ ژ ناڤ مریان رانەبیت.
- 10
- وان پەیڤ د دلێ خۆ دا ژ بەر كر و پرسیار ژ ئێكودوو كرن: «رابوون ژ ناڤ مریان چییە؟»
- 11
- و پرسیار ژێ كرن: «بۆچی مامۆستایێن دەستوری دبێژن دڤێت ل بەراهیێ ئیلیا بهێت؟»
- 12
- بەرسڤا وان دا: «راستە، دێ ئیلیا ل بەراهیێ هێت و هەمی تشتان چاككەتەڤە. پا چەوا ئەو نڤیسییە: كوڕێ مرۆڤ دێ گەلەك هێتە ئێشاندن و كرێت كرن؟
- 13
- لێ ئەز دبێژمە هەوە، كو ئیلیا یێ هاتی، وان چ ڤیا دگەل وی كر، كا چەوا دەربارەی وی هاتییە نڤیسین.»
- عیسا زارۆكەكی ژ گیانێ پیس ساخ دكەت
- 14
- دەمێ ڤەگەریانە نك شاگردان، دیت گەلەك یێ ل دۆران خڕڤەبووین و هندەك مامۆستایێن دەستوری گەنگەشە دگەل دكرن.
- 15
- و چەوا خڕڤەبوویان ئەو دیتی، گوهشین و كرنە غار و سلاڤ لێ كر.
- 16
- عیسای پرسیار ژ وان كر: «هوین گەنگەشێ دەربارەی چ دگەل دكەن؟»
- 17
- ئینا ئێك ژ خڕڤەبوویان بەرسڤا وی دا: «مامۆستا، من كوڕێ خۆ یێ ئینایە نك تە، گیانەكێ پیس یێ تێدا، وی لاڵ دكەت،
- 18
- چ جهێ دگەهیتێ تەپ دهێتێ و كەف ب سەر دەڤی دكەڤیت و ددانێن خۆ دقرچینیت و رەق دبیت. من داخواز ژ شاگردێن تە كر كو وی ژێ دەربئێخن، لێ نەشیان.»
- 19
- ئینا بەرسڤا وان دا و گۆت: «هەی نفشێ بێ باوەر، تا كەنگی دێ دگەل هەوە مینم، تا كەنگی دێ بێهنا خۆ ل هەوە فرەهـ كەم؟ كوڕكی بیننە نك من.»
- 20
- ئینانە نك. دەمێ ئەو دیتی ئێكسەر گیانێ پیس زارۆك ڤەهەژاند و كەفتە ئەردی و خۆ گەڤزاند و كەف ب سەر دەڤی كەفت.
- 21
- عیسای پرسیار ژ بابێ كوڕكی كر: «ئەڤە ژ كەنگی وەرە هۆ لێ دهێتە هە؟» گۆت: «ژ بچویكاتی وەرە.
- 22
- و گەلەك جاران گیانێ پیس ئەو دهاڤێتە دناڤ ئاگری یان ئاڤێ دا، داكو بكوژیت. ئەگەر تۆ دشێی تشتەكی بكەی دلوڤانیێ ب مە ببە و هاریكاریا مە بكە.»
- 23
- عیسای گۆتێ: «تە گۆت: ”ئەگەر تۆ بشێی؟“ هەمی تشت بۆ خودان باوەری یێ بەردەستە.»
- 24
- د جهـ دا بابێ كوڕكی گازی كر: «من باوەریا هەی! هاریكاریا بێ باوەریا من بكە!»
- 25
- دەمێ عیسای دیتی خەلك یێ دبەزنە نك و ل وێرێ خڕڤە دبن، ل گیانێ پیس خوڕی و گۆتێ: «هەی گیانێ كەر و لاڵ! ئەز فەرمانێ ل تە دكەم ژ كوڕكی دەركەڤە و ئێدی لێ نەزڤرەڤە!»
- 26
- گیانێ پیس كرە هەوار و زارۆك ب هێز ڤەهەژاند، پاشی دەركەفت و زارۆك وەكو مریان لێ هات، تاكو بەهرا پتر ژ خڕڤەبوویان گۆتی: «مر.»
- 27
- لێ دەمێ عیسای دەستێ وی گرتی و راكرییەڤە، ئەو رابووڤە.
- 28
- و دەمێ چووییە مال، شاگردێن وی ب تنێ پرسیار ژێ كرن: «بۆچی ئەم نەدشیاین گیانێ پیس دەربئێخین؟»
- 29
- بەرسڤا وان دا :«ئەڤ جورە ب چ تشتان نادەركەڤیت، ب تنێ ب نڤێژان نەبیت.»
- عیسا جارەكا دی بەحسێ مرن و رابوونا خۆ دكەت
- 30
- ژ وێرێ چوون و ژ دەڤەرا جەلیل دەرباز بوون و عیسای نەدڤیا كەس پێ بزانیت،
- 31
- چنكو وی شاگردێن خۆ فێردكرن و دگۆتێ: «دێ كوڕێ مرۆڤ دەنە دەستێ مرۆڤان و دێ وی كوژن و پشتی كوشتنا وی دێ ل رۆژا سیێ رابیت.»
- 32
- لێ ئەو د ڤێ ئاخفتنێ نەگەهشتن و ترسیان پرسیاران ژێ بكەن.
- كی مەزنترە؟
- 33
- گەهشتنە كەفەرناحوم و دەمێ ب ژۆر كەفتین پرسیار ژ وان كر: «هەوە ب رێكێ ڤە گەنگەشە ل سەر چ دكر؟»
- 34
- و ئەو بێ دەنگ بوون، چنكو د رێكێ دا وان گەنگەشا هندێ دكر كا كی ژ وان هەمیان مەزنترە.
- 35
- روینشت و گازی هەر دوازدە شاگردێن خۆ كر و گۆتێ: «ئەگەر ئێكی ڤیا خۆ بكەتە یێ پێشیێ، بلا ل دوماهیا هەمیان بیت و خزمەتكارێ هەمیان بیت.»
- 36
- ئینا زارۆكەك گرت و د نیڤا وان دا راوەستاند و هەمبێز كر و گۆتە وان:
- 37
- هەر كەسێ زارۆكەكێ وەكو ڤی ب ناڤێ من قەبیل بكەت، ئەوی ئەز قەبیل كریمە و یێ من قەبیل بكەت، ئەو نە من قەبیل دكەت، بەلكو وی ئەوێ ئەز هنارتیم.
- ئەوێ دژی مە نەبیت دگەل مە دایە
- 38
- ئینا یوحەننای گۆتە وی: «مامۆستا، مە زەلامەك دیت ب ناڤێ تە ئەجنە دەردئێخستن و مە رێ لێ گرت، چنكو ئەو نە ژ مە بوو.»
- 39
- عیسای گۆت: «بهێلن! چنكو كەس نەشێت حنێران ب ناڤێ من بكەت و بشێت پشتی هنگی زوی ب نەباشی بەحسێ من بكەت،
- 40
- چنكو ئەوێ دژی مە نەبیت دگەل مەیە.
- 41
- ئەز راستیێ دبێژمە هەوە ئەوێ پەرداغەكێ ئاڤێ ب ناڤێ من بدەتە هەوە، چنكو هوین یێن سەر ب مەسیحی ڤە، خەلاتێ وی ژ دەست ناچیت.»
- هشیاركرن ژ گونەهان
- 42
- «و هەر كەسێ ئێك ژ زاروكێن باوەری ب من هەی بهەلنگێڤیت، بۆ وی باشترە بەرێ ئاشی ب ستوویێ وی ڤە گرێدەن و بهاڤێنە د دەریایێ دا.
- 43
- و ئەگەر دەستێ تە ببیتە ئەگەرێ هەلنگافتنا تە، ببڕە: باشترە بۆ تە دەست بڕی بچییە د ژیانێ دا، ژ كو ب دوو دەستان تە بهاڤێنە دوزەخێ، د ناڤ ئاگرەكی دا، كو نەهێتە ڤەمراندن،
- 44
- ل وی جهێ كرمێ وان نەمریت و ئاگر نەهێتە ڤەمراندن.
- 45
- و ئەگەر پێ تە ببیتە ئەگەرێ هەلنگافتنا تە، ببڕە: باشترە بۆ تە قوپ بچییە د ژیانێ دا، ژ كو تە ب دوو پێیان بهاڤێنە دوزەخێ، د ناڤ ئاگرەكی دا، كو نەهێتە ڤەمراندن،
- 46
- ل وی جهێ كرمێ وان نەمریت و ئاگر نەهێتە ڤەمراندن.
- 47
- و ئەگەر چاڤێ تە ببیتە ئەگەرێ هەلنگافتنا تە، بینە دەرێ: باشترە بۆ تە ب چاڤەكی بچییە د پاشاتیا خودێ دا، ژ كو ب دوو چاڤان تە بهاڤێنە دوزەخێ،
- 48
- ل وی جهێ كرمێ وان نەمریت و ئاگر نەهێتە ڤەمراندن.
- 49
- چنكو هەر كەسەك ب ئاگری دهێتە خوێكرن.
- 50
- خوێ یا باشە، لێ ئەگەر سویراتیا خۆ بەردا دێ ب چ سویركەنەڤە؟ بلا خوێ د ناڤ هەوە دا هەبیت و دگەل ئێكودوو دئاشتیخواز بن.»
