عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
خزمەتا هنارتیێن مەسیحی 
1
بلا مرۆڤ مە ب ڤی شێوەی ببینن كو ئەم خزمەتكارێن مەسیحی و بریكارێن نهێنیێن خودێینە.
2
یا ژ بریكاران دهێتە خواستن ژی ئەوە كو مرۆڤێن دلسۆز بن.
3
بۆ من نە تشتەكێ گرنگە كو ئەز ژ لایێ هەوە ڤە یان ژ لایێ دادگەهەكا مرۆڤكانی ڤە بهێمە دادكرن، لێ ئەز ب خۆ ژی خۆ داد ناكەم.
4
وژدانا من یا تەنایە، لێ ئەڤ چەندە من بێگونەهـ دەرنائێخیت، چنكو دادوەرێ من خودانە.
5
لەوما پێشوەخت دادكرنێ ل سەر تشتەكی نەكەن، تاكو خودان بهێت، ئەوێ دێ تشتێن د تاریاتیێ دا ڤەشارتی ئێخیتە بەر رۆناهی و نیازێن دلان ئاشكرا كەت. هنگی پەسنكرنا[a] هەر كەسەكی دێ ژ لایێ خودێ ڤە بیت.
6
من ژ بۆ باشیا هەوە، گەلی خویشك و برایان، ئەڤ تشتە ل سەر خۆ و ل سەر ئەپولۆسی وەكو نموونە ئینان، دا هوین ژ مە فێری ڤێ چەندێ ببن: «ژ یا هاتیە نڤیسین دەرنەكەڤن» و هۆسا چ كەس ژ هەوە خۆ ب ئێكی ل دژی ئێكێ دی مەزن نەكەت.
7
كی تە ژ ئێكێ دی جودا دكەت؟ ما تە چ هەیە كو تە ژ خودێ وەرنەگرتی؟ مادەم تە وەرگرتیە، پا بۆچی شانازیێ دبەی هەروەكو تە وەرنەگرتبیت؟
8
هوین نوكە یێن تێر بووین! نوكە یێن دەولەمەند بووین! بێی مە یێ پاشایەتیێ دكەن[b] ! خوزی هوین ب راستی ببانە پاشا، دا مە ژی ل گەل هەوە پاشایەتی كربا!
9
چنكو ئەز هزر دكەم كو خودێ ئەم، ئەوێن هنارتی، وەكو پاشبەند یێن نیشاداین[c] ، وەكو كەسێن بڕیارا كوشتنێ ل سەر دەركەفتی، چنكو ئەم بۆ هەمی گەردوونێ، ئانكو بۆ فریشتەیان و بۆ مرۆڤان ژی بووینە تەماشە.
10
ئەم ژ بەر مەسیحی د بێئاقلین، لێ هوین د ئێكبوونا ل گەل مەسیحی دا د ئاقلمەندن. ئەم د بێهێزین، لێ هوین بهێزن. هوین د بەڕێزن، لێ ئەم د بێڕێزین.
11
تا نوكە ئەم د برسی و تێهنی و رویسین، دهێینە قوتان و د بێمالین.
12
ب دەستێن خۆ كار دكەین و رەنجێ دكێشین. دەمێ ئاخفتنێن كرێت دبێژنە مە، ئەم بەرەكەتێ بۆ دخوازین. دەمێ مە تەپەسەر دكەن، ئەم بێهنا خۆ فرەهـ دكەین.
13
دەمێ بوهتانان[d] ل مە دكەن، ئەم ب نەرمی بەرسڤێ ددەین. تا نوكە ئەم وەكو گلێشێ جیهانێ، قڕێژا هەمی تشتان، یێن لێ هاتین.
14
ئەز ڤان تشتان نانڤیسم دا هەوە شەرمزار بكەم، لێ دا وەكو زاڕۆكێن خۆ یێن خۆشتڤی، هەوە ئاگەهدار بكەم.
15
چنكو ئەگەر هەوە د باوەریا مەسیحی دا دەهـ هزار كەس ژی هەبن هەوە پەروەردە بكەن، لێ هەوە بابەك ب تنێ هەیە، ئەز ب مزگینیێ د باوەریا مەسیح عیسای دا بوومە بابێ هەوە.
16
لەوما هیڤی ژ هەوە دكەم، هوین چاڤ ل من بكەن.[e]
17
ژ بەر ڤێ چەندێ من تیمۆتاوس هنارتە نك هەوە، كو ئەو زاڕۆكێ منێ خۆشتڤی و دلسۆزە د ئێكبوونا ل گەل خودانی دا، ئەو دێ رێكێن من د باوەریا مەسیح عیسای دا ئینیتە بیرا هەوە، كا چەوا ئەز ل هەر جڤاكەكا باوەرداران، ل هەر جهەكی، فێركرنێ دكەم.
18
هندەك ژ هەوە دفنبلند بوون، هەروەكو ئەو هزر دكەن ئەز ناهێمە نك هەوە،
19
لێ ئەگەر خودان حەز بكەت، ئەز دێ د دەمەكێ نێزیك دا هێمە نك هەوە، هنگی نە ب تنێ ئەز دێ ئاخفتنێن وان دفنبلندبوویان زانم، لێ هێزا وان ژی،
20
چنكو پاشایەتیا خودێ نە ب ئاخفتنێیە، لێ ب هێزێیە.
21
هەوە چ دڤێت؟ ئەز ب دارێ قوتانێ بهێمە نك هەوە، یان ژی ب حەزژێكرن و گیانێ دلنەرمیێ؟
  1. a. 4‏:5 q پەسن: مەدح و سەنا
  2. b. 4‏:8 ل ڤێرێ نڤیسكار ڤی تشتی وەكو رەخنەگرتن دبێژیت، چنكو ئەو دژیان هەروەكو وان پاشایەتیا خودێ ب دەست خۆ ڤە ئینابیت.
  3. c. 4‏:9 ئەو كەسن یێن ب دویڤ لەشكەرێ سەركەفتی را وەكو دیل دهێن
  4. d. 4‏:13 q بوهتان: تاوانباركرنا بێ بنیات
  5. e. 4‏:16 1 كورنتۆس 11‏:1؛ فیلیپی 3‏:17