عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
شڤانیا پەزێ خودێ 
1
ئەز هیڤی ژ ریهسپیێن د ناڤ هەوە دا دكەم، كو ئەز وەكو هەوە ریهسپیمە و شاهدم ل سەر ئازارێن مەسیحی و هەڤپشكێ وێ مەزناهیێمە یا كو ل نێزیك دێ دیار بیت:
2
شڤانیا پەزێ خودێ یێ د ناڤ هەوە دا بكەن[a] ، نە ژ نەچاری، لێ ژ دل، وەسا چاڤدێریێ بكەن، هەروەكو خودێ دڤێت، نە ژ بەر دەستكەفتەكێ حەرام، لێ ب دلگەرمی.
3
خۆ ل سەر وان یێن ل ژێر چاڤدێریا هەوە نەسەپینن، لێ بۆ پەزی ببنە نموونە.
4
دەمێ سەرۆكشڤان دیار دبیت، هوین دێ تانجا مەزناهیێ وەرگرن، ئەوا برسقینا وێ ئێكجار ل كێمیێ نادەت.
5
ب هەمان شێوە گەلی گەنجان، ملكەچی ریهسپیان بن و هوین هەمی بۆ ئێكودوو كراسێ دەروونبچویكیێ ل خۆ بپێچن[b] ، چنكو:
«خودێ بەرهنگاریا دفنبلندان دكەت،
لێ كەرەمێ ددەتە دەروونبچویكان.»[c]
6
ئەڤجا خۆ ل بن دەستێ هێزدار یێ خودێ دەروونبچویك بكەن، دا د دەمێ دەستنیشانكری دا هەوە بلند بكەت.[d]
7
هەمی خەمێن خۆ بهاڤێژنە سەر وی، چنكو ئەو پویتەی ب هەوە ددەت.
8
هەوە های ژ خۆ هەبیت و هشیار بمینن. نەیارێ هەوە ئبلیس، وەكو شێرەكێ نڕنڕی دگەڕیێت دا ئێكی بخۆت.
9
موكم د باوەریێ دا بەرهنگاریا وی بكەن، چنكو هوین دزانن كو خویشك و برایێن هەوە ل سەرانسەری جیهانێ هەمان ئەڤێ ئازارێ دكێشن.
10
خودایێ هەمی كەرەمێ ژی، ئەوێ هوین ب مەسیح عیسای گازی كرینە مەزناهیا خۆ یا هەتا هەتایی، پشتی كو هەوە بۆ دەمەكێ كورت ئازار كێشای، ئەو ب خۆ دێ هەوە كامل كەت و موكم كەت و بهێز ئێخیت و خۆجهـ كەت.
11
سەروەری هەروهەر بۆ وی بیت. ئامین.
سڵاڤێن دویماهیێ 
12
من ب دەستێ سیلاسی[e] ئەڤ نامەیا كورت بۆ هەوە نڤیسی، كو ئەز وی ب برایەكێ دلسۆز دهژمێرم، دا هەوە هان بدەم و شاهدەییێ بدەم، كو كەرەما خودێ یا راستەقینە ئەڤەیە. تێدا موكم بمینن.
13
یا ل بابلێ[f] ، ئەوا وەكو هەوە هاتیە هەلبژارتن، سڵاڤان ل هەوە دكەت، هەروەسا كوڕێ من مەرقۆس ژی.
14
ب ماچا حەزژێكرنێ ژ لایێ من ڤە سڵاڤان ل ئێكودوو بكەن.
ئاشتی ل سەر هەوە هەمیێن گرێدای مەسیحی بیت.
  1. a. 5‏:2 یوحەننا 21‏:15‏-17
  2. b. 5‏:5 ئانكو: بۆ ئێكودوو د دەروونبچویك بن
  3. c. 5‏:5 پەند 3‏:34‏
  4. d. 5‏:6 مەتتا 23‏:12؛ لوقا 14‏:11؛ 18‏:14
  5. e. 5‏:12 q سیلاس: ب یونانی نڤیسیە ‹سیلوانۆس› كو ئەو ژی شێوازەكێ ناڤێ ‹سیلاس›یە.
  6. f. 5‏:13 q یا ل بابلێ: هێمایە بۆ جڤاكا باوەرداران یا ل رۆمایێ.