عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
سڵاڤ 
1
ژ من، پاولۆس، هنارتیێ مەسیح عیسای ب حەزا خودێ،
ژ برایێ مە تیمۆتاوسی ژی،
بۆ جڤاكا گازیكریێن خودێ[a] ل كورنتۆسێ و بۆ هەمی پیرۆزكریێن ل سەرانسەری ئەخایایێ:
2
كەرەم و ئاشتی ژ بابێ مە خودێ و ژ خودان عیسایێ مەسیح ل سەر هەوە بن.
د تەنگاڤیان دا خودێ مە هانددەت 
3
مەزناهی بۆ خودێ، بابێ خودانێ مە عیسایێ مەسیح، بابێ دلۆڤانیێ و خودایێ هەمی هاندانێ،
4
ئەوێ مە د هەمی تەنگاڤیێن مە دا هانددەت، دا بشێین ب وێ هاندانێ یا ئەم ب خۆ ژ لایێ خودێ ڤە پێ دهێینە هاندان، وان كەسان هانبدەین یێن د هەر تەنگاڤیەكێ دا.
5
چنكو كا چەوا ئازارێن مەسیحی د ژیانا مە دا گەلەكن، هۆسا هاندانا مە ژی ب رێكا مەسیحی گەلەكە.
6
ئەگەر ئەم تووشی تەنگاڤیان دبین، ئەو بۆ هاندان و قورتالبوونا هەوەیە. ئەگەر ئەم دهێینە هاندان، ئەو بۆ هاندانا هەوەیە، ئەوا شیانێ ددەتە هەوە كو خۆ ل بەر وان ئازاران بگرن یێن ئەم ژی دكێشین.
7
دەربارەی هەوە هیڤیا مە یا موكمە، چنكو ئەم دزانین كا چەوا هوین پشكدارێن ئازارێن مەنە، وەسا هوین پشكدارێن هاندانا مەنە ژی.
8
مە نەڤێت، گەلی خویشك و برایان، كو هوین دەربارەی تەنگاڤیێن مە، ئەوێن ل هەرێما ئاسیایێ ب سەرێ مە هاتین، د بێ ئاگەهـ بن، بارێ مە زێدە ژ شیانا مە گران بوو، تا ئەم ژ ژیانێ ژی بێ ئومێد بووین.
9
ب راستی، مە هەست كر كو حوكمێ مرنێ ل سەر مە یێ هاتیە دان، لێ ئەڤ تشتە چێبوو داكو ئەم پشتگەرمێن خۆ نەبین، لێ پشتگەرمێن خودێ بین، ئەوێ مریان رادكەتەڤە.
10
ئەوێ ئەم ژ مرنەكا هندە دژوار رزگار كرین و دێ مە رزگار كەت. مە هیڤیا خۆ ب وی ڤە گرێ دایە كو ئەو دێ ب بەردەوامی مە رزگار كەت،
11
هوین ژی دشێن ب نڤێژێن خۆ هاریكاریا مە بكەن، داكو ژ پێخەمەت وێ كەرەما ب رێكا نڤێژێن گەلەكان ل گەل مە هاتیە كرن، گەلەك كەس ژ بەر مە سوپاسیا خودێ بكەن.
ئەگەرێ گیرۆبوونا سەرەدانا پاولۆسی 
12
شانازیا مە ئەڤەیە: وژدانا مە شاهدەییێ ددەت كو رەفتارا مە د جیهانێ دا، ب تایبەت دەربارەی هەوە، ب سادەیی و نیازپاكیەكا خودایی بوو، نە ب ئاقلمەندیەكا مرۆڤكانی، لێ ب كەرەما خودێ بوو.
13
‏-14 چنكو ئەم تشتەكێ دی بۆ هەوە نانڤیسین، ژبلی وی یێ هوین بخوینن و تێبگەهن. ئەز هیڤیدارم هەروەكو هوین ب هندەكێ د مە گەهشتین، هوین ب تەمامی تێبگەهن كو ل رۆژا خودان عیسای، ئەم شانازیا هەوەینە، هەروەكو هوین ژی شانازیا مەنە.
15
ئەڤجا ب ڤێ پشتڕاستیێ نیازا من ئەو بوو كو ل بەراهیێ بهێمە نك هەوە، دا هەوە دوو جاران كەرەم وەرگرتبا.
16
من دڤیا د رێكا خۆ دا بەرەڤ مەقدۆنیایێ من سەرەدانا هەوە كربا، پاشی دەمێ ئەز ژ مەقدۆنیایێ دزڤڕیم ژی، هاتبامە نك هەوە و هەوە ئەز بەرەڤ یەهودیایێ ب رێ ئێخستبام.[b]
17
دەمێ من ئەڤ بڕیارە دای، ما من ب سڤكی وەرگرت؟ یان ژی ئەز بڕیارێن خۆ ل دویڤ هزرا مرۆڤكانی ددەم، كو ئاخفتنا من یا شەڤ و رۆژان وەكو ئێك نەبیت، جار بێژم «بەلێ، بەلێ» و جار ژی بێژم «نە، نە»؟
18
لێ خودایێ دلسۆز[c] شاهدە كو گۆتنا مە بۆ هەوە «بەلێ» و «نە» نەبوو.
19
كوڕێ خودێ، عیسایێ مەسیح، ئەوێ من و سیلاسی[d] و تیمۆتاوسی د ناڤ هەوە دا دایە نیاسین، «بەلێ» و «نە» نەبوو، لێ د ئێكبوونا ل گەل وی دا ب تنێ «بەلێ» یا هەی.
20
چنكو ب وی هەمی سۆزێن خودێ «بەلێ»نە، لەوما ئەم ب رێكا وی دبێژین «ئامین» بۆ مەزناهیا خودێ.
21
خودێیە یێ مە ل گەل هەوە د ئێكبوونا ل گەل مەسیحی دا موكم دكەت. وی ئەم زەیت كرین[e]
22
و موهر كرین و گیانێ پیرۆز وەكو دەستبەع كرە د دلێ مە دا.
23
ئەز خودێ ل سەر خۆ دكەمە شاهد كو دلێ من ب هەوە ڤە بوو، لەوما ئەز نەهاتمە كورنتۆسێ.
24
مەبەستا من نە ئەوە كو ئەم زاڵدەستیێ ل سەر باوەریا هەوە بكەین، چنكو هوین د باوەریێ دا دموكمن، لێ ئەم هەڤكارێن دلخۆشیا هەوەینە.
  1. a. 1‏:1 q جڤاكا گازیكریێن خودێ: ئانكو كەنیسەیا خودێ. ل فەرهەنگۆكێ بنێڕە جڤاك*.
  2. b. 1‏:16 كارێن هنارتیان 19‏:21
  3. c. 1‏:18 q دلسۆز: ئانكو وەفادار.
  4. d. 1‏:19 q سیلاس: ب یونانی نڤیسیە ‹سیلوانۆس› كو ئەو ژی شێوازەكێ ناڤێ ‹سیلاس›یە.
  5. e. 1‏:21 زەیتكرن هێمایە كو خودێ مرۆڤ هەلبژارت و گیانێ پیرۆز رشتە سەر وی. ل فەرهەنگۆكێ بنێڕە زەیتكرن*.