عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
سڵاڤ 
1
ژ من، پاولۆس، هنارتیێ مەسیح عیسای، ب حەزا خودێ،
بۆ پیرۆزكریێن ل ئەفەسۆسێ، ئەوێن ب مەسیح عیسای د دلسۆزن:
2
كەرەم و ئاشتی ژ بابێ مە خودێ و خودان عیسایێ مەسیح ل سەر هەوە بن.
بەرەكەتێن روحانی 
3
مەزناهی بۆ خودێ، بابێ خودانێ مە عیسایێ مەسیح، كو وی ب ئێكبوونا ل گەل مەسیحی، ب هەر بەرەكەتەكا روحانی د جهێن ئەسمانی دا، ئەم بەرەكەتدار كرین.
4
وی ژ بەری دامەزراندنا جیهانێ، ب ئێكبوونا مە ل گەل مەسیحی ئەم هەلبژارتین، دا ئەم ل بەرامبەری وی د حەزژێكرنێ دا د پیرۆز بین و گازندە ژ مە نەبن.
5
وی ل دویڤ كەیف و حەزا خۆ، ئەم پێشوەخت دەستنیشان كرین، دا مە ب رێیا عیسایێ مەسیح بكەتە كوڕێن خۆ،
6
ژ بۆ پەسنكرنا[a] مەزناهیا كەرەما وی، ئەوا ب رێیا خۆشتڤیێ خۆ بۆ مە كریە خەلات.
7
ژ دەولەتسەرێ وی، مە ب خوینا وی رزگاری وەرگرت، ئانكو مە لێبورینا گونەهان هەیە. ئەڤ چەندە ل دویڤ كەرەما خودێ یا دەولەمەندە [b] ،
8
ئەوا وی ب هەمی ئاقلمەندی و تێگەهشتن، ب مەردینی ب سەر مە دا باراندی.
9
وی نهێنیا حەزا خۆ بۆ مە ئاشكرا كر، ئەوا وەكو وی ڤیای نەخشە كری كو ب رێیا مەسیحی ب جهـ بینیت.
10
نەخشەیێ وی ژی ئەوە كو د تەمامكرنا دەمان دا، ئەو دێ هەمی تشتان، یێن ل سەر ئەردی و یێن ل ئەسمانی ژی، پێكڤە كۆم كەت و ئێخیتە د بن سەروەریا مەسیحی دا.
11
ل دویڤ مەبەستا وی، ئەوێ هەر تشتی ل دویڤ بڕیار و حەزا خۆ ساز دكەت، ئەم پێشوەخت هاتینە دەستنیشانكرن و ب مەسیحی هاتینە هەلبژارتن،
12
دا ئەم ژ بۆ پەسنكرنا مەزناهیا وی بین، ئەم ئەوێن ل بەراهیێ هیڤیا خۆ ب مەسیحی ڤە گرێ دای.
13
دەمێ هەوە پەیڤا راستیێ، ئانكو مزگینیا قورتالبوونا خۆ، بهیستی و باوەری ب مەسیحی ئینای، هوین ژی ب گیانێ پیرۆزێ سۆزپێدای، ژ بەر ئێكبوونا هەوە ل گەل مەسیحی هاتنە موهركرن.
14
گیانێ پیرۆز دەستبەعێ میراتێ مەیە تا دەمێ خودێ گەلێ خۆ رزگار دكەت، ژ بۆ پەسنكرنا مەزناهیا خۆ.
نڤێژا پاولۆسی 
15
ژ بەر هندێ، گاڤا من باوەریا هەوە ب خودان عیسای و حەزژێكرنا هەوە بۆ هەمی پیرۆزكریان بهیستی،
16
ژ هنگی وەرە ئەز بێ راوەستیان بۆ هەوە سوپاسیا خودێ دكەم. ب بەردەوامی د نڤێژێن خۆ دا هەوە دئینمە بیرا خۆ
17
و داخواز دكەم كو خودایێ خودانێ مە عیسایێ مەسیح، بابێ مەزناهیێ، گیانێ ئاقلمەندیێ و تێگەهشتنا ئاشكراكرنا خودێ بدەتە هەوە، دا هوین وی هێشتا باشتر بنیاسن.
18
بلا چاڤێن زێهنێ هەوە ڤەكەت، دا بزانن كا ئەو هیڤیا هوین بۆ وێ هاتینە گازیكرن چ تشتە و كا میراتێ وی چەند یێ مەزن و دەولەمەندە بۆ پیرۆزكریان
19
و كا مەزناهیا هێزا وی یا بێ سنوور چیە، یا ژ بۆ مە یێن باوەردار ل دویڤ هێز و شیانا وی كار دكەت.
20
ئەڤ هێزە ئەوە یا خودێ د مەسیحی دا ئێخستیە كاری، دەمێ ژ ناڤ مریان راكری و ل دەستێ خۆ یێ راستێ ل جهێن ئەسمانی روینشتاندی،[c]
21
ئەو هاتە دانان ل سەر هەر سەروەری، دەستهەلاتی، هێز، خودانەتی و هەر ناڤەكێ دی یێ هەبیت، نە ب تنێ د ڤێ جیهانێ دا، لێ د جیهانا دی ژی دا.
22
خودێ هەمی تشت ئێخستنە بن پێیێن وی[d] و ئەو د سەر هەر تشتەكی دا كرە سەر بۆ جڤاكا باوەرداران.[e]
23
ئەو جڤاك لەشێ ویە، ئانكو تژیاتیا ویە یێ كو هەمی تشتان ب تەمامی تژی دكەت.
  1. a. 1‏:6 q پەسنكرن: مەدحكرن
  2. b. 1‏:7 كۆلۆسی 1‏:14
  3. c. 1‏:20 زەبوور 110‏:1
  4. d. 1‏:22 زەبوور 8‏:6
  5. e. 1‏:22 كۆلۆسی 1‏:18