عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
مەسیح سەرۆككاهن و ناڤبەینكار (وسيط)ێ پەیمانەكا باشترە 
1
خالا سەرەكی ژ وان تشتێن مە گۆتین ئەڤەیە: مە سەرۆككاهنەكێ هۆسا یێ هەی، ئەوێ ل ئەسمانان ل رەخێ راستێ یێ تەختێ مەزناهیێ روینشتی،
2
خزمەتكارێ پیرۆزگەهێ و خیڤەتا رەسەن، ئەوا خودانی ڤەدای، نە مرۆڤان.
3
هەر سەرۆككاهنەكێ هاتیە دانان، دا پێشكێشی و قوربانان پێشكێش بكەت. لەوما پێدڤیە ئەڤی ژی تشتەك بۆ پێشكێشكرنێ هەبیت.
4
ئەگەر ئەو ل سەر ئەردی با، ئەو قەت نەدبوو كاهن، چنكو ئەو كاهنێن ل گۆر دەستووری پێشكێشیان پێشكێش دكەن، یێن هەین.
5
ئەو خزمەتا خۆ یا پەرستنێ ب وان تشتان دكەت یێن كو لبەرچێكری[a] و سیتافكا تشتێن ل ئەسمانانە، كا چەوا دەمێ مووسای ل بەر بوو خیڤەتێ[b] چێكەت، ژ لایێ خودێ ڤە هاتە هایداركرن: «لێ بنێڕە كو هەمی تشتان وەسا چێكەی، ل دویڤ وێ نموونەیا ل سەر چیای بۆ تە هاتیە نیشا دان.»[c]
6
لێ نوكە عیسای خزمەتەكا گەلەك باشتر ژ خزمەتا وان وەرگرت، ب هەمان پیڤانا كو پەیمانا ئەو ناڤبەینكاریێ بۆ دكەت باشترە ژی، ئەوا ل سەر سۆزێن باشتر هاتیە دانان.
7
چنكو ئەگەر پەیمانا ئێكەمین یا بێكێماسی با، هەوجەیی یا دوویێ نەدبوو.
8
لێ خودێ كێماسیێ ل نك گەلێ خۆ دبینیت و دبێژیت:
«ئەڤە رۆژ دێ هێن، خودان دبێژیت،
ئەز دێ ل گەل بنەمالا ئیسرائیلی و بنەمالا یەهودای پەیمانەكا نوی گرێ دەم،
9
وەكو وێ پەیمانێ نابیت یا من ل گەل بابكالێن وان گرێ دای،
رۆژا من دەستێ وان گرتی، دا وان ژ ئەردێ مسرێ دەربئێخم.
وان ئەڤ پەیمانا من شكاند،
ئەڤجا من ئەو پشت گوهـ ڤە هاڤێتن، خودان دبێژیت.
10
لێ ئەو پەیمانا ئەز دێ پشتی وان رۆژان ل گەل بنەمالا ئیسرائیلی گرێ دەم ئەڤەیە، خودان دبێژیت،
ئەز دێ دەستوورێ خۆ كەمە د زێهنێ وان دا
و دێ ل سەر دلێ وان نڤیسم،
ئەز دێ بمە خودایێ وان
و ئەو دێ بنە گەلێ من.
11
ئێدی كەس هەڤوەڵاتیێ خۆ فێر ناكەت
و كەس برایێ خۆ فێر ناكەت و بێژیتێ: ‹خودانی بنیاسە.›
چنكو هەمی دێ من نیاسن،
ژ بچویكێ وان تاكو مەزنێ وان.
12
ئەز دێ ل بەرامبەر خرابیێن وان یێ دلۆڤان بم
و ئێدی ب ئێكجاری گونەهێن وان نائینمە بیرا خۆ.»[d]
13
دەمێ خودێ دبێژیت: «پەیمانا نوی»، ئەڤە وی یا پێشیێ كەڤن كر. ئەو تشتێ كەڤن و پیر دبیت، ئەو نێزیكی ژناڤچوونێیە.
  1. a. 8‏:5 q لبەرچێكری: ئانكو تشتەك ل بەر تشتەكێ دی بهێتە چێكرن یان وێنەكرن.
  2. b. 8‏:5 مەبەست پێ ئەو خیڤەتە یا مووسای بۆ پەرستنا خودێ چێكری. بنێڕە دەركەفتن 26‏:1 تاكو 40‏:38
  3. c. 8‏:5 دەركەفتن 25‏:40
  4. d. 8‏:12 یەرمیا 31‏:31‏-34