عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دەستپێك 
1
ئەڤە ئاشكراكرنا عیسایێ مەسیحە، ئەوا خودێ دایە وی، دا تشتێن كو پێدڤیە د دەمێ نێزیك دا روی بدەن نیشا بەنیێن خۆ بدەت. عیسای ژی فریشتەیێ خۆ هنارت دا بۆ بەنیێ وی یوحەننای بدەتە زانین.
2
یوحەننای ژی ل دۆر هەمی تشتێن وی دیتین شاهدەیی دا، ئانكو بۆ پەیڤا خودێ و شاهدەییا عیسایێ مەسیح.
3
خوزیكێن وی یێ پەیڤێن ڤێ پەیامێ دخوینیت و خوزیكێن وان یێن دبهیسن و ئەوا تێدا هاتیە نڤیسین ب جهـ دئینن، چنكو دەم یێ نێزیكە.
سڵاڤ بۆ حەفت جڤاكێن باوەرداران 
4
ژ یوحەننای، بۆ هەر حەفت جڤاكێن باوەرداران[a] یێن ل هەرێما ئاسیایێ: كەرەم و ئاشتی ل سەر هەوە بن، ژ وی یێ هەی و یێ هەبوو و یێ دێ هێت و ژ حەفت گیانێن ل پێشیا تەختێ وی[b]
5
‏ و ژ عیسایێ مەسیح، شاهدێ دلسۆز، نەخریێ ژ ناڤ مریان[c] و سەرۆكێ پاشایێن ئەردی.
ئەوێ حەز ژ مە دكەت و ئەم ب خوینا خۆ ژ گونەهێن مە ئازاد كرین
6
و ئەم كرینە پاشایەتی و كاهنێن بابێ خۆ خودێ: مەزناهی و سەروەری هەروهەر بۆ وی[d] بن. ئامین.[e]
7
ئەڤە ئەو یێ ل گەل عەوران دهێت،
هەمی چاڤ دێ وی بینن،
8
خودان خودێ دبێژیت: «ئەز ئەلفا و ئۆمێگامە[f] ، ئەوێ هەی و ئەوێ هەبوو و ئەوێ دێ هێت، هێزدارێ هەر تشتی.»
ئێكێ وەكو كوڕێ مرۆڤ 
9
ئەز برایێ هەوە یوحەننا مە، كو د ئێكبوونا ل گەل عیسای دا هەڤپشكێ هەوەمە د تەنگاڤی و پاشایەتی و خۆڕاگرتنێ دا. ئەز ژ بەر پەیڤا خودێ و شاهدەییدانێ بۆ عیسای، ل وێ گزیرتەیێ بووم، ئەوا دبێژنێ پاتمۆس.
10
د رۆژا خودانی[g] دا، ئەز د گیانێ پیرۆز دا بووم[h] ، ل پشت خۆ من دەنگەكێ بلند یێ وەكو دەنگێ بۆڕیزانێ بهیست،
11
وی دگۆت: «تشتێ تۆ دبینی د پەرتووكەكێ دا بنڤیسە و بۆ هەر حەفت جڤاكان بهنێرە: بۆ ئەفەسۆسێ و بۆ سمیرنایێ[i] و بۆ پەرگامایێ و بۆ تیاتیرایێ و بۆ ساردیسێ و بۆ فیلادەلفیایێ و بۆ لاودیكیایێ.»
12
ئەز ل پشت خۆ زڤڕیم، دا خودانێ وی دەنگی ببینم یێ ل گەل من دئاخفت. دەمێ ئەز زڤڕیم، من حەفت چرادانكێن زێڕین دیتن
13
و د ناڤەڕاستا چرادانكان دا، ئێكێ وەكو كوڕێ مرۆڤ[j] بوو، جلكەكێ شۆڕ تا بەر پێیان ل بەر بوو و سینگێ وی ب قایشەكا زێڕین یێ پێچای بوو.
14
پرچا سەرێ وی یا سپی بوو وەكو هریێ، یا سپی بوو وەكو بەفرێ. چاڤێن وی ژی وەكو گوڕیا ئاگری بوون.[k]
15
پێیێن وی وەكو برۆنزێ تەیساندی بوون، هەروەكو ئەو برۆنز د ئێتوینێ دا هاتیە سۆركرن. دەنگێ وی ژی وەكو دەنگێ گەلەك ئاڤان بوو.[l]
16
د دەستێ وی یێ راستێ دا حەفت ستێر هەبوون و ژ دەڤێ وی شیرەكێ دوو دەڤ یێ تیژ دەردكەفت و دێمێ وی وەكو رۆژێ بوو، ئەوا ب هەمی هێزا خۆ شەوقێ ددەت.
17
دەمێ من ئەو دیتی، ئەز وەكو ئێكێ مری كەفتمە بەر پێیێن وی. ئینا وی دەستێ خۆ یێ راستێ دانا سەر من و گۆت: «نەترسە، ئەزم یێ ئێكێ و یێ دویماهیێ[m]
18
و یێ زیندی. ئەز یێ مری بووم و ئەڤە ئەز بۆ هەتا هەتایێ یێ زیندیمە. كلیلێن مرنێ و یێن وارێ مریان[n] ل دەڤ منن.
19
ئەڤجا ئەو تشتێن تە دیتین و ئەوێن نوكە هەین و ئەوێن ل بەرە پشتی ڤان چێببن، بنڤیسە.
20
نهێنیا حەفت ستێرێن تە د دەستێ من یێ راستێ دا دیتین و حەفت چرادانكێن زێڕین ئەڤەیە: حەفت ستێر، فریشتەیێن هەر حەفت جڤاكانە و حەفت چرادانك، هەر حەفت جڤاكن.»
  1. a. 1‏:4 q جڤاكا باوەرداران: ئانكو كەنیسە. ل فەرهەنگۆكێ بنێڕە جڤاك*.
  2. b. 1‏:4 دەركەفتن 3‏:14
  3. c. 1‏:5 ئانكو ئەوێ ژ ناڤ مریان رابووی.
  4. d. 1‏:6 مەبەست پێ عیسایێ مەسیحە.
  5. e. 1‏:5‏-6 دەركەفتن 19‏:6
  6. f. 1‏:8 q ئەلفا و ئۆمێگا: یێ ئێكێ و یێ دویماهیێ. پیتێن ئێكێ و دویماهیێ یێن ئەلفەبێیا یونانینە.
  7. g. 1‏:10 مەبەست پێ رۆژا ئێكشەمبێیە.
  8. h. 1‏:10 ئانكو: ئەز ل بن كارتێكرنا گیانێ پیرۆز بووم.
  9. i. 1‏:11 q سمیرنا: ناڤێ كەڤن یێ باژێڕێ ئیزمیرێ
  10. j. 1‏:13 q كوڕێ مرۆڤ: ل فەرهەنگۆكێ بنێڕە.
  11. k. 1‏:13‏-14 دانیێل 7‏:9، 13؛ 10‏:6
  12. l. 1‏:15 حزقیێل 1‏:24
  13. m. 1‏:17 ئیشایا 44‏:6
  14. n. 1‏:18 q وارێ مریان: ل فەرهەنگۆكێ بنێڕە.