عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
باوەریا ئیبراهیمی 
1
ئێدی ئەم دەربارەی ئیبراهیمێ بابكالێ مە ل دویڤ لەشی چ بێژین، ئەوی چ دیت؟
2
ئەگەر ئیبراهیم ژ بەر كریارێن خۆ راستدار دەركەفتبا، هنگی ئەو دشیا شانازیێ ببەت، لێ نە ل نك خودێ.
3
ما نڤیسار چ دبێژیت؟ «ئیبراهیمی باوەر ژ خودێ كر، ئەڤە ژی بۆ وی وەكو راستداری هاتە هژمارتن.»[a]
4
ئەوێ كار دكەت، كرێیا وی نە وەكو دیاری، لێ وەكو ماف دهێتە هژمارتن.
5
لێ ئەوێ كار نەكەت و باوەری ب وی هەبیت، یێ كەسێ بەدكار بێگونەهـ دەردئێخیت، باوەریا وی وەكو راستداری دهێتە هژمارتن.
6
هەروەكو داوود ژی دەربارەی بەختەوەریا وی مرۆڤێ كو خودێ وی بێی كریار راستدار دهژمێریت، دبێژیت:
7
«خوزیكێن وان یێن ل سەرپێچیێن وان هاتیە بورین
و گونەهێن وان هاتینە نخافتن.
8
خوزیكێن وی مرۆڤی یێ خودان گونەهان ل سەر وی ناهژمێریت!»[b]
9
ما ئەڤ بەختەوەریە ب تنێ ژ بۆ یێن سونەتكریە یان یێن سونەتنەكری ژی ڤەدگریت؟ ئەم دبێژین كو «باوەریا ئیبراهیمی بۆ وی وەكو راستداری هاتە هژمارتن.»[c]
10
ئەڤجا كەنگی هاتە هژمارتن؟ ما ئەڤە پشتی سونەتكرنا وی یان بەری سونەتكرنا وی بوو؟ ئەڤە نە پشتی سونەتكرنا وی بوو، لێ بەری سونەتكرنێ بوو.
11
پاشی ئەو هاتە سونەتكرن وەكو نیشان و بەلگە كو ئەو ژ بەر باوەریا خۆ، بەری سونەتكرنێ، راستدار هاتە هژمارتن. هۆسا ئیبراهیم بوو بابێ وان هەمیێن سونەتنەكری و باوەریێ دئینن، داكو ئەو ژی راستدار بهێنە هژمارتن،[d]
12
هەروەسا بوو بابێ سونەتكریێن نە ب تنێ هاتینە سونەتكرن، لێ هەروەسا ل دویڤ دەوسا باوەریا بابێ مە ئیبراهیمی دچن، یا بەری سونەتكرنێ.
سۆزا خودێ گرێدای باوەریێیە 
13
ئەو سۆزا بۆ ئیبراهیمی و دویندەها وی هاتیە دان، كو ئەو دێ بیتە میراتگرێ جیهانێ، ب رێیا دەستووری نەبوو، لێ ب رێیا راستداریا باوەریێ بوو.[e]
14
ئەگەر میراتگر ئەو بن یێن ل دویڤ دەستووری دچن، هنگی باوەری بێ مفا بوو و سۆز ژی ژ كار كەفت.[f]
15
چنكو دەستوور تۆڕەبوونێ پەیدا دكەت. جهێ دەستوور لێ نەبیت، زێدەگاڤی ژی لێ نینە.
16
ژ بەر ڤێ چەندێ سۆز گرێدای باوەریێیە، دا ل دویڤ كەرەمێ بیت و ژ بۆ هەمی دویندەها ئیبراهیمی یا مسۆگەر بیت. نە ب تنێ ژ بۆ وان یێن ل دویڤ دەستووری دچن، لێ ژ بۆ وان ژی یێن باوەریا وان وەكو باوەریا ئیبراهیمی، ئەوێ كو بابێ مە هەمیانە.[g]
17
هەروەكو هاتیە نڤیسین: «من تۆ یێ كریە بابێ گەلەك مللەتان.»[h] ئەو بابێ مەیە ل بەرامبەر خودایێ ئیبراهیمی باوەر ژێ كری، ئەوێ مریان ڤەدژینیت و گازی تشتێن نەیی دكەت، دا هەبن.
18
ئەوی ل دەمێ كو هیڤی نەمابوو، ب هیڤیێ باوەر ژ خودێ كر، دا ببیتە «بابێ گەلەك مللەتان»، ل دویڤ ئەوا هاتیە گۆتن: «دویندەها تە دێ یا هۆسا بیت.»[i]
19
ئەو د باوەریێ دا لاواز نەبوو، هەر چەندە وی دزانی لەشێ وی هەروەكو یێ مری بیت، ژ بەر كو ژیێ وی نێزیكی سەد ساڵان بوو، و مالبچویكێ سارایێ ژی یێ مریە.[j]
20
ئەو ب بێباوەریێ ل سەر سۆزا خودێ دوودل نەبوو، لێ د باوەریێ دا بهێز كەفت و هۆسا مەزناهی دا خودێ.
21
ئەو پشتڕاست بوو كو ئەوا خودێ سۆز پێ دای، دشێت ب جهـ ژی بینیت.
22
ژ بەر ڤێ چەندێ باوەریا وی «بۆ وی وەكو راستداری هاتە هژمارتن.»[k]
23
ئەڤجا گۆتنا پەرتووكێ «بۆ وی هاتە هژمارتن» نە ب تنێ ژ بۆ ئیبراهیمی هاتیە نڤیسین،
24
لێ ژ بۆ مە ژی هاتیە نڤیسین. بۆ مە ژی دێ هێتە هژمارتن، ئەم یێن مە باوەری ب وی هەی، یێ خودانێ مە عیسا ژ ناڤ مریان راكری،
25
ئەوێ ژ بەر گونەهێن مە رادەستی مرنێ هاتیە كرن و ژ بۆ بێگونەهـ دەرئێخستنا مە هاتیە راكرن.[l]
  1. a. 4‏:3 دەستپێكرن 15‏:6؛ گالاتیا 3‏:6؛ یەعقوب 2‏:23
  2. b. 4‏:7‏-8 زەبوور 32‏:1‏-2
  3. c. 4‏:9 دەستپێكرن 15‏:6
  4. d. 4‏:11 دەستپێكرن 17‏:10
  5. e. 4‏:13 دەستپێكرن 17‏:4‏-6؛ گالاتیا 3‏:29
  6. f. 4‏:14 گالاتیا 3‏:18
  7. g. 4‏:16 گالاتیا 3‏:7
  8. h. 4‏:17 دەستپێكرن 17‏:5
  9. i. 4‏:18 دەستپێكرن 15‏:5
  10. j. 4‏:19 دەستپێكرن 17‏:17
  11. k. 4‏:22 دەستپێكرن 15‏:6
  12. l. 4‏:25 ئیشایا 53‏:4‏-5