عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ژیانا ب دلێ خودێ 
1
ل دویماهیێ گەلی برا، وەكو هوین ژ مە فێر بووین كا دڤێت هوین چەوا بژین، دا هوین خودێ رازی بكەن و ب راستی ژی هوین وە دكەن، ئەم ب ناڤێ خودان عیسای داخوازێ ژ هەوە دكەین و هیڤی دكەین كو هوین هێشتا پێشڤە بچن،
2
چنكو هوین دزانن مە ب دەستهەلاتا خودان عیسای چ راسپاردە داینە هەوە.
3
حەزا خودێ ژی ئەوە كو هوین د پیرۆز بن، ئانكو خۆ ژ دەهمەنپیسیێ بدەنە پاش.
4
بلا هەر ئێك ژ هەوە بزانیت كا دێ چەوا ل سەر لەشێ خۆ زاڵ بیت و د پیرۆزی و سەربلندیێ دا ژیت،
5
نە د حەز و ئارەزوویێن لەشی دا وەكو مللەتێن خودێ نەنیاس.
6
د ڤێ چەندێ دا بلا كەس زێدەگاڤیێ یان دەستدرێژیێ ل سەر خویشك یان برایێ خۆ نەكەت، چنكو خودان تۆلڤەكەرێ ئەڤان هەمی تشتانە، هەروەكو مە بەری نوكە گۆتیە هەوە و مە هوین ب رژدی تەمبی كرین.
7
چنكو خودێ ئەم بۆ پویچاتیێ گازی نەكرینە، لێ بۆ پیرۆزیێ.
8
ئەڤجا یێ ڤێ چەندێ رەت بكەت، ئەو مرۆڤەكی رەت ناكەت، لێ خودایێ كو گیانێ خۆ یێ پیرۆز ددەتە هەوە، رەت دكەت.
9
دەربارەی حەزژێكرنا برایانە ژی، هوین نە د پێدڤینە ئەم بۆ هەوە بنڤیسین، چنكو هوین ب خۆ ژ لایێ خودێ ڤە هاتینە فێركرن، كو حەز ژ ئێكودوو بكەن.
10
ب راستی ژی هوین ڤێ چەندێ بۆ هەمی برایێن ل سەرانسەری مەقدۆنیایێ دكەن. لێ ئەم هیڤی ژ هەوە دكەین، گەلی برا، كو هوین ڤێ چەندێ هێشتا زێدەتر بكەن.
11
بزاڤێ بكەن كو ب ئارامی بژین و مژویلی كاروبارێن خۆ بن و ب دەستێن خۆ كار بكەن، هەروەكو مە هوین راسپاردین،
12
دا رەفتارا هەوە ل گەل یێن ژ دەرڤە[a] ب شێوەیەكێ سەرفەراز بیت و هوین هەوجەیی كەسێ نەبن.
هاتنا خودانی 
13
مە نەڤێت هوین دەربارەی نڤستیان[b] د بێ ئاگەهـ بن، گەلی برا، دا خۆ خەمگین نەكەن وەكو یێن دی یێن كو چ هیڤی نینن.
14
مادەم مە باوەری هەیە كو عیسا مر و رابوو، وەسا ژی خودێ دێ وان یێن ل سەر باوەریێ ب عیسای نڤستین ل گەل وی ئینیت.
15
ئەم ڤێ چەندێ ب پەیڤا خودانی بۆ هەوە دبێژین: ئەم یێن زیندی كو تا هاتنا خودانی بمینین، ئێكجار د بەراهیا یێن نڤستی را ناكەین.
16
چنكو خودان ب خۆ ب گازیەكا ب فەرمان، ب دەنگێ سەرۆكێ فریشتەیان و بوڕیزانا[c] خودێ، دێ ژ ئەسمانی هێتە خوار، ل بەراهیێ دێ یێن ل سەر باوەریێ ب مەسیحی مرین، رابنەڤە.
17
پاشی، ئەم یێن زیندی یێن كو ماین، دێ ل گەل وان د عەوران دا هێینە رەڤاندن، دا ل گەل خودانی د بەرگەبای[d] دا بگەهینە ئێك، هۆسا ئەم دێ هەردەم ل گەل خودانی بین.[e]
18
ئەڤجا ب ڤان گۆتنان هاندانا ئێكودوو بكەن.
  1. a. ‏4‏:12 ئانكو ئەوێن نەباوەردار
  2. b. ‏4‏:13 ئانكو ئەوێن ب لەشی مرین
  3. c. 4‏:16 q بوڕیزان ب عەرەبی دبێژنێ ‹بوق›.
  4. d. ‏4‏:17 ئانكو ئەسمانێ نێزیكی ئەردی، ئەوێ با لێ هەی. (الغلاف الجوي)
  5. e. ‏4‏:15‏-17 1 كورنتۆس ‏15‏:51‏-52