عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ئێكگرتن د ناڤبەرا باوەرداران دا 
1
ئەڤجا ئەز، كو ژ بەر خودانی هاتیمە زیندانكرن، هیڤی ژ هەوە دكەم كو هوین ب شێوەیەكی بژین، یا هەژی وێ گازیكرنێ بیت، ئەوا هوین بۆ هاتینە گازیكرن.
2
ب هەمی دەروونبچویكی و نەرمی و بێهنفرەهی ئێكودوو د حەزژێكرنێ دا رابگرن.[a]
3
هەمی بزاڤان بكەن كو هوین ئێكەتیا گیانی ب بەندكێ ئاشتیێ بپارێزن.
4
ئێكە لەش و ئێكە گیان، هەروەكو خودێ بۆ ئێك هیڤی هوین گازی كرین.
5
ئێكە خودان، ئێكە باوەری، ئێكە تافیركرن[b] ،
6
ئێكە خودێ كو بابێ هەمیانە، ئەوێ د سەر هەمیان را، ب رێكا هەمیان و د ناڤ هەمیان دا.
7
لێ بۆ هەر ئێك ژ مە، ل دویڤ پیڤانا دیاریا مەسیحی، كەرەم هاتیە دان.
8
ژ بەر هندێ دبێژیت:
«گاڤا سەركەفتیە سڵال،
9
ئەڤ «سەركەفتنا سڵال» چ رامان ددەت؟ وی دڤێت بێژیت كو ئەو ل پێشیێ خواركەفتبوو جهێن نزم ئانكو ئەردی[c] .
10
ئەوێ خواركەفتی هەر ئەوە یێ سەركەفتیە سەر هەمی ئەسمانان، دا هەمی تشتان ب ئامادەبوونا خۆ تژی بكەت.
11
هەر ئەوە یێ دیاری دای كو هندەك ببنە هنارتی، هندەك ببنە پێغەمبەر[d] ، هندەك ببنە مزگینیدەر، هندەك ژی ببنە شڤان و مامۆستا،
12
بۆ ئامادەكرنا پیرۆزكریان بۆ كارێ خزمەتێ ژ پێخەمەت ئاڤاكرنا لەشێ مەسیحی،
13
تاكو ئەم هەمی بگەهینە ئێكەتیا باوەریێ و نیاسینا كوڕێ خودێ، هەروەسا ئەم ببینە مرۆڤەكێ پێگەهشتی، بگەهینە ئاستێ تەمامێ بەژنا[e] مەسیحی.
14
هۆسا ئەم ئێدی وەكو زاڕۆكان نابین، ل بەر پێلان هێڤە و وێڤە بهێینە هاڤێتن و ب درەوێن مرۆڤان ل بەر بایێ هەر فێركرنەكێ بهێینە ئینان و برن، ئەو مرۆڤێن كو ب فێلبازیان دخاپینن و د سەر دا دبەن.
15
لێ ئەم راستیێ ب حەزژێكرن ببێژین، دا د هەر تشتەكی دا وەرارێ بكەین بەرەڤ وی ڤە یێ كو سەرە، ئەو ژی مەسیحە.
16
ژ ویە هەمی لەش خۆ پێكڤە دگریت و ب هاریكاریا هەر گەهەكێ دهێتە گرێدان و دەمێ هەر ئەندامەك كارێ خۆ دكەت، لەش وەرارێ دكەت و د حەزژێكرنێ دا خۆ ئاڤا دكەت.[f]
ژیانا كەڤن و ژیانا نوی 
17
لەوما ئەز ڤێ دبێژم و ب ناڤێ خودانی دووپات دكەم كو ئێدی هوین وەسا نەژین هەروەكو مللەتێن نەجوهی دژین، هزرێن وان دخرشن.
18
تاریاتیا ب سەر تێگەهشتنا وان دا هاتی، ئەو ژ بەر وێ نەزانینا د ناخێ وان دا و سەرهشكیا وان، ژ ژیانا خودێ د بیانینە.
19
ئەوان شەرم نەمایە و خۆ رادەستی بێدەلنگیێ كریە كو هەمی جۆرێن پویچاتیێ بكەن و ژێ تێر نابن.
20
لێ هوین هۆسا فێری مەسیحی نەبوون.
21
بێگۆمان هەوە ل دۆر وی بهیستیە و ل گۆر وێ راستیا د عیسای دا، هوین دەربارەی وی هاتینە فێركرن.
22
هوین هاتینە فێركرن كو ژ لایێ رەفتارا هەوە یا بەرێ ڤە، مرۆڤێ كەڤن ژ بەر خۆ بكەن، ئەوێ ب حەزێن خاپینۆك گەنی دبیت[g]
23
و د گیانێ زێهنێ خۆ دا نوی ببن
24
و مرۆڤێ نوی بكەنە بەر خۆ، ئەوێ ل گۆر خودێ د راستداری و پیرۆزیا راستیێ دا هاتیە ئافراندن[h] .
25
لەوما درەوێ ژ خۆ دویر بئێخن و بلا هەر ئێك ژ هەوە ل گەل نێزیكێ خۆ یێ راستگۆ بیت، چنكو ئەم ئەندامێن ئێكودووینە[i] .
26
«تۆڕە ببن، لێ گونەهێ نەكەن»[j] . نەهێلن رۆژ ل سەر تۆڕەییا هەوە ئاڤا ببیت،
27
نە ژی رێكێ بدەنە ئبلیسی.
28
بلا دزیكەر ئێدی دزیێ نەكەت، لێ بلا بوەستیێت و ب دەستێ خۆ كارەكێ حەلال بكەت، دا وی تشتەك هەبیت بدەتە یێ هەوجە ژی.
29
بلا گۆتنەكا خراب ژ دەڤێ هەوە دەرنەكەڤیت، لێ ب تنێ ئەوێ بێژن یا كو ل دویڤ رەوشێ بكێر ئاڤاكرنێ دهێت، دا مفایەكی بگەهینیتە گوهداران.
30
گیانێ خودێ یێ پیرۆز خەمبار نەكەن، ئەوێ هوین ب وی بۆ رۆژا رزگاربوونێ هاتینە موهركرن.
31
هەمی تەحلاتی، كەرب، تۆڕەبوون، قێڕ قێڕ، بوهتان[k] و هەمی كینێ ژ ناڤ خۆ راكەن.
32
ل گەل ئێكودوو د دلنازك و دلۆڤان بن، ل ئێكودوو ببورن، هەروەكو خودێ ژی ب رێیا مەسیحی ل هەوە بوری.[l]
  1. a. 4‏:2 كۆلۆسی 3‏:12‏-13
  2. b. 4‏:5 q تافیركرن: ئانكو ژێراڤكرن، نیشانە كو وی كەسی باوەری ب مەسیحی ئینا. ل فەرهەنگۆكێ بنێڕە تافیركرن*.
  3. c. 4‏:9 q جهێن نزم ئانكو ئەردی: هۆسا ژی دهێتە وەرگێڕان: «جهێن نزم یێن ئەردی» یان «كویراتیێن ئەردی».
  4. d. 4‏:11 q پێغەمبەر: ئەوێن پەیاما خودێ رادگەهینن. ل فەرهەنگۆكێ بنێڕە.
  5. e. 4‏:13 q بەژن: ل ڤێرێ هێمایە بۆ كاملبوونێ ژ لایێ باوەریێ ڤە.
  6. f. 4‏:16 كۆلۆسی 2‏:19
  7. g. 4‏:22 كۆلۆسی 3‏:9؛ رۆما 6‏:6
  8. h. 4‏:24 كۆلۆسی 3‏:10
  9. i. 4‏:25 زەكەریا 8‏:16
  10. j. 4‏:26 زەبوور 4‏:4
  11. k. 4‏:31 q بوهتان: تاوانباركرنا بێ بنیات
  12. l. 4‏:32 كۆلۆسی 3‏:13