عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ئاگەهداری و هاندان
- 1
- د وی دەمی دا ب هزاران ژ مللەتی كومبوون، تا گەلەك ژ وان پێ ل ئێكودوو ددانان و گۆتە شاگردێن خۆ: «هوین ل بەراهیێ خۆ ژ هەڤیرترشێ فەریسییان بپارێزن، ئەو ژی دوورویاتییە.
- 2
- چ نەپەنی نینن، ئاشكرا نەبن و چ نهێنی نینن نەهێنە زانین.
- 3
- لەوما یا هەوە د تاریێ دا گۆتی، دێ د روناهیێ دا هێتە گوهـ لێ بوون و ئاخفتنێن هەوە د گوهان دا د ژۆرێن مالان دا گۆتین، دێ ل بانان هێنە گازی كرن.
- 4
- گەلی خۆشتڤیان، ئەز دبێژمە هەوە: هوین ژ وان نەترسن، یێن كو لەشی دكوژن، و پاشی ژ وێ پێڤە نەشێن چ دی بكەن.
- 5
- لێ ئەز دێ نیشا هەوەدەم ژ كێ بترسن: هوین ژ وی بترسن، ئەوێ دشێت پشتی كوشتنێ هەوە بهاڤێژیتە د دوزەخێ دا. بەلێ، ئەز دبێژمە هەوە هوین ژ وی بترسن.
- 6
- ما نە پێنچ چویچك دێ ب دوو فلسان هێنە فرۆتن؟ دگەل هندێ خودێ چ ژ وانا ژبیر ناكەت.
- 7
- لێ تاكو مویێن سەرێ هەوە دهژمارتینە. ئەڤجا نەترسن هوین ژ گەلەك چویچكان ب بهاترن.
- 8
- و ئەز دبێژمە هەوە هەر كەسێ ل پێش مرۆڤان دانێ ب من بدەت، كوڕێ مرۆڤ ژی دێ دانێ بەرامبەری فریشتێن خودێ بۆ وی دەت،
- 9
- لێ ئەو كەسێ بەرامبەری مرۆڤان من ماندەل بكەت، دێ بەرامبەری فریشتێن خودێ هێتە ماندەل كرن.
- 10
- و هەركەسێ پەیڤەكێ دژی كوڕێ مرۆڤ بێژیت، دێ لێ هێتە بورین. لێ ئەوێ جڤینان ل گیانێ پیرۆز بكەت لێ ناهێتە بورین.
- 11
- چ دەمێ هەوە بۆ كنیشتان و حوكمدار و دەستهەلاتداران راكێشن، خەما هندێ نەخون كا هوین دێ چەوا بەرەڤانیێ ژ خۆ كەن و چ بێژن.
- 12
- چنكو گیانێ پیرۆز هنگی دێ هەوە فێركەتن كا چ پێدڤییە هوین بێژن.»
- نموونەیا دەولەمەندێ دەبەنگ
- 13
- ئێكی ژ كومبوویان گۆتێ: «مامۆستا، بێژە برایێ من بلا بارا من ژ میراتەی بدەتە من.»
- 14
- ئینا گۆتێ: «هەی مرۆڤ، كێ ئەز ل سەر هەوە كریمە دادوەر و لێكڤەكەر؟»
- 15
- و پاشی گۆتە جڤاتێ: «هشیار بن خۆ ژ چاڤچنوكیێ بپارێزن، چنكو ژیانا مرۆڤی ب زێدەهیا سامانی نینە.»
- 16
- و پاشی نموونەیەك بۆ وان ئینا و گۆت: «ئەردێ كەسەكێ دەولەمەند ب زاخ كەفت.
- 17
- هزرێن خۆ كرن و گۆت: ”ئەز چ بكەم، من چ جهـ نینە ئەز بەرهەمێ خۆ تێدا كوار بكەم؟“
- 18
- و گۆت: ”ئەز دێ هوسا كەم: دێ كوارێن خۆ هەرێفینم، و یێن مەزنتر ئاڤاكەم، و دێ د وان كواران دا دەخل و دانێ خۆ كوار كەم
- 19
- ئەز دێ بێژمە خۆ: دەروونا من، تە دەخل و دانەكێ كوار كری بۆ گەلەك سالان یێ هەی، ئەڤجا تۆ بێهنا خۆ ڤەدە و بخو و ڤەخو و كەیفێ بكە.“
- 20
- لێ خودێ گۆتێ: ”هەی دەبەنگ، ئەڤ شەڤە دێ دەروونا تە ژ تە هێتە ستاندن. یێ تە خڕڤە كری دێ بۆ كێ مینیت؟“
- 21
- ئەها ئەڤە رەوشا وی كەسێ بۆ خۆ خڕڤە دكەت، و ل نك خودێ نە یێ دەولەمەندە.
- خودێ چاڤدێرێ مەیە
- 22
- پاشی گۆتە شاگردێن خۆ: «ژ بەر ڤی ئەگەری ئەز دبێژمە هەوە: هوین خەما ژیانا خۆ نەهەلگرن كا دێ چ خون، و خەما ب لەشێ خۆ ژی نەبەن كا دێ چ كەنە بەر خۆ،
- 23
- چنكو ژیان نە ب تنێ خوارنە، و لەش ژی نە بتنێ جل و بەرگە.
- 24
- هزرا خۆ د قەلەرەشكان دا بكەن: ئەو نە دچینن و نە ددورین، نە چ كوار و نە ژی كوگەهـ هەیە، لێ خودێ ب خودان دكەت، پا هوین چەند ژ بالندان ب بهاترن.
- 25
- لێ كی ژ هەوە ب خەمخوری ڤە دێ شێت دەمژمێرەكی ل سەر ژیێ خۆ درێژ كەت؟
- 26
- لەوما ئەگەر هوین نەشێن كارەكێ هوسا بچویك ژی بكەن، پا بۆچی هوین خەمێ ژ یێن مای دخون؟
- 27
- بەرێ خۆ بدەنە كولیلكان چەوا شین و گەش دبن: نە خەبتینێ و نە رستنێ دكەن، لێ ئەز دبێژمە هەوە: خۆ سلێمان ژی د هەمی مەزناهیا خۆ دا نەشیا تەمەت ئێك ژ وان جل و بەرگێن جوان بكەتە بەر خۆ.
- 28
- ئەگەر خودێ هوسا كراسی بكەتە بەر گیایەكێ كو ئەڤرۆ د زەڤیێ دایە و سوبەهی بۆ ناڤ كۆچكی بهێتە هاڤێتن، پا خودێ دێ چەند پتر هەوە ب جل ئێخیت، گەلی كێمباوەران!
- 29
- ئەڤجا پێدڤییە هوین بزاڤێ نەكەن بۆ خوارن و ڤەخوارنێ. هوین نیگەران نەبن.
- 30
- چنكو مللەتێن جیهانێ هەمی بۆ ڤان پێدڤیان بزاڤێ دكەن و بابێ هەوە دزانیت كا هەوە پێدڤی ب ڤان تشتان هەیە.
- 31
- بەلكو ب تنێ بزاڤێ بۆ پاشاتیا خودێ بكەن و ئەڤ تشتێن هەنێ ژی دێ بۆ هەوە هێنە دان.
- 32
- كەرێ پەزی یێ بچویك، هوین نەترسن، چنكو بابێ هەوە پێخۆش بوو كو پاشاتیێ بدەتە هەوە.
- 33
- ئەو سامانێ هەوە هەی بفرۆشن و بكەنە خێر. بۆ خۆ كیسكان چێكەن كو پویچ نەبن و گەنجینەكێ ل ئەسمانان كو چ جاران ب دوماهیك نەهێت، ل وی جهێ كو نە دز لێ نێزیك دبیت و نە خویرك دخوت.
- 34
- چنكو كا گەنجینا هەوە ل كیرێیە، دلێ هەوە ژی دێ ل وێرێ بیت.
- نموونەیا كۆلەیێن دەستپاك
- 35
- بلا چرایێن هەوە دهەلبن و ناڤتەنگێن هەوە دگرێدای بن.
- 36
- و بلا هوین وەكو وان مرۆڤان بن یێن كو ل هیڤیا خودانێ خۆ دمینن كا دێ كەنگی ژ داوەتێ ڤەگەڕیت، داكو دەمێ بهێت و دەرگەهی بقوتیت، ئێك سەر بۆ ڤەكەن.
- 37
- خوزیكێن وان كۆلەیان كو دەمێ خودانێ وان ڤەدگەڕیێت، وانا هشیار دبینیت. ب راستی دبێژمە هەوە: ئەو دێ ناڤتەنگا خۆ گرێدەت و دێ وان پالڤەكەت و خزمەتا وان كەت.
- 38
- و ئەگەر ل چوارێكا دووێ یان یا سیێ ژ شەڤێ هات و هوسا دیتن، ئەڤجا خوزیكێن وان كولەیان.
- 39
- لێ هوین ڤێ بزانن: ئەگەر خودانێ مالێ بزانیت كەنگی دێ دز كەڤیتە د مالا وی دا، ئەو دا مینیت هشیار و نەدهێلا مالا وی بهێتە كونكرن و دزین.
- 40
- هوین هەردەم ئامادە بن، چنكو كوڕێ مرۆڤ دێ د دەمەكێ وەسا دا ڤەگەڕیت، كو مرۆڤ هزر نەكەت.»
- 41
- پەتروسی گوتێ: «خودان، تۆ ڤێ نموونەیێ بۆ مە دبێژی یان بۆ هەمیا ب گشتی؟»
- 42
- خودانی گۆت: «ئەڤجا ئەو كییە بریكارێ دەستپاك و زانا كو خودان وی ل سەر خزمەتكارێن خۆ بەرپرس دانیت كو بارا وان ژ خوارنێ د دەمێ خۆ دا بدەتێ؟
- 43
- خوزیكا وی كۆلەی یێ كو خودانێ وی دەمێ ڤەدگەڕیێت، وی ببینیت ئەو یێ ڤی كاری دكەت
- 44
- ب راستی دبێژمە هەوە: ئەو دێ وی كەتە بەرپرسێ هەمی مالێ خۆ.
- 45
- لێ ئەگەر كۆلەی گۆتە خۆ: ”خودانێ من د ڤەگەڕیانا خۆ دا دێ گیرو بیت“ و دەست ب قوتانا خزمەتكاران بكەت، ژ ژن و مێران، و بخوت و ڤەخوت و سەرخۆش ببیت،
- 46
- دێ خودانێ ڤی كۆلەی ل رۆژەكێ ڤەگەڕیت كو ئەو هزر نەكەت و ل دەمژمێرەكی كو ئەو نزانیت و دێ وی پارچە پارچە كەت و چارەنڤیسێ وی كەتە دگەل بێباوەران.
- 47
- لێ ئەو كۆلەیێ حەزا مەزنێ خۆ دزانیت و ئەو خۆ ئامادە نەكەت و ل دویڤ حەزا وی نەكەت، ئەو دێ گەلەك هێتە قوتان،
- 48
- لێ ئەوێ نەزانیت، و تشتێن هەژی قوتانێ بكەت، ئەو دێ پیچەك هێتە قوتان. هەر كەسێ گەلەك بۆ هاتییە دان، دێ گەلەك ژێ هێتە خواستن، و یێ گەلەك ل نك دهێتە دانان، دێ گەلەكتر ژێ هێتە خواستن.
- نە ئاشتی بەلكو ژێكڤەبوون
- 49
- ئەزێ هاتیم دا ئاگری بهاڤێژمە سەر ئەردی، و من چەند حەزدكر ئەو ئاگرە هەلببا!
- 50
- و من تافیركرنەك یا هەی و ئەز چەند یێ تەنگاڤم تاكو ب جهـ بهێت!
- 51
- ما هوین وەسا هزر دكەن كو ئەز یێ هاتیم ئاشتیێ بینمە سەر رویێ ئەردی؟ ئەز دبێژمە هەوە، نەخێر، بەلكو ژێكڤەكرنێ.
- 52
- چنكو ژ ئەڤرۆ پێڤە، پێنج د مالەكێ دا دێ ژێكڤە بن، سێ ل سەر دووان، دوو ل سەر سێیان.
- 53
- باب دژی كوڕی و كوڕ دژی بابی، دایك دژی كچێ، و كچ دژی دایكێ، خەسی دژی بویكێ و بویك دژی خەسیێ دێ ل بەر ئێك راوەستن.»
- ڤاڤارتنا دەمان
- 54
- دیسان گۆتە كومێ: «دەمێ هوین عەورەكی ل رۆژئاڤا دبینن، ئێكسەر هوین هزر دكەن باران دێ هێت. ئەو ژی هوسا دبیت.
- 55
- و دەمێ بایێ باشوری دهێت، هوین دبێژن دێ گەرم بیت، ئەو ژی هوسا دبیت.
- 56
- گەلی دوورویان، هوین دزانن وێنێ ئەرد و ئەسمانی بخوینن، پا چەوا هوین نزانن ڤی سەردەمی بخوینن؟
- 57
- و بۆچی هوین ب خۆ دادیێ ناكەن، كا یا راست چییە؟
- 58
- دەمێ تۆ دگەل هەڤركێ خۆ قەستا هەرێمداری [a] دكەی، هەر ب رێڤە بزاڤێ بكە هوین پێك بهێن، نەكو تە بۆ دادوەری بكێشیت و دادوەر دێ تە دانە دەستی زێرەڤانێ دادگەهێ كەت، و ئەو دێ تە هاڤێتە دزیندانێ دا.
- 59
- ئەز دبێژمە تە: تۆ چ جاران ژ وێرێ دەرناكەڤی تاكو فلسێ دوماهیێ بدەی.»
- a. هەرێمدار بەرامبەری قایمقامییە ل سەردەمێ نهوو.
