عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- نڤێژا خودانی
- 1
- عیسای ل جهەكی نڤێژ دكر، و دەمێ نڤێژا خۆ ب دوماهی ئینای، ئێك ژ شاگردێن وی گۆتێ: «خودان، مە فێری نڤێژان بكە وەكو یوحەننای شاگردێن خۆ فێركرین.»
- 2
- ئینا گۆتە وان: «دەمێ هوین نڤێژێ دكەن بێژن: ”بابێ مە ئەوێ ل ئەسمانی؛ بلا ناڤێ تە پیرۆز بیت، بلا پاشاتیا تە بهێت،
- 3
- هەمی رۆژان نانێ مە یێ رۆژانە بدە مە
- 4
- و ل گونەهێن مە ببورە، چنكو ئەم ژی ل وی كەسی دبورین ئەوێ نەباشیێ دگەل مە دكەت و مە نەئێخە د تاقیكرنێ دا.“»
- 5
- و پاشی گۆتە وان: «كی ژ هەوە هەیە، هەڤالەك هەبیت و نیڤا شەڤێ بچیتە نك و بێژیتێ: ”هەڤال، سێ نانان ب قەر بدە من
- 6
- چنكو هەڤالەكێ من ب رێباری یێ هاتییە نك من و من چ نینە بدەمێ.“
- 7
- لێ هەڤالێ وی بەرسڤا وی بدەت و د ژۆرڤە بێژیتێ: ”سەرێ من گێژ نەكە، من دەرگەهێ گرتی ئەز و زارۆكێن خۆ یێن د ناڤ نڤینان دا، ئەز نەشێم رابم و بدەمە تە.“
- 8
- ئەز دبێژمە هەوە: ئەگەر نە ژ بەر هەڤالینیێ رابیت و بدەتێ، لێ ژ بەر رژدبوونا وی دێ رابیت و ل دویڤ پێدڤیا وی دەتێ.
- 9
- ئەڤجا ئەز دبێژمە هەوە: بخوازن، دێ وەرگرن، و بزاڤێ بكەن، دێ ب دەست هەوە ڤە هێت. دەرگەهی بقوتن، دێ بۆ هەوە هێتە ڤەكرن.
- 10
- ئەڤجا هەر كەسێ بخوازیت دێ وەرگریت و یێ بزاڤێ بكەت دێ بینیت و هەركەسێ بقوتیت دێ بۆ هێتە ڤەكرن.
- 11
- ئەڤجا ئەو كیژ بابە ژ هەوە، كوڕێ وی ماسیەكێ ژێ بخوازیت ئەو مارەكی ژ پێشڤە بدەتێ؟
- 12
- یان هێكەكێ ژێ بخوازیت دوویپشكەكی ژ پێشڤە بدەتێ؟
- 13
- ئەڤجا ئەگەر هوینێن خراب بزانن دانێن باش بدەنە زارۆكێن خۆ، پا چەند پتر بابێ ئەسمانی دێ گیانێ پیرۆز دەتە وان كەسێن ژێ بخوازن.»
- عیسا و بەعەلزەبول
- 14
- عیسای ئەجنەك ژ مرۆڤەكی دەرئێخست. وی ئەجنەی ئەو مرۆڤ لاڵ كربوو و دەمێ ئەجنە هاتییە دەرئێخستن، یێ لاڵ ئاخفت و هەمی حێبەتی بوون.
- 15
- لێ هندەكان ژ وان گۆت: «ئەو ئەجنان ب ”بەعەلزەبولی“ سەرۆكێ ئەجنان دەردئێخیت.»
- 16
- و هندەكێن دی داكو تاقی بكەن نیشانەك ژ ئەسمانی ژێ خواست.
- 17
- لێ عیسا د هزرێن وانا گەهشت و گۆتێ: «هەر پاشاتیا دووبەرەكی بكەڤیتە د ناڤ دا، دێ وێران بیت و هەر مالا دووبەرەكی بكەڤیتە د ناڤ دا دێ هەرفیت.
- 18
- ئەڤجا ئەگەر دووبەرەكی بكەڤیتە د ناڤ ئبلیسی ژی دا، دێ چەوا پاشاتیا خۆ راگریت؟ هەوە گۆت ئەز ب ”بەعەلزەبولی“ ئەجنان دەردئێخم
- 19
- لێ ئەگەر ئەز ب ”بەعەلزەبولی“ ئەجنان دەربئێخم، باشە كۆڕێن هەوە ب كێ دەردئێخن؟ ژ بەر هندێ ئەو دێ هەوە دادكەن.
- 20
- لێ ئەگەر من ب تلا خودێ ئەجنە دەرئێخستن، ئەڤجا پاشاتیا خودێ ب سەر هەوە دا هاتییە.
- 21
- دەمێ مرۆڤێ هێزدار ب چەكێن باش زێرەڤانیێ ل مالا خۆ دكەت، ناڤمالیا وی دێ د ئێمناهیێ دا بیت.
- 22
- لێ دەمێ مرۆڤەكێ ژ وی ب هێزتر هێرشێ بكەتێ و بشێتێ، ئەو چەكێن پشتا خۆ پێ راست دكر ژێ دستینیت، پاشی كەلەپویرتێ وی دابەش دكەت.
- 23
- هەركەسێ دگەل من نەبیت، ئەو دژی منە، و ئەوێ دگەل من خڕڤە نەكەت ئەو بەلاڤ دكەت.
- ڤەگەریانا گیانێ پیس
- 24
- پشتی گیانێ پیس ژ مرۆڤی دەردكەڤیت، دەربازی جهێن بێ ئاڤ دبیت و ل حەوانگەهەكێ دگەریێت، لێ نابینیت و دبێژیت: ”ئەز دێ زڤڕمە مالا خۆ ئەوا ئەز ژێ دەركەفتیم.“
- 25
- و دەمێ دگەهتە مالێ دبینیت یا مالشتی و خەملاندییە
- 26
- پاشی دچیت حەفت گیانێن دی یێن ژ خۆ پیستر دئینیت و د وی جهی دا ئاكنجی دبن و رەوشا وی مرۆڤی ژ یا بەرێ نەخۆشتر لێ دهێت.»
- 27
- دەمێ وی ئەڤ ئاخفتنە دكرن، ژنەكێ ژ ناڤ كومێ دەنگێ خۆ بلند كر و گۆت «خوزیكێن وی زكێ تۆ هەلگرتی و وان مەمكێن تە شیر ژێ ڤەخواری.»
- 28
- لێ عیسای گۆت: «بەلكو پتر خوزیكێن وان ئەوێن گوهـ ل پەیڤا خودێ دبن و پێ دكەن.»
- نیشانا یونس پێغەمبەر
- 29
- دەمێ خەلك پتر لێ خڕڤە دبوون، عیسای دەستپێكر و گۆت: «ئەڤ نفشە، نفشەكێ خرابە، نیشانەكێ دخوازن. و ژبلی نیشانا یونسی چ نیشان بۆ وان ناهێتە دان.
- 30
- كا چەوا یونس بۆ خەلكێ نەینەوا نیشانەك بوو، هەروەسا كوڕێ مرۆڤ ژی دێ بیتە نیشانا ڤی نفشی.
- 31
- شاژنا باشور د رۆژا دادكرنێ دا، دێ دگەل ڤی نفشی رابیت و تاوانبار كەت، چنكو ئەو یا ژ بنێ جیهانێ هاتی داكو گوهێ خۆ بدەتە دانای یا سلێمانی، و ئەها ئەڤە ئێكێ ژ سلێمانی مەزنتر ل ڤێرێیە.
- 32
- و دێ خەلكێ نەینەوا ل رۆژا دوماهیێ دگەل ڤی نفشی رابن و تاوانبار كەن، چنكو ئەو ژ بەر راگەهاندنا یونسی ل خۆ زڤرین، و ئەها ئەڤە ئێكێ ژ یونسی مەزنتر ل ڤێرێیە.
- چرایێ لەشی
- 33
- كەس نینە چرایەكی هەلكەت و دانیتە ئەردەكێ ڤەشارتی، یان دانیتە بن ئامانەكی، لێ دێ دانیتە ئەردەكێ بلند داكو ئەوێن دهێنە د ژۆرڤە روناهیێ ببینن.
- 34
- چاڤێ تە روناهیا لەشییە، ئەڤجا ئەگەر چاڤێ تە یێ ساخلەم بیت، لەشێ تە هەمی دێ یێ روهن بیت، لێ ئەگەر چاڤێ تە نە یێ باش بیت، دێ لەشێ تە ژی هەمی یێ تاری بیت.
- 35
- ئەڤجا هشیار بە نەكو روناهی یا د لەشێ تە دا ببیتە تاری
- 36
- ئەڤجا ئەگەر لەشێ تە هەمی روناهی بیت و چ رەخێن تاری لێ نەبن، دێ هەمی لەش روناهی بیت، دێ تۆ ب خۆ بێژی ئەڤە روناهیا چرایەكێیە ل لەشێ من ددەت.
- عیسا فەریسیان وماموستایێن دەستوری پاشڤە دبەت
- 37
- دەمێ عیسا دئاخفت، ئێكێ فەریسی داخوازی ژێ كر كو فراڤینێ ل نك بخوت. عیسا چوو مالا وی و پالڤەدا.
- 38
- لێ یێ فەریسی حێبەتی بوو، دەمێ دیتی عیسا ژ بەری خوارنێ دەستێن خۆ نە شویشتن.
- 39
- ئینا خودانی گۆتێ: هوین فەریسی دەرڤەییا پەرداغ و ئامانێن خۆ دشون، لێ د ناڤ خۆ دا هوین ژ چاڤچنوكی و خرابیێ دپڕن.
- 40
- هەی بێ مەژینوو، ما ئەوێ ژ دەرڤە چێكری ژ ناڤ دا ژی چێنەكرییە؟
- 41
- بەلكو تشتێن د ناڤ دا بدەنە ب خێر، ل وی دەمی هەمی تشت دێ بۆ هەوە پاقژ بن.
- 42
- لێ گەلی فەریسیان، نەخوزیكێن هەوە، هوین دەهێكا ژ پینگی و ژ رزیانكان و ژ هەر كەسكاتیەكێ ددەن، لێ هوین دادپەروەریێ و حەژێكرنا خودێ، ب پاش گوهێن خۆ ڤە دهاڤێن، پێدڤی بوو هەوە ئەو ژی كربا و یا دی ژی ب پشت گوهێن خۆ ڤە نەهاڤێت با.
- 43
- نەخوزیكێن هەوە گەلی فەریسیان، چنكو هوین ل كنیشتان گەلەك حەژ روینشتنا ل جهێن پێشیێ دكەن، و ل گورەپانێن گشتی گەلەك حەژ سلاڤان دكەن.
- 44
- نەخوزیكێن هەوە چنكو هوین وەكو گۆڕێن ڤەشارتینە، مرۆڤ د سەر را دچن و نزانن گۆڕە.»
- 45
- ئێك ژ زانایێن دەستوری گۆتێ: «مامۆستا، تۆ ب ڤێ گۆتنا خۆ مە ژی كرێت دكەی.»
- 46
- ئینا گۆت: «نەخوزیكێن هەوە ژی گەلی زانایێن دەستوری، چنكو هوین بارێن گران ل مرۆڤان دكەن، لێ هوین تلەكێ ژ تلێن خۆ نادەنە بەر.
- 47
- نەخوزیكێن هەوە، چنكو هوین گۆڕێن پێغەمبەران ئاڤا دكەن، و بابكالێن هەوە ئەو پیغەمبەرێن كوشتین.
- 48
- ئەڤجا هوین شاهدەیێ ددەن كو ب كارێن بابكالێن خۆ درازینە، چنكو وان پێغەمبەر كوشتن و هوین گۆڕێن وان ئاڤا دكەن،
- 49
- ژ بەر ڤێ چەندێ ژی دانای یا خودێ دگۆت: ”ئەز دێ پێغەمبەر و هنارتیان بۆ وان هنێرم لێ هندەك ژ وان دێ كوژن و تەپەسەر كەن،“
- 50
- تاكو هەمی خوینا ژ پێغەمبەران هاتییە رشتن هەر ژ دەستپێكرنا جیهانێ، دێ كەڤیتە سەر ستویێ ڤی نفشی،
- 51
- هەر ژ خوینا هابیلی تا خوینا زەكەریای، ئەوێ د ناڤبەرا قوربانگەهـ و پەرستگەهێ دا هاتییە كوشتن: ئەز دبێژمە هەوە: لێ ئەو خوین ل سەر ستویێ ڤی نفشییە.
- 52
- نەخوزیكێن هەوە گەلی زانایێن دەستوری، چنكو هەوە كلیلا زانینێ بر. نە هوین چوونە د ژۆرڤە و نە هەوە هێلا ئەوێن دچنە ژۆر، بچنە د ژۆرڤە.»
- 53
- و دەمێ ئەو ژ وێرێ دەركەفتی مامۆستایێن دەستوری و فەریسیان دەست ب تەنگاڤكرنا وی كرن و ئەو بۆ گەلەك بابەتان رادكێشا.
- 54
- و چاڤێ وان لێ بوو داكو ب ئاخفتنەكێ بئێخنە داڤان.
