عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- نموونەیا بریكارێ دەستپیس
- 1
- عیسای گۆتە شاگردێن خۆ: «مرۆڤەكێ دەولەمەند بریكارەك هەبوو، كاروبارێن وی ب رێڤە دبرن، و بۆ هاتە گۆتن كو بریكارێ وی مالێ وی پویچ دكەت.
- 2
- ئینا گازی بریكاری كر و پرسیار ژێ كر: ”ئەڤە چییە من دەرباری تە گوهـ لێ دبیت؟ كا تۆ ژمێریاریا بریكاریا خۆ بدە من. چنكو ژ ئەڤرۆ پێڤە چێنابیت تۆ بریكارێ من بی.“
- 3
- ئینا بریكاری گۆتە خۆ: ”ئەز چ بكەم، چنكو خودانێ من دێ بریكاریێ ژ من ستینیت؟ من هێز نینە كولانێ بكەم و شەرم دكەم خوازوكیێ بكەم.
- 4
- ئەها ئەز دزانم چ بكەم داكو دەمێ من ژ بریكاریێ دەردئێخیت، من د مالێن خۆ دا وەربگرن.“
- 5
- ئینا ئێك ئێكە گازی قەردارێن خودانێ خۆ كرن، و پرسیار ژ یێ ئێكێ كر: ”تۆ چەندێ قەردارێ خودانێ منی؟“
- 6
- بەرسڤ دا و گۆت: ”سەد جرنی یێن روینی.“ ئینا گۆتێ: ”چەكێ خۆ هەلگرە ب لەز روینە و بنڤیسە پێنجی.“
- 7
- پاشی گۆتە یێ دی: ”و تۆ چەندێ قەرداری؟“ بەرسڤ دا و گۆت: ”سەد فەردێن گەنمی.“ گۆتێ: ”چەكێ خۆ هەلگرە و بنڤیسە هەشتێ.“
- 8
- ئینا خودانێ وی پەسنا بریكارێ خۆ یێ دەستپیس كر، چنكو ب دانایی رەفتاری كر. چنكو كوڕێن ڤی سەردەمی دگەل ئێكودوو ژ كوڕێن روناهیێ داناترن.
- 9
- و ئەز دبێژمە هەوە: ب مالێ نەپاك بۆ خۆ هەڤالان پەیدا بكەن، داكو دەمێ مالێ هەوە نەما هوین ل مالێن هەتاهەتایێ بهێنە وەرگرتن.
- 10
- یێ كو ل سەر پیچەكێ دەستپاك بیت دێ ل سەر گەلەكێ ژی دەستپاك بیت و یێ ل سەر پیچەكێ دەستپاك نەبیت، ل سەر گەلەكێ ژی دەستپاك نابیت.
- 11
- ئەڤجا ئەگەر هوین ل سەر مالێ نەپاك دەستپاك نەبن، ئەو كییە دێ ل سەر دەولەمەندیا راستەقینە پشتا خۆ ب هەوە راست كەت؟
- 12
- و ئەگەر هوین ل سەر مالێ ئێكێ دی دەستپاك نەبن، ئەو كییە دێ مالێ هەوە دەتە هەوە؟
- 13
- چ خزمەتكار نەشێن خزمەتا دوو خودانان بكەن، چنكو یان دێ دلگرانیێ ژ ئێكی هەلگریت و حەژ یێ دی كەت، یان دێ گەهیتە ئێك ژ وان و یێ دی پشتگوهـ هاڤێت. هوین نەشێن خزمەتا خودێ و دراڤی بكەن.»
- 14
- و فەریسیان ژی ئەوێن حەژ دراڤی دكر، گوهـ ل ڤێ چەندێ هەمیێ بوو، ئینا ترانێن خۆ پێ كرن.
- 15
- ئەوی گۆتە وان: «هوین خۆ ل بەر چاڤێن خەلكێ راست دكەن لێ خودێ یا د دلێ هەوە دا دزانیت، ئەوێ خەلك وی ب پایەدار بزانیت، ئەو ل نك خودێ گەلەكێ پیسە.
- 16
- دەستور و پێغەمبەر تاكو دەمێ یوحەننای هەبوون. هەر ژ وی دەمی وەرە مزگینیا پاشاتیا خودێ یا دهێتە راگەهاندن، و هەر كەسەك ب زوریێ خۆ دكەتە د ناڤ دا.
- 17
- لێ نەمانا ئەرد و ئەسمانی ب ساناهیترە ژ كەفتنا ئێك خالا دەستوری.
- 18
- هەركەسێ هەڤژینا خۆ بەردەت و ژنەكا دی بینیت، دەهمەنپیسیێ دكەت، و هەركەسێ ژنەكا بەردای بینیت، ئەو دەهمەنپیسیێ دكەت.
- دەولەمەند و لەعازەر
- 19
- مرۆڤەكێ دەولەمەند هەبوو. بهاترین جلك دكرنە بەر خۆ و هەمی رۆژان د خۆشیەكا مەزن دا بوو.
- 20
- مرۆڤەكێ بەلەنگاز هەبوو دگۆتنێ لەعازەر ل بەر دەرێ وی دەولەمەندی كەفتبوو و كولكان لەشێ وی گرتبوو.
- 21
- دلێ وی نەساخی دچوویێ ژ بەرمایكێن مێزا دەولەمەندی تێر ببیت، سە ژی دهاتن و كولكێن وی دئالیستن.
- 22
- وەسا چێبوو ئەو بەلەنگاز مر و فریشتان هەلگرت و د هەمبێزا ئیبراهیمی دا دانا، و پاشی ئەوێ دەولەمەند ژی مر و هاتە ڤەشارتن.
- 23
- دەمێ د دوزەخێ دا دهاتە ئەشكەنجەدان سەرێ خۆ راكر، و چاڤێن وی ب ئیبراهیمی كەفتن و لەعازەر یێ د هەمبێزا وی دا
- 24
- ئینا گازی كر و گۆت: ”بابێ من ئیبراهیم، دلوڤانیێ ب من ببە و لەعازەری بهنێرە نك من داكو تبلا خۆ ب ئاڤێ تەر بكەت و ئەزمانێ من پێ سار بكەت، چنكو ئەز د ڤی ئاگری دا یێ ئازاران دخوم.“
- 25
- لێ ئیبراهیمی گۆت: ”كوڕێ من، بلا ل بیرا تە بیت كو تە خۆشیێن خۆ د ژیانا خۆ دا وەرگرتن، و لەعازەری ژی نەخۆشی كێشان، لێ ڤێ گاڤێ ئەو ل ڤێرێ یێ دهێتە دلخۆش كرن و تۆ یێ ئازاران دكێشی.
- 26
- سەرەرای ڤێ هەمیێ نهالەكا گەلەك مەزن د ناڤبەرا مە و هەوە دا یا هاتییە دانان، تاكو ئەوێن بڤێن ژ ڤێرێ بچن و دەربازی هەوە ببن نەشێن، هەروەسا ئەوێن رەخێ هەوە ژی نەشێن دەربازی رەخێ مە ببن.“
- 27
- ئینا گۆت: ”ئەڤجا پا بابو، ئەز داخوازێ ژ تە دكەم تۆ وی بهنێریە مالا بابێ من،
- 28
- چنكو من پێنچ برایێن هەین، داكو وان ئاگەهدار بكەت ئەو ژی نەهێنە ڤی جهێ ئازاردانێ.“
- 29
- لێ ئیبراهیمی گۆتێ: ”وان موسا و پێغەمبەرێن هەین، بلا گوهێ خۆ بدەنە وان.“
- 30
- ئینا گۆتێ: ”نە، بابێ من ئیبراهیم، ئەگەر ئێك ژ ناڤ مریان رابیت و بچیتە نك وان، دێ ل خۆ زڤرن.“
- 31
- ئیبراهیمی گۆتێ: ”ئەگەر ئەو گوهێ خۆ نەدەنە موسای و پێغەمبەران، خۆ ئەگەر ئێك ژ ناڤ مریان ژی رابیت ئەو باوەر ناكەن.“»
