عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- نموونەیا رەزڤانێن خراب
- 1
- ئینا ب نموونەیان دەست ب ئاخفتنێ كر و گۆت: «مرۆڤەكی رەزەك چێكر، دۆرێن وی تان كرن و ئویسلەیەك[a] د ناڤ دا كولا و برجەكا زێرەڤانیێ د ناڤ دا ئاڤاكر، پاشی ئەو رەز ب كرێ دا رەزڤانان و چوو وەغەرێ.
- 2
- دەمێ فێقی گەهشتنێ، خودانێ رەزی كۆلەیەك هنارتە نك رەزڤانان، داكو پشكا وی ژ بەرێ رەزی بدەنێ
- 3
- لێ وانا كۆلە گرت و قۆتان و دەست ڤالا فرێكر.
- 4
- پاشی ئەوی كۆلەیەكی دی هنارتە نك وان، لێ وان سەرێ وی شكاند و سڤكایەتی پێكر.
- 5
- پاشی ئێكێ دی هنارت و ئەو ژی كوشت، گەلەكێن دی هنارتن، لێ وان هندەك قوتان و هندەك كوشتن.
- 6
- ئەوی ئێك مابوو ئەو ژی كوڕێ وی یێ خۆشتڤی بوو، ئینا ل دوماهیێ هنارتە نك وان، ئەوی هزر دكر و دگۆت: ”دێ رێزێ ل كۆڕێ من گرن.“
- 7
- لێ وان رەزڤانان گۆتە ئێكودوو: ”ئەڤە میراتگرە، وەرن دا بكوژین و دێ میرات بۆ مە مینیت.“
- 8
- ئینا وان گرت و كوشت و هاڤێتە ژ دەرڤەی رەزی.
- 9
- ئەڤجا خودانێ رەزی دێ چ كەت؟ ئەو دێ هێتن رەزڤانان كوژیت و رەزی دەتە دەست هندەكێن دی.
- 10
- ئەرێ ما هەوە ئەڤ نڤیسارە نەخواندینە:
”ئەو بەرێ هۆستایان رەتكری
ئەو بوو بەرێ سەرێ كۆژی. - 11
- ئەڤە ژ لایێ خودانی ڤە چێبوو،
و ل پێش چاڤێن مە كارەكێ حێبەتییە.“» - 12
- و ئەوان بزاڤ كر داكو بگرن، چنكو دزانی یێ بەحسێ وان دكەت، لێ ژ كومبوویان ترسیان ئینا هێلان و چوون.
- دانا خویكێ بۆ قەیسەری
- 13
- و پاشی هندەك ژ فەریسیان و تاگرێن هێرودێسی فرێكرنە نك داكو ب ئاخفتنەكێ بئێخنە داڤان.
- 14
- ئینا هاتن و گۆتنێ: «مامۆستا، ئەم دزانین تۆ یێ راستگۆی. تۆ هەمیان وەكی ئێك دبینی و تۆ بەرێ خۆ نادەیە ئاستێن مرۆڤان، بەلكو تۆ ب راستیێ خەلكی فێری رێكا خودێ دكەی. ئەرێ چێدبیت خویك بۆ قەیسەری بهێتە دان یان نە؟ ئەم بدەینێ یان نە؟»
- 15
- لێ عیسای ب فێلا وان زانی و گۆتێ: «بۆچی هوین من تاقی دكەن؟ دینارەكێ بینن دا بەرێ خۆ بدەمێ.»
- 16
- دینارەك دانەڤێ، ئینا گۆت: «ئەڤ وێنە و ناسناڤێن كێنە؟» گۆتن: «یێن قەیسەرینە.»
- 17
- ئەڤجا عیسای گۆتە وان: «یێ قەیسەری بدەنە قەیسەری و یێ خودێ بدەنە خودێ» و ئەو ژ وی گوهشین.
- پرس ل دوور رابوونا مریان
- 18
- سەدوقی ئەوێن دبێژن رابوونا مریان نینە، هندەك ژ وان هاتنە نك و پرسیار ژێ كرن:
- 19
- «مامۆستا، موسای بۆ مە یا نڤیسی: ئەگەر برایێ ئێكی مر ژنا وی ما و چ زارۆك نەبوون، یا ل سەر برایێ وی ئەوە ژنبرا خۆ مار بكەت و دویندەهەكی ل سەر ناڤێ برایێ خۆ ژێ راكەت.
- 20
- ئەڤجا حەفت برا هەبوون: یێ ئێكێ ژنەك ئینا و بێ زارۆك مر؛
- 21
- ئینا یێ دووێ ماركر و ئەو ژی بێ زارۆك مر و هەروەسا یێ سیێ ژی
- 22
- و تا یێ حەفتێ مر و زارۆك ژێ نەبوون و پاشی ژنك ژی مر.
- 23
- ئەرێ ل رۆژا رابوونێ، دەمێ رادبنەڤە ئەو ژنك دێ بیتە هەڤژینا كێ؟ چنكو ژنا هەر حەفتان بوو.»
- 24
- ئینا عیسای بەرسڤا وان دا: «ما نە ژ بەر ڤێ هوین شاش دبن، هوین نە د نڤیساران و نە د شیانا خودێ دگەهن.
- 25
- دەمێ مرۆڤ ژ مرنێ رادبنەڤە نە ژنێ دئینن و نە شوی دكەن، لێ دێ وەكو فریشتێن ل ئەسمانان لێ هێن.
- 26
- و دەربارەی مریان و رابوونا وان، ما هەوە سەرهاتیا تەراشێ د پەرتوكا موسای دا نە خواندییە، كا چەوا خودێ دگەل وی ئاخفت و گۆتێ: ”ئەز خودایێ ئیبراهیمی و ئیسحاقی و یەعقوبیمە“ ؟
- 27
- ئەو نە خودایێ مریایە، لێ ئەو خودایێ زیندیایە. شاشیا هەوە گەلەك یا مەزنە.»
- فەرمانا پێشین
- 28
- ئێك ژ مامۆستایێن دەستوری ل وێرێ بوو، گوهـ ل كێش و ڤەكێشا وان بوو و زانی عیسای ب رەنگەكێ باش بەرسڤا سەدوقیان دابوو، خۆ نێزیك كر و پرسیار ژێ كر: «كیش فەرمان ل پێشیا هەمیانە؟»
- 29
- عیسای بەرسڤ دا: «فەرمانا پێشین ئەڤەیە: ئیسرائیل، گوهێ خۆ بدەیێ، خودان خودایێ مەیە ئێك خودانە.
- 30
- حەژ خودان خودایێ خۆ بكە ب هەمی دل و ب هەمی دەروون و ب هەمی هزر و ب هەمی هێزا خۆ.
- 31
- و فەرمانا دووێ ئەڤەیە: حەژ نێزیكێ خۆ بكە، وەكو تۆ حەژ خۆ دكەی. چ فەرمان ژ وان هەردووان مەزنتر نینن.»
- 32
- ئینا مامۆستایێ دەستوری گۆتێ: «باشە مامۆستا، ئەڤە تە ب راستی گۆت! خودێ ئێكە و كەسەك ژ وی پێڤەتر نینە.
- 33
- و حەژێكرنا مرۆڤی بۆ خودێ ژ هەمی دل و ژ هەمی هزر و ژ هەمی شیانێ، و حەژێكرنا مرۆڤی بۆ نێزیكێ خۆ هەر وەكی حەژ خۆ دكەت، فەرترە ژ هەمی سەرژێكریێن سۆتنێ و قوربانان.»
- 34
- و عیسای دیت وی ب شەهرەزایی بەرسڤ دا و گۆتە وی: «تۆ ژ پاشاتیا خودێ نە یێ دویری.» و ئێدی كەس نەدوێریا پرسیاران ژێ بكەت.
- مەسیح و داوود
- 35
- و دەمێ عیسای د ناڤ پەرستگەهێ دا فێركرن دكر گۆت: «چەوا مامۆستایێن دەستوری دبێژن مەسیح كوڕێ داوودییە؟
- 36
- داوودی ب خۆ ب گیانێ پیرۆز گۆت:
خودانی گۆتە خودانێ من: ل دەستێ من یێ راستێ روینە هەتا كو دوژمنێن تە بئێخمە ل بن پێن تە. - 37
- داوود ب خۆ دبێژیتە مەسیحی خودان، ئەڤجا چەوا مەسیح كوڕێ وییە؟» وی جەماوەرێ مەزن گەلەك ب دلخۆشی گوهداریا وی دكر.
- هشیاربوون ژ مامۆستایێن دەستوری
- 38
- ئەوی د فێركرنا خۆ دا گۆت: «ژ مامۆستایێن دەستوری هشیار بن، ئەوێن حەز دكەن: گەریانێ ب جلكێن ماقویل بكەن، ل بازاری سلاڤ لێ بهێنە كرن،
- 39
- هەروەسا ل كنیشتان ل رێزێن پێشین روینن و ل مێڤانداریان ل سەرێ ژوری بن.
- 40
- ئەو مالێ بیژنان دخون، و ژ بەر رویمەتیێ نڤێژێ درێژ دكەن. سزایێ ڤان دێ گرانتر بیت.»
- بیژنا هەژار
- 41
- و دەمێ عیسا بەرامبەری گەنجینا پەرستگەهێ روینشتی، دیت كا چەوا خەلكی پارە دهاڤێتنە د گەنجینێ دا و گەلەك ژ دەولەمەندان پارەكی زۆر دبەردانە تێدا.
- 42
- پاشی بیژنەكا هەژار هات و دوو فلس بەردانە د گەنجینێ دا،
- 43
- ئینا گازی كرە شاگردێن خۆ و گۆتە وان: «ئەز ب راستی دبێژمە هەوە، ئەڤێ بیژنا هەژار ژ هەمیان پتر دان
- 44
- چنكو هەمیان ژ سامانێ خۆ یێ زێدە دان، لێ ئەوێ ژ دەستكورتیا خۆ چ دراڤێ هەی دا، ئەو دراڤێ ژیانا وێ هەمی ل سەر.»
- a. ئویسلە: ئالاڤێ گڤاشتنا ترییە ژ بەری دهێتە چێكرن.
