عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ساخكرنا فالنجیەكی ل كەفەرناحومێ
- 1
- پشتی چەند رۆژان، عیسا ڤەگەڕیا ڤە باژێرێ كەفەرناحوم، خەلكی گوهـ لێ بوو، كو ئەو یێ ل مال.
- 2
- ئینا گەلەك ژ وان لێ كوم ڤە بوون تا ل بەر دەری ژی جهی نەدكر، و وی پەیڤ بۆ وان دگۆت.
- 3
- هندەك هاتن و فالنجیەك دگەل دا بوو و چوار زەلامان هەلگرتبوو
- 4
- لێ ژ بەر بوشاتیێ، نەدشیان نێزیكی وی بن و چوونە وی جهێ عیسا تێدا و بان كون كر و مرۆڤێ فالنجی ب نڤین ڤە داهێلانە خوارێ.
- 5
- دەمێ عیسای باوەریا وان دیتی، گۆتە یێ فالنجی: «كوڕێ من، ل گونەهێن تە هاتە بورین!»
- 6
- هندەك مامۆستایێن دەستوری د ناڤبەرا وان دا دروینشتی بوون، و د دلێ خۆ دا دگۆتن:
- 7
- « چەوا ئەڤ زەلامە ئاخفتنەكا هوسا دبێژیت؟ ئەوێ كوفری یا دكەت! ما كی ژ خودێ پێڤەتر دشێت ل گونەهان ببوریت؟»
- 8
- د جهـ دا عیسا ب گیانێ خۆ زانی ئەو چ هزردكەن، ئەڤجا گۆتە وان: «بۆچی هوین هوسا د دلێ خۆ دا هزران دكەن؟
- 9
- كی ژ ڤان ب ساناهیترە: كو بۆ ڤی فالنجی بهێتە گۆتن: ”ل گونەهێن تە هاتە بورین“ یان ژی بۆ وی بهێتە گۆتن: ”رابە نڤینێن خۆ هەلگرە و ب رێڤە هەڕە“؟
- 10
- لێ دا هوین بزانن، كو كوڕێ مرۆڤ دەستهەلاتیا ل سەر ئەردی هەی، دا ل گونەهان ببوریت» - ئەڤجا گۆتە یێ فالنجی -
- 11
- «دبێژمە تە: رابە و نڤینێن خۆ هەلگرە و هەڕە مالا خۆ.»
- 12
- د گاڤێ دا ئەو زەلام رابوو و نڤینێن خۆ هەلگرتن، و ل پێش چاڤێن هەمیان دەركەفت. ئینا هەمی گوهشین و خودێ مەزن دكر و دگۆتن: «مە چ جاران وەكو ڤی تشتی نەدیتییە!»
- عیسا داخوازیا لاوی دكەت
- 13
- جارەكا دی عیسا دەركەفتە كنارێ گۆلێ. و خەلك هەمی هاتنە نك و وی دەست ب فێركرنا وان كر.
- 14
- و دەمێ ئەو ب رێڤە دچوو، لاوی یێ كوڕێ حەلفی دیت یێ ل جهێ باج كومكرنێ روینشتییە و عیسای گۆتە وی: «ل دویڤ من وەرە!» رابوو و كەفتە دویڤ.
- 15
- دەمێ عیسا ل سەر سفرێ ل مالا لاوی، گەلەك باجگر و گونەهكار، دگەل وی و شاگردێن وی دروینشتی بوون، چنكو ئەوێن ل دویڤ وی كەفتین گەلەك بوون.
- 16
- دەمێ مامۆستایێن دەستوری یێن فەریسی دیتین عیسا یێ دگەل گونەهكار و باجگران خوارنێ دخوت، گۆتنە شاگردێن وی: «ئەرێ بۆچی دگەل باجگران و گونەهكاران خوارنێ دخوت!»
- 17
- دەمێ عیسای گوهـ لێ بووی، گۆتێ: «مرۆڤێن ساخلەم پێدڤی ب نوژداری نینە، بەلێ مرۆڤێن نەساخ دپێدڤینە. ئەز نەهاتیمە داكو داخوازیا راستداران بكەم، بەلكو دا داخوازیا گونەهكاران بكەم.»
- رۆژی
- 18
- شاگردێن یوحەننای و فەریسی ب رۆژی بوون، ئەڤجا هندەك مرۆڤ هاتنە نك عیسای و گۆتنێ: «بۆچی شاگردێن فەریسیان و شاگردێن یوحەننای رۆژیان دگرن، لێ شاگردێن تە رۆژیان ناگرن؟»
- 19
- گۆتە وان: «ئەرێ ما مالا داوەتێ دشێن ب رۆژی بن و زاڤا د ناڤبەرا وان دا بیت؟ هندی زاڤا د ناڤبەرا وان دا بیت، ئەو نەشێن ب رۆژی بن.
- 20
- لێ د رۆژێن داهاتی دا، زاڤا دێ ژ ناڤ وان هێتە راكرن، ئەو دێ ل وێ رۆژێ ب رۆژی بن.
- 21
- كەس كراسەكێ كەڤن ب پاتەكێ نوی پنی ناكەت، نەكو پارچا نوی تێك بچیت و ژ كراسێ كەڤن بخوت و كون مەزنتر لێ بهێت.
- 22
- و كەس مەیا نوی ناكەتە د مەشكێن كەڤن دا، نەكو ئەو مەیا نوی وان مەشكان بدڕینیت، ئەڤجا ئەو مەیە دێ هێتە رشتن و ئەو مەشك دێ پویچ بن. بەلكو مەیا نوی دكەنە د مەشكێن نوی دا.»
- خودانێ شەمبیێ
- 23
- د شەمبیێ دا، عیسا د ناڤ زەڤیان را دبوری و شاگردێن وی ب رێڤە دەست ب گولیكرنێ كر.
- 24
- ئینا فەریسیان گۆتە وی: «بەرێ خۆ بدێ! بۆچی وێ دكەن، ئەوا كو چێ نابیت ل شەمبیێ بهێتە كرن؟»
- 25
- گۆتە وان: «ئەرێ ما هەوە ئەوا داوودی كری قەت نەخواندییە، ئەو و ئەوێن دگەل دا پێدڤی و برسی بووین،
- 26
- چەوا ل سەردەمێ ئەبیاتارێ سەرۆكێ كاهنان، ئەو چوو مالا خودێ و نانێ پێشكێشكرنێ خوار و دا یێن دگەل خۆ ژی و ئەڤ نانە ژبلی كاهنان چێ نەدبوو كەس بخوت.»
- 27
- و وی گۆتە وان: «شەمبی پێخەمەت مرۆڤان یا هاتییە چێكرن نە مرۆڤ پێخەمەت شەمبیێ.
- 28
- ئەڤجا كوڕێ مرۆڤ خودانێ شەمبیێیە ژی.»
