عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ساخكرن د شەمبیێ دا
- 1
- عیسا جارەكا دی چوو د كنیشتێ ڤە، زەلامەكێ دەست هشك ل وێرێ بوو.
- 2
- ئەوان زێرەڤانیا وی دكر، دا ببینن كا دێ وی ل شەمبیێ ساخ كەت، دا گونەهبار بكەن.
- 3
- گۆتە زەلامێ دەست هشك: «رابە ل نیڤا كنیشتێ راوەستە!»
- 4
- گۆتە ئامادەبوویان: «د رۆژا شەمبی دا، ئەرێ كرنا كارێ باش دروستە، یان كارێ خراب؟ قورتالكرنا گیانەكی یانژی ژناڤبرنا وی؟» لێ ئەو بێ دەنگ بوون.
- 5
- عیسا ب توڕەبوون ڤە ل وان زڤڕی و ژ سەرهشكیا وان خەمگین بوو، گۆتە زەلامی: «دەستێ خۆ درێژ كە!» ئینا دەستێ خۆ درێژ كر، دەستێ وی ساخ بووڤە.
- 6
- ئینا فەریسی دەركەفتن و د گاڤێ دا دگەل تاگرێن هێرودێسی دەست ب پیلان دانانێ كرن، دا عیسای بكوژن.
- جەماوەرەكێ مەزن ل كنارێ گۆلێ
- 7
- عیسا و شاگردێن خۆ چوونە گۆلێ و جەماوەرەكێ مەزن ژ جەلیل و یەهودیایێ ب دویڤ كەفتن،
- 8
- ژ ئورشەلیمێ، ئەدومیێ، رەخێ دی یێ رویبارێ ئوردن و ژ دەوروبەررێن سور و سایدایێ ژی، دەمێ خەلكی گوهـ ل وان تشتێن كرین بووی هاتنە نك وی.
- 9
- ژ بەر وی گێلەشوكا مەزن، عیسای گۆتە شاگردێن خۆ، كو بۆ وی قاییكەكا بچویك ئامادە بكەن، داكو فشار لێ نەهێتە كرن،
- 10
- چنكو وی گەلەك خەلك ساخ كربوون، لەوما هەر ئێكێ نەساخ ژی بزاڤ دكر خۆ نێزیكی عیسای بكەت، داكو دەستێ خۆ بگەهینیتێ.
- 11
- دەمێ گیانێن پیس ئەو ددیت، بەرامبەری وی دكەفتنە سەر چوكێن خۆ و دكرنە قێری: «تۆ كوڕێ خودێی!»
- 12
- لێ عیسای گەلەك هوشداری ل وان دكر كو بۆ كەسێ نەبێژن ئەو كی بوو.
- هەلبژارتنا دوازدە هنارتیان
- 13
- پاشی عیسا ب سەر چیای كەفت و گازی وان كر، ئەوێن وی دڤیان. ئەو ژی چوونە نك وی.
- 14
- دوازدە شاگردە دەست نیشان كرن، دا دگەل وی بن و وان بهنێریت دا مزگینیێ رابگەهینن
- 15
- و وان دەستهەلات بۆ دەرئێخستنا ئەجنان هەبیت.
- 16
- ئەڤە ئەو دوازدەنە ئەوێن وی دەست نیشان كرین: شەمعون ئەوێ ناڤێ وی كرییە «پەتروس»
- 17
- و یەعقوب و برایێ وی یوحەننا، كوڕێن زەبەدی، ناڤێ وان كرە بووانەرجس ئانكو كوڕێن بریسیێ
- 18
- و ئەندراوس، فیلیپوس، بەرتۆلوماوس، مەتتا، توما، یەعقوبێ كوڕێ حەلفی، تەداوس، شەمعونێ وەلاتپەروەر
- 19
- و یەهودایێ ئەسخەریوتی ئەوێ بێبەختی ل عیسای كری.
- عیسا و بەعەلزەبول
- 20
- پاشی عیسا هاتە مالەكێ و جارەكا دی جەماوەرەك لێ خڕڤەبوو، تاكو ئێدی عیسا و شاگردێن وی نەشیاین خوارنێ ژی بخون.
- 21
- دەمێ مرۆڤێن وی گوهـ لێ بووی، هاتن دا ببەن، چنكو دگۆتن: «ئەو یێ تێكچووی.»
- 22
- مامۆستایێن دەستوری ئەوێن ژ ئورشەلیمێ هاتینە خوار دگۆتن: «بەعەلزەبول یێ هنگافتی» و «ب هێزا سەرۆكێ ئەجنان، ئەجنان دەردئێخیت.»
- 23
- ئەڤجا عیسای گازی وان كر و ب نموونەیان دگەل وان ئاخفت و گۆت: «ئبلیس چەوا دشێت ئبلیسی دەربئێخیت؟
- 24
- ئەگەر پاشاتیەك هاتە پارچەكرن، ئەو نەشێت خۆ رابگریت
- 25
- یان مالەك هاتە پارچەكرن ئەو مال نەشێت خۆ رابگریت.
- 26
- و ئەگەر ئبلیس دژی خۆ راوەستا و دابەش بوو ئەو نەشێت خۆ رابگریت، بەلكو ئەو دێ نەمانا وی بیت.
- 27
- لێ كەس نەشێت بچیتە مالا زەلامەكێ ب هێز و كەلوپەلێن وی تالان بكەت، ئەگەر ئەو وی زەلامێ ب هێز ل بەراهیێ گرێنەدەت و پشتی هنگی مالا وی تالان بكەت.
- 28
- راستیێ بۆ هەوە بێژم: هەر گونەهەك و هەر كوفریەك یا چەوا بیت، خودێ دێ ل مرۆڤان بوریت،
- 29
- لێ ئەوێ كوفریان ب گیانێ پیرۆز بكەت، لێبورینا وی چ جاران نینە، بەلكو گونەها وی دێ هەروهەر مینیت.»
- 30
- ب ڤێ ئاخفتنێ بەرسڤا وانا دا ئەوێن دگۆتن: «گیانەكێ پیس یێ هنگافتی.»
- دایك و برایێن عیسای
- 31
- د وێ چەندێ دا دایك و برایێن وی هاتن، و ل دەرڤەی مالێ راوەستان و هنارتنە د دویڤ را
- 32
- و جەماوەرەك ل دۆرێن وی یێ روینشتی بوو، گۆتنە وی: «ئەڤە دایك و برایێن تە یێ ژ دەرڤە داخوازا تە دكەن.»
- 33
- بەرسڤا وان دا: «دایكا من كییە و برایێن من كینە؟»
- 34
- بەرێ خۆ دا ئەوێن ل دەوروبەرێن وی دروینشتی و گۆت: «ئەها ئەڤەنە دایك و برایێن من!
- 35
- ئەوێ ب حەزا خودێ بكەت، ئەو برا و خویشك و دایكا منە.»
