عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- مرنا لەعازەری:
- 1
- مرۆڤەك نە ساخ بوو ناڤێ وی لەعازەر بوو، ئەو ژ بەیت عەنیا بوو گوندێ مەریەمێ و مەرتایا خویشكا وێ.
- 2
- و ئەڤ مەریەمە ئەو بوو ئەڤا ب گولاڤێ پێن عیسای روین كرین و ب پرچا خۆ پاقژ كرین و لەعازەر برایێ وێ بوو.
- 3
- هەردوو خویشكان هنارتە دویڤ عیسای و گۆتنێ: «خودان، ئەوێ تۆ حەز ژێ دكەی یێ نەساخە.»
- 4
- دەمێ گوهـ ل ڤێ چەندێ بووی گۆت: «ئەڤ نەساخییە ب مرنێ ب دوماهیك ناهێت، بەلێ دێ بیتە مەزناهی بۆ خودێ و مەزناهی بۆ كوڕێ خودێ ب رێیا وێ.»
- 5
- و عیسای ژی حەز ژ مەرتایێ و خویشكا وێ و لەعازەری دكر.
- 6
- ئەو دوو رۆژێن دی ژی ل جهێ خۆ ما پشتی ب نەساخیا لەعازەری زانی.
- 7
- پشتی هنگی گۆتە شاگردێن خۆ: «دا بزڤرینە دەڤەرا یەهودیایێ.»
- 8
- شاگردان گۆتێ: «ماموستا، دێ زڤریە یەهودیایێ و بەری دەمەكێ كورت جوهیان دڤیا تە بەردە باران بكەن؟»
- 9
- عیسای بەرسڤ دا: «ما رۆژ نە دوازدە دەمژمێرن؟ ئەڤجا ئەڤێ ب رۆژێ بگەڕیێت ناهلنگڤت، چنكو روناهیا ڤێ جیهانێ دبینیت.
- 10
- بەلێ ئەوێ ب شەڤێ بگەڕیێت دێ هلنگڤت، چنكو روناهی تێدا نینە.»
- 11
- پاشی عیسای گۆت: «لەعازەر خۆشتڤیێ مە یێ نڤستی، بەلێ ئەز دێ چم دا وی راكەم.»
- 12
- شاگردان گۆتێ: «ئەی خودان، ئەگەر ئەو نڤستبیت، دێ چاك بیتە ڤە.»
- 13
- و مەبەستا عیسای مرنا لەعازەری بوو، بەلێ شاگردان هزر دكر كو یێ نڤستییە.
- 14
- پشتی هنگی گۆتە وان: «لەعازەر یێ مری،
- 15
- و ژ بەر هەوە ئەزێ دلخۆشم چنكو ئەز ل وێرێ نەبووم، دا هوین باوەریێ بینن. دا بچینە نك!»
- 16
- توما ئەوێ دگۆتنێ دێدیموس گۆتە شاگردێن دی: «بلا ئەم ژی بچین دا دگەل وی بمرین.»
- عیسا دهێتە تازیا خویشكێن لەعازەری:
- 17
- و دەمێ عیسا گەهشتییە بەیت عەنیا ئەو چوار رۆژ بوو لەعازەر هاتییە ڤەشارتن.
- 18
- و بەیت عەنیا دۆروبەری سێ كیلۆمەتران ژ ئورشەلیمێ یا دویر بوو.
- 19
- و گەلەك جوهی هاتبوونە تازیا مەرتایێ و خویشكا وێ.
- 20
- دەمێ مەرتایێ زانی كو عیسایێ هاتی، چوو پێشوازیا وی، بەلێ مەریەم ل مال ما.
- 21
- و مەرتایێ گۆتە عیسای: «ئەی خودان، ئەگەر تۆ ل ڤێرێ بای برایێ من نەدمر.
- 22
- و نوكە ژی ئەزا پشتراستم هەر چ تشتێ تۆ ژ خودێ داخواز بكەی دێ دەتە تە.»
- 23
- عیسای بەرسڤ دا: «دێ برایێ تە رابیت.»
- 24
- مەرتایێ گۆتێ: «ئەز دزانم ئەو دێ ل رابوونێ رۆژا دوماهیێ رابیت.»
- 25
- عیسای گۆتە وێ: «ئەزم رابوون و ژیان. یێ باوەریێ ب من بینیت، ئەگەر مر ژی دێ ساخ بیتە ڤە.
- 26
- و یێ ساخ بیت و باوەریێ ب من بینیت نامریت هەتا هەتایێ. ئەرێ تۆ باوەریێ ب ڤێ دئینی؟»
- 27
- بەرسڤا وی دا: «بەلێ ئەی خودان، من باوەریا ئینای كو تۆ مەسیحی كوڕێ خودێیی ئەڤێ هاتییە ڤێ جیهانێ.»
- 28
- پشتی ئەڤە گۆتی، چوو گازی مەریەما خویشكا خۆ كر و ب دزی ڤە گۆتێ: «مامۆستایێ ل ڤێرێ، و یێ داخوازا تە دكەت.»
- 29
- دەمێ ئەڤە گوهـ لێ بووی راست رابوو ڤە و ب لەز چوو نك عیسای.
- 30
- و هێشتا ئەو نە گەهشتبوو گوندی بەلێ ل وی جهی بوو ئەوێ مەرتا لێ دیتی.
- 31
- دەمێ ئەو جوهی یێن هاتینە تازیا وان ئەو دیتی رابوویە ڤە و ب لەز دەركەفتی، ل دویڤ چوون چنكو وان هزر كر دێ چیتە نك گۆڕی كەتە گری.
- 32
- و دەمێ مەریەم گەهشتیە وی جهێ عیسا لێ دیتی خۆ هاڤێتە بەر پێیان و گۆتێ: «ئەی خودان، ئەگەر تۆ ل ڤێرێ بای برایێ من نەدمر.»
- 33
- دەمێ عیسای ئەو دیتی یا دكەتە گری و جوهیێن دگەل ژی دكرنە گری ب دلەكی كزری ئەرزنك راهێلان.
- 34
- پرسیار كر: «هەوە ل كێرێ ڤەشارتییە؟» بەرسڤ دا: «وەرە ئەی خودان و بنێرە.»
- 35
- و عیسای كرە گری.
- 36
- ئەڤجا جوهیان گۆتە ئێكودوو: «بنێرن چەند حەز ژێ دكر.»
- 37
- بەلێ هندەكان پرسیار كر: «ئەرێ ما ئەڤێ چاڤێن كۆرەی ساخ كرین نەدشیا لەعازەری ژی ژ مرنێ بپارێزت؟»
- عیسا لەعازەری ژ مرنێ رادكەت:
- 38
- ئەڤجا جارەكا دی عیسای ئەرزنك راهێلان. و نێزیكی گۆڕی بوو، و ئەو ژی شكەفتەك بوو، بەرەك ل سەر دەرگەهێ وێ بوو.
- 39
- گۆت: «بەری راكەن!» مەرتایا خویشكا مری گۆت: «ئەی خودان، ئەڤە چوار رۆژە ئەو د ڤێرێ دا. نوكە گەنی بوویە.»
- 40
- عیسای گۆت: «ما من نەگۆتە تە: ئەگەر تە باوەری ئینا دێ مەزناهیا خودێ بینی؟»
- 41
- ئەڤجا بەر راكر. و عیسای چاڤێن خۆ بەرەڤ ئەسمانان بلند كرن و گۆت: «ئەی باب، ئەز سوپاسیا تە دكەم چنكو تە گوهـ ل من بوو.
- 42
- و من دزانی تۆ هەردەم گوهـ ددەیە داخوازێن من، بەلێ من ئەڤە گۆت ژ بەر ئەڤێن رەخ و دۆرێن من دا باوەریێ بینن كو تە ئەزێ هنارتیم.»
- 43
- پاشی ب دەنگەكێ بلند گازی كر: «ئەی لەعازەر، دەركەڤە!»
- 44
- و مری دەركەفت و كفن ل دەست و پێن وی د پێچای بوون و دەرسۆك ل سەرێ وی بوو. عیسای گۆتە ئەڤێن ل دەورێن وی: «ڤەكەن و بهێلن بچیت.»
- پیلان ژ بۆ كوشتنا عیسای:
- 45
- و گەلەك جوهی یێن هاتینە تازیا مەریەمێ باوەری پێ ئینا دەمێ وان ئەو كارێ كری دیتی.
- 46
- بەلێ هندەك ژ وان چوونە نك فەریسیان ئەو كارێن عیسای كرین گۆتنێ.
- 47
- ئەڤجا سەرۆكێن كاهنان و فەریسیان جڤاتەك گرێدا و گۆتن: «ئەم چ بكەین؟ ئەڤ زەلامە یێ گەلەك نیشانان دكەت.
- 48
- و ئەگەر مە هێلا وەسا دێ هەمی باوەریێ پێ ئینن دێ رومی هێن و نەتەوێ مە وێران كەن.»
- 49
- ئێك ژ وان، ئەو ژی قیافا بوو سەرۆكێ كاهنان ل وێ سالێ گۆت: «هوین چ نزانن.
- 50
- ما هوین نە ل وێ هزرێنە كو مرۆڤەك ب تنێ د پێخەمەتی مللەتی دا بمریت چێترە ژ كو مللەت هەمی هلاك بیت؟»
- 51
- و قیافای ئەڤ ئاخفتنە ژ نك خۆ نەكر، بەلێ چنكو ئەو ل وێ سالێ سەرۆكێ كاهنان بوو پێشبینی كر كو عیسا دێ ل پێخەمەتی مللەتی مریت،
- 52
- و نە ب تنێ پێخەمەتی مللەتی بەلێ دا زارۆكێن خودێ كوم كەت و بكەتە ئێك ئەڤێن بژالە.
- 53
- ژ وێ رۆژێ وەرە جوهیان شێورا خۆ كر دا عیسای بكوژن.
- 54
- ئێدی عیسا ب ئاشكرایی د ناڤ وان دا نەدگەڕیا، بەلێ چوو باژێرەكی دگۆتنێ ئەفرایم، دكەڤتە نێزیكی بیابانێ، و دگەل شاگردێن خۆ ل وێرێ ما.
- 55
- و جەژنا دەربازبوونا جوهیان نێزیك ببوو، و گەلەك ژ گوندان هاتنە ئورشەلیمێ ژ بەری جەژنێ دا خۆ تافیر بكەن.
- 56
- و ل عیسای دگەڕیان، و دەمێ ئەو ل پەرستگەهێ ل ئێكودوو راست دبوون پرسیار دكرن: «هوین چ دبێژن، چێدبیت نەهێتە جەژنێ؟»
- 57
- سەرۆكێن كاهنان و فەریسیان بریارەك دەرئێخستبوو هەر كەسەكێ عیسای ببینیت بلا بێژیت دا وی دەستەسەر بكەن.
