عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- عیسا پێن شاگردان دشوت:
- 1
- ژ بەری جەژنا دەربازبوونێ، عیسای دزانی كو دەمێ وی هات دا ژ ڤێ جیهانێ بار كەت و بچیتە نك بابی. هكەر وی حەز ژ تایبەتمەندێن خۆ یێن ل جیهانێ كربیت، ئێدی بێ قەدەر حەز ژ وان دكەت.
- 2
- و دەمێ شیڤێ، ئبلیسی كربوو د دلێ یەهودا یێ كوڕێ شەمعونێ ئەسخەریوتی داكو بێبەختیێ ل عیسای بكەت.
- 3
- و عیسای دزانی كو بابی هەمی تشت یێن كرینە د دەستێن وی دا و ئەو یێ ژ خودێ دەركەفتی و بۆ خودێ دێ ڤەگەڕیتە ڤە.
- 4
- ژسەر مێزا شیڤێ رابوو، و كوركێ خۆ ژ بەر خۆ كر و دەستمالەك ل ناڤتەنگا خۆ شداند،
- 5
- پاشی ئاڤ كرە ئامانەكێ بۆ شویشتنێ، و دەست پێ كر پێن شاگردان شویشتن و ب وێ دەستمالا ل ناڤتەنگا خۆ شداندی زوها كرن.
- 6
- دەمێ گەهشتییە شەمعونێ پەتروسی، گۆتێ: «ئەی خودان، تۆ پێن من دشوی؟»
- 7
- عیسای بەرسڤا وی دا: «ئەو كارێ ئەز دكەم تۆ نوكە تێ ناگەهی، بەلێ پاشی دێ تێگەهی.»
- 8
- بەلێ پەتروس رشت بوو و گۆت: «نە، تۆ قەت پێن من ناشۆی!» عیسای بەرسڤا وی دا: «ئەگەر ئەز تە نەشۆم تە چ بەهر دگەل من نابیت!»
- 9
- شەمعون پەتروسی گۆتە وی: «ئەی خودان، نە پێن من ب تنێ، بەلێ دەست و سەرێ من ژی!»
- 10
- عیسای گۆت: «هەر كەسێ خۆ شویشتی هەمیێ پاقژ بووی، بەس پێدڤییە پێن خۆ بشوت. و هوین پاقژن، بەلێ نە هوین هەمی.»
- 11
- عیسای دزانی كی دێ بێبەختیێ لێ كەت، و ژ بەر هندێ گۆت: «نە هوین هەمی دپاقژن.»
- 12
- و دەمێ ژ شویشتنا پێن وان ب دوماهی هاتی، كوركێ خۆ كرە بەر خۆ و زڤری جهێ خۆ، و پرسیار ژ وان كر: «هوین تێ گەهشتن من چ بۆ هەوە كر؟
- 13
- هوین دبێژنە من مامۆستا و خودان، هەوە راست گۆت، ئەز ژی وەسامە.
- 14
- ئەگەر ئەز خودان و مامۆستا بم، و من پێن هەوە شویشتن، ل سەر هەوەیە ژی هەر ئێك ژ هەوە پێن یێ دی بشوت.
- 15
- من بۆ هەوە نموونەیەك ئینا دا هوین وە بكەن وەكو من ل هەوە كری.
- 16
- ب راستی ب راستی ئەز بۆ هەوە دبێژم: كۆلە ژ خودانێ خۆ نە مەزنترە، و چ هنارتی مەزنتر نینە ژ ئەوێ ئەو هنارتی.
- 17
- ئەگەر هەوە ئەڤ چەندە زانیبیت، خنێكێن هەوە ئەگەر هەوە كار پێ كربیت.
- 18
- و ئەز ڤێ نابێژم دەربارەی هەوە هەمیان، ئەز دنیاسم ئەوێن من هەلبژارتین. بەلێ دڤێت نڤیسار ب جهـ بهێت دەمێ دبێژیت:
ئەوێ ژ نانێ من خواری، پەحنیا خۆ ل من راكر.[a] - 19
- و ئەز دێ بێژمە هەوە دێ چ روی دەت، بەری رویدانا وی، داكو دەمێ روی ددەت هنگی هوین دێ باوەر كەن كو ئەز ئەوم.
- 20
- ب راستی ب راستی ئەز دبێژمە هەوە، هەر كەسێ قاییل بیت ب وی ئەوێ ئەز دهنێرم ب من قاییل دبیت، و هەچیێ ب من قاییل بیت، ب ئەوێ ئەز هنارتیم.»
- عیسا پێشبینیا سپارتنا خۆ دكەت:
- 21
- دەمێ عیسای ئەڤ چەندە گۆتی ئەو تەنگاڤ بوو و شاهدەی دا و گۆت: «ب راستی ب راستی ئەز بۆ هەوە دبێژم: ئێك ژ هەوە دێ بێبەختیێ ل من كەت!»
- 22
- و شاگرد گوهشین و بەرێ خۆ دانە ئێكودوو و ئەوان نەدزانی بەحسێ كێ دكەت.
- 23
- و ئەو شاگردێ عیسای حەز ژێ دكر پالا خۆ دا بوو سینگێ وی.
- 24
- شەمعون پەتروسی نیشانەك دایێ كو پرسیار كەت ئەو بەحسێ كێ دكەت.
- 25
- خۆ خواركرە سەر سینگێ عیسای و پرسیار ژێ كر: «ئەو كییە، ئەی خودان؟»
- 26
- عیسای بەرسڤ دا: «ئەو ئەوە ئەوێ ئەز پاریێ تێ دهەلینم و ددەمێ.» پاشی پاری تێ هەلاند و دا یەهودایێ كوڕێ شەمعونێ ئەسخەریوتی.
- 27
- پشتی پاری، ئبلیس چوو د ناڤ وی دا و عیسای گۆتە وی: «ب لەز وێ بكە ئەوا تە دڤیا بكەی!»
- 28
- و كەس ژ جڤاتێ تێ نەگەهشت ژ بەر چ ئەڤ چەندە گۆتە وی،
- 29
- بەلێ هندەك ژ وان هزر كر ئەو فەرمانا وی دكەت كو پێدڤیێن وان یێن جەژنێ بكڕت یان هندەك پارا بدەتە هەژاران، چنكو ئەو دەستخزنەدار بوو.
- 30
- و چەوا یەهودای پاری وەرگرتی و كرییە د دەڤێ خۆ دا دەركەفت. و ئەو دەم شەڤ بوو.
- شیرەتا نوی:
- 31
- دەمێ یەهودا دەركەفتی عیسای گۆت: «نوكە كوڕێ مرۆڤ مەزن بوو و خودێ ژی د ناڤ وی دا مەزن بوو،
- 32
- و ئەگەر خودێ د ناڤ دا مەزن بوو، ئەو دێ وی د ناڤ خۆ دا مەزن كەت، و دێ ب لەز مەزن كەت.
- 33
- ئەی زارۆكێن من، ئەز دێ دەمەكێ كورت دگەل هەوە مینم، و پاشی دێ من داخواز كەن بەلێ دێ وێ بێژمە هەوە ئەوا من ژ بەری هنگی گۆتییە جوهیان: هوین نەشێن بهێنە وی جهێ ئەز دچمێ.
- 34
- ئەز دێ شیرەتەكا نوی ل هەوە كەم: حەز ژ ئێكودوو بكەن، هەروەكو من حەز ژ هەوە كری، دڤێت هوین حەز ژ ئێكودوو بكەن.
- 35
- و ب ڤێ چەندێ خەلك هەمی دێ زانن هوین شاگردێن منن: ئەگەر هوین حەز ژ ئێكودوو بكەن.»
- عیسا دزانیت كو پەتروس دێ وی نەنیاس كەت:
- 36
- ئینا شەمعون پەتروسی گۆتێ: «ئەی خودان دێ كیڤە چی؟» عیسای بەرسڤ دا: «نوكە تۆ نەشێی بێیە وی جهێ ئەز دچمێ بەلێ تۆ دێ پاشی ل دویڤ من هێی.»
- 37
- پەتروسی گۆتێ: «ئەی خودان، ئەها ئەز نەشێم نوكە ل دویڤ تە بهێم؟ ئەز دێ ژیانا خۆ گۆری تە كەم.»
- 38
- عیسای بەرسڤ دا: «ئەرێ تۆ دێ ژیانا خۆ گۆری من كەی؟ ب راستی ب راستی دبێژمە تە: ژ بەری دیكل بانگ بدەت تۆ دێ سێ جاران من نەنیاس كەی.»
- a. 13:18 زەبور 41:9
