عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ئاخفتنا عیسای دگەل ژنكا سامەری:
- 1
- و دەمێ خودانی زانی كو فەریسیان یا گوهـ لێ بووی كو ئەو ژ یوحەننای پتر شاگردان وەردگرت و پتر ژێ تافیركرنێ ژی دكەت
- 2
- - و هەرچەندە عیسای ب خۆ تافیركرن نەدكر، لێ شاگردێن وی دكرن -
- 3
- ئینا دەڤەرا یەهودیایێ هێلا و ڤەگەڕیا دەڤەرا جەلیل.
- 4
- و دڤیا ئەو د ناڤ دەڤەرا سامەریایێ را ببوریت.
- 5
- و گەهشتە باژێرەكێ سامەریایێ دگۆتنێ سوخار، نێزیكی وی ئەردی بوو ئەوێ یەعقوبی داییە كوڕێ خۆ یوسڤی،
- 6
- و بیرا یەعقوبی ل وێرێ بوو. و دەمێ عیسا ب رێڤە وەستیای، ل سەر لێڤا بیرێ روینشت، و نێزیكی دەمژمێر شەشێ بوو.
- 7
- ژنكەكا سامەری هات داكو ئاڤێ ببەت. ئینا عیسای گۆتێ: «بێ زەحمەت ئاڤێ بدە من.»
- 8
- شاگردێن وی چووبوونە باژێری داكو خوارنەكێ بكڕن.
- 9
- ئینا ژنكا سامەری گۆتێ: «تۆ جوهیی و ئەز سامەریمە، تۆ چەوا ژ من داخواز دكەی ئاڤێ بدەمە تە؟» چنكو جوهیان دانوستاندن دگەل سامەریان نەدكرن.
- 10
- ئینا عیسای بەرسڤا وێ دا و گۆتێ: «ئەگەر تە دانا خودێ زانیبا و كا كییە دبێژیتە تە: ”ئاڤێ بدە من،“ تۆ دا ژێ داخواز كەی و ئەو دا ئاڤا ژیانێ دەتە تە.»
- 11
- ئینا ژنكێ گۆتێ: «هێژا، چ دەولك دگەل تە نینن و بیر یا كویرە. ئەرێ تۆ دێ ئاڤا ژیانێ ژ كیرێ ئینی؟
- 12
- ئەرێ ما تۆ ژ بابێ مە یەعقوبی مەزنتری ئەوێ ئەڤ بیرە بۆ مە پاش خۆ ڤە هێلای و ئەوی و كوڕێن وی و كەوالێن وی ژێ ڤەخوارین؟»
- 13
- ئینا عیسای بەرسڤ دا و گۆتێ: «هەركەسێ ژ ڤێ ئاڤێ ڤەخوت دێ تێهنی بیتەڤە،
- 14
- لێ ئەوێ ژ وێ ئاڤا ئەز ددەمێ ڤەخوت ئەو چ جاران تێهنی نابیت، بەلكو ئەو ئاڤا ئەز ددەمێ دێ د وی دا بیتە كانیەكا ئاڤێ و بۆ ژیانا هەروهەر زێت.»
- 15
- ئینا ژنكێ گۆتێ: «هێژا، ڤێ ئاڤێ بدە من، داكو تێهنی نەبم و ئێدی نەهێمە ڤێرێ داكو ئاڤێ ببەم.»
- 16
- ئینا گۆتێ: «هەڕە و داخوازا هەڤژینێ خۆ بكە و پاشی ڤەگەڕە ڤێرێ.»
- 17
- ئینا بەرسڤ دا و گۆت:: «من چ هەڤژین نینن.» ئینا گۆتێ: «تە راست گۆت دەمێ تە گۆتی: ”من هەڤژین نینە.“
- 18
- چنكو تە پێنچ هەڤژین هەبوون، و ئەوێ نوكە تۆ دگەل دژی نە هەڤژینێ تەیە. تە ئەڤە راست گۆت.»
- 19
- ژنكێ گۆتێ: «هێژا، ئەز دبێژم تۆ پێغەمبەری.
- 20
- بابكالێن مە ل ڤی چیای خودێ پەرست و هوین دبێژن، كو ئورشەلیم ب تنێ دڤێت بنگەهێ پەرستنێ بیت.»
- 21
- ئینا عیسای گۆتێ: «باوەر بكە ژنكێ، دێ ئەو دەم هێت هوین بابی نە ل ڤی چیای و نە ل ئورشەلیم بپەرێسن.
- 22
- هوین وی تشتی دپەرێسن یێ كو هوین نزانن، لێ ئەم وی دپەرێسین یێ دزانین، چنكو قورتالبوون ژ نك جوهیانە.
- 23
- و دێ دەمەك هێتن، و ئەو ب خۆ ڤێ گاڤێیە، دەمێ پەرستكارێن راست بابی ب گیان و راستیێ دپەرێسن، چنكو باب ل پەرستكارێن هوسا دگەڕیێت.
- 24
- خودێ گیانە، و ل سەر پەرستكارێن وی ئەوە ب گیان و راستیێ بپەرێسن.»
- 25
- ئینا ژنكێ گۆتێ: «ئەز دزانم مەسیح ئەوێ دبێژنێ یێ چەوركری دێ هێتن و دەمێ ئەو هات دێ بۆ مە هەمی تشتان دیار كەت.»
- 26
- عیسای گۆتێ: «ئەز ب خۆ ئەوم، ئەڤەیە دگەل تە دئاخڤیت.»
- 27
- و هنگی شاگردە گەهشتن و گوهشین دەمێ دیتین یێ دگەل ژنكەكێ دئاخڤیت. لێ كەسێ ژ وان نەگۆت: «تە چ دڤێت؟» یان «تۆ بۆچی دگەل وێ دئاخڤی؟»
- 28
- ئینا ژنكێ جەڕكێ خۆ هێلا و ڤەگەڕیا باژێری و گۆتە خەلكی:
- 29
- «وەرن، بەرێ خۆ بدەنێ زەلامەكی ئەوا من كری هەمی بۆ من دیار كر. ئەرێ چێدبیت ئەو مەسیح بیت؟»
- 30
- ئینا ژ باژێری دەركەفتن و هاتنە نك وی.
- 31
- و د وی دەمی دا شاگردان دگۆتێ و ژێ ڤە نەدبوون: «ماموستا، بخو!»
- 32
- ئینا گۆتە: «من خوارنەكا هەی ئەز دخوم هوین نزانن كا چییە!»
- 33
- ئینا شاگردان گۆتە ئێكودوو: «ئەرێ كەسەكی تشتەك بۆ ئینایە دا بخوت؟»
- 34
- ئینا عیسای گۆتە وان: «خوارنا من ئەوە كو ئەز ب حەزا وی بكەم یێ ئەز هنارتیم و كارێ وی ب جهـ بینم.
- 35
- ما هوین نابێژن: ”پشتی چوار هەیڤان دێ دەمێ دورینێ هێت“؟ لێ ئەز دبێژمە هەوە: هوین باش بەرێ خۆ بدەنە زەڤیان- یێن گەهشتین و دەمێ دورینا وان یێ هاتی!
- 36
- و پالەیێ دورینێ كرێیا خۆ وەردگریت و بەرهەمی بۆ ژیانا هەروهەر كوم دكەت، داكو جوتیار و پالەیێ دورینێ پێكڤە دلخۆش بن.
- 37
- د ڤێ چەندێ دا راستیا ڤێ گۆتنێ دیار دبیت: ”ئێك دچینیت و یێ دی ددوریت.“
- 38
- من هوین هنارتن داكو هوین وی بدورین یا كو هوین پێڤە نەوەستیاین. هندەكێن دی یێن وەستیاین، و هوین بەرهەمێ وەستیانا وان دچنن.»
- 39
- ئینا گەلەكا سامەری يێن وی باژێری باوەری پێ ئینا ژ بەر ئاخفتنا ژنكێ ئەوا دگۆت: «هەر تشتێ من كری بۆ من ئاشكرا كر.»
- 40
- دەمێ سامەری هاتنە نك داخواز ژێ كرن ل نك وان بمینیت، ئینا دوو رۆژان ل نك وان ما.
- 41
- و ژ بەر ئاخفتنا وی ژمارا ئەوێن باوەری پێ ئیناین گەلەك زێدە بوو
- 42
- و گۆتنە ژنكێ: «نە هەر ژ بەر ئاخفتنا تە ئەم باوەریێ دئینین، لێ چنكو مە ب گوهێن خۆ گوهـ لێ بوو و مە زانی كو ئەڤە ب راستی قورتالكەرێ جیهانێیە.»
- ساخكرنا كوڕێ ناڤمالیێ پاشای:
- 43
- و پشتی وان هەردوو رۆژان، عیسای ب جهـ هێلا و چوو جەلیلێ،
- 44
- چنكو عیسای ب خۆ شاهدەی دابوو كو پێغەمبەران د ناڤ وەلاتێ خۆ دا رێز نینە.
- 45
- و دەمێ گەهشتییە جەلیلێ خەلكێ وێ پێشوازی لێ كر. ئەوان هەر تشتێ وی ل ئورشەلیمێ كری دیتبوو ل دەمێ جەژنا دەربازبوونێ چنكو ئەو ژی چووبوونە جەژنێ.
- 46
- عیسا گەهشتە قانا ل جەلیل، ئەو جهێ ئاڤ لێ كرییە مەی. و ل كەفەرناحومێ زەلامەك هەبوو ناڤمالیێ پاشای بوو. كوڕەكێ نەساخ هەبوو
- 47
- و دەمێ گوهـ لێ بووی كو عیسا یێ ژ یەهودیێ هاتییە جەلیل، چوو نك و داخواز ژێ كر، كو بهێتە كەفەرناحوم داكو كوڕێ وی یێ ل بەر مرنێ ساخ بكەت.
- 48
- ئینا عیسای گۆتێ: «هوین باوەریێ نائینن تا هوین نیشانان و مەندهوشیان نەبینن.»
- 49
- ئینا زەلامی گۆتێ: «هێژا، دگەل من وەرە ژ بەری كوڕێ من بمریت!»
- 50
- ئینا عیسای بەرسڤا وی دا: «هەرە، كوڕێ تە یێ ساخە.» ئینا زەلامی باوەری ب وێ پەیڤا عیسای گۆتیێ ئینا و چوو.
- 51
- دەمێ ئەو ب رێ دچوو هندەك كۆلەیێن وی گەهشتنێ و مزگینی دانێ كو كوڕێ وی یێ ساخە.
- 52
- ئینا پرسیارا وان كر: «چ دەم بوو ساخ بووی؟» ئینا گۆتنێ: «دوهی ئێڤاری دەمژمێر حەفت تای لێ نەما.»
- 53
- بابێ وی زانی ئەو دەمژمێر بوو عیسای گۆتیێ: «كوڕێ تە یێ ساخە.» ئینا ئەوی و خەلكێ مالا وی هەمیان باوەری پێ ئینا.
- 54
- ئەڤە نیشانا دووێ بوو عیسای كری، پشتی دەركەفتنا وی ژ یەهودیایێ بۆ جەلیل.
