عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- نیقودیموس سەرا عیسای ددەت:
- 1
- مرۆڤەك ژ فەریسیان هەبوو ناڤێ وی نیقودیموس بوو، ئێك بوو ژ سەرۆكێن جوهیان.
- 2
- ئەڤە ب شەڤێ هاتە نك عیسای و گۆتێ: «ماموستا، ئەم دزانین تۆ مامۆستایەكی ژ نك خودێ یێ هاتی، چنكو كەس نەشێت وان نیشانێن تۆ دكەی بكەت ئەگەر خودێ دگەل نەبیت.»
- 3
- ئینا عیسای بەرسڤا وی دا: «ب راستی ب راستی دبێژمە تە: كەس نەشێت پاشاتیا خودێ ببینیت ئەگەر جارەكا دی ژ دایك نەبیت.»
- 4
- ئینا نیقودیموسی پرسیار ژێ كر: «دێ چەوا مرۆڤ ژ دایك بیتەڤە و ئەو یێ د ناڤ سالان دا چووی؟ ئەرێ ما دێ شێت بچیتە د زكێ دایكا خۆ دا و پاشی ژ دایك بیتەڤە؟»
- 5
- ئینا عیسای بەرسڤا وی دا: «ب راستی ب راستی دبێژمە تە: كەس نەشێت بچیتە پاشاتیا خودێ ئەگەر ژ ئاڤێ و گیانی ژ دایك نەبیت.
- 6
- ئەوێ ژ لەشی دبیت لەشە، و یێ ژ گیانی دبیت گیانە.
- 7
- ئەڤجا تۆ نەگوهشە ئەگەر ئەز بێژمە تە هوین پێدڤی هندێنە كو جارەكا دی ژ دایك ببنەڤە.
- 8
- بای كیڤە دڤێت دچیت و تە گوهـ ل فیتێنا وی هەیە، لێ تۆ نزانی ژ كیڤە دهێت و دێ كیڤە چیت. هەروەسا یێ ژ گیانی ژ دایك ببیت وەسانە.»
- 9
- ئینا نیقودیموسی بەرسڤا وی دا و گۆت: «دێ چەوا ئەڤ تشتە چێبیت؟»
- 10
- ئینا عیسای بەرسڤا وی دا و گۆتێ: «تۆ مامۆستایێ ئیسرائیلێی و تۆ ڤێ نزانی؟
- 11
- براستی براستی دبێژمە تە ئەم وێ دبێژین یا ئەم دزانین، و شاهدەیێ ب وێ ددەین یا مە دیتی، و دسەر هندێ را هوین شاهدەیا مە وەرناگرن.
- 12
- ئەگەر من بۆ هەوە بەحسێ كاروبارێن ئەردی كربیت و باوەریێ نەئینن، ئەرێ هوین دێ چەوا باوەریێ ئینن ئەگەر ئەز بۆ هەوە بەحسێ كاروبارێن ئەسمانان بكەم؟
- 13
- و كەسەك بلند نەبوویە ئەسمانی ئەگەر ئەو نەبیت یێ ژ ئەسمانی هاتییە خوارێ، و ئەو ژی كوڕێ مرۆڤە.
- 14
- و كا چەوا موسای ماڕ ل چولی هلاویست هەروەسا دڤێت كوڕێ مرۆڤ بهێتە هلاویستن
- 15
- داكو هەر كەسەكێ باوەریێ پێ بینیت ژیانا هەروهەر هەبیت.
- 16
- چنكو خودێ وەسا حەژ جیهانێ كر كو كوڕێ خۆ یێ ئێكانە دایێ داكو هەركەسێ باوەریێ پێ بینیت ژناڤ نەچیت، بەلكو ژیانا هەروهەر بۆ وی بیت.
- 17
- خودێ كوڕێ خۆ یێ ئێكانە نەهنارتییە جیهانێ داكو داد بكەت، لێ داكو جیهانێ پێ قورتال بكەت.
- 18
- ئەوێ باوەریێ پێ بینیت ناهێتە دادكرن، لێ ئەوێ باوەریێ پێ نەئینیت بریارا دادكرنێ ل سەر هاتە دانێ چنكو وی باوەری ب ناڤێ كوڕێ خودێ یێ ئێكانە نەئینا.
- 19
- و دادوەری ئەڤەیە: روناهی هاتە جیهانێ، لێ مرۆڤان حەژ تاریێ كر پتر ژ روناهیێ، چنكو كارێن وانا دخراب بوون.
- 20
- هەر كەسێ خرابیێ بكەت كەربا وی ژ روناهیێ ڤەدبیت و ژ بەر درەڤيت داكو كریارێن وی دیار نەبن.
- 21
- لێ ئەوێ ب راستیێ كار دكەت دهێتە بەر روناهیێ داكو كارێن وی دیار بن و دیار بیت كو ب خودێ یێن هاتینە كرن.»
- شاهدەیا یوحەننایێ تافیركەر بۆ عیسای
- 22
- پشتی هنگی عیسا و شاگردێن خۆ چوونە وەلاتێ یەهودیایێ و دگەل وان ئاكنجی بوون و تافیركرن دكر.
- 23
- و یوحەننای ژی ل عەینونێ ل نك سالیم تافیركرن دكر، چنكو ل وێرێ ئاڤ مشە بوو. خەلك دهاتن و دهاتنە تافیركرن.
- 24
- هنگی یوحەننا هێشتا نەهاتبوو زیندان كرن.
- 25
- و گەنگەشەیەك د ناڤبەرا شاگردێن یوحەننای و جوهیەكی دا دەربارەی پاقژكرنێ پەیدا بوو
- 26
- و چوونە نك یوحەننای و گۆتنێ: «ماموستا: ئەو زەلامێ مە دگەل تە دیتی ل پشت رویبارێ ئوردن، و ئەوێ تە شاهدەی بۆ دای، ئەو ژی تافیركرنێ دكەت و هەمی دچنە نك وی.»
- 27
- ئینا یوحەننای بەرسڤ دا: «كەس نەشێت تشتەكی ب دەست خۆ ڤە بینیت ئەگەر ژ ئەسمانی بۆ نەهاتبیتە دانێ.
- 28
- هوین ب خۆ شاهدەیێ ددەن كو من گۆت: ئەز نە مەسیحم، لێ ب تنێ ئەز پێشرەوێ ویمە.
- 29
- هەچیێ بویك بۆ وی بیت، ئەو زاڤایە. لێ هەڤالێ زاڤای، ئەوێ نێزیكی وی دراوەستیت و گوهـ لێ دبیت، ب دەنگێ زاڤای دلخۆش دبیت. ئەڤە دلخۆشیا من ب جهـ هات.
- 30
- و پێدڤییە ئەو زێدە ببیت و ئەز كێم ببم.»
- 31
- ئەوێ ژ ئەسمانان بهێت- ئەو دسەر هەمیان را. لێ هەركەسێ ژ ئەردی بیت، ئەو یێ ئەردییە و ئاخفتنێن ئەردی دكەت. یێ ژ ئەسمانی هاتی ئەو د سەر هەمیان دایە.
- 32
- ئەو شاهدەیێ ددەت ب یا دیتی و گوهـ لێ بووی و كەس شاهدەیا وی وەرناگریت.
- 33
- ئەوێ شاهدەیا وی وەردگریت پەسەند دكەت كو خودێ یێ راستە.
- 34
- چنكو ئەوێ خودێ هنارتی ب پەیڤێن خودێ دئاخڤیت، چنكو خودێ گیانی بێ ژمار ددەت.
- 35
- باب حەژ كوڕی دكەت و هەمی تشت یێن كرینە د دەستێ وی دا.
- 36
- ئەوێ باوەریێ ب كوڕی بینیت، ژیانا هەروهەر بۆ وییە، و ئەوێ باوەریێ ب كوڕی نەئینیت ئەو ژیانێ نابینیت بەلكو دێ توڕەبوونا خودێ ل سەر مینیت.
