عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- سەرهاتیا ژنكا دەهمەنپیس:
- 1
- بەلێ عیسا چوو چیایێ زەیتونان.
- 2
- و ل دەمێ ئەلندێ زڤری پەرستگەهێ، و گەلەك جەماوەر ل دۆر خر بوو، و روینشت و ئەو فێردكرن.
- 3
- و مامۆستایێن دەستوری و فەریسیان ژنكەك ب دەهمەنپیسیێ گرتبوو ئینا نك و ل نیڤا وان راوەستاند
- 4
- و گۆتنە وی: «مامۆستا، ئەڤ ژنكە د بەر مێركەكی را رازای یا هاتییە گرتن.
- 5
- و موسای د دەستورێ دا فەرمان یا ل مە كری ئەڤ ژنكێن ڤان كاران دكەن ب بەردە بارانكرنێ بهێنە كوشتن. تۆ چ دبێژی؟»
- 6
- ئەڤ پرسیارە ژێ كر دا وی تەنگاڤ بكەن و هێجەتەكێ پەیدا كەن وی پێ تاوانبار بكەن. بەلێ وی خۆ چەماند و ب تبلا خۆ ل سەر ئەردی دنڤیسی.
- 7
- بەلێ وان هەر پرسیار ژێ كرەڤە، ئەڤجا خۆ راست كر و گۆتە وان: «ئەو كەسێ د ناڤ هەوە دا یێ بێ گونەهـ بیت، بلا ل بەراهیێ بەرەكی دانتێ.»
- 8
- جارەكا دی خۆ چەماند و ل سەر ئەردی دنڤیسی.
- 9
- دەمێ وان گوهـ ل ڤێ ئاخفتنێ بووی، ئێك ل دویڤ ئێكی چوون و بەراهیا هەمیان ریهسپی، و عیسا ب تنێ ل وێرێ ما، و ژنك د جهێ خۆ دا یا راوەستای بوو.
- 10
- خۆ راست كر و گۆتە وێ: «ژنێ، كانێنە ئەو؟ كەس ژ وان داد ل سەر تە نەكر؟»
- 11
- بەرسڤ دا: «نە خێر ئەز خدام.» گۆتە وێ: «ئەزێ ژی تە داد ناكەم. هەڕە و گونەهان نەكەڤە.»
- عیسا روناهیا جیهانێیە:
- 12
- جارەكا دی عیسای گازی وان كر و گۆت: «ئەز روناهیا جیهانێمە. یێ ل دویڤ من بهێت ل تاریێ ناچیت بەلێ دێ روناهیا ژیانێ بۆ وی بیت.»
- 13
- فەریسیان نەرازیبوونا خۆ دیار كر و گۆتن: «تۆ نوكە بۆ خۆ شاهدەیێ ددەی، و شاهدەیا تە چێنابیت.»
- 14
- بەرسڤ دا: «هەرچەندە ئەز شاهدەیێ بۆ خۆ ددەم شاهدەیا من راستە، چنكو ئەز دزانم ئەز ژ كێرێ هاتیمە و دێ چمە كێرێ، بەلێ هوین نزانن كا ئەز ژ كێرێ هاتیمە و دێ كیڤە چم.
- 15
- هوین ب چاڤێ مرۆڤان دادكرنێ دكەن، بەلێ ئەز كەسێ داد ناكەم.
- 16
- هەرچەندە من دادكرن كربا، دا یێ راست بیت، چنكو ئەز ب تنێ دادكرنێ ناكەم، بەلێ ئەز و باب ئەوێ ئەز هنارتیم.
- 17
- و یا نڤیسییە د دەستورێ هەوە دا شاهدەیا دوو شاهدان یا راستە.
- 18
- ئەز بۆ خۆ شاهدەیێ ددەم و ئەو بابێ ئەز هنارتیم ژی شاهدەیێ بۆ من دكەت.»
- 19
- ژێ پرسین: «كا بابێ تە؟» بەرسڤ دا: «هوین من نانیاسن و بابێ من ژی نانیاسن. ئەگەر هەوە ئەز نیاسیبام دا بابێ من ژی نیاسن.»
- 20
- عیسای ئەڤ ئاخفتنە ل نێزیكی سندۆقا پێشكێشیان گۆت دەمێ فێركرنێ ل پەرستگەهێ دكر و كەسێ ئەو دەستەسەر نەكر، چنكو دەمێ وی هێشتا نەهاتبوو.
- 21
- پاشی عیسای گۆتە وان: «ئەز دێ چم و دێ ل دویڤ من گەڕیێن و دێ د گونەها خۆ دا مرن. هوین نەشێن بهێنە وی جهێ ئەز لێ.»
- 22
- ئەڤجا جوهیان ژ ئێكودوو پرسی: «ئەرێ مەبەستا ئاخفتنا وی چییە، ”نەشێن بهێنە وی جهێ ئەز لێ؟“ ئەرێ دێ خۆ كوژت؟»
- 23
- ئەڤە بەرسڤا وی بوو: «هوین ژ خوارێنە، بەلێ ئەزی ژ سەلالم. هوین ژ ڤێ جیهانێنە، بەلێ ئەز نە.
- 24
- ژ بەر هندێ من گۆتە هەوە: هوین دێ د گونەهێن خۆ دا مرن، چنكو ئەگەر هەوە باوەری نەئینا كو ئەز ئەوم، دێ د گونەهێن خۆ دا مرن.»
- 25
- ژێ پرسین: «تۆ كی؟» عیسای بەرسڤ دا: «ئەز ئەو هەمیمە ئەڤا من بۆ هەوە هەر دگۆت.
- 26
- و من گەلەك تشتێن هەین بێژم و هەوە پێ داد بكەم. بەلێ ئەوێ ئەز هنارتیم ئەو راستگۆیە، و ئەڤا ئەز دبێژمە جیهانێ ئەوە ئەوا من ژ وی گوهـ لێ بووی.»
- 27
- بەلێ ئەو تێ نەگەهشتن كو عیسای ب ڤێ ئاخفتنێ بەحسێ بابی دكر.
- 28
- ژ بەر هندێ عیسای گۆتە وان: «دەمێ هوین كوڕێ مرۆڤ دهلاویسن دێ زانن كو ئەز ئەوم، و ئەز چ تشتان ژ نك خۆ ناكەم، بەلێ ئەز وێ دبێژم ئەوا بابی ئەز پێ فێركریم.
- 29
- یێ ئەز هنارتیم یێ دگەل من و ئەز نەهێلایمە ب تنێ، چنكو ئەز هەر وێ دكەم یا ئەو پێ رازی دبیت.»
- 30
- دەمێ عیسا ب ڤێ چەندێ دئاخفت گەلەكان باوەری پێ ئینا.
- 31
- گۆتە وان جوهیێن باوەری پێ ئینای: «ئەگەر هەوە خۆ د پەیڤا من دا راگرت، هوین دێ ب راستی شاگردێن من بن،
- 32
- و دێ راستیێ زانن و دێ راستی هەوە ئازاد كەت.»
- 33
- جوهیان بەرسڤ دا: «ئەم دویندەهێ ئیبراهیمینە، و ئەم چ جاران كۆلەیێن كەسێ نەبووین! تۆ چەوا دبێژیە مە: ”هوین دێ ئازاد بن“؟»
- 34
- عیسای بەرسڤا وان دا: «ب راستی ب راستی دبێژمە هەوە: یێ گونەهێ بكەت دێ بیتە كۆلەیێ گونەهێ.
- 35
- و كۆلە هەتاهەتایێ ل مالا خودانێ خۆ نامینیت بەلێ كوڕ دێ هەتاهەتایێ ل وێرێ مینیت.
- 36
- ئەگەر كوڕی هوین ئازاد كرن دێ ب راستی ئازاد بن.
- 37
- ئەز دزانم هوین دویندەهێ ئیبراهیمینە، بەلێ هوین ل دویڤ كوشتنا من دگەڕیێن، چنكو پەیڤا من چ جهـ د دلێن هەوە دا نینە.
- 38
- ئەز ب وێ دئاخڤم ئەڤا من ل نك بابی دیتی، و هوین ب وێ دكەن ئەڤا هەوە ژ بابێ خۆ گوهـ لێ بووی.»
- 39
- بەرسڤ دان و گۆتن: «بابێ مە ئیبراهیمە!» عیسای گۆت: «ئەگەر هوین كوڕێن ئیبراهیمی بان دا كارێن ئیبراهیمی كەن.
- 40
- بەلێ هوین ل دویڤ كوشتنا من دگەڕیێن و ئەز مرۆڤەكم ب وێ راستیا من ژ خودێ گوهـ لێ بووی بۆ هەوە ئاخفتم، و ئەڤ چەندە ئیبراهیمی نەكرییە.
- 41
- هوین كارێن بابێ خۆ دكەن!» گۆتنە وی: «ئەم ژ دەهمەنپیسیێ نەبووینە! مە بابەكێ ب تنێ یێ هەی، ئەو ژی خودێ یە.»
- 42
- عیسای گۆتە وان: «دا حەز ژ من كەن ئەگەر خودێ بابێ هەوە با، چنكو ئەز یێ ژ خودێ دەركەفتیم. و ئەز ژ نك خۆ نەهاتیمە، بەلێ ئەوی ئەزێ هنارتیم.
- 43
- ئەها هوین د ئاخفتنا من ناگەهن؟ چنكو هوین نەشێن گوهێ خۆ بدەنە پەیڤا من.
- 44
- هوین كوڕێن بابێ خۆ ئبلیسینە، و هەوە دڤێت ڤیانێن بابێ خۆ بكەن، چنكو ئەو ل دەستپێكێ كوژەك بوو، و ژ راستیێ دەركەفتییە چنكو ژ راستیێ یێ ڤالایە. دەمێ ئەو درەوان دكەت ئەو جەهوەرێ خۆ دیار دكەت، چنكو ئەو درەوینە و بابێ درەوێیە.
- 45
- بەلێ چنكو ئەز راستیێ دبێژم، هوین ژ من باوەر ناكەن.
- 46
- كی ژ هەوە دشێت گونەهەكێ ل سەر من دیار كەت؟ ئەڤجا ئەگەر ئەز راستیێ دبێژم، ئەها هوین ژ من باوەر ناكەن؟
- 47
- یێ ژ خودێ بیت دێ گوهێ خۆ دەتە پەیڤا خودێ. بەلێ هوین گوهداریێ ناكن جونكو هوین نە ژ خودێ نە!»
- 48
- جوهیان گۆت: «ما ئەم راستیێ نابێژین دەمێ ئەم دبێژینە تە تۆ سامەری و یێ جنگرتی؟»
- 49
- بەرسڤا وان دا: «ئەز نە یێ جنگرتیمە، بەلێ ئەز قەدرێ بابێ خۆ دگرم و هوین من كرێت دكەن.
- 50
- ئەز داخوازا مەزناهیێ بۆ خۆ ناكەم، لێ ئێكێ دی یێ هەی بۆ من داخواز دكەت و ئەو دادوەرە.
- 51
- ب راستی ب راستی دبێژمە هەوە: یێ گوهـ بدەتە پەیڤا من هەتاهەتایێ مرنێ نابینیت.»
- 52
- جوهیان گۆتێ: «نوكە ئەم پشتراست بووین كو تۆ یێ جنگرتی. ئیبراهیم مر و پێغەمبەر مرن، و تۆ دبێژی: ”یێ ب پەیڤا من بكەت تام ناكەتە مرنێ.“
- 53
- ئەرێ تۆ ژ بابێ مە ئیبراهیمی مەزنتری ئەڤێ مری؟ خۆ پێغەمبەر ژی یێن مرین، تۆ خۆ چ دادنی؟»
- 54
- عیسای بەرسڤ دا: «ئەگەر ئەز خۆ مەزن بكەم، مەزناهیا من چ نینە. بەلێ بابێ منە یێ من مەزن دكەت. و هوین دبێژن: ”ئەو خودایێ مەیە.“
- 55
- هوین وی نانیاسن، بەلێ ئەز وی دنیاسم. بەلێ ئەگەر من گۆتبا ئەز وی نانیاسم دا ئەز ژی وەكو هەوە درەوین بم. بەلێ ئەز وی دنیاسم و ب پەیڤا وی دكەم.
- 56
- بابێ هەوە ئیبراهیم یێ ئومێدەوار بوو رۆژا من ببینیت و دیت و كەیفخۆش بوو.»
- 57
- جوهیان گۆتە وی: «ژیێ تە نەبوویە پێنجی سال. ئەرێ تە ئیبراهیم دیتییە؟»
- 58
- عیسای گۆتە وان: «ب راستی ب راستی دبێژمە هەوە: ئەز هەبووم بەری ئیبراهیم هەبیت.»
- 59
- جوهیان بەر هەلگرتن دا وی بەردە باران كەن، بەلێ وی خۆ ڤەشارت و ژ پەرستگەهێ دەركەفت.
