عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- عیسا و برایێن خۆ:
- 1
- پشتی هنگی عیسای دەست ب هاتن و چوونێ ل دەڤەرا جەلیل كر، خۆ دا پاش ژ هاتن و چوونێ ل دەڤەرا یەهودیایێ چنكو جوهیان بزاڤا كوشتنا وی دكر.
- 2
- و دەمێ جەژنا كەپرە شینان یا جوهیان نێزیك بووی
- 3
- برایێن وی گۆتە وی: «ڤێ دەڤەرێ بهێلە و هەڕە یەهودیایێ دا شاگردێن تە ژی ئەو كارێن تۆ دكەی ببینن!
- 4
- ئەوێ ناڤودەنگی دڤێت ل بەرزەیێ كار ناكەت، و ئەگەر تۆ ڤان كریاران دكەی خۆ بۆ جیهانێ دیار كە.»
- 5
- برایێن وی ژی باوەری پێ نەبوو.
- 6
- عیسای بەرسڤا وان دا: «هێشتا دەمێ من نەهاتییە بەلێ دەمێ هەوە هەردەم یێ د جهێ خۆ دایە.
- 7
- جیهان نەشێت كەربێن خۆ ژ هەوە ڤەكەت، بەلێ ئەو كەربێن خۆ ژ من ڤەدكەت، چنكو ئەز شاهدەیێ ل سەر وێ ددەم كو كارێن وێ دخرابن.
- 8
- هوین سەركەڤنە جەژنێ، بەلێ ئەز نوكە سەرناكەڤمە ڤێ جەژنێ چنكو دەمێ من هێشتا نەهاتییە.»
- 9
- ئەڤە گۆتە وان و ل جەلیل ما.
- عیسا ب ئاشكرایی فێركرنێ د پەرستگەهێ دا دكەت:
- 10
- و پشتی برایێن وی چووینە جەژنێ ئەو ژی چوو هەروەكو ڤەشارتی، نە ئاشكرا.
- 11
- ل جەژنێ جوهی ل وی دگەڕیان و پرسیار دكرن: «كا ئەو زەلام؟»
- 12
- و گەلەك پست پست ل ناڤبەرا جەماوەری هاتنە كرن دەربارەی وی، هندەكان ژ وانا دگۆتن: «ئەو یێ باشە» و هندەكێن دی دگۆتن: «نە! ئەو مللەتی د سەردا دبەت.»
- 13
- بەلێ كەس ژ وان نەدوێریا ب ئاشكرایی بەحسێ وی بكەت ژ ترسا جوهیان دا.
- 14
- دەمێ جەژن نیڤی بووی، عیسا سەركەفتە پەرستگەهێ و دەست ب فێركرنا خەلكی كر.
- 15
- جوهی مەندەهۆش بوون و پرسیار كرن: «چەوا ئەو ناڤەرۆكێ پەرتوكێن پیرۆز دزانیت و ئەو نەهاتییە فێركرن؟»
- 16
- عیسای بەرسڤا وان دا: «فێركرنا من نە ژ نك منە، بەلێ ژ نك وییە ئەوێ ئەز هنارتیم.
- 17
- و هەر كەسێ دڤێت ب ڤیانا خودێ بكەت دێ زانیت كا فێركرنا من ژ نك خودێ یە، یان ئەز ژ نك خۆ دئاخڤم.
- 18
- هەر كەسێ ژ نك خۆ باخڤیت مەزناهیێ بۆ خۆ داخواز دكەت، بەلێ ئەوێ داخوازیا مەزناهیێ بۆ وی بكەت ئەوێ ئەو هنارتی ئەو یێ راستە چ چەوتی د وی دا نینن.
- 19
- ما موسای دەستور نەدابوو هەوە؟ بەلێ كەس ژ هەوە كار ب دەستوری ناكەت! ئەها هوین بزاڤا كوشتنا من دكەن؟»
- 20
- هەمیان بەرسڤا وی دا: «جنەك یێ د تە دا! كێ دڤێت تە بكوژیت؟»
- 21
- عیسای گۆت: «من كارەكی ب تنێ كر هوین هەمی مەندەهۆش بوون.
- 22
- موسای هوین ب سونەت كرنێ فەرمان كربوون، و رامانا ڤێ چەندێ نە ئەوە كو سونەت كرن بۆ موسای دزڤریت، بەلێ بۆ بابكالكان. ژ بەر هندێ هوین مرۆڤان ب خۆ رۆژا شەمبیێ ژی سونەت دكەن.
- 23
- ئەگەر هوین رۆژا شەمبیێ خەلكی سونەت دكەن دا هوین دەستورێ موسای نەشكێنن، ئەرێ هوین دێ ل سەر من توڕە بن چنكو من مرۆڤەك ب تەمامی ل رۆژا شەمبیێ ساخ كر؟
- 24
- ل دویڤ تشتێ دیار دادكرنێ نەكەن، بەلێ دادكرنەكا راست بكەن.»
- 25
- وی دەمی هندەكان ژ خەلكێ ئورشەلیمێ گۆتن: «ئەرێ ما ئەڤە ئەو نینە ئەوێ دڤیان بكوژن؟
- 26
- ئەها ئەو یێ ب ئاشكرایی دئاخڤیت و كەس رێ لێ ناگریت. تۆ بێژی سەرۆكێن مە پشتراست بووینە كو ئەو ب راستی مەسیحە؟
- 27
- بەلێ ئەڤی ئەم بنیاتێ وی نیاسین، و دەمێ مەسیح دهێت كەس نزانیت دێ ژ كیڤە هێت.»
- 28
- عیسای دەنگێ خۆ بلند كر و ئەو یێ فێركرنێ دكەت د پەرستگەهێ ڤە و گۆت: «هوین من دنیاسن و هوین دزانن ئەز ژ كیرێمە. و ئەز ژ نك خۆ نەهاتیمە بەلێ ئەوێ ئەز هنارتیم ئەو یێ راستە و هوین وی نانیاسن،
- 29
- بەلێ ئەز وی دنیاسم، چنكو ئەز ژ ویمە و ئەوی ئەز یێ هنارتیم.»
- 30
- جوهیان بزاڤ كر كو وی دەستەسەر كەن، بەلێ كەسەكی دەستێ خۆ درێژ نەكرێ، چنكو هێشتا دەمێ وی نەهاتبوو.
- 31
- بەلێ گەلەكا ژ جەماوەری باوەری پێ ئینا و گۆتن: «ئەرێ تۆ بێژی دەمێ مەسیح دهێت دێ پتر نیشانان كەت ژ ئەوێن ئەڤ زەلامە دكەت؟»
- 32
- فەریسیان گوهـ ل پست پستا جەماوەری بوو ئەوا ل سەر وی دهاتە كرن. ئەڤجا وان و سەرۆكێن كاهنان هندەك زێرەڤان هنارتن دا وی بگرن.
- 33
- عیسای گۆتە وان: «ئەز دێ دەمەكێ كێم مینمە دگەل هەوە، پاشی دێ زڤرمە نك ئەوێ ئەز هنارتیم.
- 34
- هنگی هوین دێ ل من گەڕیێن بەلێ هوین من نابینن، و هوین نەشێن بهێنە جهێ ئەز لێ.»
- 35
- جوهیان پرسیار ژ ئێكودوو كرن: «وی ل بەرە كیڤە بچیت كو ئەم نەبینین؟ ئەرێ دێ چیتە باژێرێن یونانیان ئەوێن جوهی لێ بەلاڤە بووین و یونانیان فێركەت؟
- 36
- و رامانا ئاخفتنا وی چییە دەمێ گۆتی: هوین دێ داخوازا من كەن و هوین من نابینن، و هوین نەشێن بهێنە جهێ ئەز لێ؟»
- 37
- ل رۆژا دوماهیێ ژ جەژنێ و ئەو مەزنترین رۆژێن وێیە، عیسا راوەستیا و ب هەمی دەنگێ خۆ گۆت: «ئەگەر ئێك تێهنی بوو بلا بهێتە نك من و ڤەخوت،
- 38
- هەروەكو نڤیسارێ گۆتی، هەر كەسێ باوەریێ ب من بینیت دێ رویبارێن ئاڤا ژیانێ ژ ناڤ هناڤێن وی هوڕن.»
- 39
- عیسای ئەڤ چەندە ل سەر وی گیانی گۆت ئەوا ئەوێن باوەری پێ ئینای دا وەرگرن، و گیان هێشتا نەدابوو چنكو عیسا نەهاتبوو مەزنكرن.
- 40
- دەمێ ئامادەبوویان ئەڤ ئاخفتنە گوهـ لێ بووی هندەكان ژ وانا گۆت: «راست ئەڤە ئەو پێغەمبەرە.»
- 41
- و هندەكێن دی گۆتن: «ئەڤە مەسیحە» بەلێ هندەكا ژ وانا گۆت: «ئەرێ مەسیح دێ ژ جەلیل دەركەڤیت؟
- 42
- ئەرێ ما نڤیسارێ نەگۆتییە مەسیح دێ ژ دویندەهێ داوودی هێت، و ژ گوندێ بەیت لەحم ئەوێ داوود لێ؟»
- 43
- وەسا ژ بەر وی، جوداهیا بوچوونا ل ناڤبەرا جەماوەری دا چێبوو.
- 44
- و هندەك ژ وانا دڤیا ئەوی بگرن، بەلێ كەسەكێ دەستێ خۆ درێژ نەكرێ.
- 45
- و زێرەڤانێن پەرستگەهێ زڤرینە نك فەریسیان و سەرۆكێن كاهنان، پرسیارا وان كر: «هەوە ژ بەر چ ئەو نەئینا؟»
- 46
- بەرسڤا وان دا: «چ مرۆڤ وەكو ڤی زەلامی نەئاخفتینە.»
- 47
- فەریسیان لێ ڤەگێرا: «ئەرێ هوین ژی د سەردا چووینە؟
- 48
- ئەرێ هەوە دیت ئێك ژ سەرۆكان یان ژ فەریسیان باوەری پێ ئینای؟
- 49
- بەلێ خەلكێ دەستوری نزانن، دنەفرەت كرینە.»
- 50
- بەلێ ئێك ژ وان، ئەوێ بەرێ هاتییە نك عیسای كو نیقودیموس بوو
- 51
- گۆتە وان: «ئەرێ دەستورێ مە رێ ددەت ئێكی داد كەن بێی كو ل پێشیێ گوهـ بدەنە بەرگیریا وی؟»
- 52
- ئەوا بەرسڤا وی دا: «ئەرێ تۆ ژی ژ جەلیلی؟ پەرتوكێ بخوینە و ببینە: نابیت پێغەمبەر ژ جەلیل رابن!»
- 53
- پاشی هەر ئێك چوو مالا خۆ.
