عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ساخكرنا كۆرەیێ زكماك:
- 1
- دەمێ عیسا ب رێ دچوو، مرۆڤەكێ د زكماك دا كۆرە بووی دیت.
- 2
- ئینا شاگردێن وی ژێ پرسین: «ماموستا، كییە گونەهـ كری: ئەڤێ هە، یان دای و بابێن وی هەتا كو ب كۆرەیی ژ دایك بووی؟»
- 3
- عیسای بەرسڤا وان دا: «نە ئەوە گونەهـ كری، و نە دای و بابێن وی، بەلێ داكو كارێن خودێ ل سەر دیار ببن.
- 4
- ل سەر من ئەوە ئەز كارێن وی بكەم ئەوێ ئەز هنارتیم هێشتا جیهان رۆژە. دێ شەڤ هێت، و كەسەك نەشێت چ كاران تێدا بكەت.
- 5
- هندی ئەز ل جیهانێ بم، ئەز روناهیا جیهانێمە.»
- 6
- ئەڤ چەندە گۆت و تف كرە ئاخێ و هەرییەك ژێ چێكر، و پاشی دانا سەر چاڤێن كۆرەی
- 7
- و گۆتێ: «هەڕە و خۆ ل كانیا سیلوام (ئانكو هنارتی) بشو.» ئینا چوو و خۆ شویشت و ڤەگەڕیا چاڤ لێ دڕۆن.
- 8
- ئینا جیران و نێزیكێن وی ئەوێن ئەو ددیتن خوازەكی دكر پرسیار كرن: «ئەرێ ما ئەڤە ئەو نینە ئەوێ رویدنشت و خوازەكی دكر؟»
- 9
- ئینا هندەكا ژ وان گۆت: «ئەڤە ئەوە» و هندەكان گۆت: «نە، بەلێ وەكو وییە.» بەلێ وی بەرسڤ دا: «بەلێ ئەز ئەوم!»
- 10
- ئینا گۆتنێ: «چەوا چاڤێن تە ساخ بوون؟»
- 11
- بەرسڤ دا: «ئەو زەلامێ ناڤێ وی عیسا هەرییەك چێكر و ل چاڤێن من دا، و گۆتە من: ”هەڕە كانیا سیلوام و خۆ تێدا بشو.“ ئینا ئەز چووم و من خۆ شویشت و چاڤێن من روهن بوون!»
- 12
- ئینا پرسیار ژێ كرن: «و ئەو نوكە ل كێرێیە؟» گۆت: «ئەز نزانم.»
- 13
- ئینا ئەو زەلامێ ژ بەری هنگی كۆرە برنە نك فەریسیان.
- 14
- و ئەو رۆژا عیسای تێدا هەری چێكری و چاڤێن كۆرەی ساخ كرین شەمبی بوو.
- 15
- و فەریسیان ژی پرسیار ژێ كر كا چەوا چاڤێن وی ساخ بوون. ئەوی بەرسڤ دا: «هەری دانا سەر چاڤێن من و من خۆ شویشت و ئەڤە ئەز یێ دبینم!»
- 16
- ئینا هندەك فەریسیان گۆت: «ئەڤ مرۆڤە نە ژ نك خودێ یە چنكو دەستورێ شەمبیێ دشكێنیت.» بەلێ هندەكان گۆت: «دێ چەوا زەلامەكێ گونەهكار شێت ڤان نیشانان كەت؟» و دوو بەرەكی كەفتە د ناڤ وان دا.
- 17
- و جارەكا دی پرسیار ژ ئەڤێ كۆرە كرن: «تۆ دەربارەی وی چ دبێژی، ئەوێ چاڤێن تە ساخ كرین؟» ئینا بەرسڤا وان دا: «ئەو پێغەمبەرە.»
- 18
- و جوهیان باوەر نەكر كو ئەوی كۆرە بوو و پاشی چاڤ لێ روهن بوون. و گازی كرنە دای و بابێن وی
- 19
- و پرسیار ژێ كرن: «ئەرێ ئەڤە ئەو كوڕێ هەوەیە، ئەوێ هوین دبێژن ژ زكماك دا بوو یێ كۆرە، پا چەوا نوكە دبینیت؟»
- 20
- دای و بابێن وی بەرسڤ دان: «ئەم دزانین ئەڤە كوڕێ مەیە و كۆرە ژ دایك بوو،
- 21
- بەلێ ئەم نزانین چەوا نوكە دبینیت، و نزانین كا كێ چاڤێن وی ساخ كرینە. ئەو یێ مەزنە پرسیارێ ژێ بكەن، ئەو ب خۆ دێ بەرسڤا هەوە دەت.»
- 22
- و دای و بابێن وی ئەڤ چەندە گۆت چنكو ژ جوهیان دترسیان. چنكو جوهیان خۆ كربوونە ئێك هەر ئێكێ دانێ بكەت عیسا مەسیحە ژ جڤاتا كنیشتێ دەربئێخن.
- 23
- ژ بەر ڤێ چەندێ گۆتن «ئەو یێ مەزنە پرسیارێ ژێ بكەن.»
- 24
- و پاشی جارەكا دی فەریسیان گازی كرە ئەوێ ژ بەری هنگی كۆرە و گۆتنێ: «خودێ مەزن بكە. ئەم دزانین ئەڤ زەلامێ هەنێ یێ گونەهكارە.»
- 25
- ئینا بەرسڤ دا: «ئەز نزانم گونەهكارە یان نە. ئەز تشتەكێ ب تنێ دزانم: ئەز یێ كۆرە بووم و نوكە دبینم.»
- 26
- ئینا جارەكا دی پرسیار ژێ كرن: «ئەوی چ ل تە كر؟ چەوا چاڤێن تە ساخ كرن؟»
- 27
- بەرسڤا وان دا: «من گۆتە هەوە و هەوە گوهـ نەدا من. ئەها هەوە دڤێت جارەكا دی گوهـ لێ ببن؟ ئەرێ ما هەوە دڤێت هوین ژی ببنە شاگردێن وی؟»
- 28
- ئینا چڤین دانێ و گۆتنێ: «تۆ شاگردێ وی! بەلێ ئەم شاگردێن موساینە.
- 29
- ئەم دزانین خودێ دگەل موسای ئاخفت بەلێ ئەڤی ئەم نزانین ژ كیڤە هاتییە.»
- 30
- ئینا زەلامی بەرسڤا وان دا: «ئەڤە تشتەكێ سەیرە! هوین نزانین ژ كیڤە هاتییە و ئەوی چاڤێن من ساخ كرن.
- 31
- ئەم دزانین خودێ گوهێ خۆ نادەتە گونەهكاران، بەلێ گوهێ خۆ ددەتە وی یێ ژ خودێ ترس و ب ڤیانا وی دكەت.
- 32
- و نەهاتییە گوهـ لێ بوون ل هەمی سەردەمان كو مرۆڤەكی چاڤێن كۆرەیەكی د زكماك دا ساخ كرین.
- 33
- ئەگەر ئەو نە ژ خودێ با ئەوی نەدشیا چ بكەت.»
- 34
- ئینا لێ كرنە هەوار: «تۆ ب هەمی ڤە د گونەهێ دا ژ دایك بووی، و تۆ مە فێردكەی؟» و پاشی دەرئێخستنە ژ دەرڤە.
- 35
- و عیسای زانی یێ دەرئێخستین. ئینا چوو نك و پرسیار ژێ كر: «ئەرێ تۆ باوەریێ ب كوڕێ مرۆڤ دئینی؟»
- 36
- ئەوی بەرسڤ دا: «ئەز خولام، ئەو كییە دا ئەز باوەریێ پێ بینم؟»
- 37
- ئینا عیسای گۆتێ: «ئەوێ تە دیتی و ئەوێ دگەل تە دئاخڤیت، ئەو ب خویە.»
- 38
- ئینا گۆت: «ئەز باوەریێ دئینم، ئەی خودان،» و خۆ بۆ چەماند.
- 39
- ئینا عیسا گۆت: «ئەز بۆ دادكرنێ یێ هاتمە ڤێ جیهانێ داكو كۆرە ببینن و یێن دبینن كۆرە ببن.»
- 40
- و هندەك فەریسیێن دگەل وی ئەو چەندە گوهـ لێ بوو و پرسیار كر: «ئەرێ ما ئەم ژی دكورەینە؟»
- 41
- ئینا عیسا بەرسڤا وان دا: «ئەگەر هوین كۆرە بان، چ گونەها هەوە نەدبوو، بەلێ هوین دبێژن ”ئەم دبینن،“ ئەڤجا گونەها هەوە دمینیت.»
