عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ئەگەرا نڤیسینا ڤێ پەرتوكێ
- 1
- ژ بەر كو گەلەكان دەست هاڤێتییە نڤیسینا وان رویدانێن د ناڤ مە دا پەیدا بووین
- 2
- هەروەكو ئەو مرۆڤێن ژ دەستپێكێ وەرە ب چاڤێ خۆ دیتین و گەهاندینە مە و بووینە خزمەتكارێن پەیڤێ،
- 3
- پشتی من هەمی تشت ژ دەستپێكێ ب هویری شرۆڤە كرین، من ژی ب باشی دیت، تاوفیلوسێ هێژا، ب رێكوپێكی بۆ تە بنڤیسم،
- 4
- دا تۆ راستیا وان پەیڤێن تۆ پێ هاتییە فێركرن بزانی.
- مزگینیا ژدایكبوونا یوحەننایێ تافیركەر
- 5
- ل سەردەمێ هێرودێسی، پاشایێ یەهودیایێ، كاهنەك هەبوو ناڤێ وی زەكەریا بوو ژ تیپا ئەبیای بوو و هەڤژینا وی ژ دویندەها هارونی بوو، ناڤێ وێ ئەلیزابێت بوو.
- 6
- هەردوو بەرامبەری خودێ دراست بوون و بێ گازندە فەرمان و شیرەتێن خودانی ب جهـ دئینان.
- 7
- لێ چ زارۆك نەبوون، چنكو هەڤژینا زەكەریای ئەلیزابێت یا خرش بوو و هەردوو ژی گەلەك ب ناڤ سالان ڤە چووبوون.
- 8
- هوسا چێبوو دەمێ وی د گەڕا تیپا خۆ دا خزمەتا خۆ یا كاهنیێ بەرامبەر خودێ دكر،
- 9
- ل دویڤ رەوشتێن كاهنیێ پشك بۆ زەكەریای كەفت كو بچیتە د پەرستگەها خودانی ڤە، دا بخویرێ بسوژیت.
- 10
- ل دەمێ بخویر سۆتنێ، هەمی کۆمەلا خەلكی ژ دەرڤە نڤێژ دكر.
- 11
- هنگی فریشتەكێ خودێ دیاربوو و ل رەخێ راستێ ژ جهێ سۆتنا بخویرێ یێ راوەستیای بوو.
- 12
- دەمێ زەكەریای فریشتە دیتی، تێكچوو و ترس كەفتە دلێ وی.
- 13
- و فریشتەی گۆتێ: «زەكەریا نەترسە، چنكو داخوازیا تە هاتە بهیستن، و دێ هەڤژینا تە ئەلیزابێت كوڕەك بیت و تۆ دێ ناڤێ وی كەیە یوحەننا.
- 14
- و دێ ئەو كوڕ بیتە جهێ كەیف و دلخۆشیا تە و دێ گەلەك مرۆڤ ب دایكبوونا وی دلشاد بن.
- 15
- چنكو دێ ل بەرامبەری خودێ گەلەك یێ مەزن بیت، مەیێ و هەر تشتەكێ مرۆڤی سەرخۆش بكەت ناڤەخوت و هێشتا ئەو د زكێ دایكا خۆ دا، دێ ژ گیانێ پیرۆز پڕ بیت.
- 16
- و دێ گەلەكان ژ گەلێ ئیسرائیلی بۆ خودان خودایێ وان ڤەگەڕینیت،
- 17
- دێ ب گیان و شیانا ئیلیای ب پێش وی كەڤیت، داكو دلێن بابان ڤەگەڕینیتە سەر زارۆكان، و ڤارێبوویان ڤەگەڕینیتە داناییا چاكان، داكو مللەتەكی بۆ خودانی ئامادە بكەت.»
- 18
- ئینا زەكەریای پرسیارا فریشتەی كر: «دێ چەوا ژ ڤێ ئاخفتنێ پشت راست بم؟ چنكو ئەز كالەمێرم و هەڤژینا من ژی یا ب ناڤ سال ڤە چووی.»
- 19
- ئەڤجا فریشتەی بەرسڤا وی دا: «ئەز جبرائیلم ئەوێ ل بەر دەستێ خودێ راوەستیای، ئەزێ هنارتیم داكو دگەل تە باخڤم و ڤێ مزگینیێ بدەمە تە.
- 20
- و ئەڤە تۆ دێ بێ دەنگ مینی و نەشێی بئاخڤی تا وێ رۆژا ئەڤ تشتە ب جهـ بهێن، چنكو تە باوەری ب ئاخفتنا من نەئینا، و ئەڤە دێ د دەمێ خۆ دا ب جهـ هێن.
- 21
- خەلكێ ژ دەرڤە چاڤەرێی زەكەریای بوو، ژ بەر گیروبوونا وی د ناڤ پەرستگەهێ دا حێبەتی مابوون.
- 22
- دەمێ زەكەریا دەركەفتی، نەشیا بۆ وان باخڤیت، ئینا وان زانی ئەوی د پەرستگەهێ ڤە بینینەكا دیتی. ئەو ب ئاماژەیان دگەل وان ئاخفت و لاڵ ما.
- 23
- دەمێ رۆژێن خزمەتا وی ب دوماهی هاتین، بەرەڤ مالا خۆ ڤەگەڕیا.
- 24
- پشتی وان رۆژان هەڤژینا وی ئەلیزابێت ب دوو گیان كەفت، لێ وێ پێنج هەیڤان خۆ ڤەشارت و گۆت:
- 25
- «خودێ ل رۆژێن بەرێ خۆ دایە من ئەڤ چەندە ل من كر، دا شەرمزاریا من دناڤ مرۆڤان دا راكەت.»
- مزگینیا ژدایكبوونا عیسای
- 26
- ل هەیڤا شەشێ جبرائیل ژ لایێ خودێ ڤە بۆ باژێرێ ناسیرە هاتە هنارتن، ئەو ژی باژێرەكە ژ باژێرێن جەلیل،
- 27
- داكو بچیتە نك كچەكا كچین دەزگرا زەلامەكێ دبێژنێ یوسڤ، ژ بنەمالا داوودی بوو، ناڤێ ئەوێ كچا كچین مەریەم بوو.
- 28
- فریشتە چوو ژۆر و گۆتێ: «سلاڤ ل سەر تە بن ئەوا خودێ داناهی لێ كری، خودێ دگەل تەیە.»
- 29
- ئینا مەریەم ژ بەر گۆتنێن فریشتەی تێكچوو و پرسیار ژ خۆ كر: «ئەرێ تۆ بێژی ئەڤ سلاڤە چ بیت؟»
- 30
- ئەڤجا فریشتەی گۆتێ: «مەریەم، تۆ نەترسە داناهی ژ نك خودێ بۆ تە هاتییە دان.
- 31
- ئەڤە تۆ دێ ب دوو گیان كەڤی، و دێ تە كوڕەك بیت، دێ ناڤێ وی كەیە عیسا.
- 32
- و دێ مەزن بیت و دێ ب كوڕێ یێ هەری بلند هێتە نیاسین و خودان یێ خودێ دێ تەختێ بابێ وی داوودی دەتێ.
- 33
- و دێ پاشاتیێ ل بنەمالا یەعقوبی هەتا هەتایێ كەت، و دوماهی بۆ پاشاتیا وی نینە.»
- 34
- مەریەمێ گۆتە فریشتەی: «دێ چەوا ئەڤ تشتە چێبیت، چنكو ئەز چ زەلامان نانیاسم؟»
- 35
- فریشتەی گۆتێ: «گیانێ پیرۆز دێ دادەتە سەر تە، و شیانا یێ هەری بلند دێ سیبەرێ ل تە كەت، و ژ بەر هندێ ئەو پیرۆزێ ژ تە دبیت دێ بێژنێ كوڕێ خودێ.
- 36
- و ئەڤە مرۆڤا تە ئەلیزابێتە، ئەو ژی د پیراتیا خۆ دا یا ب كوڕكەكی ب دوو گیان كەفتی. ئەوا ب خرشی دهاتە نیاسین، ئەڤە هەیڤا وێ یا شەشێیە.
- 37
- چنكو چ تشت نینە د شیانا خودێ دا نەبیت.»
- 38
- ئینا مەریەمێ گۆت: «ئەز كۆلەیا خودانیمە و بلا ئەوا تە گۆتی ب جهـ بهێت.» و پاشی فریشتە ژ نك چوو.
- مەریەم ل نك ئەلیزابێتێ
- 39
- ل وان رۆژان مەریەم ب لەز رابوو قەستا چیایان كر و چوو باژێرەكێ دەڤەرا یەهودیایێ،
- 40
- و چوو د مالا زەكەریای ڤە و سلاڤ ل ئەلیزابێتێ كر.
- 41
- دەمێ ئەلیزابێتێ گوهـ ل سلاڤا مەریەمێ بووی، ئەو زارۆكێ د زكێ وێ دا، خۆ هەلاڤێت و ئەلیزابێت ژ گیانێ پیرۆز پڕ بوو.
- 42
- و ب دەنگەكێ بلند گازی كر و گۆت: «تۆ ل ناڤ ژنان یا پیرۆزی، ئەوێ د زكێ تە ژی دا یێ پیرۆزە.
- 43
- ئەڤە چ بەختەوەریەكە كو دایكا خودانێ من سەرەدانا من بكەت؟
- 44
- ئەو دەمێ دەنگێ سلاڤا تە گەهشتییە گوهێ من، زارۆكێ د زكێ من دا خۆ ژ كەیفان دا هەلاڤێت.
- 45
- ئەڤجا خوزیكێن وێ یا باوەری ئینای، كو ئاخفتنا خودێ دێ ب جهـ هێت، ئەوا ژ زاردەڤێ خودێ بۆ وێ هاتییە گۆتن.»
- سرودا مەریەمێ
- 46
- مەریەمێ گۆت: «دەروونێ من پەسنا خودێ دكەت
- 47
- و گیانێ من ب خودێ، قورتالكەرێ من، گەلەك كەیفخۆش دبیت،
- 48
- چنكو ئەوی بەرێ خۆ دا بەلەنگازیا خزمەتكارا خۆ و ژ نوكە و پێڤە هەمی نفش دێ بێژنە من: خوزیكێن تە.
- 49
- شیانداری گەلەك كارێن مەزن ل من كرن، ناڤێ وی پیرۆزە.
- 50
- دلوڤانیا وی نفش ل دویف نفشی بۆ وانە، یێن كو ژ وی دترسن.
- 51
- وی ب زەندێن خۆ كارەكێ ب هێز كر، و ئەوێن د دلێ خۆ دا دفنبلند بەلاڤە كرن.
- 52
- ئەوێن ب شیان ژ تەختێ وان ئینانە خوارێ، و ئەوێن دەروون بچویك بلندكرن.
- 53
- یێن برسی ب تشتێن باش تێركرن و یێن دەولەمەند ژی دەست ڤالا هنارتن.
- 54
- ئەوی دلوڤانی ئینا بیرا خۆ، و هاریكاریا خزمەتكارێ خۆ ئیسرائیل كر،
- 55
- هەروەكو بۆ هەتا هەتایێ سۆز دایە باب و باپیرێن مە ئیبراهیم و دویندەها وی.»
- 56
- مەریەم نێزیكی سێ هەیڤان ل نك ئەلیزابێتێ ما و پاشی ڤەگەڕیا مالا خۆ.
- ژدایكبوونا یوحەننایێ تافیركەر
- 57
- هندی ئەلیزابێت بوو، رۆژێن وێ ب دوماهی هاتن و زارۆك بوو.
- 58
- هەڤسوی و مرۆڤێن وێ گوهـ لێ بوو، كو خودێ گەلەك دلوڤانی یا پێ بری و گەلەك دگەل وێ دلخۆش بوون.
- 59
- و رۆژا هەشتێ ئامادەبوون داكو كوڕكی سونەت بكەن، و وان دڤیا ب ناڤێ بابێ وی زەكەریای ناڤ بكەن
- 60
- لێ دایكا وی گۆت: «نەخێر، دێ ناڤێ وی كەینە: یوحەننا.»
- 61
- وان گۆتێ: «كەسەك ژ هۆزا تە ب ڤی ناڤی نەهاتییە ناڤكرن.»
- 62
- و ئەوان ب ئاماژەیان گۆتنە بابێ وی كا وی دڤێت ناڤێ وی بكەتە چ؟
- 63
- و زەكەریای دەپەك ژ وان خواست و ل سەر نڤیسی: «ناڤێ وی یوحەننایە.» ئینا هەمی گوهشین.
- 64
- ئێكسەر دەڤێ زەكەریای ڤەبوو و ئەزمانێ وی گەڕیا و ئاخفت و پەسنا خودێ كر.
- 65
- هەمی ئاكنجیێن دەوروبەرێن وان ترسیان و ئەڤ رویدانە ل هەمی چیایێن یەهودیایێ بوونە بابەتێن ئاخفتنێن وان.
- 66
- و هەمی گوهداران كرە د دلێ خۆ دا و گۆتن: «ئەرێ تۆ بێژی ئەڤ كوڕە دێ بیتە چ؟» چنكو دەستێ خودێ دگەل دا بوو.
- پێشبینیا زەكەریای
- 67
- بابێ وی زەكەریا ژ گیانێ پیرۆز پڕ بوو و پێشبینی كر و گۆت:
- 68
- «مەزناهی بۆ خودان خودایێ ئیسرائیل، چنكو سەرا گەلێ خۆ دا و ب بها رزگار كر
- 69
- و بۆ مە شاخەكێ قورتالبوونێ ژ بنەمالا خزمەتكارێ خۆ داوودی دروست كر،
- 70
- وەكو خودێ ب ئەزمانێ پێغەمبەرێن خۆ یێن بەرێ و پیرۆز گۆتی،
- 71
- بۆ قورتالبوونێ ژ هەمی دوژمن و كیندارێن مە،
- 72
- داكو دلوڤانیێ بەرامبەری بابكالێن مە تەمام بكەت و پەیمانا خۆ یا پیرۆز بینیتە بیرا خۆ،
- 73
- ئەو سویندا دایە بابێ مە ئیبراهیمی، بدەتە مە،
- 74
- داكو ئەم بێ ترس، پشتی ئەم ژ دەستێ دوژمنێن مە قورتال كرین، پەرستنا وی بكەین
- 75
- ب پیرۆزی و راستی ل بەرامبەر وی، هەمی رۆژێن ژیانا خۆ.
- 76
- تۆ ژی زارۆكۆ، دێ بێژنە تە پێغەمبەرێ وی یێ هەری بلند، چنكو تۆ دێ كەڤییە پێشیا خودانی، داكو رێكێن وی بۆ ئامادە كەی
- 77
- و تۆ بۆ گەلێ وی دیار بكەی و وان تێبگەهینی، كو قورتالبوون ب لێبورینا گونەهێن وانە
- 78
- ب رێكا هەستێن دلوڤان یێن خودایێ مە، ئەوێن ب رێكا وان هەلاتنا رۆژێ دێ ژ بلنداهیان ب سەر مە دا هێت،
- 79
- داكو روناهیێ بدەتە وان، ئەوێن ل تاریستان و سیبەرا مرنێ روینشتین، و بەرێ مە بدەتە رێكا ئاشتیێ.»
- 80
- ئەو زارۆك مەزن دبوو و ب گیانی ب هێز دكەفت و تا رۆژا بۆ ئیسرائیلێ دیار بووی، ل چۆلی دژیا.
