عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ژدایكبوونا عیسایێ مەسیح
- 1
- ل وی سەردەمی ئوغستوسێ قەیسەر فەرمانەك دا، هەمی مرۆڤێن ئیمپراتۆریێ بهێنە سەرژمێركرن.
- 2
- د ماوێ حكومرانیا كرینیوسی بۆ سوریا دا، ئەڤە ئێكەم سەرژمێری بوو هاتییە كرن.
- 3
- ئینا هەمی چوونە باژێرێن خۆ، دا ناڤێن خۆ بنڤیسن.
- 4
- یوسڤ ژی ژ باژێرێ ناسیرە ل دەڤەرا جەلیل چوو باژێرێ داوودی یێ كو دبێژنێ بەیت لەحم ل دەڤەرا یەهودیایێ، چنكو ئەو ژ بنەمالا داوودی و هۆزا وی بوو،
- 5
- دا ناڤێ وی دگەل دەزگرا وی، مەریەمێ ئەوا ب دووگیان، بهێتە نڤیسین.
- 6
- دەمێ ئەو ل وێرێ، رۆژێن مەریەمێ تەمامبوون و بوو دەمێ زارۆكبوونێ.
- 7
- خودێ كوڕێ وێ یێ نەخری دایێ، و د پێچكەكێ پێچا و د هافڕی دا نڤاند، چنكو د خانی ڤە جهێ وان نەبوو.
- شڤان و فریشتە
- 8
- ل وێ دەڤەرێ هندەك شڤان هەبوون ل چۆلی دمان، ب شەڤێ زێرەڤانی ل كەرێ پەزی دكر.
- 9
- ژ نشكەكێ ڤە فریشتەكێ خودێ ل وان دیار بوو و مەزناهیا خودێ دورێن وانا تژی روناهی كرن و ترسەكا مەزن ئەو گرتن.
- 10
- فریشتەی گۆتە وان: «نەترسن، ئەڤە ئەزێ مزگینیا دلخۆشیەكا مەزن ددەمە هەوە، و دێ بیتە دلخۆشیا هەمی مللەتی.
- 11
- ئەڤرۆ ل باژێرێ داوودی قورتالكەرەك بۆ هەوە یێ ژ دایك بووی، ئەو ژی مەسیحێ خودانە.
- 12
- نیشان ژی بۆ هەوە دێ ئەڤە بیت: دێ زارۆكەكێ د ناڤ پێچكێ دا پێچای و د هافری دا نڤستی بینن.»
- 13
- ژ نشكەكێ ڤە گەلەك سەربازێن ئەسمانی دگەل فریشتەی دیاربوون و پەسنا خودێ كرن و گۆتن:
- 14
- «مەزناهی بۆ خودێ ل بلنداهیان، و ل سەر ئەردی ژی ئاشتی بۆ مرۆڤانە یێن كو خودێ ژێ رازی.»
- 15
- دەمێ فریشتان شڤان هێلاین و چووینە ئەسمانی، شڤانان گۆتە ئێكودوو: «ئەڤجا دا بچینە بەیت لەحم، دا ئەڤ تشتێ رویدای و خودێ گەهاندییە مە ببینین.»
- 16
- شڤان ب لەز چوون، مەریەم و یوسڤ و زارۆكێ وان ل وێرێ یێ د هافڕی دا دیتن.
- 17
- دەمێ دیتین، ئەو ئاخفتنا دەربارەی زارۆكی بۆ وان هاتییە گۆتن بەلاڤە كر.
- 18
- هەمی ئەوێن ئەڤ ئاخفتنە ژ شڤانان گوهـ لێ بووی گوهشین.
- 19
- لێ هندی مەریەم بوو، ئەڤ تشتە هەمی د دلێ خۆ دا هەلدگرتن و ب كویری هزر تێدا دكر.
- 20
- شڤان ڤەگەڕیان مەزناهیا خودێ دكر و پەسنا وی دكر، ژ بەر ب جهـ هاتنا هەمی تشتێن دیتین و گوهـ لێ بووین، هەروەكو بۆ وان هاتییە گۆتن.
- 21
- پشتی هەشت رۆژ ب سەر ژدایكبوونێ ڤە بورین، دەمێ سونەتكرنا وی هات، و ناڤێ وی كرنە عیسا، وەكو ناڤ ژ لایێ فریشتەی ڤە، بەری دایكا وی ب وی ب دووگیان بكەڤیت، ل سەر هاتییە دانان.
- 22
- دەمێ ل دویڤ دەستورێ موسای رۆژێن پاقژكرنا وێ ب دوماهیك هاتین، وان كوڕك برە ئورشەلیمێ، دا پێشكێشی خودانی بكەن،
- 23
- هەروەكو د دەستورێ خودێ دا هاتییە نڤیسین: «هەر نەخریەك ژ نێران دبێژنێ پیرۆزێ خودێ»
- 24
- و داكو سەرەكی بدەن وەكو د دەستورێ خودێ دا هاتی: «ژ جوتەكێ كەڤوكان یان دوو تێشكێن كوتران».
- 25
- زەلامەك ل ئورشەلیمێ هەبوو دگۆتنێ شەمعون. یێ راست و ژ خودێ ترس بوو. چاڤەرێی دلخۆشكرنا ئیسرائیلێ بوو و گیانێ پیرۆز ل سەر بوو.
- 26
- ژ لایێ گیانێ پیرۆز ڤە بۆ وی هاتبوو دیاركرن، كو ئەو نامریت تاكو مەسیحێ خودانی ببینیت.
- 27
- گیانێ پیرۆز بەرێ شەمعونی دابوو پەرستگەهێ، ل دەمێ دایك و بابێن عیسایێ زارۆك ئەو گەهاندییە پەرستگەهێ، دا بۆ وی ئەوا د دەستوری دا هاتی، بكەن.
- 28
- شەمعونی ئەو دانا سەر دەستێن خۆ و سوپاسیا خودێ كر و گۆت:
- 29
- « ئەڤجا خودانێ من، نوكە تۆ ل دویڤ گۆتنا خۆ كولەیێ خۆ ب ئاشتیانە بەرددەی،
- 30
- چنكو ئەڤە چاڤێن من قورتالكرنا تە دیتن،
- 31
- ئەوێ تە ل بەر چاڤێ هەمی مللەتان ئامادەكری.
- 32
- ئەوە روناهی بۆ ڤەكرنا چاڤێن مللەتان و شانازی بۆ گەلێ تە ئیسرائیل.»
- 33
- دایك و بابێن عیسای ژ ڤان ئاخفتنێن دەربارەی وی هاتینە گۆتن گوهشین.
- 34
- شەمعونی ئەو پیرۆزكرن و گۆتە مەریەما دایكا وی: «ئەڤ زارۆكێ هەنێ یێ بۆ كەفتن و رابوونا گەلەكان ل ئیسرائیلێ هاتییە دانان، و وەكو نیشانەكێ دێ بەرهنگاری لێ هێتە كرن،
- 35
- داكو دلێن گەلەكان بهێنە ئاشكراكرن. دێ شیرەك دلێ تە ژی كون كەت.»
- 36
- پێغەمبەرەكا ژن ل وێرێ بوو دگۆتنێ حەننا كچا فەنوئێلی ژ هۆزا ئاشێر بوو و گەلەكا ب ناڤ سال ڤە چوویبوو. پشتی شوی كرنێ حەفت سالان دگەل مێرێ خۆ ژیابوو،
- 37
- و هەشتێ و چوار سالان بیژن مابوو. ئەوێ پەرستگەهـ ب جهـ نەدهێلا، ب شەڤ و رۆژان رۆژی دگرتن و نڤێژ دكرن و پەرستن دكر.
- 38
- وی دەمی ئەو ل پەرستگەهێ ئامادەبوو، دەست ب پەسنا خودێ كر و دەربارەی عیسای بۆ ئەوێن چاڤەرێ یا قورتالكرنا ئورشەلیمێ دكرن، دئاخفت.
- 39
- پشتی هەمی تشتێن ل دویڤ دەستورێ خودانی ب جهـ ئیناین، دایك و بابێن عیسای بۆ باژێرێ خۆ «ناسیرە» كو دكەڤیتە هەرێما «جەلیل» ڤەگەڕیانە ڤە.
- 40
- زارۆك مەزن دبوو و ب هێز دكەفت و تژی دانایی دبوو، و داناهیا خودێ ل سەر بوو.
- عیسایێ زارۆك دمینیتە د پەرستگەهێ ڤە
- 41
- دایك و بابێن وی سالێ جارەكێ ژ بەر جەژنا دەربازبوونێ دچوونە ئورشەلیمێ.
- 42
- دەمێ ژیێ وی گەهشتیە دوازدە سالیێ، ل دویڤ رەوشتێن جەژنێ چوونە ئورشەلیمێ،
- 43
- و پشتی رۆژێن جەژنێ تەمام كرین، ڤەگەڕیان. عیسایێ زارۆك، بێی كو دایك و بابێن وی پێ بزانن، ما ل ئورشەلیمێ.
- 44
- وان هزر كر یێ دگەل هەڤالێن خۆ ب رێ ڤە، رێیا رۆژەكێ چوون، پشتی هنگی د ناڤ خزم و كەسێن خۆ دا لێ گەڕیان.
- 45
- لێ دەمێ نەدیتی، ڤەگەڕیانە ئورشەلیمێ و لێ گەڕیان.
- 46
- پشتی هنگی ب سێ رۆژان عیسا ل پەرستگەهێ دیت یێ د ناڤبەرا مامۆستایێن دەستوری دا روینشتییە و گوهێ خۆ ددەتێ و پرسیارا ئاراستەی وان دكەت.
- 47
- هەمی مرۆڤێن گوهـ لێ دبوو، ژ تێگەهشتن و بەرسڤێن وی دگوهشین.
- 48
- دەمێ چاڤێ وان ب وی كەفتی، مەندەهوش بوون و دایكا وی گۆتێ: «كوڕێ من، تە بۆچی ئەڤە ب سەرێ مە ئینا؟ ئەز و بابێ تە ب شەپرزەیی ل تە دگەڕیاین.»
- 49
- عیسای بەرسڤا وان دا و گۆت: «بۆچی هوین ل من دگەڕیان؟ ئەرێ ما هەوە نەدزانی كو پێدڤییە ئەز ل مالا بابێ خۆ بم؟»[a]
- 50
- لێ ئەو د ئاخفتنێن وی نەگەهشتن.
- 51
- پاشی دگەل وان بەرەڤ باژێرێ ناسیرە ڤەگەڕیا و ل ژێر چاڤدێریا وان بوو و دایكا وی ئەڤ تشتە هەمی د دلێ خۆ دا هەلدگرتن.
- 52
- هندی عیسا بوو ب دانا دكەفت و مەزن دبوو و ل پێش چاڤێن خودێ و خەلكی پایەبلند دبوو و پێش دكەفت.
- a. ئانكو: پێدڤییە ئەز مژیلی كاروبارێن بابێ خۆ بم؟
