عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- مەسیح حەفتێ و دوو كەسان دهنێریت
- 1
- پشتی هنگی خودانی حەفتێ و دوو كەسێن دی ژی دوو دووە ل پێشیا خۆ هنارتنە هەر جهـ و باژێرێ كو دڤیا بچیتێ
- 2
- و گۆتە وان: «دورین گەلەكە، لێ پالەیێن دورینێ دكێمن، ئەڤجا ژ خودانێ دورینێ بخوازن هندەك پالەیان بهنێریتە دورینا خۆ.
- 3
- هەڕن! ئەها ئەڤە ئەز هەوە وەكو بەرخان بۆ ناڤ گورگان دهنێرم
- 4
- چ ژ ڤان تشتان دگەل خۆ هەلنەگرن: نە گرێكا پارا، و نە تویركی، نە پێلاڤان و د رێكا خۆ دا سلاڤێ ل كەسێ نەكەن.
- 5
- هەر مالا هوین بچنێ ل پێشیێ بێژن: ”ئاشتی بۆ ڤێ مالێ بیت.“
- 6
- ئەگەر د مالێ دا كۆرێ ئاشتیێ هەبیت، دێ ئاشتیا هەوە د سەر دا گریت، و ئەگەر نە، ئاشتیا هەوە دێ بوو هەوە ڤەگەڕیتەڤە.
- 7
- و هوین ئەوی تشتی بخون و ڤەخون یێ د مالا وان دا هەی، چنكو پالە هەژی كرێیا خۆیە. ژ مالەكێ بۆ مالەكێ نەچن.
- 8
- و هەر باژێرەكی هوین بچنێ و هەوە وەربگریت، ژ وێ خوارنێ بخون ئەوا بۆ هەوە دهێتە پێشكێش كرن.
- 9
- و نەساخێن تێدا ساخ بكەن، و بێژنە وان پاشاتیا خودێ یا نێزیكی هەوە بووی.
- 10
- لێ هەر باژێرێ هوین بچنێ و هەوە وەرنەگریت، دەركەڤنە كولانێن وی باژێری و بێژن:
- 11
- ”تا تۆزا باژێرێ هەوە، ئەوا ب پێن مە ڤە دادقوتینە سەر هەوە، لێ ئەڤێ بزانن: پاشاتیا خودێ یا نێزیك بووی.“
- 12
- ئەز دبێژمە هەوە، ل وێ رۆژێ دێ بۆ سەدوم ژ وی باژێری ب ساناهیتر بیت.
- 13
- نەخۆزیكێن تە كورەزینێ، نەخۆزیكێن تە بەیت سایدا. ئەو حنێرێن ل ناڤ هەوە رویداین، ئەگەر ل سور و سایدا هاتبانەكرن، دا ژمێژە ل خۆ زڤرن، و دا كنجران كەنە بەر خۆ و د ناڤ خولیێ دا روینن.
- 14
- لێ ل رۆژا دادكرنێ دێ بۆ سور و سایدا ژ هەوە ب ساناهیتر بیت.
- 15
- و تۆ كەفەرناحوم، ما دێ بۆ ئەسمانی هێیە بلندكرن؟ نە، تۆ دێ كەڤیە بنێ چالێ.
- 16
- و هەر كەسێ گوهێ خۆ بدەتە هەوە، ئەو گوهێ خۆ ددەتە من، و ئەوێ هەوە رەت بكەت، من ژی رەت دكەت، و یێ من رەت بكەت، ئەو وی رەت دكەت یێ ئەز هنارتیم.»
- ڤەگەریانا حەفتێ و دوویان
- 17
- پاشی هەر حەفتێ و دوو ب دلخۆشی ڤەگەڕیان و گۆتن: «خودان، ب ناڤێ تە تا ئەجنە ژی دكەڤنە ل ژێر دەستێ مە.»
- 18
- عیسای گۆتە وان: «من ئبلیس دیت وەكو بریسیێ ژ ئەسمانی دكەفت.
- 19
- و ئەڤە من هند دەستهەلات دا هەوە، داكو هوین پێ ل مار و دووپشك و هەمی شیانا دوژمنی بكەن و چ تشت نەشێت هەوە چ جاران بئێشینیت،
- 20
- لێ ب ڤێ چەندێ دلخۆش نەبن، كو گیانێن پیس دكەڤنە ژێر دەستێ هەوە، بەلكو دلخۆش ببن، چنكو ناڤێن هەوە یێ ل ئەسمانان هاتینە نڤیسین.»
- دیاركرنا نهێنیان بۆ هەژاران
- 21
- د وێ گاڤێ دا عیسا گەلەك ب گیانی دلخۆش بوو و گۆت: «باب، خودانێ ئەرد و ئەسمانی، ئەز گەلەك سوپاسیا تە دكەم، چنكو تە ئەڤ تشتێن هەنێ ژ مرۆڤێن تێگەهشتی و دانا یێن ڤەشارتین و تە بۆ زارۆكان دیاركرن. بەلێ باب، چنكو هوسا د دیتنا تە دا باشە.
- 22
- بابێ من هەمی تشت یێ كرییە د دەستێ من دا، و كەسەك نزانیت كوڕ كییە، ئەگەر باب نەبیت و هەروەسا كەسەك نزانیت باب كییە ژبلی كوڕی، و هەركەسێ كوڕی بڤێت بۆ وان دیار بكەت.
- 23
- پاشی ل خۆ زڤری و بەرێ خۆ دا شاگردان و ب تنێ گۆتە وان: خوزیگێن وان چاڤان ئەوێن وێ چەندێ دبینن،یا هوین دبینن.
- 24
- ئەز دبێژمە هەوە گەلەك پێغەمبەر و پاشایان حەزدكر وان ببینن یێن هوین دبینن، لێ وان ئەو نەدیتن. وان حەزدكر گوهـ ل وان تشتان ببیت یێن هەوە گوهـ لێ دبیت، لێ وان گوهـ لێ نەبوو.»
- نموونەیا سامەریێ چاك
- 25
- ئێك ژ زانایێن دەستوری بەرهنگاری عیسای بوو و دڤیا تاقی بكەت و گۆتێ: «مامۆستا، ئەز چ بكەم داكو ژیانا هەروهەر ب دەست خۆ ڤە بینم؟»
- 26
- عیسای گۆتێ: «د دەستوری دا چ هاتییە نڤیسین؟ تۆ چەوا دخوینی؟»
- 27
- ئینا بەرسڤ دا: «ژ هەمی دل و دەروون و شیان و هزرا خۆ، حەژ خودانی یێ خودایێ خو بكە و كا تۆ چەوا حەژ خۆ دكەی، وەسا حەژ نێزیكێ خۆ ژی بكە.»
- 28
- عیسای گۆتێ: «بەرسڤا تە دروستە، ئەگەر تە پێ كر دێ ژی.»
- 29
- لێ ئەوی دڤیا خۆ ب راستداریێ دەربئێخیت. ئەڤ پرسیارە ژ عیسای كر: «نێزیكێ من كییە؟»
- 30
- عیسای بەرسڤا وی دا و گۆتێ: «مرۆڤەك ژ ئورشەلیمێ بۆ ئەریحا دهات، ئەو مرۆڤ كەفتە د لەپێ رێگران دا، و شەلاند و گەلەك قوتان و نیڤ كوشتی هێلا و چوون.
- 31
- وەسا چێبوو كاهنەك د وێ رێكێ را بوری، و چاڤێ وی ب وی مرۆڤی كەفت، لێ كاهنی چ پویتە پێ نەكر، و هێلا و چوو رەخێ دی یێ رێكێ
- 32
- هەروەسا ئێك ژ لاویان د وێ رێكێ را هات، و بەرێ خۆ دایێ و هێلا و چوو رەخێ دی یێ رێكێ.
- 33
- لێ رێڤینگەكێ سامەری د وێرێ را بوری و دەمێ چاڤێ وی ڤێ كەفتی دلێ وی پێ سۆت.
- 34
- ئینا خۆ نێزیك كر، و زەیت و مەی ب برینێن وی دا كر و پێچان، پاشی ل دەوارێ خۆ سیار كر و گەهاندە خانێ و چاڤێ خۆ دایێ.
- 35
- و ل رۆژا پاشتر، دوو دینار ئینانە دەرێ و دانە خودانێ خانێ و گۆتێ: ”چاڤێ خۆ بدەیێ و هندی تۆ پتر ل ڤی مرۆڤی ب مەزێخی، دەمێ ئەز ڤەدگەڕم دێ دەمە تە.“
- 36
- ئەڤجا ب هزرا تە كی ژ وان هەر سێكان نێزیكێ وی بوو، ئەوێ كەفتییە دەستێ رێگران؟»
- 37
- ئەوی بەرسڤا عیسای دا و گۆت: «ئەو مرۆڤێ دلوڤانی پێ بری.» عیسای گۆتێ: «هەرە تۆ ژی وەكو وی بكە.»
- عیسا ل مالا مەرتایێ و مەریەمێ
- 38
- دەمێ عیسا و شاگردێن خۆ ب رێ دچوون، گەهشتنە گوندەكی و ژنكەكێ دگۆتنێ مەرتا ئەو ل مالا خۆ مێڤان كر.
- 39
- و ئەوێ ژنكێ خویشكەك هەبوو دگۆتنێ مەریەم، ل نك پێن عیسای روینشت و گوهێ خۆ دا گۆتنێن وی
- 40
- هندی مەرتا بوو ب خزمەتا مێڤانان ڤە شەپرزە ببوو، مەرتا هات و گۆتە عیسای: «خودان، ما تۆ پویتەی پێ نادەی چەوا خویشكا من ئەزا هێلایم داكو ب تنێ خزمەتێ بكەم؟ بێژێ بلا هاری من بكەت.»
- 41
- لێ عیسای بەرسڤا وێ دا و گۆت: «مەرتا، مەرتا، تۆ خەمخوریێ ب گەلەك تشتان دبەی و یا شەپرزەی،
- 42
- لێ ب تنێ تشتەك یێ پێدڤییە و مەریەمێ ب خۆ بارا باش یا هەلبژارتی و ژێ ناهێتە ستاندن.»
