عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- نموونەیا بەرخێ بەرزە
- 1
- هەمی باجگر و گونەهكاران خۆ نێزیكی عیسای دكر دا گوهێ خۆ بدەنێ،
- 2
- فەریسی و مامۆستایێن دەستوری پتەپت كر و گۆتن: «ئەڤ مرۆڤە گونەهكاران وەردگریت و دگەل وان دخوت.»
- 3
- ئینا عیسای ئەڤ نموونە بۆ ئینا و گۆتێ:
- 4
- «كیژ مرۆڤ ژ هەوە سەد بەرخ هەبن و ئێك ژ وان بەرزە ببیت، ئەرێ ما وان نۆت و نەهان ل چۆلی ناهێلیت و بچیت ل دویڤ یا بەرزە بگەڕیێت تاكو ببینیت؟
- 5
- پشتی دبینیت ب كەیفخۆشی ددانیتە سەر ملێن خۆ،
- 6
- دێ ڤەگەریتە مال و گازی هەڤال و هەڤسوی یێن خۆ كەت و بێژیتە وان: ”هوین دگەل من دلخۆش ببن، چنكو من بەرخێ خۆ یێ بەرزە دیت.“
- 7
- ئەز دبێژمە هەوە هوسا ل ئەسمانی ژ بەر گونەهكارەكێ ل خۆ زڤڕی دێ دلخۆشی پتر هەبیت ژ نۆت و نەهـ راستدارێن نە پێدڤی لخۆزڤڕینێ.
- نموونەیا دەرهەمێ بەرزە
- 8
- یان ئەگەر ژنەكێ دەهـ دەرهەم هەبن، ئەگەر دەرهەمەك بەرزەكر، ئەرێ ما ئەو چرایەكێ هەلناكەت و مالێ نامالیت و ب هویری لێ بگەڕیێت تاكو ببینیت؟
- 9
- و پشتی دبینیت، دێ گازی هەڤال و هەڤسویان كەت و بێژیت: ”هوین دگەل من دلخۆش ببن، چنكو من دەرهەمێ خۆ یێ بەرزە كری دیت.“
- 10
- ئەز دبێژمە هەوە هوسا دێ كەیف د ناڤ فریشتێن خودێ دا پەیدا بیت دەمێ گونەهكارەك ل خۆ دزڤریت.»
- نموونەیا كوڕێ بەرزە
- 11
- و گۆت: «مرۆڤەكی دوو كوڕ هەبوون
- 12
- كوڕێ بچویك گۆتە بابێ خۆ: ”بابو، تۆ بارا من ژ میراتی بدە من.“ ئینا بابێ هەر تشتێ هەیی ل سەر وان لێكڤەكر.
- 13
- پشتی چەند رۆژان، كوڕێ بچویك هەمی تشتێن خۆ خڕڤەكرن و چوو وەلاتەكێ دویر، ل وێرێ هەمی مالێ خۆ ب خۆشیێن ژیانێ ڤە مەزاختن.
- 14
- پشتی وی تشتێن خۆ هەمی مەزاختین، برسەكا دژوار ب سەر وی وەلاتی دا هات، ئینا ئەو كەتە تەنگاڤیێ.
- 15
- ئەڤجا ئەو چوو خۆ گەهاندە ئێك ژ خەلكێ وی وەلاتی. ئەوی ژی هنارتە ناڤ زەڤیێن خۆ، دا بەڕازان بچەرینیت.
- 16
- خوزی رادهێلان زکێ خۆ ژ خرنیڤكێن بەڕازان دخوارن تژی كربا، و كەسێ چ نەددایێ.
- 17
- پاشی هشێن وی هاتنە سەری و گۆتە خۆ: ”پالەیێن بابێ من یێن كو نانێ وان ژ بەر دمینیت، چەند گەلەكن و ئەڤە ئەزێ ژ برسا دمرم.
- 18
- ئەز دێ رابم چمە نك بابێ خۆ، و دێ بێژمێ: ”بابو، ئەز دژی ئەسمانی و د راستا تە دا گونەهكار بووم
- 19
- و ئێدی ئەز نە هەژی هندێ مە كو ئەز ب كوڕێ تە بهێمە ب ناڤ كرن. من بكە ئێك ژ خزمەتكارێن خۆ یێن پالە.“
- 20
- ئینا رابوو ڤەگەڕیا نك بابێ خۆ، لێ بابێ وی ئەو هەر ژ دویرڤە دیت و دلێ وی پێڤە ما و كرە غار و هەمبێز كر و ب گەرمی ماچی كر.
- 21
- كوری گۆتێ: ”بابو، ئەز دژی ئەسمانی و د راستا تە گونەهكار بووم. ئێدی ئەز نە هەژی هندێمە كو ب كوڕێ تە بهێمە ب ناڤ كرن.“
- 22
- لێ بابێ گۆتە كۆلەیێن خۆ: ”هوین زویكا باشترین جلكان ئامادە بكەن و بكەنە بەر، و گوستیرەكێ بكەنە تبلێ و پێلاڤەكێ بكەنە پێیان
- 23
- و هوین گولكێ ربیتەكری بینن و سەرژێ بكەن، دا ئەم بخوین و كەیفێ بكەین،
- 24
- چنكو ئەڤ كوڕێ منێ مری بوو و ساخ بووڤە، و یێ بەرزە بوو و هاتە دیتن.“ ئینا وان دەست ب كەیفێ كر.
- 25
- د وی دەمی دا كوڕێ وی یێ مەزن ل ناڤ زەڤیێ بوو. گاڤا هاتی و نێزیكی مالێ بووی، گوهـ ل دەنگێ موزیكێ و سەمایێ بوو
- 26
- گازی ئێكێ ژ خزمەتكاران كر و پرسیار ژێ كر: ”ئەرێ ئەڤە چ چێبووییە؟“
- 27
- بەرسڤا وی دا: ”برایێ تە هاتەڤە، و بابێ تە گولكێ ربیتەكری سەرژێ كر، چنكو ئەو ب ساخی وەرگرتەڤە.“
- 28
- ئەو تورە بوو و نەدڤیا بچیتە د ژۆرڤە، ئینا بابێ وی دەركەفت و هیڤی ژێ كرن،
- 29
- لێ وی بەرسڤا بابێ خۆ دا و گۆت: ”ئەڤە چەند سالە ئەزێ خزمەتا تە دكەم. من چ بێ فەرمانیا تە نەكرییە، لێ تە كارەك نە دایە من ئەز ژی دگەل هەڤالێن خۆ كەیفێ بكەم.
- 30
- لێ دەمێ ئەڤ كوڕێ تە ئەوێ مالێ تە دگەل دەهمەنپیسان پویچ كری هاتییەڤە، تە گولكێ ربیتەكری بۆ سەرژێ كر.“
- 31
- بابێ وی گۆتێ: ”كوڕێ من، تۆ هەردەم یێ دگەل من، هەر تشتێ من هەی یێ تەیە،
- 32
- لێ یا فەر بوو ئەم دلشاد و كەیفخۆش بین، چنكو برایێ تە ئەڤە، یێ مری بوو، ساخ بووڤە، و یێ بەرزە بوو، هاتە ڤەدیتن.“»
