عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- عیسا ل بەرامبەری پیلاتوسی
- 1
- پاشی جەماوەرێ وان هەمی رابوو و عیسا برە نك پیلاتوسی
- 2
- و دەست ب شكایەت لێ كرنێ كر و گۆتن: «مە دیت ئەڤە یێ مللەتێ مە د سەردا دبەت و ناهێلیت خویك بۆ قەیسەری بهێتە دان و دبێژیت ئەز مەسیحێ پاشامە.»
- 3
- ئینا پیلاتوسی پرسیار ژێ كر: «تویی پاشایێ جوهیان؟» عیسای بەرسڤا وی دا: «تە ب دەڤێ خۆ گۆت.»
- 4
- ئینا پیلاتوسی گۆتە سەرۆكێن كاهنان و جەماوەری: «ئەز چ تاوانەكی ل نك ڤی مرۆڤی نابینم.»
- 5
- لێ ئەو ل سەر ئاخفتنا خۆ رژد مان و گۆتن: «ئەو فێركرنێ ل هەمی یەهودیایێ دكەت، هەر ژ جەلیل و تا ڤێرێ، و مللەتی دئازرینیت.»
- عیسا ل بەرامبەری هێرودێسی
- 6
- دەمێ پیلاتوسی ئەڤە گوهـ لێ بووی، پرسیاركر: «ئەرێ ئەڤ زەلامە جەلیلییە؟»
- 7
- و دەمێ زانی عیسا ل ژێر دەستهەلاتیا هێرودێسییە، هنارتە نك هێرودێسی یێ كو ل وان رۆژان ل ئورشەلێمێ بوو
- 8
- و دەمێ هێرودێسی عیسا دیتی، گەلەك كەیفخۆش بوو، چنكو ئەو دەمەكێ درێژ بوو دڤیا ببینیت، ژ بەر وان تشتێن دەربارەی وی گوهـ لێ بووین، و هیڤی دكرن نیشانەكێ ل سەر دەستی ببینیت.
- 9
- ئینا پرسیار ب گەلەك گۆتنان ژێ كر، لێ عیسای چ بەرسڤ نەدان
- 10
- و سەرۆكێن كاهنان و مامۆستایێن دەستوری رابوون و ب توندی سكالا لێ كرن.
- 11
- پاشی هێرودێسی و سەربازێن وی ب سفكاتی و ترانە پێ كرن و كراسەكێ تەیسوك كرە بەر و ڤەگەراندە نك پیلاتوسی
- 12
- و ل وێ رۆژێ پیلاتوس و هێرودێس بوونە هەڤالێن ئێك، و ژ بەری هنگی دوژمناتی د ناڤبەرا وان دا هەبوو.
- دادكرنا عیسای ب مرنێ
- 13
- پیلاتوسی داخوازا سەرۆكێن كاهنان و رێبەرێن مللەتی و خەلكی كر
- 14
- و گۆتە وان: «هەوە ئەڤ مرۆڤە ئینایە نك من وەكو ئێكێ مللەتی د سەردا دبەت. ئەها ئەڤە من بەرامبەری هەوە پشكنین كر، و من هیچ تاوانەك ل نك نەدیت ژ وان تاوانێن هوین سکالایێ لێ دكەن.
- 15
- هێرودێسی ژی چ نەدیت، لەوما ڤەگەڕاندە نك مە. بەرێ خۆ بدەنە ڤێرە، ئەوی چ تشتێ وەسا نەكرییە كو هەژی مرنێ بیت.
- 16
- ئەڤجا ئەز دێ وی تەمبی كەم و بەردەم.»
- 17
- و یا فەربوو ل سەر پیلاتوسی ل هەر جەژنەكێ بۆ وان ئێكی بەردەت.
- 18
- لێ هەمیان پێكڤە گازی كر: «ئەڤی بكوژە و بۆ مە باراباسی بەردە.»
- 19
- ئەڤ باراباسە ژ ئەگەرێ تێكدانا باژێری و كوشتنێ هاتبوو زیندان كرن.
- 20
- جارەكا دی پیلاتوس بۆ وان ئاخفت، چنكو دڤیا عیسای بەردەت.
- 21
- ئەوان پێكڤە گازی كرن: «ل خاچێ بدە! ل خاچێ بدە!»
- 22
- ئینا جارا سیێ گۆتە وان: «ئەڤی چ خرابی كرییە؟ ئەز چ تاوانان ل وی نابینم كو هەژی مرنێ بیت، ئەڤجا ئەز دێ وی تەمبی كەم و بەردەم.»
- 23
- لێ ئەو ل سەر ئاخفتنا خۆ مان و ب دەنگەكێ بلند گازی كرن و دخواستن بهێتە خاچدان و دەنگێ وان ب سەر دەنگێ وی كەفت
- 24
- ئینا پیلاتوسی بریار دا داخوازا وان ب جهـ بهێت.
- 25
- و ئەوێ ژ ئەگەرێ تێكدانێ و كوشتنێ هاتییە گرتن، ل دویڤ داخوازا وان بەردا، و عیسا ئێخستە ژێر حەزا وان.
- خاچدانا عیسای
- 26
- دەمێ ئەوان عیسا بۆ خاچدانێ دبر، ئێكێ خەلکێ قەیرەوانێ ژ ئاقاری دهات ناڤێ وی شەمعون بوو، گرت و خاچ دانا سەر ملێن وی داكو ل دویڤ عیسای ببەت.
- 27
- جەماوەرەكێ مەزن ژ خەلكی كەفتبوونە ل دویڤ وان دگەل هندەك ژنكان بۆ دگرین و خۆ ڤەدقوتان.
- 28
- ئینا عیسا ل وان زڤری و گۆت: «كچێن ئورشەلیمێ، بۆ من نەگرین، بەلكو هوین بۆ خۆ و بۆ زارۆكێن خۆ بگرین.
- 29
- چنكو ها ئەڤە دێ هندەك رۆژ هێن خەلك دێ بێژن: ”خوزیكێن ژنێن خرش و زكێن زارۆك ژێ نەبووین و ئەو مەمكێ شیر نەداین.“
- 30
- هنگی دێ دەست پێكەن و بێژنە چیایان ”ب سەر مە دا وە رن،“ و بێژنە گركان ”مە بنخێڤن.“
- 31
- چنكو ئەگەر هوسا ب دارا تەر بكەن، پا دێ حالێ دارا هشك چەوا بیت؟»
- 32
- و دوو یێن دی یێن گونەهبار دگەل عیسای برن داكو بهێنە كوشتن.
- 33
- دەمێ گەهشتینە وی جهێ دبێژنێ «كلوخ»، ئەو دگەل گونەهباران ل وێرێ خاچدان، ئێك ژ وان ل دەستێ وی یێ راستێ و یێ دی ل دەستێ وی یێ چەپێ.
- 34
- ئینا عیسای گۆت: «بابێ من، ل وان ببورە، چنكو ئەو نزانن كا ئەو چ دكەن.» جلكێن وی هاڤێتنە پشكێ و ل سەر خۆ لێكڤەكرن.
- 35
- و خەلك ل وێرێ راوەستیا بوو و بەرێ خۆ ددانێ، سەرۆكێن جوهیان ژی ترانێن خۆ پێ دكرن و دگۆتن: « ئەوی هندەكێن دی قورتال كرن، پا ئەگەر ئەو مەسیحێ هەلبژارتیێ خودێ بیت، بلا خۆ قورتال بكەت.»
- 36
- هەروەسا سەربازان ژی ترانە پێ دكرن و چوونە نك و سهك بۆ پێشكێشكر،
- 37
- و دگۆتن: «ئەگەر تۆ پاشایێ جوهیانی، خۆ قورتال بكە.»
- 38
- و پارچە دەپەك ل سەر سەرێ وی هەلاویستبوون و ئەڤ چەندە ل سەر نڤیسی بوو: «ئەڤەیە پاشایێ جوهیان»
- 39
- و ئێك ژ وان گونەهبارێن هەلاویستی جڤین دانێ و دگۆت: «ما تۆ نە مەسیحی؟ پا خۆ و مە ژی قورتال بكە.»
- 40
- لێ یێ دی ئەو پاشڤە بر و گۆتێ: « ما تۆ ژ خودێ ناترسی، نێ تۆ ژی یێ ل ژێر هەمان سزای؟
- 41
- ئەڤ سزایێ ل سەر مە، یێ دادپەروەرانەیە، چنكو ئەم یێ سزایێ كریارێن خۆ وەردگرین، لێ ڤی مرۆڤی چ خرابی نەكرییە.»
- 42
- و پاشی گۆت: «عیسا، من بینە بیرا خۆ دەمێ تۆ د پاشاتیا خۆ دا دهێی.»
- 43
- عیسای گۆتێ: «ب راستی ئەز دبێژمە تە، تۆ دێ ئەڤرۆ دگەل من بی د بەحەشتێ دا.»
- مرنا عیسای
- 44
- دەمژمێر نێزیكی شەشێ بوو، تاریێ هەمی ئەرد گرت، تا دەمژمێر نەه.
- 45
- چاڤێ رۆژێ تاری بوو، و پەردا پەرستگەهێ د نیڤێ را دریا و بوو دوو پارچە .
- 46
- عیسای ب دەنگەكێ بلند گازی كر: «بابێ من، ئەز گیانێ خۆ ددەمە دەستێ تە.» و پشتی ئەڤە گۆتی گیان ژ دەست دا.
- 47
- دەمێ سەرلەشكەری ئەڤ تشتێ چێبووی دیتی، خودێ مەزن كر و گۆت: «ب راستی ئەڤ مرۆڤێ هەنێ یێ راستدار بوو.»
- 48
- و هەمی ئەوێن بۆ دیتنا ڤی دیمەنی خڕڤەبووین، دەمێ ئەو تشتێن رویداین دیتی، ڤەگەریان و ل سینگێ خۆ ددا
- 49
- لێ هەمی نیاسێن وی و ئەو ژنێن ژ جەلیلێ دگەل هاتین، ژ دویر ڤە راوەستیابوون و بەرێ خۆ ددانە وی سەروبەری.
- ڤەشارتنا عیسای
- 50
- و زەلامەك ژ جڤاتا ریهسپیێن مللەتی هەبوو ناڤێ وی یوسڤ بوو. مرۆڤەكێ باش و راست بوو.
- 51
- ئەو دگەل بریارا جڤاتێ و كریارا وان نەبوو. ئەو ژ باژێرێ ئاریمەتیا[a] بوو كو ئەو ژی ئێك ژ باژێرێن جوهیانە. ئەوی ژی چاڤەرێیا پاشاتیا خودێ دكر.
- 52
- ئەڤ مرۆڤە چوو نك پیلاتوسی و تەرمێ عیسای ژێ خواست
- 53
- و پاشی ژ خاچێ ئینا خوارێ و كتان تێ ئالاند و دانا د گۆڕەكی دا، د كەڤری دا یێ كولای بوو، بەری هنگی كەسەك تێدا نەهاتبوو ڤەشارتن.
- 54
- ئەو رۆژا ئامادەكرنێ بوو و شەمبیێ دەستپێدكر،
- 55
- و ئەو ژنكێن ژ جەلیلێ دگەل عیسای هاتین، كەفتنە دویڤ یوسڤی و گۆڕ دیت كا تەرمێ وی چەوا دانایە.
- 56
- پاشی ڤەگەڕیانەڤە و دەرمانێن بێهن خۆش و چەوركرنێ ئامادەكرن، و ل شەمبیێ ل دویڤ فەرمانا دەستوری بێهنا خۆ ڤەدان.
- a. ئاریمەتیا ناڤێ كەڤنە یێ باژێرێ (رامە)
