عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- نەوەفاداریا یەهودای
- 1
- جەژنا نانێ شكەڤا نێزیك بوو، یا كو دبێژنێ جەژنا دەربازبوونێ
- 2
- و سەرۆكێن كاهنان و مامۆستایێن دەستوری ل رێكەكێ دگەریان عیسای پێ بكوژن، چنكو ئەو ژ مللەتی دترسیان.
- 3
- ئینا ئبلیس چوو د یەهودای دا یێ كو دگۆتنێ «ئەسخەریوتی» و ئەو ئێك ژ دوازدە شاگردان بوو.
- 4
- یەهودا رابوو چوو و دگەل سەرۆكێن كاهنان و بەرپرسێن نوبەدارێن پەرستگەهێ ئاخفت، كا دێ چەوا عیسای دەتە دەستێ وان.
- 5
- ئینا كەیفا وان هات و بریار دا هندەك پارا بدەنێ
- 6
- ئەو ژی ب وێ چەندێ رازی بوو و ل دەلیڤەیەكی دگەریا، دا عیسای ل دویری خەلكی بدەتە دەستێ وان.
- ئامادەكرنا شیڤا دەربازبوونێ
- 7
- رۆژا دەربازبوونێ هات یا كو پێدڤی بوو تێدا بەرخێ دەربازبوونێ سەرژێ كەن.
- 8
- ئینا عیسای، پەتروس و یوحەننا هنارتن و گۆت: «هەرن و بۆ مە خوارنا دەربازبوونێ ئامادە بكەن داكو ئەم بخوین.»
- 9
- ئینا پرسیار ژێ كر: «تە دڤێت ئەم ل كیرێ ئامادە بكەین؟»
- 10
- وی گۆتە وان: «دەمێ هوین دچنە ناڤ باژێری، دێ مرۆڤەكی بینن جەڕێ ئاڤێ ل سەر ملی. هوین بكەڤنە دویڤ تا مالا دچیتە د ژۆرڤە.
- 11
- و بێژنە خودانێ وێ مالێ: ”مامۆستا دبێژیتە تە: ’ژۆرا مێڤانان ل كیڤەیە یا كو ئەز شیڤا دەربازبوونێ دگەل شاگردێن خۆ تێدا بخوم؟‘“
- 12
- ئەو دێ ژۆرەكێ ل قاتێ سەری نیشا هەوە دەت، ژۆرەكا مەزنە و رائێخستییە. ل وێرێ ئامادە بكەن.»
- 13
- ئەو دەركەفتن و چوون و ئەو تشت دیت یێ عیسای گۆتییە وان و نانێ دەربازبوونێ ئامادەكر.
- شیڤا خودانی:
- 14
- چاخێ ئەو دەم هاتی، ئەو و هنارتی دگەل ئێك روینشتن،
- 15
- و گۆتە وان: «دلێ من گەلەك یێ چوویێ ئەز ڤێ جەژنا دەربازبوونێ دگەل هەوە بخوم بەری ئەز بهێمە ئێشاندن
- 16
- چنكو ئەز دبێژمە هەوە، ئێدی ناخوم تاكو د پاشاتیا خودێ دا ب جهـ بهێت.»
- 17
- و پەرداغەك هەلگرت و سوپاسیا خودێ كر و گۆت: «ڤێ پەرداغێ بگرن و د ناڤبەرا خۆ دا لێكڤەكەن،
- 18
- چنكو ئەز دبێژمە هەوە ئێدی ئەز ژ بەرهەمێ مێوا تری ڤەناخوم تا پاشاتیا خودێ بهێت.»
- 19
- و نان هەلگرت و سوپاسیا خودێ كر، كەركر و دا وان و گۆت: «ئەڤە لەشێ منە، یێ كو سەخمەراتی هەوە دهێتە دان. هوین ڤێ ژ بەر بیرهاتنا من بكەن.»
- 20
- و هەروەسا پەرداغ پشتی شیڤێ ژی هەلگرت و گۆت: «ئەڤ پەرداغە پەیمانا نوییە ب خوینا من یا كو پێخەمەتی هەوە دهێتە رشتن.
- 21
- لێ ئەها ئەڤە ئەو دەستێ كو دێ من دەتە دەست یێ دگەل من ل سەر سفرێ.
- 22
- راستە، كوڕێ مرۆڤ دێ چیت، كا چەوا بۆ هاتییە دانان. لێ نەخوزیكێن وی مرۆڤی یێ وی بدەتە دەست.»
- 23
- ئینا پرسیارا ئێكودوو كرن، كا كی ژ وانا ل بەرە ڤێ چەندێ بكەت.
- كی ژ وان مەزنترە؟
- 24
- هەروەسا كێش و ڤەكێشەك د ناڤبەرا وان دا پەیدابوو كا كی ژ وان مەزنتر بهێتە هژمارتن.
- 25
- ئینا عیسای گۆتە وان: «پاشایێن مللەتان سەروەریا وان دكەن، و ئەو كەسێن كو دەستهەلاتیێ ل سەر وان دكەن، ب چاكخواز دهێنە ب ناڤ كرن.
- 26
- لێ دڤێت هوین د وەسا نەبن، بەلكو بلا مەزنترین كەس د ناڤ هەوە دا، بچویكترین كەس بیت، و سەرۆك وەكو خزمەتكاری بیت.
- 27
- ئەڤجا كیژكە یێ مەزنتر: ئەوە یێ پالڤەددەت یانژی ئەوە یێ خزمەتێ دكەت؟ ما نە ئەوە یێ پالڤەددەت؟ لێ پا ئەز د ناڤبەرا هەوە دا وەكو وی كەسیمە یێ خزمەتێ دكەت.
- 28
- ئەو هوینن یێن كو د تاقیكرنێن من دا خۆ راگرتی.
- 29
- و ئەز ژی دێ پاشاتیەكێ دەمە هەوە هەر وەكو بابێ من دایە من،
- 30
- داكو هوین ل پاشاتیا من ل سەر سفرا من بخون و ڤەخون، و ل سەر تەختان روینن، و هوین دێ هەر دوازدە هۆزێن ئیسرائیلێ داد كەن.»
- عیسا پێشبینیێ ب ماندەل كرنا پەتروسی دكەت
- 31
- و خودانی گۆت: «شەمعون، شەمعون، ئەڤە ئبلیسی هوین یێن داخواز كرین داكو هەوە وەكو گەنمی بێژینگ بكەت
- 32
- لێ من بۆ تە داخواز ژ خودێ كر، داكو باوەریا تە ژناڤ نەچیت. دەمێ تۆ ڤەدگەڕی برایێن خۆ بهێز بئێخە.»
- 33
- ئینا شەمعونی گۆت: «خودان، ئەز یێ ئامادەمە دگەل تە خۆ بۆ زیندانێ و مرنێ بچم.»
- 34
- عیسای گۆت: «پەتروس، ئەز دبێژمە تە: ئەڤروكە ژ بەری دیكل بانگ بدەت، تۆ دێ سێ جاران ماندەل كەی كو تۆ من دنیاسی.»
- 35
- پاشی گۆتە وان: «دەمێ من هوین بێی گرێكا پاران و تویرك و پێلاڤ هنارتین، ما هەوە پێدڤی ب تشتەكی هەبوو؟» ئینا گۆتن: «نەخێر.»
- 36
- عیسای گۆتە وان: «لێ ڤێ گاڤێ هەركەسێ گرێكا پاران هەبیت بلا هەلگریت، هەروەسا هەركەسێ تویركەك هەبیت، و یێ شیر نەبیت، بلا كراسێ خۆ بفرۆشیت و شیرەكی پێ بكڕیت.
- 37
- چنكو ئەز دبێژمە هەوە، پێدڤییە ئەڤا هاتییە نڤیسین، ب من ب جهـ بهێت: ”و دگەل گونەهباران هاتە هژمارتن“، چنكو ئەو تشتێن دەربارەی من، ب جهـ دهێن.»
- 38
- ئینا گۆتن: «خودان، ئەها ئەڤە دوو شیرن.» ئینا وی گۆتە وان: «بەسە»
- عیسا ل چیایێ زەیتونان نڤێژێ دكەت
- 39
- پاشی وەكو هەر جار چوو چیایێ زەیتونان و شاگردێن وی ب دویڤ كەفتن.
- 40
- دەمێ گەهشتینێ، گۆتە وان: «نڤێژان بكەن داكو هوین نەكەڤنە د تاقیكرنێ دا.»
- 41
- نێزیكی دویراتیا هاڤێتنا بەرەكی ژ وان دویر كەفت و چوكڤەدان بر و نڤێژ كر،
- 42
- و گۆت: «بابوو، ئەگەر حەزبكەی، ڤێ پەرداغێ ژ من دویر بئێخە، لێ نە ب حەزا من بەلكو ب حەزا تە بیت.»
- 43
- ئینا فریشتەیەك ژ ئەسمانی بۆ وی ئاشكرابوو و ئەو بهێز ئێخست.
- 44
- عیسای د رەنج كێشانا دژوار دا ب گەرمی نڤێژ دكر و خوها وی وەكو چبكێن خوینێ لێ هاتن و دكەفتنە ئەردی.
- 45
- پشتی ژ نڤێژێ رابووی، هاتە نك شاگردان، دیت ئەو ژ خەمان دا یێن د خەو چووین.
- 46
- ئینا گۆتە وان: «هەوە چییە هوین نڤستین؟ رابن نڤێژان بكەن دا هوین نەكەڤنە د تاقیكرنێ دا.»
- گرتنا عیسای
- 47
- دەمێ هێشتا عیسا دئاخفت، رەڤدەكا مرۆڤان هات و یێ دبێژنێ یەهودا ل پێشیا وان بوو. ئەو ژی ئێك ژ وان دوازدە شاگردان بوو. ئینا ب پێش عیسای ڤە هات داكو ماچی بكەت.
- 48
- عیسای گۆتێ: «یەهودا، ما تۆ ب ماچێ كوڕێ مرۆڤ ددەیە دەست؟»
- 49
- دەمێ شاگردێن عیسای زانی دێ چ رویدەت، گۆتن: «خودان، ئەم شیری ڤەوەشینین؟»
- 50
- و ئێك ژ وان شیر ڤەوەشاندە كۆلەیێ سەرۆكێ كاهنان و گوهێ وی یێ راستێ بڕی.
- 51
- عیسای گۆت: «بەسە، بهێلن.» و دەستێ خۆ كرە گوهێ وی و ساخ كر.
- 52
- پاشی عیسای گۆتە سەرۆكێن كاهنان و بەرپرسێن نۆبەدارێن پەرستگەهێ و ریهسپیان، ئەوێن كو هاتینێ: «هوین وەسا ب شیر و داران هاتینە؛ ما هوین هاتینە پێشیا رێگرەكی؟
- 53
- دەمێ ئەز هەر رۆژ ل پەرستگەهێ دگەل هەوە دا، هەوە دەستێ خۆ درێژ نەكرە من، لێ ئەڤە دەمژمێرا هەوە و دەستهەلاتیا تاریێیە.»
- پەتروس عیسای ماندەل دكەت
- 54
- عیسا گرت و برە مالا سەرۆكێ كاهنان، و پەتروس ژ دویر ڤە ل دویڤ دچوو.
- 55
- دەمێ ئاگرەك ل حەوشا خانی هەلكرین و دگەل ئێك روینشتین، پەتروس دگەل وان روینشت.
- 56
- ژنكا خزمەتكار پەتروس دیت یێ ل بەر روناهیا ئاگری روینشتی، ئینا بەرێ خۆ دایێ و گۆت: «ئەها ئەڤە ژی دگەل وی دا بوو.»
- 57
- لێ ماندەل كر و گۆت: «ژنكێ، ئەز وی نانیاسم.»
- 58
- پشتی دەمەكێ كورت ئێكێ دی دیت و گۆت: «تۆ ژی ژ وانی.» لێ پەتروسی گۆت: «مرۆڤ، نە ئەزم.»
- 59
- و پشتی بورینا نێزیكی دەمژمێرەكی، ئێكێ دی دوپات كر و گۆت: «ب راستی ئەڤە ژی دگەل وان بوو، چنكو ئەو ژی جەلیلییە.»
- 60
- پەتروسی گۆت: «مرۆڤ، ئەز نزانم تۆ چ دبێژی.» و د جهـ دا دەمێ ئەو دئاخفت، دیكلی بانگ دا.
- 61
- خودان ل خۆ زڤری و بەرێ خۆ دا پەتروسی، ئینا ئاخفتنا خودانی هاتە بیرا پەتروسی دەمێ گۆتیێ: «ژ بەری دیكل بانگ بدەت، تۆ دێ سێ جاران من ماندەل كەی.»
- 62
- و پەتروس دەركەفتە ژ دەرڤە و گریەكا تەحل كر.
- 63
- ئەو زەلامێن زێرەڤانی ل عیسای دكر ترانە پێ دكرن و لێ ددان،
- 64
- و رویێ وی دنخافت و پرسیار ژێ دكرن: «پێشبینیێ بكە، كی بوو ل تە دای؟»
- 65
- و گەلەك ئاخفتنێن دی یێن كرێت دگۆتنێ،
- 66
- و دەمێ رۆژ دەركەفتی، جڤاتا ریهسپیێن مللەتی، سەرۆكێن كاهنان و مامۆستایێن دەستوری كومبوون، و عیسا برنە پێشیا جڤاتا خۆ
- 67
- و گۆتن: «ئەگەر تۆ مەسیح بی، بێژە مە.» ئینا گۆتە وان: «ئەگەر ئەز بێژمە هەوە هوین باوەر ژ من ناكەن
- 68
- و ئەگەر ئەز پرسیارێ ژ هەوە بكەم، هوین بەرسڤا من نادەن
- 69
- لێ كوڕێ مرۆڤ ژ نوكە پێڤە دێ ل دەستێ راستێ یێ هێزا خودێ یێ روینشتی بیت.»
- 70
- ئینا هەمیان گۆت: «ئانكو تۆ كوڕێ خودێ یی؟» عیسای گۆتە وان: «هوین بخۆ دبێژن ئەز ئەوم.»
- 71
- ئینا گۆتن: «ما مە چ پێدڤی ب شاهدەیێ هەیە؟ ئەڤە مە ژ دەڤێ وی بخو گوهـ لێ بوو.»
