عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- رابوونا عیسای
- 1
- لێ ل رۆژا ئێكێ ژ حەفتیێ دگەل ئەلندێ، ئەو ژنك چوونە سەر گۆڕی و دەرمان و بێهنا خۆش یا كو ژ بەری هنگی ئامادەكرین، دگەل خۆ برن.
- 2
- بەرێ خۆ دانێ ئەو بەرێ د دەرێ گۆڕی دا یێ هاتییە گرێلكرن
- 3
- لێ دەمێ چووینە ژۆر، تەرمێ عیسایێ خودان نەدیتن
- 4
- و دەمێ ئەو ژ ڤێ چەندێ هێشتا دمەندەهۆش، ژ نشكەكێ ڤە دوو زەلامێن ب جلكێن تەیسوك ل تەنشت وان راوەستیان.
- 5
- ژ ترسان دا ژنكان بەرێ خۆ چەماندە ئەردی. ئینا زەلامان گۆتە وان: «بۆچی هوین ل ناڤ مریان ل ئەوێ زیندی دگەڕیێن؟
- 6
- ئەو نە ل ڤێرێیە، یێ رابووی. بیننە بیرا خۆ دەمێ هێشتا ئەو ل جەلیلێ چ گۆتییە هەوە.
- 7
- وی گۆتبوو: ”دڤێت كوڕێ مرۆڤ رادەستی گونەهكاران بهێتە كرن و بهێتە خاچدان، و ل رۆژا سیێ رابیتەڤە.“»
- 8
- ئینا ئاخفتنا وی هاتە بیرا وان
- 9
- و ژ سەر گۆڕی ڤەگەڕیانە ڤە و ئەڤە هەمی بێ كێماتی گەهاندنە هەر یازدە شاگردان و هەمی یێن دی
- 10
- و ئەوێن نوچە گەهاندینە هنارتیان ئەڤە بوون: مەریەما مەجدەلی، یووەننا و مەریەما دایكا یەعقوبی و هندەكێن دی ئەوێن دگەل وان دا بوون.
- 11
- ئاخفتنا وان ل نك هنارتیان وەكو ئاخفتنا مرۆڤەكێ بێ هوش بوو و باوەری ب وان نەئینا،
- 12
- لێ پەتروسی كرە غار و چوو سەر گۆڕی. دەمێ خۆ چەماندی، ژ پارچێن كتانی پێڤە چ نە دیت، ئینا ئەو ژ وێرێ چوو یێ حەیبەتی ژ وێ رویدانێ.
- د رێكا ئەماوس دا
- 13
- و هەر وێ رۆژێ دوو شاگردە دچوونە گوندەكێ دبێژنێ ئەماوس، ئەڤ گوندە نێزیكی حەفت میلان ژ ئورشەلیمێ یێ دویر بوو،
- 14
- و دەربارەی هەمی رویدانێن پەیدا بووین دگەل ئێكودوو دئاخفتن.
- 15
- دەمێ ئەو دئاخفتن و دانوستاندن دكر، عیسا ب خۆ نێزیكی وان بوو و دگەل وان ب رێ چوو،
- 16
- لێ چاڤێن وان هاتنە بەستن و نەنیاسی
- 17
- و پرسیار ژ وان كر: «هوین د چوونا خۆ دا دەربارەی چ دئاخڤن؟» ئینا ب رویەكێ خەمگین راوەستیان.
- 18
- ئێكی ژ وان بەرسڤا وی دا، ناڤێ وی كلیوپاس بوو و گۆتێ: «دیارە تۆ ب تنێ ل ئورشەلیمێ یێ بیانی و نزانی د ڤان رۆژان دا چ ل وێرێ چێبوویە.»
- 19
- ئینا گۆتە وان: «چ چێبوویە؟» گۆتن: «ئەوێن دەربارەی عیسایێ ناسری. ئەو مرۆڤ ب دیتنا خودێ و هەمی مللەتی پێغەمبەرەكێ خودان هێز بوو د گۆتن و كریارێ دا،
- 20
- و چەوا سەرۆكێن كاهنان و رێبەرێن مە ئەو ب مرنێ سزا دا و خاچدا.
- 21
- لێ هیڤیا مە ئەو بوو و مە هزر دكر، ئەو دێ ئیسرائیلێ رزگار كەت. د سەر ڤێ هەمیێ را، ئەڤە سێ رۆژە هاتییە خاچدان.
- 22
- و هندەك ژنكان د ناڤ مە دا ئەم مەندەهوش كرین. ئەو سپێدێ زوی چوونە سەر گۆڕی
- 23
- و تەرمێ وی نەدیت .ئینا هاتن و گۆتنە مە كو فریشتە بۆ وان دیاربوون و دگۆتنە وان كو عیسا یێ زیندییە.
- 24
- و هندەك ژ ئەوێن دگەل مە چوونە سەر گۆڕی و دیتن ئەو راست دبێژن، لێ وان عیسا نەدیت.»
- 25
- ئینا عیسای گۆتە وان: «هەی مەژی هشكینوو، و هوین ئەوێن باوەریا هەوە ب هەمی گۆتنێن پێغەمبەران درەنگ دهێت:
- 26
- ما نە یا پێدڤی بوو مەسیح وان هەمی نەخۆشیان ببینیت و پاشی بچیت و بگەهیتە مەزناهیا خۆ؟»
- 27
- پاشی هەر ژ موسای و هەمی پێغەمبەران بگرە، كا چ دەربارەی وی د هەمی نڤیساران دا بۆ وان شرۆڤە كر.
- 28
- دەمێ نێزیكی وی گوندی بووین ئەوێ هەردوو شاگردان دڤیا بچنێ، عیسای پێشان دا كو ئەو دێ بۆ جهەكێ دویرتر چیت.
- 29
- لێ وان هیڤی ژێ كرن و گۆتنێ: «بمینە ل نك مە، چنكو ئەڤە بوو ئێڤار و رۆژ دێ ئاڤابیت.» ئینا عیسا چوو ژۆر داكو دگەل وان بمینیت.
- 30
- و دەمێ دگەل وان پالڤەدای، دەست هاڤێتە نانی و سوپاسیا خودێ كر و شكاند و دا وان.
- 31
- هنگی چاڤێن وان ڤەبوون و ئەو نیاسی و پاشی بەرزە بوو.
- 32
- ئینا گۆتە ئێكودوو: «ما نە دلێ مە د سینگێ مە دا دسۆت، دەمێ د رێكێ دا دگەل مە دئاخفت و بۆ مە نڤیسار روهن دكرن؟»
- 33
- پاشی هەر د وێ دەمژمێرێ دا رابوون و ڤەگەڕیانە ئورشەلیمێ، و هەر یازدە و ئەوێن دگەل وان دا كومبووین، دیتن
- 34
- و گۆتن: «راستە، خودانێ رابووی و یێ خۆ نیشا شەمعونی دای!»
- 35
- و ئەو چەندا د رێكێ دا رویدای گەهاندە وان، و كا چەوا د نان شكاندنێ دا ئەو بۆ وان هاتبوو نیاسین.
- عیسا خۆ نیشا شاگردێن خۆ ددەت
- 36
- دەمێ هێشتا بەحسێ هندێ دكر، عیسا ب خۆ د ناڤبەرا وان دا راوەستیا و گۆتێ: «ئاشتی بۆ هەوە بیت.»
- 37
- ئەو ترسیان و بزدیان و هزركرن وان رەشەك دیت.
- 38
- و گۆتە وان: « بۆچی هوین تێكچوون؟ و بۆچی گومان دكەڤیتە د دلێ هەوە دا؟
- 39
- بەرێ خۆ بدەنە دەست و پێن من، ئەو ئەزم، دەست بكەنە من و ببینن. چنكو رەشەی چ گۆشت و هەستی نینن وەكو هوین دبینن من یێن هەی.»
- 40
- پشتی ئەو چەندە گۆتی، دەست و پێن خۆ نیشا وان دان.
- 41
- دەمێ هێشتا ژ كەیف و گوهشینێ باوەر نەدكر. گۆتە وان: «هەوە تشتەكێ خوارنێ ل ڤێرێ هەیە؟»
- 42
- ئینا پارچەكا ماسیا براژتی دانێ
- 43
- و ژ وان وەرگرت و ل بەر چاڤێن وان خوار.
- 44
- و پاشی گۆتە وان: «ئەڤە ئەو گۆتنە یا كو هێشتا ئەز د ناڤ هەوە دا من گۆتییە هەوە، كو دڤێت چ تشتێ د دەستورێ موسای، پەرتوكێن پێغەمبەران و زەبورێ دا دەربارەی من هاتییە نڤیسین ب جهـ بهێت.»
- 45
- و پاشی بیر و هشێن وان ڤەكرن داكو د نڤیساران بگەهن.
- 46
- و گۆتە وان: «هوسا یا هاتییە نڤیسین و هوسا دڤیا مەسیح بهێتە ئێشاندن و ل رۆژا سیێ ژ ناڤ مریان رابیت
- 47
- و ب ناڤێ وی راگەهاندنا ل خۆ زڤرینێ بۆ لێبورینا گونەهان ژ ئورشەلیمێ را دەستپێ بكەت و بۆ هەمی مللەتان بهێتە كرن.
- 48
- هوین ل سەر ڤانان شاهدن.
- 49
- و ئەها ئەڤە ئەز دێ ئەوا بابێ من سۆز پێ دای بۆ هەوە هنێرم. ل باژێری بمینن تاكو هوین ژ بلنداهیێ ب هێزێ دهێنە راپێچان. »
- ڤەگەریانا عیسایێ مەسیح بۆ ئەسمانی
- 50
- و پاشی برنە ژ دەرڤەی باژێری، بۆ بەیت عەنیا و دەستێن خۆ بلندكرن و ئەو پیرۆز كرن.
- 51
- دەمێ وی ئەو پیرۆز دكرن، ژ وان ڤەقەتیا و بۆ ئەسمانی بلند بوو.
- 52
- ئەوان ژی بۆ چوكڤەدان و ب كەیفەكا مەزن ڤەگەڕیانە ئورشەلیمێ
- 53
- و بەردەوام د پەرستگەهێ دا بوون و پەسنا خودێ دكرن.
