عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ئبلیس عیسای تاقی دكەت
- 1
- دەمێ عیسا ژ ئوردون ڤەگەڕیای، ژ گیانێ پیرۆز یێ پڕ بوو و گیانی بەرێ وی دا چۆلی.
- 2
- ئبلیسی بۆ چل رۆژان تاقی دكر. ل وان رۆژان چ نەخوار، دەمێ هەر چل رۆژ ب دوماهی هاتین، برسی بوو.
- 3
- ئبلیسی گۆتێ: «ئەگەر تۆ كوڕێ خودێ بی، بێژە ڤی بەری ببە نان.»
- 4
- عیسای بەرسڤا وی دا و گۆتێ: «یا هاتییە نڤیسین: ”مرۆڤ ب نانی ب تنێ ناژیت.“»
- 5
- پاشی ئبلیسی برە سەرێ چیایەكێ بلند و هەمی پاشاتی يێن جیهانێ د چركەكێ دا نیشا دان
- 6
- و گۆتێ: «ئەز دێ ڤێ هەمی دەستهەلاتێ و مەزناهیا وان دەمە تە، چنكو ئەڤ جیهانە بۆ من یا هاتییە دان و ئەز ژی دێ دەمە وی یێ من بڤێت،
- 7
- و ئەگەر تۆ بۆ من چوكڤە دەی، هەمی دێ بنە یێن تە.»
- 8
- عیسای بەرسڤا وی دا و گۆتێ: «یا هاتییە نڤیسین: ”بۆ خودان خودایێ خۆ چوكڤەدە و وی بتنێ بپەرێسە.“»
- 9
- پاشی ئبلیسی بەرێ وی دا ئورشەلیمێ و ل سەر لێڤا بانێ پەرستگەهێ راوەستاند و گۆتێ: «ئەگەر تۆ كوڕێ خودێ بی، خۆ ژ ڤی بانی بهاڤێژە خوارێ
- 10
- چنكو یا هاتییە نڤیسین: ”خودێ دبێژیتە فریشتێن خۆ تە بپارێزن
- 11
- و تە ل سەر دەستان راكەن، نەكو پێ تە ب بەرەكی بكەڤیت.“»
- 12
- ئینا عیسای بەرسڤا وی دا و گۆتێ: «و یا هاتییە گۆتن: ”خودان خودایێ خۆ تاقی نەكە.“»
- 13
- دەمێ ئبلیسی هەمی تاقیكرن ب دوماهی ئیناین، عیسا تا دەمەكی هێلا و چوو.
- باژێرێ ناسیرە عیسای رەت دكەت
- 14
- عیسا ب شیانا گیانی بەرەڤ دەڤەرا جەلیل ڤەگەڕیا و ناڤودەنگێن وی ل هەمی گوندێن دەوروبەران بەلاڤ بوو.
- 15
- عیسای ل كنیشتێن وان فێركرن دكر و هەمیان پەسنا وی دكر.
- 16
- عیسا هاتە باژێرێ ناسیرە، ئەوێ كو لێ مەزن بووی و ل دویڤ رەوشتێن خۆ ل رۆژا شەمبی چوو د كنیشتێڤە و رابوو ژ پێرڤە داكو بخوینیت.
- 17
- ئینا پەرتوكا ئەشعیا پێغەمبەری دانەڤێ، دەمێ پەرتوك ڤەكری ئەو جهـ دیت، ئەوێ كو تێدا نڤیسی:
- 18
- گیانێ خودانی ل سەر منە،
چنكو وی ئەزێ چەور كریم
دا مزگینیێ بدەمە هەژاران.
ئەزێ هنارتیم دا ئازادیێ بۆ ئێخسیران
و بینینێ بۆ كۆرەیان رابگەهینم،
دا ئازادیێ بدەمە بندەستان، - 19
- دا مزگینیا هاتنا سالا رەزامەندیا خودانی رابگەهینم.
- 20
- پاشی پەرتوك دائێخست و داڤ خزمەتكاری و روینشت و هەمی كەسێن ل وێرێ ئامادە، چاڤێن وان رك ل عیسای بوون
- 21
- و دەست ب گۆتارێ كر و گۆت: «ئەڤرۆ ب بهیستنا هەوە، ئەڤ نڤیسارە ب جهـ هات.»
- 22
- هەمیان ل وێرێ بەحسێ وی ب باشی دكرن، ژ گۆتنێن وی یێن ب چاكی ئەوێن ژ دەڤێ وی دەركەفتین دگوهشی بوون و پرسیار دكرن: «ما ئەڤە نە كوڕێ یوسڤییە؟»
- 23
- ئەڤجا گۆتە وان: «بێ گومان هوین دێ ڤێ گۆتنێ بێژنە من: ”نوژدارۆ، چارەسەریا خۆ بكە!“ و ئەوێن مە گوهـ لێ بووی تە ل كەفەرناحوم یێن كرین، ل باژێرێ خۆ ژی بكە.»
- 24
- هەروەسا گۆت: «ئەز ب راستی دبێژمە هەوە چ پێغەمبەر د باژێرێ خۆ دا ناهێنە وەرگرتن
- 25
- و ئەز ب راستی دبێژمە هەوە ل سەردەمێ ئیلیای، دەمێ سێ سال و شەش هەیڤان باران نەباری و كولپەكا مەزن ل ئەردی هەمیێ چێبووی، گەلەك بیژن ل ئیسرائیلێ هەبوون،
- 26
- لێ ئیلیا بۆ كەسەكێ ژ وان نەهاتبوو هنارتن، ژبلی بیژنەكا سارفات ل سایدا.
- 27
- هەروەسا ل سەردەمێ ئەلیشەع پێغەمبەری گەلەك هەبوون توشی گۆڕیاتیێ ببوون، لێ كەس ژ وان نەخۆشان چارەسەر نەببوون، ب تنێ نەعمانێ سوری نەبیت.»
- 28
- دەمێ گوهـ ل ڤان ئاخفتنان بووی، هەمی ئامادەبوویێن ل كەنیشتێ، گەلەك تورەبوون.
- 29
- و رابوون ژ باژێری دەرئێخست و برە سەر لێڤا وی چیایێ باژێرێ وان ل سەر هاتییە ئاڤاكرن داكو تێدا بهاڤێژن.
- 30
- لێ عیسا د ناڤ هەمیان را دەرباز بوو و چوو.
- عیسا گیانەكێ پیس دەردئێخیت
- 31
- ئەو خوار كەفتە كەفەرناحوم، كو باژێرەكێ دەڤەرا جەلیلە و د شەمبیان دا خەلك فێردكر.
- 32
- خەلك ژ فێركرنا وی حێبەتی بوون، چنكو پەیڤێن وی ب دەستهەلات بوون.
- 33
- ل كنیشتێ زەلامەك هەبوو گیانێ ئەجنەكێ پیس د وی دا بوو، ئینا ب دەنگەكێ بلند گازی كر
- 34
- «تە چ دگەل مە هەیە، عیسایێ ناسری؟ تۆ هاتییە مە ژناڤببەی؟ ئەز دزانم تۆ كی، تۆ پیرۆزێ خودێی.»
- 35
- ئینا عیسای پاشڤە بر و گۆتێ: «بێدەنگ بە و ژ وی دەركەڤە.» ئەڤجا ئەجنەی ئەو ل ئەردی دا و بێی ب ئێشینیت ژ وی دەركەفت.
- 36
- گوهشینێ هەمی گرتن و پرسیار ژ ئێكودوو كرن «ئەڤە چ پەیڤە؟ ب هێز و شیان فەرمانێ ل گیانێن پیس دكەت و دەردكەڤن!»
- 37
- و ناڤودەنگێن وی ل هەمی دەڤەرێن دەوروبەر بەلاڤ بوون.
- «عیسا گەلەكان ساخ دكەت»
- 38
- پاشی ژ كنیشتێ دەركەفت و چوو مالا شەمعونی. تایەكا گەلەك دژوار ل خەسیا شەمعونی بوو. ئەڤجا وان هاریكاری ژێ خواست.
- 39
- عیسا ل هنداڤ سەرێ وێ راوەستیا و ل تایا وێ خوڕی، ئینا تا ژێ چوو، و د جهـ دا نەساخیا وێ نەما و دەست ب خزمەتا وان كر.
- 40
- دەمێ رۆژ ئاڤا بووی، هەر كەسێ نەساخەك هەی و چ جورێ ئێشێ لێ با، دئینانە نك عیسای و دەستێن خۆ ددانانە سەر وان ساخ دكرن.
- 41
- ئەجنە ژی ژ گەلەكان دەركەفتن و گازی دكر و دگۆت: «تۆ كوڕێ خودێی.» ئەوی ئەو پاشڤە دبرن و نەدهێلا باخڤن، چنكو دزانی ئەو مەسیحە.
- 42
- دەمێ رۆژ هەلاتی، چوو جهەكێ ڤەدەر و خەلك لێ دگەڕیا و هاتنە نك وی و مانە پێڤە كو وان ب جهـ نەهێلیت،
- 43
- لێ گۆتە وان: «دڤێت ئەز مزگینیا پاشاتیا خودێ بگەهینمە باژێرێن دی ژی، چنكو ژ بەر ڤێ چەندێ ئەزێ هاتیمە هنارتن.»
- 44
- و ل كنیشتێن یەهودیایێ ب بەردەوامی مزگینی دگەهاند.
