عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- 1
- ل وی دەمی عیسا رۆژا شەمبیێ د ناڤ زەڤیێن گەنمی را بوری. شاگردێن وی دبرسی بوون و دەستپێكر چەند گولیێن گەنمی كرن و خوارن.
- 2
- و دەمێ فەریسیان ئەو تشت دیتین؛ گۆتێ: «سەحكێ، شاگردێن تە یێ وێ دكەن، ئەوا نابیت ل رۆژا شەمبیێ بهێتە كرن!»
- 3
- وی بەرسڤ دا: «ما هەوە نە خواندییە كا داوودی چ كر، دەمێ ئەو و یێن دگەل وی برسی بووین؟
- 4
- ئەو چەوا چوو د مالا خودێ ڤە؛ وی و یێن دگەل وی چەوا نانێ پێشكێشكرنێ خوار و ئەو خوارن بۆ وان چێ نە دبوو، بەلێ بەس بۆ كاهنان ب تنێ چێ دبوو؟
- 5
- یان ما هەوە د دەستوری دا نە خواندییە، كو ل رۆژا شەمبیێ كاهن د پەرستگەهێ ڤە كار دكەن، بەلێ ب شكاندنا دەستورا شەمبیێ گونەهبار نابن؟
- 6
- بەلێ ئەز دبێژمە هەوە، كو ئێكێ ژ پەرستگەهێ مەزنترێ ل ڤێرێ.
- 7
- ئەگەر هوین رامانا ڤێ ئاخفتنێ تێگەهشتبان، هەوە یێ بێگونەهـ داد نەدكر: من دلوڤانی دڤێت نە قوربانی .
- 8
- چنكو كوڕێ مرۆڤە خودانێ شەمبیێ.»
- 9
- پاشی وێرێ هێلا و چوو د كنیشتا وان ڤە
- 10
- و زەلامەكێ دەست هشك ل وێرێ بوو و چنكو وان دڤیا عیسای گونەهبار بكەن، پرسیار ژێ كرن: «ئەرێ ساخكرن د شەمبیێ دا چێ دبیت؟»
- 11
- وی بەرسڤا وان دا: «ئەرێ ئەگەر ئێك ژ هەوە پەزەك هەبیت و ل رۆژا شەمبیێ كەفتە د چالەكێ دا، ئەرێ ما ناگریت و دەربئێخیت؟
- 12
- باشە! مرۆڤ چەند ژ پەزی ب بهاترە! ژ بەر هندێ چێ دبیت باشی ل رۆژا شەمبی بهێتە كرن.»
- 13
- پاشی گۆتە زەلامی: «دەستێ خۆ درێژكە.» ئەڤجا وی دەستێ خۆ درێژكر و هەروەكو دەستێ دی ساخ بووڤە.
- 14
- بەلێ فەریسی دەركەفتن و پیلان ل سەر عیسای گێران، داكو بكوژن.
- 15
- بەلێ عیسای زانی؛ ئینا خۆ ژ وێرێ كێشا. گەلەك ب دویڤ كەفتن و وی هەمی نەخۆشێن وان ساخكرن،
- 16
- بەلێ ئاگەهدار كرن، كو ل نك كەسێ بەحسێ وی نەكەن،
- 17
- داكو ئەوا ل سەر زمانێ ئەشعیا پێغەمبەری هاتی ب جهـ بهێت؛ دەمێ دبێژیت:
- 18
ئەڤەیە خزمەتكارێ من هەلبژارتی
خۆشتڤیێ من یێ دلێ من پێ خۆش بووی
ئەز دێ گیانێ خۆ دانمە سەر
و ئەو دێ دادوەریێ ل سەر مللەتان بەلاڤكەت.- 19
- هەڤركیێ و هەوارا ناكەت
و كەسێ ل سەر جادان گوهـ ل دەنگێ وی نابیت - 20
- و ئەو لەڤەنەكێ هەرشی ژی ناشكێنیت
و پەتیلەكا پێتی ناڤەمرینیت،
هەتا كو دادوەریێ ب سەر نە ئێخیت - 21
- و هیڤیا مللەتان دێ ب ناڤێ وی ڤە هێنە گرێدەن.
- 22
- پاشی وان مرۆڤەكێ كۆرە و لاڵێ جنگرتی، ئینا نك عیسای و ساخكر؛ دا بشێت باخڤیت و ببینیت.
- 23
- هەمی خەلك گوهشین و گۆتن: «ئەرێ ما ئەڤەیە كوڕێ داوودی؟»
- 24
- بەلێ دەمێ فەریسیان ئەڤە گوهـ لێ بووی؛ وان گۆت: «ئەو ب تنێ ب بەعەلزەبولێ سەرۆكێ جنان دشێت جنان دەربئێخیت.»
- 25
- عیسای بیركرنا وان زانی و گۆتێ: «هەر پاشاتیەكا دووبەرەكی تێ دا بیت دێ وێران بیت و هەر باژێرەك یان مالەك دووبەرەكی تێ دا بیت خۆ ناراگریت.
- 26
- ئەگەر ئبلیس، ئبلیسی دەربئێخیت، ئەو دووبەرەكییە؛ ئەڤجا چەوا پاشاتیا وی دێ خۆ راگریت؟
- 27
- و ئەگەر ئەز جنان ب بەعەلزەبولی دەربئێخم، پا زەلامێن هەوە وان ب چ دەردئێخن؟ ژ بەر ڤێ چەندێ ئەو دێ هەوە دادكەن،
- 28
- بەلێ ئەگەر ئەز ب گیانێ خودێ جنان دەربئێخم، ئەڤە پاشاتیا خودێ هاتییە سەر هەوە!
- 29
- یان چەوا ئێك دشێت بچیتە د مالا یێ هێزدار ڤە و تشتێن وی تالان كەت، ئەگەر ئەو ل بەراهیێ یێ هێزدار نەگرێدەت؟ و پشتی هنگی مالا وی تالان كەت.
- 30
- ئەوێ نە دگەل من، دژی منە و هەر كەسێ دگەل من كوم نەكەت، بەلاڤ دكەت.
- 31
- ژ بەر هندێ ئەز دبێژمە هەوە: هەر خڕیان و گونەهـ دێ بۆ مرۆڤی هێتە لێ بوراندن، بەلێ خڕیانێن ل سەر گیانێ پیرۆز ناهێنە لێ بوراندن.
- 32
- و هەر كەسێ پەیڤەك دژی كوڕێ مرۆڤ گۆت دێ بۆ وی هێتە لێ بوراندن، بەلێ هەر كەس پەیڤەك دژی گیانێ پیرۆز بێژیت لێ ناهێتە بوراندن، نە د ڤی سەردەمی دا و نە ژی د سەردەمێ داهاتی دا. \s دار ژ بەرێ وێ دهێتە نیاسین
- 33
- بلا دارێ باش بكەن، دا بەرەكێ باش بدەت و بلا دارێ پویچ بكەن، دا بەرەكێ پویچ بدەت! چنكو ژ بەرێ دارێ، دێ دار هێتە نیاسین.
- 34
- ئەی تێشكێن ماران چەوا هوینێن چەوت دشێن ئاخفتنەكا چاك بێژن؟ چنكو دەڤ ئەوا ل سەر دلی دا درێژیت.
- 35
- مرۆڤێ باش ژ خزینا دلێ خویێ باش، باشیێ دەردئێخیت و مرۆڤێ چەوت، ژ خزینا چەوت، چەوتیێ دەردئێخیت.
- 36
- بەلێ ئەز دبیژمە هەوە هەر پەیڤەكا بێ نرخا مرۆڤ بێژیت، رۆژا دادكرنێ دێ بهایێ وێ دەتن.
- 37
- چنكو تۆ ب پەیڤێن خۆ دێ هێییە بێ گونەهكرن و تۆ ب پەیڤێن خۆ دێ هێییە گونەهبار كرن.»
- فەریسی نیشانەكێ داخواز دكەن
- 38
- وی دەمی هندەك مامۆستایێن دەستوری و فەریسیان بەرسڤا وی دا، گۆتن: «ئەی مامۆستا ئەم حەز دكەین، نیشانەكا سەرسورمان ل سەر دەستێ تە ببینین!»
- 39
- وی بەرسڤا وان دا: «نفشەكێ چەپەل و فاسق؛ داخوازا نیشانەكێ دكەت، بەلێ چ نیشان بۆ ڤی نفشی ناهێنە دان، نیشانا یونس پێغەمبەر نەبیت.
- 40
- هەروەكو یونس سێ شەڤ و سێ رۆژان مایە د زكێ حویتی دا، ئەها هوسا كوڕێ مرۆڤ سێ شەڤ و سێ رۆژان دێ مینیتە د دلێ ئەردی دا.
- 41
- خەلكێ نەینەوا دێ رۆژا دادكرنێ دگەل ڤی نفشی راوەستن و دێ وان دادكەن، چنكو پەشێمان ببوون دەمێ یونسی ئەو ئاگەهدار كرین و ئەڤەیە ل ڤێرێ یێ ژ یونسی مەزنتر.
- 42
- و شاژنا باشوری؛ دێ رۆژا دادكرنێ دگەل ڤی نفشی رابیت و دێ دادكەت، چنكو ئەوا ژ دوماهیا ئەردی هاتی، دا گوهـ بدەتە دانایی سلێمانی و ئەڤەیە ل ڤێرێ یێ ژ سلێمانی مەزنتر.
- 43
- كەنگی گیانێ پیس ژ مرۆڤی دەركەفت، دێ د چۆلێ هشك دا ل تەناهیێ گەڕیێت؛ بەلێ نابینیت،
- 44
- دێ هنگی بێژیت: ”دا بزڤرمە مالا من هێلای!“ و دزڤریت، دێ بینیت یا ڤالا و مالشتی و لێكدایە.
- 45
- ئەڤجا دێ چیت حەفت گیانێن دیێن ژ خۆ پیستر ئینیت، هەمی دێ چنە د وی مرۆڤی دا و دێ ل وێرێ ژین، ئەڤجا دووماهیا وی دێ ژ كاودانێ وی یێ پێشی یێ خرابتر بیت. كاودانێ ڤی نفشێ چەپەل ژی دێ یێ هوسا بیت!»
- 46
- و دەمێ هێشتا بۆ خڕڤەبوویان دئاخفت، دایكا وی و برایێن وی ژ دەرڤە دراوەستای بوون و داخواز دكرن دگەل باخڤن.
- 47
- ئینا ئێك ژ ئامادەبوویان گۆتێ: «ئەڤە دایكا تە و برایێن تە ژ دەرڤە دراوەستاینە و دڤێن دگەل تە باخڤن.»
- 48
- بەلێ وی بەرسڤ دا: «دایكا من كییە و برایێن من كینە؟»
- 49
- و دەستێ خۆ درێژكرە شاگردێن خۆ و گۆت: «ئەڤەنە دایك و برایێن من.
- 50
- چنكو هەچیێ ب ڤیانا بابێ منێ ل ئەسمانان بكەت، ئەو برا و خویشك و دایكا منە.»
