عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ئەوێ مەزنتر ل پاشاتیا ئەسمانان
- 1
- د وی دەمی دا شاگردە بەرەڤ عیسای ڤە هاتن و ژێ پرسین: «كییە مەزنتر ل پاشاتیا ئەسمانان؟»
- 2
- گازی كرە زارۆكەكی و د ناڤبەرا وان دا راوەستاند
- 3
- و گۆت: «ب راستی دبێژمە هەوە: ئەگەر هوین وەكو زارۆكەكی نەهێنە گوهورین، چ جاران هوین ناچنە د پاشاتیا ئەسمانی دا.
- 4
- ئەوێ خۆ كێم دانیت وەكو ڤی زارۆكی، ئەوە یێ مەزنتر ل پاشاتیا ئەسمانی.
- 5
- هەر كەسەكێ زارۆكەكێ وەكو وی ب ناڤێ من قەبیل كەت، وی ئەزێ قەبیل كریم.
- 6
- و هەر كەسەكێ ئێك ژ ڤان زارۆكێن باوەری ب من هەی توشی گونەهێ بكەت، بۆ وی چێترە بەرێ دستاری ب ستویێ وی ڤە گرێدان و بهاڤێنە د كویراتیا دەریایێ دا.
- 7
- نەخوزیكێن جیهانێ ژ بەر ئەگەرێن ڤارێبوونێ! پێدڤییە ئەگەرێن ڤارێبوونێ هەبن، بەلێ نەخوزیكێن وی یێ ل سەر دەستێ وی ئەگەرێ ڤارێبوونێ دهێت.
- 8
- ئەگەر دەست یان پێ تە بۆ تە ببیتە تەلی ببرە و بهاڤێژە. باشترە تۆ بێ دەست و پێ بچیە د ژیانێ دا، نەكو تۆ ب دەست و پێ بێیە هاڤێتن د ئاگرێ هەروهەر دا.
- 9
- و ئەگەر چاڤێ تە بۆ تە ببیتە تەلی، هەلكێشە و بهاڤێژە. باشترە تۆ ب چاڤەكی بچیە د ژیانێ دا، نەكو تۆ ب دوو چاڤان بچیە د ئاگرێ دوزەخێ دا.
- 10
- هشیار بن؛ كەس ژ ڤان زارۆكان كێم نەبینن؛ ئەز دبێژمە هەوە فریشتێن وان ل ئەسمانان هەردەم دێمێ بابێ منێ ل ئەسمانان دبینن. \s نموونەیا میها بەرزە
- 11
- چنكو كوڕێ مرۆڤ یێ هاتی، دا یێن وێران قورتال بكەت.
- 12
- هوین چ دبێژن: ئەگەر مرۆڤەكی سەد میهـ هەبن و ئێك ژ وان بەرزە بوو؛ ما ئەو نوت و نەهـ میهان ل چیایی ناهێلیت و ل دویڤ ئەوا بەرزە بگەڕیێت؟
- 13
- ب راستی دبێژمە هەوە ئەگەر وی دیت دێ كەیفا وی ب وێ پتر بیت ژ یا وان نوت و نەهـ میهێن ماین.
- 14
- وەسا، بابێ هەوە ئەوێ ل ئەسمانان نەڤێت، ئێك ژ ڤان زارۆكان وێران ببیت.
- ئەگەر برایێ تە گونەهـ دگەل تە كر
- 15
- ئەگەر برایێ تە گونەهـ دگەل تە كر، ب تنێ هەرە نك وی گازندا ژێ بكە. ئەگەر گوهێ خۆ دا تە، تە برایێ خۆ ب دەستێ خۆ ڤە ئینا.
- 16
- ئەگەر گوهێ خۆ نەدا تە ئێكی یان دووان دگەل خۆ ببە، داكو هەر تشت ب رێكا دوو یان سێ شاهدان ئاشكرا ببن .
- 17
- ئەگەر گوهێ خۆ نەدا وان، وێ دوزێ بگەهینە جڤاتا باوەرداران و ئەگەر گوهێ خۆ نەدا باوەرداران ژی، بلا ل نك تە وەكو پەیكەر پەرێس و باجگر بیت.
- 18
- ب راستی دبێژمە هەوە، هەر تشتێ هوین ب ئەردی ڤە گرێددەن دێ ب ئەسمانی ڤە هێتە گرێدان و هەر تشتەكێ ل سەر ئەردی ڤەكەن ئەو ل ئەسمانی یێ هاتییە ڤەكرن.
- 19
- و دبێژمە هەوە، ئەگەر دوو ژ هەوە ل ئەردی ل سەر داخوازكێ پێك هاتن، داخوازا وان چ تشت بیت، دێ بۆ وان ژ نك بابێ من ل ئەسمانان ب جهـ هێت.
- 20
- چنكو هەر جهەكێ دوو یان سێ ب ناڤێ من كومبوون، دێ ئەز د ناڤ وان دا بم.»
- نموونەیا كۆلەیێ نە دلوڤان
- 21
- پاشی پەتروس هاتە نك و پرسیار ژێ كر: «ئەی خودان، چەند جاران برایێ من بەرامبەری من گونەهان بكەت، ئەز لێ ببورم؟ ئەرێ هەتا حەفت جاران؟»
- 22
- عیسا بەرسڤا وی دا: «ئەز دبێژمە تە: نە هەتا حەفت جاران و بەس، بەلێ هەتا حەفتێ جاران حەفت جار!
- 23
- چنكو پاشاتیا ئەسمانان وەكو پاشایێ ڤیای حسابێ دگەل كۆلەیێن خۆ بكەت.
- 24
- دەمێ دگەل وان دەست ب حسابێ كری، ئێك ژ وان یێ ب دەهـ هزار دەرهەمێن زیڤی قەردار ئینا نك،
- 25
- بەلێ نە بوو قەرێ وی بدەتێ، خودانێ وی فەرمان دا، كو وی و ژن و زارۆكان و هەر تشتەكێ هەی بهێنە فرۆتن، دا قەرێ وی رابیت.
- 26
- ئەڤجا كۆلە كەتە سەر چوكان و گۆت: ”بێهنا خۆ ل من فرەكە و ئەز دێ هەمی قەرێ خۆ دەم.“
- 27
- دلێ خودانی ما ب كۆلەی ڤە، ئەڤجا بەردا و ل قەرێ وی بوری.
- 28
- دەمێ ئەو كۆلە دەركەفتی، چوو ل هەڤالێ خۆیێ كۆلە بگەڕیێت، ئەوێ ب سەد دیناران قەردار دیت. حەفكا وی گرت و گۆت: ”قەرێ من بدە!“
- 29
- ئەڤجا هەڤالێ وی كەفتە سەر چوكان و هیڤی ژێكرن و گۆتێ: ”بێهنا خۆ ل من فرەهـ بكە دێ دەمە تە.“
- 30
- بەلێ رازی نەبوو و كرە د زیندانێ دا؛ هەتا قەرێ خۆ بدەت.
- 31
- دەمێ هەڤالێن وی یێن كۆلە ئەڤ تشتە دیتی، گەلەك پێ نەخۆش بوون و چوون ئەڤ چەندە گۆتنە خودانێ خۆ.
- 32
- خودانی ژی گازی كرێ و گۆتێ: ”ئەی كۆلەیێ خراب ئەو قەر هەمی من ب تە هێلا، چنكو تە هیڤی ژ من كرن؛
- 33
- ئەرێ ما نە پێدڤی بوو تە دلوڤانی ب هەڤالێ خۆ یێ كۆلە بربا، هەروەكو من دلوڤانی ب تە بری؟“
- 34
- خودان گەلەك توڕە بوو، داڤ خودانێن قامچیان، دا ئەشكەنجە بدەن؛ هەتا قەرێ خۆ هەمیێ بدەت.
- 35
- ئەها دێ هوسا بابێ منێ ئەسمانی دگەل هەوە كەت، ئەگەر هەر ئێك ژ هەوە ژ دل ل برایێ خۆ نەبوریت.»
