عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- نموونەیا پالەیان
- 1
- «چنكو پاشاتیا ئەسمانان وەك مرۆڤەكێ خودان مالە سپێدێ زوی ژ مالێ دەركەفت؛ دا بۆ رەزێ خۆ پالەیان بگریت.
- 2
- دگەل وان پێك هات هەر رۆژێ دینارەكێ بدەتێ و فرێكرنە ناڤ رەزی.
- 3
- ل دورا سەعەت نەه؛ دەركەفت و هندەك پالەیێن بێكار ل بازارێ دیتن.
- 4
- گۆتە وان: ”هوین ژی هەڕنە ناڤ رەزێ من شول بكەن، ئەز دێ وێ دەمە هەوە ئەوا بۆ هەوە دكەڤیت.“ و چوون.
- 5
- ل نیڤرو؛ ئەو چوو بازارێ هندەك پالەیێن دی فرێكرنە ناڤ رەزێ خۆ. ل سەعەت سێ؛ چوو هندەك پالەیێن دی ژی فرێكرنە ناڤ رەزێ خۆ.
- 6
- ل دورا سەعەت پێنجی ئێڤاری؛ جارەكا دی دەركەفت؛ هندەك پالەیێن دی دیتن و پرسیار ژێكر: ”بۆچی هوین ب درێژاهیا رۆژێ بێكار ل ڤێرێ دراوەستیاینە؟“
- 7
- بەرسڤا وی دا: ”چنكو كەسێ ئەم نەبرینە پالەتیێ.“ گۆتە وان: ”هوین ژی هەڕنە ناڤ رەزێ من.“
- 8
- دەمێ بوویە شەڤ خودانێ رەزی گۆتە جێگرێ خۆ: ”گازی كە پالەیان و حەقێ وان بدێ، ژ یێن دوماهیێ دەست پێ بكە و ژ یێن سەری ب دوماهی بینە.“
- 9
- و ئەڤێن سەعەت پێنجی ئێڤاری چووینە كاری، هەر ئێكی دینارەك وەرگرت.
- 10
- دەمێ ئەوێن دەستپێكێ هاتین یا ژ وان ڤە ئەو دێ پتر وەرگرن، بەلێ هەر ئێك ژ وان ژی دینارەك وەرگرت.
- 11
- دەمێ وان دینار وەرگرتی قەسە گۆتنە خودانێ كاری
- 12
- و گۆتنێ: ”ئەوێن دوماهیێ هاتین؛ ب تنێ سەعەتەكێ شول كر و تە ئەو ئینانە رێزا مە و مە رۆژێ هەمیێ لبەر گەرمیا حەتاڤێ شولكر.“
- 13
- بەرسڤا ئێك ژ وان دا: ”ئەی برا، من نەحەقی ل تە نەكرییە. ما ئەز و تۆ ل سەر دینارەكێ پێك نەهاتبووین؟
- 14
- حەقێ خۆ وەرگرە و هەرە سەر رێكا خۆ. من دڤێت وەكو تە بدەمە ئەڤێ دوماهیێ ژی.
- 15
- ما من ماف نینە ب مالێ خۆ وێ بكەم یا من دڤێت؟ یان ژی تۆ یێ قەلسی، چنكو ئەزێ مەردم؟“
- 16
- وەسا ئەوێن دوماهیكێ دێ بنە پێشی و یێن پێشی دێ بنە دوماهیك.»
- عیسا جارا سیێ مرنا خۆ دیاردكەت
- 17
- دەمێ عیسا بەرەڤ ئورشەلیمێ دچوو، هەر دوازدە شاگردێن خۆ ب رێڤە خلوەكرن و گۆتێ:
- 18
- «ئەها ئەڤە ئەم بەرەڤ ئورشەلیم سەركەفتین و كوڕێ مرۆڤ دێ هێتە دان بۆ دەستێن سەرۆكێن كاهنان و مامۆستایێن دەستوری و دێ وی ب مرنێ دادكەن
- 19
- و دێ تەسلیمی دەستێ بیانیان كەن و دێ ترانا پێ كەن و دێ قامچی و خاچ دەن، بەلێ دێ د رۆژا سیێ دا رابیت.»
- داخوازا دایكا یەعقوب و یوحەننا
- 20
- دایكا كوڕێن زەبەدی و كوڕێن وێ دگەل وێ بوون نێزیكی وی بوو و كەتە سەر چوكێن خۆ داخوازا تشتەكێ ژێكر.
- 21
- گۆتێ: «تە چ دڤێت؟» بەرسڤا وی دا: «ئەمركە داكو هەردوو كوڕێن من د پاشاتیا تە دا ئێك ل لایێ تەیێ راستێ و یێ دی لایێ چەپێ روینن.»
- 22
- عیسای بەرسڤ دا: «هوین نزانن داخوازا چ دكەن. ما هوین دشێن ئەو پەرداغا ئەز دێ ڤەخوم هوین ژی ڤەخون؟» بەرسڤا وی دا: «بەلێ ئەم دشێین.»
- 23
- عیسای گۆتە وان: «دێ پەرداغا من ڤەخون، بەلێ روینشتن ل لایێ منێ چەپێ و راستێ، نەشێم بدەم؛ چنكو ب تنێ بۆ وانە ئەوێن بابێ من بۆ دروستكری.»
- 24
- دەمێ ئەو دەهـ شاگردێن دی ئەڤ تشتە گوهـ لێ بووی ژ هەردوو برایان توڕەبوون.
- 25
- عیسای هەمی گازیكرن و گۆت: «هوین دزانن سەرۆكێن مللەتان سەرۆكاتیا وان دكەن و مەزنێن وان ژی دەستهەلاتی ل سەر دكەن؛
- 26
- لێ، ئەڤ چەندە د ناڤ هەوە دا نابیت، بەلێ ئەوێ دڤێت مەزن بیت بلا ببیتە خزمەتكارێ هەوە
- 27
- و ئەوێ دڤێت د ناڤ هەوە دا ببیتە پێشی بلا ببیتە كۆلەیێ هەوە.
- 28
- هەروەكو كوڕێ مرۆڤ یێ هاتی؛ نە داكو خزمەتا وی بهێتە كرن، بەلێ دا ئەو خزمەتێ بكەت و خۆ گوری گەلەكان بكەت.»
- ساخكرنا دوو زەلامێن كوڕە
- 29
- دەمێ عیسا و شاگردێن خۆ ژ ئەریحایێ دەردكەفتین، خەلكەكێ مەزن ل دویڤ وی چوون.
- 30
- دوو كوڕە ل رەخێ رێكێ روینشتبوون. دەمێ گوهـ لێ بووی كو عیسا یێ دبوریت، كرنە گازی: «ئەی خودان، كوڕێ داوودی، دلوڤانیێ ب مە ببە!»
- 31
- بەلێ خەلكی لێ كرە هەوار دا مت ببن، بەلێ گازیێن خۆ زێدەكرن و گۆتن: «ئەی خودان، كوڕێ داوودی دلوڤانیێ ب مە ببە!»
- 32
- عیسا راوەستیا و گازی كرە وان و پرسیار ژێكر: «هەوە چ دڤێت ئەز بۆ هەوە بكەم؟»
- 33
- وان بەرسڤا وی دا «ئەی خودان تۆ چاڤێن مە ساخكەی.»
- 34
- دلێ وی ما ب وان ڤە و دەستێ خۆ كرە چاڤێن وان. د گاڤێ دا چاڤێن وان ساخبوون و ل دویڤ چوون.
