عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
عیسا مامۆستایێن دەستووری و فەریسیان تاوانبار دكەت 
1
هنگی عیسای گۆتە جەماوەری و شاگردێن خۆ:
2
«مامۆستایێن دەستووری و فەریسی ل سەر كورسیكا مووسای دروینن،
3
ئەڤجا هەر تشتێ ئەو دبێژنە هەوە، هوین بكەن و ب جهـ بینن، لێ ل دویڤ كریارێن وان نەكەن، چنكو ئەو دبێژن، لێ ناكەن.
4
ئەو بارێن گران و دەستنەخۆش گرێ ددەن و دداننە سەر ملێن مرۆڤان، لێ ئەو ب خۆ تبلەكا خۆ بۆ هەلگرتنا باری نالڤینن.
5
هەمی تشتێن دكەن ژ بەر هندێیە، داكو خەلك وان ببینن. ئەو نڤشتیێن[a] خۆ پەحن دكەن و ریشالۆكێن[b] كراسێ خۆ شۆڕ دكەن
6
و حەز دكەن د مێڤانداریان دا ل سەرێ ژۆری و د كنیشتەیان دا ل كورسیكێن پێشیێ بن
7
و ل بازاڕان سڵاڤ لێ بهێنە كرن و خەلك بێژیتە وان ‹رابی[c] ›.
8
لێ بلا هوین ب ‹رابی› نەهێنە گازی كرن، چنكو مامۆستایێ هەوە ئێكە و هوین هەمی برانە.
9
هەروەسا ل سەر ئەردی نەبێژنە كەسێ ‹باب›، چنكو بابێ هەوە ئێكە، ئەوێ ل ئەسمانی.
10
هەروەسا بلا هوین ب ‹رێبەر› نەهێنە گازی كرن، چنكو رێبەرێ هەوە ئێكە، ئەو ژی مەسیحە.
11
د ناڤ هەوە دا یێ هەری مەزن، دێ خزمەتكارێ هەوە بیت.
12
هەر كەسێ خۆ بلند بكەت، دێ هێتە نزمكرن و هەر كەسێ خۆ نزم بكەت، دێ هێتە بلندكرن.
13
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین دەرگەهێ پاشایەتیا ئەسمانان ل بەر مرۆڤان دگرن، نە هوین ب ژۆر دكەڤن و نەدهێلن ژی ئەوێن حەز بكەن، ب ژۆر بكەڤن.
14
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین مالێ بیژنان دخۆن و بۆ رویمەتی نڤێژان درێژ دكەن. ژ بەر هندێ هوین دێ سزادانەكا گرانتر وەرگرن.
15
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین ل دەریا و دێمی دگەڕیێن، دا ئێكی بیننە سەر باوەریا خۆ و ئەگەر وەسا چێبوو، هوین وی دوو جاران ژ خۆ پتر دكەنە كوڕێ دۆزەخێ[d] .
16
نەخوزیكێن هەوە گەلی سەركێشێن كۆرە. هوین دبێژن: ‹هەر كەسێ سویندێ ب پەرستگەهێ بخۆت، سویند ل سەر نینە، لێ یێ سویندێ ب زێڕێ پەرستگەهێ بخۆت، دڤێت پێگیریێ پێ بكەت.›
17
گەلی دەبەنگ و كۆرەیان، ما كیژ مەزنترە، زێڕ یان پەرستگەهـ ئەوا زێڕی پیرۆز دكەت؟
18
دیسان هوین دبێژن: ‹هەر كەسێ ب قوربانگەهێ سویند بخۆت، سویند ل سەر نینە. لێ ئەوێ سویندێ ب پێشكێشیێ ل سەر قوربانگەهێ بخۆت، دڤێت پێگیریێ پێ بكەت.›
19
گەلی كۆرەیان! ما كیژ مەزنترە، قوربان یان قوربانگەها قوربانی پیرۆز دكەت؟
20
ئەڤجا هەر كەسێ سویندێ ب قوربانگەهێ بخۆت، وی سویند ب وێ و ب هەمی تشتێ ل سەر ژی خوار.
21
هەر كەسێ سویندێ ب پەرستگەهێ ژی بخۆت، وی سویند ب وێ و ب ئاكنجیێ وێ ژی خوار.
22
هەر كەسێ سویندێ ب ئەسمانی ژی بخۆت، ئەوی سویند ب تەختێ خودێ و ئەوێ ل سەر روینشتی ژی خوار.
23
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین دەهێكێ ژ پوینگی و سبتێ و رەها زەر ددەن، لێ هەوە تشتێن گرنگتر د دەستووری دا، ئانكو دادپەروەری، دلۆڤانی و دلسۆزی، ب پاش گوهێن خۆ ڤە هاڤێتینە. پێدڤی بوو هوین ئەڤان بكەن و یێن دی ژی ب پاش گوهێن خۆ ڤە نەهاڤێژن.
24
گەلی سەركێشێن كۆرە، هوین خۆ ژ وێ ڤەخوارنێ ددەنە پاش یا پێشكەك بكەڤیتە تێدا، لێ هوین حێشترێ دادعیرن.
25
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین دەرڤەیا پەرداغ و سێنیكێن خۆ دشوون، لێ ئەو ژ ناڤ دا دپڕن ژ وی تشتی یێ هەوە ب تالانی و چاڤبرسیێ بدەست خۆ ڤە ئینای.
26
هەی فەریسیێ كۆرە! تۆ ل بەراهیێ ناڤخۆیا پەرداغێ بشوو، داكو دەرڤەیا وێ ژی پاقژ ببیت.
27
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین وەكو گۆڕێن گێچكرینە، كو ژ دەرڤە جوان دیار دبن، لێ ژ ناڤ دا دپڕن ژ هەستیكێن مریان و هەمی پیساتیێ.
28
هوین ژی هۆسا، بۆ خەلكی دیار دبن كو هوین د راستدارن، لێ ژ ناڤ دا د پڕی دووڕویاتی و خرابینە.
29
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین گۆڕێن پێغەمبەران ئاڤا دكەن و گۆڕێن مرۆڤێن چاك دنەخشینن
30
و هوین دبێژن: ‹ئەگەر ئەم ل سەردەمێ بابكالێن خۆ ژیاباین، مە پشكداری د كوشتنا پێغەمبەران دا نەدكر.›
31
ب ڤێ چەندێ هوین دژی خۆ شاهدەییێ ددەن كو هوین كوڕێن كوژەكێن پێغەمبەرانە.
32
ئەڤجا هوین ژی شووپا بابكالێن خۆ تەمام كەن.
33
هەی مارێن تێژكێن كۆرەماران، دێ چەوا ژ سزایێ دۆزەخێ رەڤن؟
34
ئەڤجا ئەڤە ئەز دێ پێغەمبەر، ئاقلمەند و مامۆستایێن دەستووری بۆ هەوە هنێرم. هوین دێ هندەك ژ وان كوژن و خاچ دەن و هندەكان ژی د كنیشتەیێن خۆ دا قامچی دەن و دێ ژ باژێڕەكی بۆ یێ دی راتەقینن.
35
لەوما هەر خوینەكا پاقژ یا ل سەر ئەردی هاتیە رشتن، هەر ژ خوینا هابیلێ راستدار تا خوینا زەكەریایێ كوڕێ بەرەخیای، ئەوێ هەوە د ناڤبەرا پەرستگەهـ و قوربانگەهێ دا كوشتی، دێ كەڤیتە ستۆیێ هەوە.
36
ئەز ب راستی دبێژمە هەوە: ئەڤە هەمی دێ كەڤیتە ستۆیێ ڤی نفشی.
زێمارا عیسای ل سەر ئورشەلیمێ 
37
ئورشەلیم، ئورشەلیم، هەی كوژەكا پێغەمبەران و بەربارانكەرا ئەوێن بۆ تە هاتینە هنارتن، چەند جاران من حەز دكر زاڕۆكێن تە خڕڤە بكەم، كا چەوا مریشك چیچەلۆكێن خۆ د بن چەنگێن خۆ ڤە خڕڤە دكەت، لێ هەوە نەڤیا!
38
ئەڤە مالا هەوە ما ب هیڤیا هەوە ڤە و دێ كاڤل بیت.
39
ئەز دبێژمە هەوە: ئێدی هوین من نابینن، تاكو هوین بێژن: ‹یێ بەرەكەتدارە ئەوێ ب ناڤێ خودانی دهێت.›[e] »
  1. a. 23‏:5 q نڤشتی: ل فەرهەنگۆكێ بنێڕە.
  2. b. 23‏:5 q ریشالۆك: ل فەرهەنگۆكێ بنێڕە.
  3. c. 23‏:7 پەیڤەكا ئارامیە رامانێ وێ ‹مامۆستایێ ئایینی›.
  4. d. 23‏:15 یێ كو هەژی دۆزەخێیە.
  5. e. 23‏:39 زەبوور 118‏:26