عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ژن ئینان و بەردان
- 1
- ژ وێرێ رابوو و هاتە دەوروبەرێن دەڤەرا یەهودیایێ و ئەو ئەردێ پشت رویبارێ ئوردن. ئینا جارەكا دی جەماوەر لێ خڕڤەبوو و وی وەكو هەر جار دەست ب فێركرنا وان كر.
- 2
- هندەك فەریسی هاتنە نك و پرسیار ژێ كرن دا تاقی بكەن: «دروستە زەلام ژنا خۆ بەردەت؟»
- 3
- بەرسڤا وان دا «ما موسای ب چ فەرمان ل هەوە كرییە؟»
- 4
- ئینا گۆتن: «موسای دەستویری دا كو بەلگەناما بەردانێ بهێتە نڤیسین، پاشی ژنك بهێتە بەردان.»
- 5
- عیسای بەرسڤا وان دا: «موسای ژ ئەگەرێ سەرهشكیا هەوە، ئەڤ فەرمانە بۆ هەوە نڤیسی.
- 6
- لێ ژ دەستپێكا ئافراندنێ خودێ مرۆڤ نێر و مێ داینە.
- 7
- ژ بەر هندێ زەلام دێ باب و دایكا خۆ هێلیت و دێ خۆ ب هەڤژینا خۆ ڤە گرێدەت،
- 8
- و دێ هەردوو بنە لەشەك، ئێدی نابنە دوو، بەلێ ئێك لەش.
- 9
- ئەڤجا ئەو تشتێ خودێ گەهاندییە ئێك، بلا مرۆڤ ژێكڤە نەكەت.»
- 10
- پاشی ل مال ژی شاگردێن وی، دەربارەی ڤێ چەندێ پرسیار ژێ كرن.
- 11
- ئینا گۆتە وان: «یێ هەڤژینا خۆ بەردەت و ئێكا دی مار كەت، ئەو دەهمەنپیسیێ د سەر وێ را دكەت
- 12
- و ئەگەر ژنێ زەلامێ خۆ هێلا و شوی ب ئێكێ دی كر، ئەو دەهمەنپیسیێ دكەت!»
- عیسا زارۆكان پیرۆز دكەت
- 13
- هندەكان زارۆك ئینانە نك، دا دەستێ خۆ بدانیتە سەر، لێ شاگردان ل وان حەیتاند.
- 14
- و دەمێ عیسای ئەڤ چەندە دیتی، توڕە بوو و گۆتە وان: «بهێلن زارۆك بهێنە نك من، رێ ل وان نەگرن، چنكو پاشاتیا خودێ بۆ یێن وەكو وانە.
- 15
- ب راستی دبێژمە هەوە، ئەوێ وەكو زارۆكەكی پاشاتیا خودێ قەبیل نەكەت، ئەو قەت ناچیتە د ژۆرڤە.»
- 16
- پاشی زارۆك هەمبێزكرن و دەستێن خۆ دانانە سەر وان و پیرۆز كرن.
- گەنجێ دەولەمەند
- 17
- پشتی ب رێ كەفتی، زەلامەك ب لەز گەهەشتێ و كەفتە سەر چوكان و پرسیار ژێ كر: « مامۆستایێ چاك، ئەز چ بكەم دا میراتێ ژیانا هەروهەر وەرگرم؟»
- 18
- لێ عیسای گۆتێ: «تۆ بۆچی دبێژیە من یێ چاك؟ ژبلی ئێكی كەس یێ چاك نینە، ئەو ژی خودێیە.
- 19
- تۆ فەرمانان دزانی: كوشتنێ نەكە، دەهمەنپیسیێ نەكە، دزیێ نەكە و شاهدەیێ ب درەو نەدە، مافێ كەسێ نەخۆ، رێزێ ل دایك و بابێن خۆ بگرە. »
- 20
- ئینا زەلامی بەرسڤا وی دا و گۆت: «مامۆستا، ئەڤ هەمی فەرمانێن هەنێ هەر ژ لاوینیا خۆ من یێن ب جهـ ئیناین.»
- 21
- و عیسای سەحكرێ و حەز ژێ كر و گۆتێ: «تشتەك ب تنێ یێ ژ تە كێمە: هەڕە هەمی تشتێ تە هەی بفرۆشە و ل بەلەنگازان لێكڤەكە، دێ تە خەزینەك ل ئەسمانی هەبیت و وەرە ب دویڤ من بكەڤە.»
- 22
- لێ ئەو ب ڤێ گۆتنێ دلگران بوو و چوو یێ خەمبار، چنكو ئەو خودانێ سامانەكێ زۆر بوو.
- 23
- عیسای بەرێ خۆ دا دەوروبەرێن خۆ و گۆتە شاگردێن خۆ: «چەندا ب زەحمەتە دەولەمەند بچنە د پاشاتیا خودێ دا!»
- 24
- شاگرد ژ گۆتنا وی گوهشین، عیسای جارەكا دی گۆتە وان: «لاوێن من، ب ژووركەفتنا پاشاتیا خودێ، بۆ وان كەسێن ب مالێ خۆ دخوڕن، چەند یا ب زەحمەتە!
- 25
- دەربازبوونا حێشترەكێ د كونا دەرزیكێ را، ژ ب ژووركەفتنا دەولەمەندەكی بۆ پاشاتیا خودێ ب ساناهیترە!
- 26
- هندی بێژی ئەو حێبەتی بوون و گۆتنە ئێك: «ئەڤجا كی دشێت قورتال ببیت؟»
- 27
- عیسای سەحكرە وان و گۆت: « ئەڤە ل نك مرۆڤان مەحالە، لێ نە ل نك خودێ، چنكو هەمی تشت ب دەست خودێ ڤە دهێن.»
- 28
- ئینا پەتروسی گۆتێ: «پا ئەڤە مە هەمی تشت یێن هێلاین و كەفتینە دویڤ تە.»
- 29
- عیسای بەرسڤ دا: «راستیێ دبێژمە هەوە: هەر كەسێ كو ژ بەر من و مزگینیێ خانی، برا، خویشك، دایك، باب، هەڤژین، زارۆك یان ژی زەڤی هێلاینە
- 30
- دێ سەد جاران بەرامبەری ڤان مال، خویشك، برا، دایك، زارۆك و زەڤیان، دگەل تەپەسەریان، ل ڤێ جیهانێ هەر ب دەست ڤە ئینیت و دێ د سەردەمێ داهاتی دا ژیانا هەروهەر وەرگریت.
- 31
- لێ گەلەكێن پێشیێ دێ بنە یێن پاشیێ و یێن پاشیێ دبنە یێن پێشیێ.»
- عیسا بۆ جارا سیێ پەیامێ ب مرن و رابوونا خۆ ددەت
- 32
- ئەو ب رێڤە بوون دچوونە ئورشەلیمێ، عیسا ل پێشیا وان بوو. شاگردە دمەندەهۆش بوون و ئەوێن ب دویڤ كەفتین، دترسیای بوون. جارەكا دی ئەو دوازدە برنە لایەكی و ئاگەهدار كرن ب ئەوا دێ ل وی قەومیت،
- 33
- و گۆت: «بەرێخۆ بدەنێ: ئەڤە ئەم یێ سەردكەڤینە ئورشەلیمێ، دێ كوڕێ مرۆڤ دەنە دەستێ سەرۆكێن كاهنان و مامۆستایێن دەستوری و دێ بریارا مرنا وی دەن و دێ دەنە دەستێ مللەتێن بیانی،
- 34
- دێ ترانا پێ كەن و تف كەنێ و قامچی دەن و كوژن و پشتی سێ رۆژان دێ رابیت.»
- داخوازا یەعقوبی و یوحەننای
- 35
- ل وی دەمی یەعقوب و یوحەننا كوڕێن زەبدی هاتنە نك و گۆتنێ: «مامۆستا، ئەم حەز دكەین هەر تشتەكی ژ تە داخواز بكەین بۆ مە بكەی.»
- 36
- گۆتە وان: «هەوە چ دڤێت ئەز بۆ هەوە بكەم؟»
- 37
- بەرسڤ دان: «دەستویریێ بدە مە، ئێك ل لایێ تە یێ راستی و یێ دی ل لایێ تە یێ چەپێ، د مەزناهیا تە دا روینین.»
- 38
- عیسای گۆتە وان: «هوین نزانن كا هوین چ دخوازن. ئەرێ هوین دشێن وێ پەرداغا ئەز دێ ڤەخوم هوین ڤەخون یان بهێنە تافیركرن ب وێ تافیركرنا ئەز وەرگرم؟»
- 39
- ئینا بەرسڤ دان: «ئەم دشێین!» عیسای گۆتە وان: «ئەرێ ئەو پەرداغا ئەز ڤەدخوم هوین دێ ڤەخون و ب وێ یا ئەز پێ تێمە تافیركرن هوین دێ پێ هێنە تافیركرن.
- 40
- بەلێ روینشتنا ل لایێ راست و چەپێ من ئەز نەشێم بدەم، ب تنێ بۆ وان كەسایە یێن بۆ هاتینە بەرهەڤكرن.»
- 41
- و دەمێ هەر دەهـ شاگردێن دی گوهـ ل ڤێ چەندێ بووی ژ یەعقوب و یوحەننای ئەنیگرێ بوون.
- 42
- بەلێ عیسای گازی وان كر و گۆتە وان: «هوین دزانن ئەوێن ب سەرۆكێن مللەتان دهێنە نیاسین زالدەستیێ ل وان دكەن و مەزنێن وان دەستهەلاتداریێ لێ دكەن
- 43
- بەلێ ئەڤ چەندە د ناڤبەرا هەوە دا نابیت، هەر كەسەكێ دڤێت ببیتە مەزن دناڤ هەوە دا، بلا بۆ هەوە ببیتە خزمەتكار،
- 44
- و هەر كەسەكێ ژ هەوە ڤیا ل پێشیێ بیت د ناڤ هەوە دا، بلا كۆلەیێ هەمیان بیت.
- 45
- چنكو كوڕێ مرۆڤ بخۆ ژی نەهاتییە دا خزمەتا وی بهێتە كرن، لێ دا خزمەتێ بكەت و خۆ ل شوینا گەلەكان گۆری كەت.»
- ساخبوونا بارتیماوسێ كۆرە
- 46
- گەهشتنە ئەریحا و دەمێ ئەو ژ ئەریحا دەردكەت دگەل شاگردێن خۆ و جەماوەرەكێ مەزن، بارتیماوس كوڕێ تیماوسی خوازوكەكێ كۆرە بوو ل سەر رێكێ یێ روینشتی بوو.
- 47
- و دەمێ گوهـ لێ بووی، كو ئەو عیسایێ ناسرییە، كرە هەوار و گۆت: «عیسایێ كوڕێ داوودی، دلوڤانیێ ب من ببە!»
- 48
- گەلەكان پاشڤە بر داكو بێدەنگ بیت، لێ وی پتر كرە گازی: «كوڕێ داوودی دلوڤانیێ ب من ببە.»
- 49
- ئینا عیسا راوەستیا و گۆت: «گازی كەنێ!» گازی كرنە كۆرەی و گۆتنێ: «پشتراست بە و رابە! ئەوێ گازی تە دكەت!»
- 50
- كراسێ خۆ هاڤێت و ب لەز رابوو و هاتە نك عیسای.
- 51
- ئینا عیسای گۆت: «تە چ دڤێت ئەز بۆ تە بكەم؟» گۆت: «مامۆستا، من بیناهی دڤێت!»
- 52
- ئینا عیسای گۆتێ: «هەڕە، باوەریا تە تۆ ساخ كری.» و د جهـ دا چاڤێن وی روهن بوون و ل رێكێ كەفتە دویڤ عیسای .
