عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- خەلكێ باژێرێ ناسیرایێ عیسای رەتدكەت
- 1
- عیسای ئەو جهـ هێلا و هاتە باژێرێ خۆ و شاگردێن وی كەفتنە دویڤ.
- 2
- دەمێ بوویە شەمبی، د ناڤ كنیشتێ دا دەست ب فێركرنێ كر. دەمێ گوهـ لێ بووین، گەلەك مرۆڤ گوهشین و گۆتن: «ئەوی ئەڤە ژ كیڤە ئیناییە؟ و ئەڤە چ داناییە بۆ هاتییە دان، و ئەڤ حنێرێن ل سەر دەستێن وی چێ دبن چنە؟
- 3
- ئەرێ ئەڤە نە ئەو دارتاشێ كوڕێ مەریەمێیە، برایێ یەعقوب و یوسی و یەهودا و شەمعونییە؟ ئەرێ ما خویشكێن وی نە ل ڤێرێنە د ناڤ مە دانە؟» و هوسا لێ ب گومان بوون.
- 4
- ئینا عیسای گۆتە وان: «چ پێغەمبەر دبێ رێز نینن، ب تنێ ئەوێ د ناڤ باژێر و كەس و كارێن خۆ دا نەبیت.»
- 5
- و نەدشیا ل وێرێ چ حنێران بكەت، ژبلی كو دەستێ خۆ كرە چەند نەساخان و ساخ كرنەڤە.
- 6
- و ئەو ژ بەر كێم باوەریا وان یێ گوهشی بوو.
پاشی ل گوندێن دەوروبەران گەڕیا و فێركرن كر. - هنارتنا هەر دوازدە شاگردان
- 7
- و گازی كرە هەر دوازدە شاگردان و دەست پێكر جووت جووتە فرێكرن. و دەستهەلاتداری ل سەر گیانێن پیس دا وان،
- 8
- و ئەو راسپاردن كو چ تشتی بۆ رێكێ ژبلی دارەكی هەلنەگرن؛ تۆڕبە، نان و دراڤ دگەل وان دا نەبن،
- 9
- لێ پێلاڤەك ل پێ وان بیت و دوو كراسان نەكەنە بەر خۆ.
- 10
- و گۆتە وان: «هەر گاڤا هوین چوونە د خانیەكێ ڤە، تێدا بمینن هەتا هوین ژ وێرێ دچن.
- 11
- هەر جهەكێ هوین نەهێنە وەرگرتن، و خەلكی گوهێ خۆ نەدا ئاخفتنێن هەوە، هوین وی جهی بهێلن و تۆزا پێن خۆ داقوتن، وەكو شاهدەیەك ل سەر وان.»
- 12
- ئینا ب رێ كەفتن و گۆتنە خەلكی، كو پێدڤییە ئەو ل خۆ بزڤرن.
- 13
- و گەلەك ئەجنە دەرئێخستن، نەخۆش چەوركرن و ساخ كرن.
- سەربڕینا یوحەننایێ تافیركەر
- 14
- هێرودێسێ پاشا گوهـ ل نوچێن عیسای بوو، چنكو ناڤێ وی بەلاڤ ببوو. هندەك مرۆڤان دگۆت: «یوحەننایێ تافیركەرە یێ ژ ناڤ مریان رابووی، ژ بەر هندێ ئەو حنێر ل سەر دەستێ وی چێدبن.»
- 15
- لێ هندەكێن دی دگۆت: «ئەڤە ئیلیایە.» هەروەسا هندەكان دگۆت: «ئەڤە پێغەمبەرەكە وەكو پێغەمبەرێن بەرێ.»
- 16
- دەمێ هێرودێسی گوهـ لێ بووی گۆت: «ئەڤە یوحەننایە ئەوێ من سەرێ وی بری، ژ ناڤ مریان یێ رابووییەڤە!»
- 17
- هێرودێسی یوحەننا گرتبوو و د ناڤ زیندانێ دا گرێدابوو، ژ بەر هیرودیایێ ئەوا مار كری، ئەو ژی هەڤژینا فیلیپوسێ برایێ وی بوو.
- 18
- ژ بەر كو یوحەننای دگۆتە وی: «نە یا دروستە تۆ ژن برا خۆ مار بكەی.»
- 19
- و كەربێن هیرودیایێ ژ یوحەننای ڤەدبوون و دڤیا بكوژیت، لێ نەدشیا،
- 20
- چنكو هێرودێس ژ یوحەننای دترسیا و دزانی كو ئەو زەلامەكێ راستە و یێ پیرۆزە، ژ بەر هندێ دپاراست. دەمێ وی گوهداریا یوحەننای دكر تەنگاڤ دبوو، لێ دگەل هندێ دڤیا بزانیت كا چ دبێژیت.
- 21
- و پاشی بۆ هیرودیایێ دەرفەت چێبوو دەمێ هێرودێسی ب هەلكەفتنا ژدایكبوونا خۆ شیڤەكا بەركەفتی بۆ خانەدانێن وی، سەرلەشكەر و ناڤدارێن دەڤەرا جەلیلێ چێكری.
- 22
- دەمێ كچا هیرودیایێ ب ژۆر كەفتی و سەماكری، هێرودێس و مێڤانێن وی پێ دلخۆش بوون. ئینا پاشای گۆتە كچكێ: «تە چ دڤێت ژ من بخوازە، ئەز دێ دەمە تە.»
- 23
- و سویند بۆ وێ خوار و گۆت: «تۆ چ بخوازی ئەز دێ دەمە تە، ئەگەر نیڤا پاشاتیا من ژی بیت.»
- 24
- ئینا كچك دەركەفت و پرسیار ژ دایكا خۆ كر: «ئەز چ بخوازم؟» بەرسڤا وێ دا: «سەرێ یوحەننایێ تافیركەر!»
- 25
- و د گاڤێ دا ب لەز ب ژۆر كەفت و داخواز ژ پاشای كر و گۆت: «من دڤێت تۆ ڤێ گاڤێ سەرێ یوحەننایێ تافیركەر د سێنیكەكێ دا بدەیە من!»
- 26
- پاشا گەلەك خەمگین بوو، لێ وی نەدڤیا داخوازیا وێ ڤەگەڕینیت ژ بەر وان سویندێن وی خوارین و ژ بەر مێڤانان.
- 27
- و د گاڤێ دا شیرڤانەك هنارت و فەرمان دایێ، كو سەرێ یوحەننای بینیت. شیرڤان چوو و سەرێ وی د زیندانێ دا بڕی،
- 28
- و پاشی سەرێ وی ل سەر سێنیكەكێ ئینا و دا كچكێ، ئەوێ ژی بر و دا دایكا خۆ.
- 29
- دەمێ دەنگوباس گەهشتینە شاگردێن یوحەننای، هاتن و تەرمێ وی راكر و ڤەشارت.
- عیسا خوارنێ ددەتە پێنچ هزاران
- 30
- و هنارتی ل نك عیسای كوم بوون، هەمی كریار و فێركرنێن وان كری گۆتنێ.
- 31
- و گەلەك خەلك دهاتن و دچوون، چ دەرفەت نەبوو كو خوارنا خۆ بخون، ئینا عیسای گۆتە وان: «هوین ب تنێ وەرنە جهەكێ ڤالا و پیچەكێ بێهنا خۆ ڤەدەن.»
- 32
- و ب تنێ ب قاییكێ بۆ جهەكێ ڤالا چوون.
- 33
- ئەڤجا خەلكی دیتن یێ دچن، گەلەك ژ وان ئەو نیاسی، ژ هەمی باژێران ب پیان غاردان و بەری وان گەهشتنە وێرێ و لێ كوم بوون.
- 34
- و دەمێ عیسا ژ قاییكێ هاتییە خوارێ، خەلكەكێ زۆر دیت و دلێ وی ب وان سۆت، چنكو ئەو وەكو پەزێ بێ شڤان بوون. ئینا ئەو فێری گەلەك تشتان كرن.
- 35
- دەمەكێ درێژ ژ رۆژێ بوری، شاگردێن وی هاتنە نك و گۆتنێ: «ئەڤ جهە بەیارە و هندە دێ رۆژئاڤا بیت،
- 36
- ئەڤجا بێژە خەلكی داكو بچنە گوند و گوندكێن دەوروبەران دا بۆ خۆ تشتەكی بكڕن و بخون.»
- 37
- لێ عیسای بەرسڤ دا: «هوین بدەنێ دا بخون.» و گۆتن: «ئەرێ تە دڤێت ئەم بچین و ب بهایێ دووسەد دیناران[a] بۆ وان نانی بكرین و بدەینێ دا بخون؟»
- 38
- لێ عیسای گۆتە وان: «هەوە چەند نان هەنە؟ هەڕن سەحكەنێ.» دەمێ وان زانی چەندێ هەی، گۆتنە وی: «پێنچ نان و دوو ماسی.»
- 39
- ئینا فەرمان دا وان، دا بێژنە خەلكی، كو كوم كوم ل سەر زویركان رویننە خوارێ.
- 40
- ئینا سەد سەد و پێنجی پێنجی روینشتن.
- 41
- پاشی عیسای هەر پێنچ نان و هەردوو ماسی هەلگرتن و بەرێ خۆ دا ئەسمانی و سوپاسی كر و نان شكاندن و دانە شاگردێن خۆ داكو بدەنە خەلكی و هەردوو ماسی ژی ل سەر هەمیان لێكڤەكرن،
- 42
- و هەمیان خوار و تێر بوون.
- 43
- و پشتی هنگی دوازدە بوقچكێن تژی ژ چنیێن نانی و ژ بەرمایكێن ماسیان هەلگرتن
- 44
- و ئەو زەلامێن ژ وی نانی خوارین، نێزیكی پێنج هزاران بوون.
- عیسا ل سەر ئاڤێ برێڤە دچیت
- 45
- و د گاڤێ دا فەرمان ل شاگردێن خۆ كر ل قاییكێ سیار بن و بەری وی بچنە رەخێ دی یێ ئاڤێ ل بەیت سایدا، د وێ چەندێ دا دێ وان كومان بەلاڤەكەت.
- 46
- دەمێ هەمی فرێكرین چوو چیای دا نڤێژێ بكەت.
- 47
- و دەمێ بووییە شەڤ قاییك ل نیڤا گۆلێ بوو و عیسا ب تنێ ل ئەردی بوو.
- 48
- و عیسای دیت شاگردێن وی گەلەك ب هاژوتنێ دوەستیێن، چنكو با یێ دژی وان بوو. بەری ئەلندێ عیسا ب پیان د سەر گۆلێ را هاتە نك وان و ڤیا ژ وان دەرباز ببیت.
- 49
- دەمێ وان دیتی ل سەر ئاڤێ ب رێڤە دچیت هزر كرن رەشەیەكە ، ئینا كرنە هەوار،
- 50
- چنكو هەمیان ئەو دیت و ترسیان. لێ د گاڤێ دا دگەل وان ئاخفت و گۆت: «پشتراست بن، ئەز ئەوم، نەترسن.»
- 51
- و دگەل وان ل قاییكێ سیار بوو و با راوەستیا، ئەڤجا گەلەك گوهشین و حێبەتی بوون،
- 52
- چنكو ئەو د حنێرا نانی نە گەهشتبوون، ژ بەر كو د مەژی هشك بوون.
- عیسا گەلەك نەساخان ساخ دكەت
- 53
- دەمێ دەرباز بووین، ل جەنیسارتێ هاتنە هشكاتیێ و قاییك گرێدا.
- 54
- و دەمێ ژ قاییكێ هاتینە خوار، خەلكی ئێكسەر عیسا ناسكر.
- 55
- ئەڤجا رابوون و ب لەز ل وان دەوروبەران گەڕیان و نەساخ ل سەر نڤینان هەلگرتن و دئینانە هەر جهەكی گوهـ لێ ببا كو یێ ل وێرێ،
- 56
- و هەر چ گوند یان باژێر و دەڤەرا چووبایێ، دا نەساخان داننە گورەپانان و هیڤی ژێ دكرن، كو بتنێ دەستێ خۆ بكەنە لێڤا كراسێ وی و هەر كەسێ دەستێ خۆ گەهاندبایێ ساخ دبوو.
- a. ئێك دینار ل وی دەمی كریا پالەیەكی بوو كو بۆ ماوێ ئێك رۆژ كاركربیت.
