عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- مەسیح پەیڤا خودێ:
- 1
- ل دەستپێكێ پەیڤ بوو، و پەیڤ دگەل خودێ بوو، و پەیڤ ب خۆ خودێ بوو.
- 2
- ئەو ل دەستپێكێ دگەل خودێ بوو.
- 3
- ب وی هەمی تشتێن چێبووین، و بێی وی چ تشت نەچێبوویە ژ ئەڤێن چێبووین.
- 4
- ژیان د وی دا بوو، و ئەڤ ژیانە بۆ مرۆڤان روناهی بوو.
- 5
- و روناهی د تاریێ دا گەش دكەت، و تاری ل سەر روناهیێ نەكەفت.
- 6
- مرۆڤەك هەبوو ژ لایێ خودێ ڤە هاتبوو هنارتن، ناڤێ وی یوحەننا بوو.
- 7
- ئەڤە بۆ شاهدەیێ هاتبوو، دا شاهدەیێ بۆ روناهیێ بدەت، دا هەمی ب رێیا وی باوەریێ بینن.
- 8
- ئەو نە روناهی بوو، بەلكو شاهدێ روناهیێ بوو.
- 9
- روناهی یا راست یا هەمی مرۆڤان روهن دكەت دهاتە جیهانێ.
- 10
- ئەو ل جیهانێ بوو و ب وی جیهان یا هاتبوو چێكرن و جیهانێ ئەو نەنیاسی.
- 11
- ئەو بۆ یێن خۆ هاتبوو، لێ ئەو پێ رازی نەبوون،
- 12
- لێ ئەڤێن پێ رازی بووین، ئانكو باوەری ب ناڤێ وی ئیناین، دەستهەلاتی دا وان كو ببنە زارۆكێن خودێ
- 13
- ئەوێن نە ژ خوینێ و نە ژ حەزا لەشی و نە ژ حەزا زەلامەكی بووین، لێ ئەوێن ژ خودێ بووین.
- 14
- و پەیڤ بوو لەش، و د ناڤ مە دا دانا، و مە مەزناهیا وی دیت، مەزناهیا كوڕێ ئێكانە ژ بابی، و ئەو یێ پڕە ژ داناهیێ و راستیێ.
- 15
- یوحەننای بۆ وی شاهدەی دا و كرە گازی و گۆت: «ئەڤەیە ئەڤێ من دەربارەی وی گۆتی: ئەوێ پشتی من دهێت ژ من رێزدارترە، چنكو ئەو هەبوو بەری ئەز پەیدا ببم.»
- 16
- و ژ پڕ بوونا وی مە هەمیان داناهی ل سەر داناهیێ وەرگرت،
- 17
- چنكو دەستور ب رێكا موسای هاتبوو دان، لێ داناهی و راستی ب عیسایێ مەسیح هاتن.
- 18
- كەسێ چ جاران خودێ نەدیتییە، بەلكو كوڕێ ئێكانە ئەوێ ل بەر سنگێ بابی دا، ئەوی یێ دایە نیاسین.
- شاهدەیا یوحەننایێ تافیركەر:
- 19
- و ئەڤە شاهدەیا یوحەننایە دەمێ جوهیان هندەك كاهن و لاوی ژ ئورشەلیمێ هنارتین، داكو پرسیارێ ژێ بكەن: «تۆ كی؟»
- 20
- ئینا دان پێ دا و نەوەیی نەكر و دوبارە كر و گۆت: «ئەز نە مەسیحم.»
- 21
- ژێ پرسین: «پا چ؟ تۆ ئیلیای؟» گۆتی: «ئەز نە ئەوم!» «یان تۆ پێغەمبەری؟» بەرسڤ دا: «نەخێر.»
- 22
- ئینا گۆتنێ: «تۆ كی، دا بەرسڤێ بدەینە وان ئەوێن ئەم هنارتین؟ تۆ چ دەربارەی خۆ دبێژی؟»
- 23
- گۆتی: «ئەز دەنگەكم ل بیابانێ گازی دكەت: ”رێكێ راست بكەن بەرامبەر خودانی،“ [a] هەروەكو ئەشعیا پێغەمبەر گۆتی.»
- 24
- و ئەڤە دهنارتی بوون ژ لایێ فەریسیان ڤە،
- 25
- و پرسیار ژێ كرن وگۆتنێ: «ئەگەر تۆ نە مەسیح بی و نە ئیلیا بی و نە پێغەمبەر بی، پا تۆ بۆچی تافیركرنێ دكەی؟»
- 26
- یوحەننای بەرسڤ دا: «ئەز ب ئاڤێ تافیركرنێ دكەم، لێ ئێك یێ د ناڤ هەوە دا هوین نانیاسن،
- 27
- و ئەو یێ ل پشت من دهێت، و ئەز نە یێ هەژیمە بەنكێن پێلاڤا وی ڤەكەم.»
- 28
- ئەڤێ ل بەیت عەنیا روی دا، ل پشت رویبارێ ئوردن، ل جهێ یوحەننای تافیركرن دكر.
- 29
- و ل رۆژا دویڤ دا یوحەننای دیت عیسا یێ بەرەڤ وی ڤە دهێت، و گۆت: «ئەڤەیە بەرخێ خودێ ئەوێ گونەها جیهانێ رادكەت.
- 30
- ئەڤەیە ئەوێ من دەربارەی وی گۆتی: ئەو زەلامێ ل پشت من دهێت یێ د سەر من رایە چنكو بەری ئەز پەیدا ببم ئەو هەبوو.
- 31
- و من ئەو نەدنیاسی، لێ ئەز هاتم ب ئاڤێ تافیركرنێ بكەم، داكو بۆ ئیسرائیلێ بهێتە راگەهاندن.»
- 32
- و یوحەننای شاهدەی دا و گۆت: «من گیان دیت وەكو كوترەكێ ژ ئەسمانی دهاتە خوار و دادا سەر وی،
- 33
- و من ئەو نەدنیاسی، لێ ئەڤێ ئەز هنارتیم ب ئاڤێ تافیركرنێ بكەم گۆتە من: ”ئەوێ تۆ دبینی گیان دهێتە خوارێ و ل سەر داددەت و لێ ڤەدحەویێت، ئەها ئەوە دێ ب گیانێ پیرۆز تافیركرنێ كەت.“
- 34
- و من دیت و شاهدەی دا كو ئەڤەیە كوڕێ خودێ.»
- شاگردێن پیشەنگ
- 35
- و ل رۆژا دویڤ دا یوحەننا ژی یێ راوەستای بوو و دوو شاگردێن وی دگەل بوون،
- 36
- سەح كرە عیسای دەمێ ب رێڤە دچوو و گۆت: «ئەڤەیە بەرخێ خودێ.»
- 37
- دەمێ هەردوو شاگردان گوهـ ل ئاخفتنا وی بووی ل دویڤ عیسای چوون.
- 38
- عیسا ل خۆ زڤری، دیت كو ئەو یێن ل دویڤ وی دچن، ژ وان پرسی: «هەوە چ دڤێت؟» گۆتن: «رابی،» ئانكو مامۆستا، «تۆ ل كیرێ یێ ئاكنجی؟»
- 39
- ئینا گۆتە وان: «وەرن و بنێرن.» و دگەل چوون و جهێ وی دیت و وێ رۆژێ دگەل مان، و دەم نێزیكی دەمژمێر دەهـ بوو.
- 40
- و ئەندراوس برایێ شەمعون پەتروسی ئێك ژ وان هەردووكان بوو ئەوێن گوهـ ل یوحەننای بووی و ل دویڤ عیسای چووین.
- 41
- دەمێ برایێ خۆ شەمعون دیتی، گۆتێ: «مە مەسییا دیت» ئەوێ رامانا وی مەسیح،
- 42
- و برە نك عیسای. و عیسا باش ل شەمعونی نێری و گۆت: «تۆ شەمعونێ كوڕێ یوحەننایی، بەلێ ئەز دێ تە ب كیفاس ناڤ كەم ئانكو پەتروس.»
- 43
- و ل رۆژا دویڤ دا عیسای ل بەر بوو بچیتە جەلیل، فیلیپوس دیت و گۆتێ: «ل دویڤ من وەرە.»
- 44
- و فیلیپوس ژ بەیت سایدا بوو باژێرێ ئەندراوسی و پەتروسی.
- 45
- پاشی فیلیپوسی نەتانائێل دیت، و گۆتێ: «مە ئەو دیت ئەوێ موسای د دەستوری دا و پێغەمبەران دەربارەی وی نڤیسی، ئەو ژی عیسایێ كوڕێ یوسڤییە، خەلكێ ناسیرەیە.»
- 46
- نەتانائێلی گۆت: «ما تشتەكێ باش ژ ناسیرە دەردكەڤیت؟» فیلیپوسی بەرسڤا وی دا: «وەرە و بنێرە.»
- 47
- عیسای نەتانائێل دیت یێ بەرەڤ وی ڤە دهێت، ئینا دەربارەی وی گۆت: «ئەڤە ئیسرائیلیەكێ راستە، چ گومان تێدا نینە!»
- 48
- نەتانائێلی گۆتێ: «تۆ ژ كیڤە من دنیاسی؟» عیسای بەرسڤا وی دا: «من تۆ ل بن دارهژیرێ دیتی بەری فیلیپوس گازی تە بكەت.»
- 49
- نەتانائێلی بەرسڤا وی دا: «مامۆستا، تۆ كوڕێ خودێی، تۆ پاشایێ ئیسرائیلێی!»
- 50
- عیسای بەرسڤا وی دا و گۆتێ: «چنكو من گۆتە تە من تۆ ل بن هژیرێ دیتی تە باوەری ئینا؟ تۆ دێ ژ ڤێ مەزنتر بینی.»
- 51
- و پاشی گۆتێ: «ب راستی ب راستی دبێژمە هەوە هوین دێ ئەسمانی بینن یێ ڤەكرییە و فریشتێن خودێ یێ بلند دبن و دهێنە خوار ل سەر كوڕێ مرۆڤ!»
- a. 1:23 ئەشعیا 40:3
