عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
عیسا و برایێن خۆ 
1
پشتی هنگی عیسا ل دەڤەرا جەلیل دگەڕیا و نەدڤیا ل دەڤەرا یەهودیایێ بگەڕیێت، چنكو سەرۆكێن جوهیان بزاڤ دكر وی بكوژن.
2
دەمێ جەژنا كەپرەشینان[a] یا جوهیان نێزیك بووی،
3
برایێن وی گۆتێ: «ڤێرێ بهێلە و هەڕە یەهودیایێ، دا ئەو كارێن تۆ دكەی شاگردێن تە ژی ببینن!
4
چنكو ئەو كەسێ دڤێت ناڤدار ببیت، كارەكی ب نەپەنی ڤە ناكەت. مادەم تۆ ڤان كریاران دكەی، خۆ بۆ جیهانێ دیار بكە.»
5
چنكو برایێن وی ژی باوەری پێ نەدئینا.
6
عیسای بەرسڤا وان دا: «هێشتا دەمێ من نەهاتیە، لێ بۆ هەوە هەمی گاڤان دەم یێ گونجایە.
7
جیهان نەشێت كەربێن خۆ ژ هەوە ڤەكەت، لێ ئەو كەربێن خۆ ژ من ڤەدكەت، چنكو ئەز شاهدەییێ ل سەر وێ ددەم كو كارێن وێ د خرابن.
8
هوین ب خۆ هەڕنە جەژنێ، لێ ئەز ب خۆ نوكە ناهێمە ڤێ جەژنێ، چنكو دەمێ من هێشتا نەهاتیە.»
9
ئەڤە گۆتە وان و ل جەلیل ما.
عیسا د جەژنا كەپرەشینان دا 
10
پشتی برایێن وی چووینە جەژنێ، ئەو ژی چوو جەژنێ، لێ نە ب ئاشكرایی، ب نەپەنی.
11
ل جەژنێ جوهی[b] ل وی دگەڕیان و دگۆتن: «كانێیە ئەو؟»
12
د ناڤبەرا جەماوەری دا گەلەك پستەپست دەربارەی وی هەبوو، هندەكان دگۆت: «ئەو یێ باشە» و هندەكێن دی دگۆت: «نە! ئەو مللەتی د سەردا دبەت.»
13
لێ كەس ژ وان ژ ترسا جوهیان نەدوێریا ب ئاشكرایی بەحسێ وی بكەت.
14
دەمێ جەژن ب نیڤی بووی، عیسا سەركەفتە پەرستگەهێ و دەست ب فێركرنێ كر.
15
جوهی مەندەهۆش بوون و گۆتن: «ئەو چەوا هند ژ نڤیسارێن پیرۆز دزانیت و ئەو نەهاتیە فێركرن؟»
16
عیسای بەرسڤا وان دا و گۆت: «فێركرنا من نە ژ نك منە، لێ ژ نك ویە یێ ئەز هنارتیم.
17
هەر كەسێ دڤێت ب حەزا خودێ بكەت، دێ زانیت كا فێركرنا من ژ نك خودێ یە، یان ئەز ژ نك خۆ دئاخڤم.
18
ئەوێ ژ نك خۆ بئاخڤیت، بۆ خۆ ل مەزناهیێ دگەڕیێت، لێ ئەوێ بۆ وی ل مەزناهیێ بگەڕیێت یێ ئەو هنارتی، ئەو یێ راستە و چ خرابی ل نك وی نینە.
19
ما مووسای دەستوور نەدابوو هەوە؟ لێ كەس ژ هەوە دەستووری ب جهـ نائینیت! بۆچی هوین بزاڤێ دكەن من بكوژن؟»
20
جەماوەری بەرسڤا وی دا: «ئەجنەیەكی تۆ یێ هنگافتی! كی بزاڤا كوشتنا تە دكەت؟»
21
عیسای بەرسڤا وان دا و گۆت: «من كارەكێ ب تنێ كر، هوین هەمی مەندەهۆش بوون.
22
مووسای سونەتكرن دا هەوە (نەكو ئەو ژ نك مووسای بوو، لێ ژ نك بابكالان بوو)، ئەڤجا ل رۆژا شەمبیێ[c] ژی هوین مرۆڤی سونەت دكەن.
23
مادەم ل رۆژا شەمبیێ مرۆڤ دهێتە سونەتكرن دا دەستوورێ مووسای نەهێتە شكاندن، پا بۆچی هوین ژ من تۆڕە دبن چنكو من مرۆڤەك ب تەمامی ل رۆژا شەمبیێ ساخ كر؟
24
ل دویڤ دیتنا سەرڤە سەرڤە دادكرنێ نەكەن، لێ دادكرنەكا دادپەروەرانە بكەن.»
گۆمانا خەلكی ل سەر عیسای كو مەسیحە 
25
وی دەمی هندەك ژ خەلكێ ئورشەلیمێ دگۆت: «ئەرێ ما ئەڤە نە ئەوە یێ ئەو بزاڤا كوشتنا وی دكەن؟
26
ئەڤە ب ئاشكرایی ئەو یێ دئاخڤیت و ئەو چ نابێژنێ! ما سەرۆكێن مە قاییل بووینە كو ئەو ب راستی مەسیحە؟
27
لێ ئەم دزانین ئەڤ كەسە خەلكێ كیرێیە[d] ، و دەمێ مەسیح دهێت، كەس نزانیت خەلكێ كیرێیە.»
28
ئینا عیسای، دەمێ فێركرن د حەوشا پەرستگەهێ دا دكر، دەنگێ خۆ بلند كر و گۆت: «هوین من دنیاسن و هوین دزانن ئەز خەلكێ كیرێمە. ئەز ژ نك خۆ نەهاتیمە، لێ ئەوێ ئەز هنارتیم یێ راستە، ئەوێ كو هوین وی نانیاسن،
29
لێ ئەز وی دنیاسم، چنكو ئەز ژ ویمە و ئەوی ئەز یێ هنارتیم.»
30
وی دەمی وان بزاڤ كر كو وی دەستەسەر بكەن، لێ كەسەكی دەستێ خۆ درێژ نەكرێ، چنكو هێشتا دەمێ وی نەهاتبوو.
31
لێ گەلەك ژ جەماوەری باوەری پێ ئینا و گۆتن: «ما دەمێ مەسیح بهێت، ئەو دێ پتر نیشانان كەت ژ یێن ڤی زەڵامی كرین؟»
32
فەریسیان پستەپستا جەماوەری بهیست، ئەوا ل سەر وی دهاتە كرن. ئەڤجا وان و سەرۆكێن كاهنان هندەك زێرەڤان هنارتن دا وی بگرن.
33
ئینا عیسای گۆت: «ئەز دێ دەمەكێ كێم ل گەل هەوە مینم، پاشی دێ چمە نك وی یێ ئەز هنارتیم.
34
هنگی هوین دێ ل من گەڕیێن، لێ هوین من نابینن و ئەو جهێ ئەز لێ، هوین نەشێن بهێنە وێرێ.»
35
ئەڤجا جوهیان د ناڤبەرا خۆ دا گۆت: «وی ل بەرە كیڤە بچیت كو ئەم نەبینین؟ ئەرێ دێ چیتە باژێڕێن یونانیان، ئەوێن جوهی لێ بەڵاڤ بووین و یونانیان فێر كەت؟
36
رامانا ئاخفتنا وی چیە دەمێ گۆتی: ‹هوین دێ ل من گەڕیێن، لێ هوین من نابینن› و ‹ئەو جهێ ئەز لێ، هوین نەشێن بهێنە وێرێ›؟»
رویبارێن ئاڤا ژیانێ 
37
ل رۆژا دویماهیێ ژ جەژنێ، كو ئەو مەزنترین رۆژێن وێیە، عیسا راوەستیا و ب دەنگەكێ بلند گۆت: «ئەگەر ئێك یێ تێهنی بیت، بلا بهێتە نك من و ڤەخۆت.
38
هەر كەسێ باوەریێ ب من بینیت ‹دێ رویبارێن ئاڤا ژیانێ ژ ناڤ دلێ وی دەركەڤن،›[e] هەروەكو نڤیسار دبێژیت.»
39
عیسای ئەڤ چەندە دەربارەی گیانێ پیرۆز گۆت، كو دێ ئەو كەس وەرگرن، یێن باوەری ب عیسای ئیناین. هێشتا گیانێ پیرۆز نەهاتبوو دان، چنكو هێشتا عیسا نەهاتبوو مەزنكرن.
دووبەرەكی د ناڤ جەماوەری دا 
40
دەمێ جەماوەری گوهـ ل ڤێ ئاخفتنێ بووی، هندەك ژ وان گۆت: «ب راستی ئەڤە ئەو پێغەمبەرە.»
41
هندەكێن دی گۆت: «ئەڤە مەسیحە.» هندەكان ژی پرسیار كر: «ما مەسیح دێ خەلكێ جەلیلێ بیت؟
42
ئەرێ ما نڤیسارێ نەگۆتیە كو مەسیح دێ ژ دویندەها داوودی و ژ بێت‌لەحم بیت[f] ، ئەو گوندێ داوود لێ ژیای؟»
43
ئەڤجا ژ بەر وی، دووبەرەكی د ناڤ جەماوەری دا چێبوو.
44
هندەك ژ وان ڤیا وی بگرن، لێ كەسەكی دەستێ خۆ درێژ نەكرێ.
باوەری نەئینانا سەرۆكێن جوهیان 
45
پشتی هنگی زێرەڤانێن پەرستگەهێ زڤڕینە نك سەرۆكێن كاهنان و فەریسیان. وان پرسیار ژ زێرەڤانان كر: «بۆچی هەوە ئەو نەئینا؟»
46
زێرەڤانان بەرسڤ دا: «چ جاران كەس وەكو ڤی مرۆڤی نەئاخفتیە.»
47
فەریسیان بەرسڤا وان دا: «ما هوین ژی د سەردا چووینە؟
48
ما كەسەكی ژ سەرۆكان یان ژ فەریسیان باوەری پێ ئینایە؟
49
لێ ئەڤ خەلكێ كو دەستووری نزانن، د نفرین لێ كرینە.»
50
نیكودیمۆسی، ئەوێ بەری هنگی هاتبوو نك عیسای و ئەو ئێكە ژ فەریسیان، گۆتە وان:
51
«ئەرێ دەستوورێ مە ئێكی داد دكەت تاكو ل بەراهیێ گوهـ نەدەتێ و بزانیت وی چ كریە؟»
52
وان بەرسڤا وی دا و گۆتن: «ئەرێ تۆ ژی خەلكێ جەلیلێی؟ لێڤەكۆلە، دێ بینی كو چ پێغەمبەر ژ جەلیلێ رانابن!»
53
پاشی هەر كەسەك ژ وان چوو مالا خۆ.
  1. a. 7‏:2 q جەژنا كەپرەشینان: ل فەرهەنگۆكێ بنێڕە.
  2. b. 7‏:11 مەبەست پێ رێبەرێن جوهیانن.
  3. c. 7‏:22 ل گۆر دەستوورێ مووسای زاڕۆك ل رۆژا هەشتێ دهێتە سونەتكرن، ئەڤجا خۆ ئەگەر ئەو رۆژ شەمبی ژی بیت، رەوایە.
  4. d. 7‏:27 ب یونانی ‹ژ كیرێ هاتیە› هۆسا ژی دهێتە وەرگێڕان: ‹بنیاتێ وی كیە›.
  5. e. 7‏:38 ئیشایا 55‏:1؛ 58‏:11؛ حزقیێل 47‏:1‏-12؛ زەكەریا 14‏:8.
  6. f. 7‏:42 میخا 5‏:2