عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- عیسا و زەككایێ باجگر
- 1
- پاشی چوو ئەریحا و د ناڤ را دەرباز بوو
- 2
- زەلامەك ل وێرێ بوو دگۆتنێ، زەككا، سەرۆكێ باجگران بوو و یێ دەولەمەند بوو،
- 3
- و بزاڤ دكر عیسای ببینیت كا ئەو كییە، لێ ژ بەر بوشاتیێ نەدشیا، چنكو یێ بەژن كورت بوو،
- 4
- ئینا كرە غار و چوو سەر دارهژیرێ، داكو عیسای ببینیت، چنكو ل بەر بوو د وێرێ را بوریت.
- 5
- دەمێ عیسا گەهشتییە وی جهی، بەرێ خۆ دا سڵال و زەككا دیت و گۆتێ: «زەككا، لەزێ بكە وەرە خوارێ، چنكو دڤێت ئەز ئەڤرۆ ل مالا تە مێڤان بم.»
- 6
- ئینا لەز كر و هاتە خوارێ و ب دلخۆشی پێشوازیا وی كر.
- 7
- دەمێ هەمیان ئەڤ چەندە دیتی، گەلەك نەرازی بوون و گۆتن: «چوو ژۆر داكو ل نك مرۆڤەكێ گونەهكار مێڤان بیت.»
- 8
- لێ زەككا راوەستیا و گۆتە خودانی: «خودان، ئەها ئەڤە ئەز دێ نیڤا سامانێ خۆ دەمە هەژاران، و ئەگەر من تشتەك ب زۆری ژ ئێكی ستاندبیت، ئەز دێ چوار جاركی دەمێ.»
- 9
- ئینا عیسای گۆت: «ئەڤرۆ ئەڤ مالە قورتال بوو، چنكو ئەو ژی كوڕێ ئیبراهیمییە.
- 10
- كوڕێ مرۆڤ یێ هاتی داكو ل مرۆڤێن بەرزە بگەڕیت و قورتال بكەت.»
- نموونەیا مینایان
- 11
- دەمێ ئەوان گوهێ خۆ ددا ڤێ ئاخفتنێ، نموونەیەك بۆ وان ئینا. چنكو ئەو نێزیكی ئورشەلیمێ ببوو، و وان هزردكر كو پاشاتیا خودێ ها نێزیكە دێ دیار بیت.
- 12
- ئینا گۆت: «مرۆڤەك ژ مالەكا خانەدان چوو وەلاتەكێ دویر، داكو پاشاتیەكێ بۆ خۆ وەرگریت و ڤەگەڕیتەڤە.
- 13
- ئینا گازی هەر دەهـ كۆلەیێن خۆ كر و دەهـ «مینا»[a] دانە وان و گۆت: ”بازرگانیێ پێ بكەن تاكو ئەز ڤەگەریێمەڤە.“
- 14
- لێ هەڤوەلاتیێن وی حەژ وی نەدكر، ئینا هندەك ل دویڤ دا هنارتن، داكو بێژنێ: ”مە ئەڤە نەڤێت پاشاتیێ ل مە بكەت.“
- 15
- دەمێ پاشاتی وەرگرتی و ڤەگەڕیای، فەرمان دا كو گازی هەر دەهـ كۆلەیان بكەن، ئەوێن دەهـ مینا داینە وان، داكو بزانیت كا هەر ئێكێ ژ وانا چ قازانج ژ بازرگانیا خۆ كرییە.
- 16
- یێ ئێكێ هات و گۆت: ”هێژا، مینا یا تە دەهـ مینا قازانج كرن.“
- 17
- ئینا گۆتێ: ”دەست خوش، كۆلەیێ قەنج، ئەڤجا چنكو تۆ ل سەر پیچەكێ یێ دەستپاك بووی، هەرە دەستهەلاتیا دەهـ باژێران بكە.“
- 18
- پاشی یێ دووێ هات و گۆت: ”هێژا، مینا یا تە پێنج مینا قازانج كرن.“
- 19
- ئینا ئەڤ چەندە گۆتە وی ژی: ”تۆ دەستهەلاتیا پێنج باژێران وەربگرە.“
- 20
- پاشی كۆلەیێ دی هات و گۆت: ”هێژا، ئەڤە مینا یا تەیە، من یا د ناڤ دەستمالەكێ دا پێچای.
- 21
- ئەز ژ تە دترسیام، چنكو تۆ مرۆڤەكێ دلرەقی. تۆ وی تشتی دبەی ئەوێ تە نەدانای، و تۆ وی تشتێ ددوری، ئەوێ تە نەچاندی.“
- 22
- ئینا گۆتە وی: ”ژ دەڤێ تە ئەز دێ تە دادكەم، هەی كۆلەیێ خراب: تە دزانی ئەز مرۆڤەكێ دلرەقم، ئەز وی تشتی دبەم یێ من نە دانای، و وی تشتی ددوریم یێ من نە چاندی.
- 23
- پا تە بۆچی پارێن من نەدانانە سەر مێزا پارەگۆهوران، دا دەمێ ئەز دهاتم دا قازانجێ ژێ وەرگرم؟“
- 24
- و پاشی گۆتە ئەوێن ل وێرێ راوەستیای: ”مینایێ ژێ بستینن و بدەنە خودانێ دەهـ مینایان.“
- 25
- ئینا گۆتنێ: ”هێژا، ئەوی دەهـ مینا یێن هەی.“
- 26
- ئینا گۆت: ”ئەز دبێژمە هەوە ئەوێ هەیی دێ هێشتا بۆ هێتە دان، و ئەوێ چ نەبیت خۆ یێ هەیی ژی دێ ژێ هێتە ستاندن،
- 27
- لێ دوژمنێن من ئەوێن نەدڤیان ئەز پاشاتیێ ل وان بكەم، ل ڤێرێ بۆ من ئامادە بكەن و ل بەر چاڤێن من سەرژێ بكەن.“»
- عیسا ب سەرفەرازی دچیتە ئورشەلیمێ ڤە
- 28
- پشتی ئەڤ چەندە گۆتی، بەرەڤ ئورشەلیمێ چوو.
- 29
- دەمێ نێزیكی بەیت فاجی و بەیت عەنیا ل نك چیایێ دگۆتنێ چیایێ زەیتونان بووی، دوو شاگردێن خۆ هنارتن،
- 30
- و گۆتە وان: «هەڕنە ڤی گوندێ بەرامبەری هەوە. دەمێ هوین دچنە گوندی هوین دێ جانەكەرەكێ گرێدای بینن، كو كەس چ جاران لێ سیار نەبووی. ئەوی ڤەكەن و بینن.
- 31
- و ئەگەر ئێكی پرسیار ژ هەوە كر: ”بۆچی هوین هەفسارێ وی ڤەدكەن؟“ هوین بێژنێ: ”چنكو خودانی پێدڤی یا پێ هەی.“»
- 32
- هەردوو شاگردێن هنارتی ب رێكا خۆ چوون و وەكو خودانی گۆتییە وان دیتن.
- 33
- دەمێ ئەوان جانەكەر ڤەدكر، خودانێن وی پرسیار ژ وان كرن: «بۆچی هوین وی ڤەدكەن؟»
- 34
- ئینا وان گۆت: «خودانی پێدڤی یا پێ هەی.»
- 35
- پاشی برنە ل نك عیسای و كراسێن خۆ دانانە سەر جانەكەری و عیسا لێ سیار كر.
- 36
- و دەمێ كو ئەو ب رێ دچوو، خەلكی كراسێن خۆ ل سەر رێكێ رائێخستن
- 37
- و دەمێ نێزیكی ئورشەلیمێ بووی ل سەر نشیڤیا چیایێ زەیتونان، شاگردان هەمیان ب دلخۆشی گازی دكرن و ب دەنگەكێ بلند پەسنا خودێ كرن ژ بەر هەمی ئەو حنێرێن وان دیتین.
- 38
- دگۆتن: «پیرۆزە ئەو پاشایێ ب ناڤێ خودانی دهێت. ئاشتی ل ئەسمانی و مەزناهی ل بلنداهیان.»
- 39
- لێ هندەك ژ فەریسیان ژ كومێ گۆت: «مامۆستا، ل شاگردێن خۆ بحەیتینە.»
- 40
- ئینا ئەوی بەرسڤا وان دا و گۆت:« ئەز دبێژمە هەوە، ئەگەر ئەڤێن هەنێ بێدەنگ ببن، بەر دێ گازی كەن.»
- عیسا بۆ ئورشەلیمێ دگریت
- 41
- دەمێ نێزیك بووی و باژێر دیتی، بۆ باژێری كرە گری
- 42
- و گۆت: «خوزی تە ژی د ڤێ رۆژێ دا زانیبا كا چ تشت بەرەڤ ئاشتیا تەنە! لێ ئێدی ئەو ژ بەر چاڤێن تە ڤەشارتینە.
- 43
- رۆژ دێ ب سەر تە دا هێن، دوژمنێن تە دێ ل هەمبەری تە چەپەران چێكەن، و دێ تە دورپیچ كەن، و ب هەمی رەخان ڤە، دێ تە ئاسێ كەن.
- 44
- دێ تە ب سەر زارۆكێن تە دا تەخت كەن و بەری ل سەر بەری ناهێلن، چنكو تە دەمێ سەرەدانا خۆ نەزانی.»
- عیسا پەرستگەهێ پاقژ دكەت
- 45
- عیسا چوو د پەرستگەهێ ڤە، و دەست ب دەرئێخستنا فرۆشكەران كر
- 46
- و گۆتە وان «یا نڤیسییە: مالا من مالا نڤێژێیە، لێ هەوە یا كرییە كونجا رێگران.»
- 47
- و ئەوی هەر رۆژ ل پەرستگەهێ فێركرن دكر، و سەرۆكێن كاهنان و مامۆستایێن دەستوری و ریهسپیێن مللەتی، بزاڤ دكرن وی بكوژن.
- 48
- لێ وان رێكا خۆ نە ددیت، چنكو هەمی خەلك گرێدایی گۆتنێن وی بوون.
- a. مینا ناڤێ پارچەکا دراڤییە ژ زیڤی دهاتە دروستكرن، ل سەردەمێ ئمپراتۆریەتا رۆمانی دهاتە بكارئینان .
