عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- عیسا و زەككایێ باجگر
- 1
- پاشی چوو ئەریحا و د ناڤ را دەرباز دبوو.
- 2
- زەڵامەك ل وێرێ بوو دگۆتنێ زەككا، سەرۆكێ باجگران بوو و یێ دەولەمەند بوو.
- 3
- وی بزاڤ دكر عیسای ببینیت، كا ئەو كیە، لێ ژ بەر بۆشاتیێ نەدشیا، چنكو یێ بەژن كورت بوو،
- 4
- ئینا كرە غار و چوو سەر دارهژیرەكێ، داكو عیسای ببینیت، چنكو ل بەر بوو د وێرێ را دەرباز ببیت.
- 5
- دەمێ عیسا گەهشتیە وی جهی، بەرێ خۆ دا سڵال و زەككا دیت و گۆتێ: «زەككا، لەزێ بكە وەرە خوارێ، چنكو دڤێت ئەڤرۆ ئەز ل مالا تە بمینم.»
- 6
- ئینا ب لەز هاتە خوارێ و ب دلخۆشی پێشوازیا وی كر.
- 7
- هەمیێن ئەڤ چەندە دیتی، نەرازی بوون و گۆتن: «ئەو ل نك مرۆڤەكێ گونەهكار بوو مێڤان.»
- 8
- لێ زەككا راوەستیا و گۆتە خودانی: «خودان، ئەڤە ئەز یێ نیڤا سامانێ خۆ ددەمە هەژاران و ئەگەر من تشتەك ب زۆری ژ ئێكی ستاندبیت، ئەز یێ چوار جاركی ددەمێ.»
- 9
- ئینا عیسای گۆتێ: «ئەڤرۆ قورتالبوون بۆ ڤێ مالێ هات، چنكو ئەو ژی كوڕێ ئیبراهیمیە.
- 10
- كوڕێ مرۆڤ یێ هاتی، دا ل مرۆڤێن بەرزە بگەڕیێت و قورتال بكەت.»
- نموونەیا دەه زێڕان
- 11
- دەمێ ئەوان گوهێ خۆ ددا ڤێ ئاخفتنێ، عیسا بەردەوام بوو و نموونەیەك بۆ وان ئینا. چنكو ئەو نێزیكی ئورشەلیمێ ببوو و وان هزردكر كو پاشایەتیا خودێ نوكە دێ دیار بیت.
- 12
- ئینا گۆت: «مرۆڤەك ژ مالەكا مەزن چوو وەڵاتەكێ دویر، داكو پاشایەتیەكێ بۆ خۆ وەرگریت و ڤەگەڕیتەڤە.
- 13
- ئینا گازی هەر دەهـ بەنیێن خۆ كر و دەهـ زێڕ[a] دانە وان و گۆت: ‹بازرگانیێ پێ بكەن تاكو ئەز ڤەدگەڕیێمەڤە.›
- 14
- لێ هەڤوەڵاتیێن وی حەز ژ وی نەدكر، ئینا هندەك د دویڤ دا هنارتن، داكو بێژنێ: ‹مە نەڤێت ئەو پاشایەتیێ ل مە بكەت.›
- 15
- دەمێ پاشایەتی وەرگرتی و ڤەگەڕیای، فەرمان دا كو گازی هەر دەهـ بەنیان بكەن، ئەوێن دەهـ زێڕ داینە وان، داكو بزانیت كا هەر ئێكێ ژ وان چ قازانج ژ بازرگانیا خۆ كریە.
- 16
- یێ ئێكێ هات و گۆت: ‹ئەزبەنی، زێڕێ تە دەهـ زێڕ قازانج كرن.›
- 17
- ئینا گۆتێ: ‹دەستخۆش، بەنیێ قەنج! ئەڤجا چنكو تۆ ل سەر پیچەكێ یێ دلسۆز بووی، هەڕە سەروەریێ ل دەهـ باژێڕان بكە.›
- 18
- پاشی یێ دوویێ هات و گۆت: ‹ئەزبەنی، زێڕێ تە پێنج زێڕ قازانج كرن.›
- 19
- ئینا گۆتە وی ژی: ‹تۆ سەروەریێ ل پێنج باژێڕان بكە.›
- 20
- پاشی بەنیێ دی هات و گۆت: ‹ئەزبەنی، ئەڤە زێڕێ تەیە، من یێ د ناڤ دەستمالەكێ دا پێچای.
- 21
- ئەز ژ تە دترسیام، چنكو تۆ مرۆڤەكێ دلڕەقی، تۆ وی دبەی یێ تە نەدانای و تۆ وی ددروی یێ تە نەچاندی.›
- 22
- ئینا گۆتە وی: ‹ژ دەڤێ تە ئەز دێ تە گونەهبار كەم، هەی بەنیێ خراب: مادەم تە دزانی ئەز مرۆڤەكێ دلڕەقم، ئەز وی دبەم یێ من نەدانای و وی ددرویم یێ من نەچاندی،
- 23
- پا بۆچی تە پارەیێ من نەددانا نك پارەگوهۆڕان، دا هەر دەمێ ئەز هاتبام، من ئەو ل گەل ریبایێ وەرگرتبا؟›
- 24
- پاشی گۆتە ئەوێن ل وێرێ راوەستیای: ‹زێڕی ژێ بستینن و بدەنە خودانێ دەهـ زێڕان.›
- 25
- ئینا گۆتنێ: ‹ئەزبەنی، ئەوی دەهـ زێڕێن هەین.›
- 26
- ئینا گۆت: ‹ئەز دبێژمە هەوە: هەر كەسێ هەیی دێ پتر بۆ وی هێتە دان، لێ ئەوێ نەیی، خۆ یێ هەی ژی دێ ژێ هێتە ستاندن.
- 27
- لێ دوژمنێن من ئەوێن نەدڤیان ئەز پاشایەتیێ ل وان بكەم، ل ڤێرێ بۆ من ئامادە بكەن و ل بەر چاڤێن من ڤەكوژن.›»
- عیسا ب رێزگرتن دچیتە د ئورشەلیمێ ڤە
- 28
- پشتی ئەڤ چەندە گۆتی، بەرەڤ ئورشەلیمێ چوو.
- 29
- دەمێ نێزیكی گوندێن بێت‌فاجی و بێت‌عەنیا بووی ل نك چیایێ دگۆتنێ چیایێ زەیتوونان، دوو شاگردێن خۆ هنارتن
- 30
- و گۆتە وان: «هەڕنە ڤی گوندێ بەرامبەری هەوە، دەمێ هوین دچنە ناڤ گوندی، دێ جانەكەرەكێ گرێدای بینن كو چ جاران كەس لێ سیار نەبوویە. وی ڤەكەن و بینن.
- 31
- ئەگەر ئێكی پرسیار ژ هەوە كر: ‹بۆچی هوین وی ڤەدكەن؟› هۆسا بەرسڤا وی بدەن: ‹خودانی پێدڤی یا پێ هەی.›»
- 32
- ئەوێن هاتینە هنارتن چوون و وەكو خودانی گۆتیە وان دیت.
- 33
- دەمێ ئەوان جانەكەر ڤەدكر، خودانێن وی پرسیار ژ وان كر: «بۆچی هوین وی ڤەدكەن؟»
- 34
- ئینا وان گۆت: «خودانی پێدڤی یا پێ هەی.»
- 35
- پاشی بۆ عیسای ئینا و جلكێن خۆ دانانە سەر جانەكەری و عیسا لێ سیار كر.
- 36
- دەمێ ئەو ب رێ دچوو، خەلكی جلكێن خۆ ل سەر رێكێ رادئێخستن.
- 37
- دەمێ نێزیكی نشیڤیا چیایێ زەیتوونان بووی، هەمی جەماوەرێ شاگردان ژ بۆ هەمی ئەو حنێرێن وان دیتین، دەست پێ كر ب دلخۆشی و ب دەنگەكێ بلند پەسنا[b] خودێ كرن.
- 38
- دگۆتن:
«‹یێ بەرەكەتدارە ئەو پاشایێ ب ناڤێ خودانی دهێت!›[c]
ئاشتی ل ئەسمانی و مەزناهی ل بلنداهیان.» - 39
- لێ هندەك ژ فەریسیان ژ كۆمێ گۆت: «مامۆستا، ل شاگردێن خۆ بحەیتینە.»
- 40
- ئینا ئەوی بەرسڤا وان دا و گۆت: «ئەز دبێژمە هەوە: ئەگەر ئەڤێن هەنێ بێدەنگ ببن، بەر دێ گازی كەن.»
- عیسا بۆ ئورشەلیمێ دكەتە گری
- 41
- دەمێ نێزیك بووی و باژێڕ دیتی، بۆ كرە گری
- 42
- و گۆت: «خوزی تە د ڤێ رۆژێ دا زانیبا كا چ تشت بۆ ئاشتیا تەنە! لێ نوكە ئەو ژ بەر چاڤێن تە هاتنە ڤەشارتن.
- 43
- رۆژ دێ ب سەر تە دا هێن، دوژمنێن تە دێ ل دۆرێن تە چەپەری چێكەن و دێ تە دۆرپێچ كەن و دێ تە ژ هەمی رەخان ڤە ئاسێ كەن.
- 44
- دێ تە ب سەر زاڕۆكێن تە دا هەڕفینن و بەری ل سەر بەری ناهێلن، چنكو دەمێ خودێ سەرەدانا تە كری تۆ ب خۆ نەحەسیای.»
- عیسا پەرستگەهێ پاقژ دكەت
- 45
- چوو د حەوشا پەرستگەهێ دا و دەست ب دەرئێخستنا وان كر یێن فرۆتن دكر
- 46
- و گۆتە وان «یا هاتیە نڤیسین: ‹مالا من دێ مالا نڤێژێ بیت،[d] › لێ هەوە یا كریە ‹كونجا رێگران›[e] !»
- 47
- ئەوی هەر رۆژ ل پەرستگەهێ فێركرن دكر. سەرۆكێن كاهنان و مامۆستایێن دەستووری و ریهسپیێن مللەتی ژی بزاڤ دكر وی بكوژن.
- 48
- لێ وان رێكا خۆ نە ددیت، چنكو هەمی خەلك گرێدایی گۆتنێن وی بوو.
- a. 19:13
q دەهـ زێڕ: ب یونانی دبێژیت: ‹دەهـ مینا›. ل فەرهەنگۆكێ بنێڕە مینا*. - b. 19:37
q پەسن: مەدح و سەنا - c. 19:38 زەبوور 118:26
- d. 19:46 ئیشایا 56:7
- e. 19:46 یەرمیا 7:11
