عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- رابوونا عیسای
- 1
- ل رۆژا ئێكێ ژ حەفتیێ[a] ، ل گەل ئەلندێ، ئەو ژنك چوونە سەر گۆڕی و دەرمانكێن ژ بەری هنگی ئامادە كرین، ل گەل خۆ برن.
- 2
- وان دیت ئەو بەرێ د دەرێ گۆڕی دا یێ هاتیە گڕێلكرن.
- 3
- چوونە ژۆر و وان تەرمێ خودان عیسای نەدیت.
- 4
- دەمێ هێشتا ئەو ژ ڤێ چەندێ د مەندەهۆش، ژ نشكەكێ ڤە دوو زەڵام ب جلكێن تەیسۆك ل نك وان راوەستیان.
- 5
- ئەوان ژ ترسان دا خۆ بەردا ئەردی، ئینا وان زەڵامان گۆتە وان: «بۆچی هوین د ناڤ مریان دا ل یێ زیندی دگەڕیێن؟
- 6
- ئەو نە ل ڤێرێیە، یێ رابووی. بیننە بیرا خۆ دەمێ هێشتا ئەو ل جەلیلێ چ گۆتە هەوە:
- 7
- ‹دڤێت كوڕێ مرۆڤ رادەستی گونەهكاران بهێتە كرن و بهێتە خاچدان و ل رۆژا سێیێ راببیتەڤە.›»
- 8
- ئینا گۆتنا وی هاتە بیرا وان.
- 9
- ئەو ژ سەر گۆڕی ڤەگەڕیانەڤە و ئەڤە هەمی گەهاندە هەر یازدە شاگردان و هەمیێن دی.
- 10
- ئەوێن نوچە گەهاندیە هنارتیان، ئەڤە بوون: مەریەما مەجدەلی، یووەننا، مەریەما دایكا یەعقوبی و هندەكێن دی ئەوێن د گەل وان دا بوون.
- 11
- ل نك هنارتیان، هەروەكو ئەو ژ بەر دئاخڤن و باوەر ژ وان نەكر،
- 12
- لێ پەترۆس رابوو و غار دا سەر گۆڕی. وی خۆ چەماند و ب تنێ پارچەیێن كتانی دیتن، ئینا ئەو ژ وێرێ چوو، یێ حێبەتی بوو ژ وێ رویدانێ.
- د رێكا ئەمائۆس دا
- 13
- وەسا چێبوو دوو شاگرد هەر د وێ رۆژێ دا دچوونە گوندەكی دبێژنێ ئەمائۆس، ئەڤ گوندە نێزیكی یازدە كیلۆمەتران[b] ژ ئورشەلیمێ یێ دویر بوو.
- 14
- ئەو دەربارەی هەمی رویدانێن پەیدا بووین ل گەل ئێكودوو دئاخفتن.
- 15
- دەمێ ئەو دئاخفتن و دانوستاندن دكر، عیسا ب خۆ نێزیكی وان بوو و ل گەل وان ب رێ چوو،
- 16
- لێ چاڤێن وان ژ نیاسینا وی هاتنە گرتن.
- 17
- وی گۆتە وان: «هوین بڕێڤە، ل گەل ئێك، بەحسێ چ دكەن؟» ئینا ب رویەكێ خەمگین راوەستیان.
- 18
- ئێكی ژ وان ناڤێ وی كلیوپاس بوو، بەرسڤ دا و گۆتێ: «چەوا ژ بیانیێن ل ئورشەلیمێ، تە ب تنێ نەزانیە كا د ڤان رۆژان دا چ تشتی ل وێرێ رویدایە؟»
- 19
- ئینا گۆتە وان: «ما چ رویدایە؟» وان گۆت: «ئەم یێ بەحسێ رویدانێن دەربارەی عیسایێ ناسیرەیی دكەین، كو پێغەمبەرەك بوو، ل نك خودێ و هەمی مللەتی، د گۆتن و كریارێ دا، خودان هێز بوو
- 20
- و كا چەوا سەرۆكێن كاهنان و رێبەرێن مە، ئەو رادەستی سزایێ مرنێ كر و خاچدا.
- 21
- لێ هیڤیا مە ئەو بوو، كو ئەوە یێ ئیسرائیلێ رزگار بكەت. سەرەڕای ڤێ هەمیێ، ئەڤە رۆژا سێیێیە ژ رویدانا وان تشتان.
- 22
- د سەر ڤێ چەندێ را، هندەك ژنكان د ناڤ مە دا ئەم مەندەهۆش كرین. ئەو سپێدێ زوی ل سەر گۆڕی بوون
- 23
- و تەرمێ وی نەدیت، ئەو هاتن و گۆتن: ‹فریشتە بۆ مە دیار بوون، وان گۆتە مە كو عیسا یێ زیندیە.›
- 24
- هندەك ژ ئەوێن ل گەل مە، چوونە سەر گۆڕی و دیت وەسایە هەروەكو ژنان گۆتی، لێ وان ئەو ب خۆ نەدیت.»
- 25
- ئینا عیسای گۆتە وان: «هەی ئەوێن مەژی هشك، یێن كو باوەریا هەوە درەنگ ب هەمی گۆتنێن پێغەمبەران دهێت،
- 26
- ما نە یا پێدڤی بوو مەسیح ڤان ئازاران بكێشیت و پاشی بگەهیتە مەزناهیا خۆ؟»
- 27
- پاشی وی ژ مووسای دەست پێ كر و ژ هەمی پێغەمبەران، تشتێن دەربارەی خۆ د هەمی نڤیساران دا، بۆ وان شڕۆڤە كرن.
- 28
- دەمێ نێزیكی وی گوندی بووین یێ هەردوو شاگرد دچوونێ، عیسای وەسا ل خۆ دیار كر كو ئەو دێ دویرتر چیت.
- 29
- لێ ئەو مانە پێڤە و گۆتێ: «ل نك مە بمینە، چنكو ئێڤارە و رۆژ یا ئاڤا دبیت.» ئینا عیسا چوو ژۆر داكو ل گەل وان بمینیت.
- 30
- دەمێ ل گەل وان ل سەر سفرێ روینشتی، نان هەلگرت و سوپاسیا خودێ كر و كەر كر و دا وان.
- 31
- هنگی چاڤێن وان ڤەبوون و ئەو نیاسی، پاشی ژ بەر چاڤێن وان بەرزە بوو.
- 32
- ئینا گۆتە ئێكودوو: «ما نە دلێ مە د سینگێ مە دا گەرم دبوو، دەمێ د رێكێ دا ل گەل مە دئاخفت و بۆ مە نڤیسار روهن دكرن؟»
- 33
- پاشی هەر د وی دەمی دا رابوون و ڤەگەڕیانە ئورشەلیمێ، دیت هەر یازدە و ئەوێن د گەل وان دا یێن كۆمبووین
- 34
- و یێ دبێژن: «راستە، خودانێ رابووی و ئەو بۆ شەمعونی یێ دیار بووی!»
- 35
- هەردوویان ژی ئەو چەندا د رێكێ دا رویدای و كا چەوا د نان كەركرنێ دا، وان ئەو نیاسی، گەهاندە وان.
- عیسا بۆ شاگردان دیار دبیت
- 36
- هێشتا ئەو هەردوو دئاخفتن، عیسا ب خۆ د ناڤ وان دا راوەستیا و گۆتێ: «ئاشتی بۆ هەوە بیت!»
- 37
- ئەو بزدیان و ترسیان و هزركر وان گیانەك دیت.
- 38
- ئینا وی گۆتە وان: «بۆچی هوین تێكچوون؟ بۆچی گۆمان دكەڤیتە د دلێ هەوە دا؟
- 39
- بەرێ خۆ بدەنە دەست و پێیێن من، ئەڤە ئەز ب خۆمە. دەست بكەنە من و ببینن، چنكو گیانی گۆشت و هەستی نینن، وەكو هوین دبینن من یێن هەین.»
- 40
- پشتی ئەو چەند گۆتی، دەست و پێیێن خۆ نیشا وان دان.
- 41
- هێشتا ئەو ژ خۆشیان دا نەدشیان باوەر بكەن و د حێبەتی بوون، عیسای گۆتە وان: «هەوە تشتەكێ خوارنێ ل ڤێرێ هەیە؟»
- 42
- ئینا وان پارچەیەكا ماسیا براژتی دایێ.
- 43
- وی ژ وان وەرگرت و ل بەر چاڤێن وان خوار.
- 44
- پاشی گۆتە وان: «ئەڤە ئەو گۆتنە یا كو هێشتا ئەز د ناڤ هەوە دا من گۆتیە هەوە، كو دڤێت چ تشتێ دەربارەی من د دەستوورێ مووسای و پەرتووكێن پێغەمبەران و زەبوورێ دا هاتیە نڤیسین، ب جهـ بهێت.»
- 45
- وی دەمی زێهنێ وان ڤەكر، دا د نڤیساران بگەهن
- 46
- و گۆتە وان: «هۆسا یا هاتیە نڤیسین، كو دڤیا مەسیح ئازارێ بكێشیت و ل رۆژا سێیێ ژ ناڤ مریان راببیت
- 47
- و ب ناڤێ وی مزگینیا لخۆزڤڕینێ بۆ لێبورینا گونەهان بهێتە دان، هەر ژ ئورشەلیمێ بگرە تا هەمی مللەتان.
- 48
- هوین بۆ ڤان تشتان شاهدن.
- 49
- ئەڤە ئەز دێ سۆزا بابێ خۆ بۆ هەوە هنێرم. ل باژێڕی[c] بمینن تاكو هوین ژ بلنداهیێ ب هێزێ دهێنە راپێچان.»
- بلندبوونا عیسایێ مەسیح بۆ ئەسمانی
- 50
- پاشی هەتا بێت‌عەنیا برن و وی دەستێن خۆ بلندكرن و ئەو بەرەكەتدار كرن.
- 51
- دەمێ وی ئەو بەرەكەتدار دكرن، ئەو هێلان و بۆ ئەسمانی هاتە بلند كرن.
- 52
- ئەوان ژی سوجدە بۆ بر و ب دلشادیەكا مەزن ڤەگەڕیانە ئورشەلیمێ
- 53
- و بەردەوام ل پەرستگەهێ بوون و پەسنا[d] خودێ دكر.
- a. 24:1 ئانكو ئێكشەمبێ. ل فەرهەنگۆكێ بنێڕە رۆژا شەمبی*.
- b. 24:13 دەقێ رەسەن دبێژیت: شێست ‹ستادی›یان.
- c. 24:49 مەبەست پێ ئورشەلیمە.
- d. 24:53
q پەسن: مەدح و سەنا
